1 Nenak, mɛ lii wak ɛ́ nɛ bɛpaa di pak’en ɛ. Mam pe ɛ́ ngɔt tɔ bɛpaa dáa biyɔ. Tin, mɛ nabɛ ɛ́ tyaasɛs mezuk ɛ Klisto. Mɛ goka ɛ́ nɛ ɛnɔɔ yam di tɔ duma di ezyɛ yenek. 2 Baalka ɛsaa ɛ Zɛɛb zedjɛ bin ɛ, dáa bɛmbaalel ɛ mɛsaa. Sa bi ààsa yɛ nɛ bhel, bi goka ɛ́ nɛ sa yɛ ɛ́ nɛ lyem wat dáa Zɛɛb di ekwyɛl ɛ. É di’enek, sa bi ɛ́ ààsa yɛ kɔ mɛsɔ mɛ epata, bi sa yɛ ɛ́ nɛ kwyɛl djas. 3 Nàdjɛɛdka bot ɛ Zɛɛb nadjɛ bin bak ɔ, djɛɛda bhel. Tin, bi goka ɛ́ nɛ ɛdi ɛ́ bɛmbɛɛ bɛdjɛɛdel ɛ ɛsaa di egoka nɛ ɛdu mɛfulu mɔɔ ɛ. 4 Deenek, é sok nakuma bɛmbaalel aazyɛ ɛ, sa bi aabela tyee efute na kɔm-kɔm ɛ, yɛ ɛ́ kɔtɔ duu.

5 Tin, biyɔ mengbaaz, loobaka nɛ bɛpaa, dika nɛ mɛsila pak’en. Ekwyala na Dɛɛ lɛɛ ɛ́ náá: «Zɛɛb ààkwyɛl bot ɛ ɛghɛɛ nyel, nyɛ sa enɛm bɛ ɛ́ nɛ bot ɛ di ààghɛɛ nyel ɔ✝.» 6 Dika nɛ mɛsila si mbɔ mɛbwala mɛ Zɛɛb, étɛp nyɛ neeben bin, é sok ɛwala tak aakum ɛ. 7 Djɛka etɛp bin djas tɔ mɛmbɔ ɛ Zɛɛb, etɛɛ náá, nyɛ waadjɛ bin sa bi di nɛ gwyes tak ɛ.

8 Dika ndjem, bi ɛ́ kobaka, etɛɛ náá, mot mɛbhuka men, dim mot mɛkɔŋ ɛpebɔŋal bin dáa ghee mɛnyan, étɛp nyɛ needɛ bin. 9 Deenek, dika tɔ epiki, tɔ ɛdum ɛ koŋ ɛ len nɛ Zɛɛb, pyetka sok bhwoob dim mot mɛkɔŋ. Tin, ye goka ɛ́ bi gu náá, kɔ ɛko ɛ bɔs’ak djas, bɔn-nyɛɛg bin ɛpezuk dáa biyɔ. 10 Tin, mezuk men ɛ́, yii ba mɔɔ ɛwala batsa. Deenek, Zɛɛb mot di nɛ enɛm nɛ embɛɛ ɔ, nyɛy mot naadjóo bin étɛp bi neebe di tɔ duma yɛ na kɔm-kɔm sama wat nɛ Yezu Klisto ɔ, nyɛ waanɛɛg bin bɛsosoob, nɛ ghwyil ɛpyet. Tin, mot aanàkwaakabaakwyesal bin tɔ mɛbhowal. 11 Tin, mɛbwala na kɔm-kɔm nɛ nɛ! Amɛn.

12 Yɛ ɛ́ Silas ɛ kwyee mɛ, é ɛkwyal bin ba mɔɔ pes mɛkana mak. Mɛ bee ɛ́ náá, Silas mɔn-nyaagam ɛ́ mot esosoob. Mɛ kwyal mɛkana ɛ́ étɛp ɛdjɛ bin mɛghaaz nɛ ɛlɛɛ bin náá: Beeka tɛtɛ ɛkɛɛ ɛ Zɛɛb é, mɛtka ɛkɛɛ ɛ tak nɛ lyem wat! 13 Deenek, bot ɛ zɛɛga mendjaala di pɛ ghaada Bhabhilɔn nazesɛ́ɛa daa biyɔ ɔ, bɛ eeswos bin. Tin, Mɔn’am Malak eebaaswos bin. 14 Swoselka pak’en nɛ mɛbeedala mɛ kwyɛl bɔn-nyɛɛg.

Beta náá, egwyem di nɛ nen, bot djas zedum koŋ nɛ Klisto ɔ!