1 Yɛ ɛ́ mam Simɔŋ Pyɛɛd, mot-mɛsa nɛ mot-lwoma ɛ Yezu Klisto. Mɛ kwyal mɛkana mak ɛ́ nɛ bot ɛ di edum koŋ nɛ Zɛɛb dáa bisɔ ɔ. Yezu Klisto, mot di Zɛɛb'enaka nɛ Mɛtsik-bot'enaka ɔ, nyɛy ɛ nadjɛ mena ɛdum ɛ koŋ ɛlenek, etɛɛ náá, nyɛ ɛ́ piki mot.

2 Beta náá, enɛm nɛ embɛɛ nɛ egwyem di nɛ nen etɛɛ náá, bi nɛ gu Zɛɛb nɛ Yezu Klisto Ghɛŋ'enaka!

3 Nɛ mɛbwala mɛ, Ghɛŋ naadjɛ mena esa djas mena nadi nɛ gwyes tak ɛ, étɛp mena neekɛka ɛnyɔɛpe tɔ ɛgwakel nɛ Zɛɛb. Tin, nɛ ghwyil'ɛ met, nyɛ eetel mena mot nadjóo mena étɛp ɛdi tɔ duma yɛ nɛ tɔ mbɛɛ mɛsa mɛ ɔ. 4 Tɔ duma yenek, nɛ tɔ mɛbwala menek, Zɛɛb naakɛk mena eboo etɛtɛ ekɛk. Deenek, ɛbela bi aabela ekɛk binek ɛ, yɛ waasa náá, embee mɛkwosak mɛ bɔs'ak di eleeg bot ɛ, dus tɔ len. Tin bi aakadi ɛ́ tɔ ɛgwakel nɛ Zɛɛb.

5 Étɛp tak, saka mɛghaaz, kɛlka tsik epiki kɔ ɛdum ɛ koŋ ɛ len nɛ Zɛɛb. Deenek, bhis ɛkɛ tɔ tsik epiki, ye goka ɛ́ nɛ ɛbaadi nɛ tɛtɛ ɛgu ɛ ɛkwosak ɛ Zɛɛb. 6 Kɔ ɛgu ɛ ɛkwosak ɛ Zɛɛb, tin bi ɛ́ baagu ɛdil ɛ mɛnyel men. Bhis ɛdil ɛ mɛnyel men, bi ɛ́ baadi nɛ zii. Kɔ zii, bi ɛ́ baadi tɔ ɛgwakel nɛ Zɛɛb. 7 Tin, tɔ ɛgwakel nɛ Zɛɛb, dika nɛ tɛtɛ ɛgwakel nɛ bɔn-nyɛɛg bin tɔ zɛɛga mendjaala. Bhis ɛdi nɛ tɛtɛ ɛgwakel pak'en, dika tɔ kwyɛl. 8 Yɛ bɛ náá, bi ɛ́ nɛ embɛɛ mɛfulu menek, da bi ɛ́ di esesa yɛ ɔɔ, ye waadjedjɛ etɛtɛ ebhum tɔ len, deenek ɛ, bi aakatɔ́ sok tɔ ɛgu ɛ Ghɛŋ'enaka Yezu Klisto. 9 Mot ɛ di ààbɛ nɛ embɛɛ mɛfulu menek ɔɔ, nyɛ ɛ́ dáa mot edhim, nyɛ ɛ́ nɛ mis mendiila. Mbi yenɔk mot eedjisa náá, Zɛɛb naazedis edhuud e mesyem mɛ na mwa.

10 Bɔn-nyɛɛg, dum nɛ tɛp tak, saka mɛghaaz mɛ ɛlyaal náá, yɛ ɛ́ Zɛɛb ɛ nadjóo bin nɛ ɛtɔ bin. Tin, bi ɛ di esa deenek ɔɔ, bi aanàkabaabema ɛbɛk. 11 Deenek, Zɛɛb ɛ́ waabɛɛ bin ze ɛni ɛ́ tɔ Ɛyoŋ ɛ na kɔm-kɔm ɛ Mɛtsik-bot'enaka Yezu Klisto, Ghɛŋ'enaka.

12 Étɛp tak ɛ, mɛ aagheetetaala bin etɛp binek. Mɛ nɛ gu náá, bi nɛ gu yɛ ɛnyɔɛpe. Ɛkwosak ɛ lam ɛ́ náá, bi pyet ɛlyelɛpe tɔ esosoob nɛ etsɛɛtsɛ ee bi nagwak ɛ. 13 Mɛ bee ɛ́ náá, dáa mɛ dinaa nɛ tsik ɛ, mɛ goka ɛ́ nɛ ɛgheetetaala bin etɛp binek étɛp bi needi ndjem. 14 Tin, mɛ nɛ gu náá, dwoo ɛsyee ɛ lam moo ekunaa, dáa Ghɛŋ'enaka Yezu Klisto naazetel mɛ ɛ. 15 Deenek, mɛ waasa náá, ye nakoozodi bhis ɛsyee ɛ lam, bi gheetetaala nɛ etɛp bak.

16 É ghɛŋ bis nalɛɛ bin etɛp dum nɛ ɛzyɛ ɛ́ Ghɛŋ'es Yezu Klisto tɔ boo mɛbwala mɛ ɛ, ye nabɛ ɛ́ ààbɛ kɔ esa e esua-esua. Tin, yɛ ɛ́ etɛɛ náá, bis ɛ́ bɛtyaasɛs nabee mɛkas mɛ ɔ. 17 Deenek, nyɛ naabela duu nɛ duma Zɛɛb Sɛɛg. É ɛwala ɛlenek, gwood ɛ Zɛɛb nagék tɔ boo mɛkas ɛ́ náá: «Mot'ak ɛ́ Mɔn'am mɛ di ekwyɛl ɔ, yɛ ɛ́ nyɛy ɛ mɛ natɔ nɛ mɛmyaala djas✝.» 18 Bisɔ bɛmet naagwak gwood dáa ye nagék pɛ tɔ gwoo é sok bis nadi sama wat nɛ nɛ pɛ kɔ ɛtsok ɛ na dɛɛ ɛ.

19 Tin, bis nɛ wa lyem tɔ mɛkpa mɛ bɛngoolel ɛ Mɛkpa ɛ Zɛɛb. Dɔɔ nɛ biyɔ pe, bi baagoka ɛ́ nɛ ɛkobaka nɛ yɛ: yɛ ɛ́ tyee wat nɛ lama di egoo tɔ ghooghom kɛkum ɛwala ɛ mɛlem di elem, da mɛkas mɛ dwoo ɛ́ djɛ gwyɛ tɔ elyem bin ɛ. 20 Tin, bi goka ɛ́ nɛ gu náá, mot tok nɛ ghwyil ɛgoola Mɛkpa ɛ Zɛɛb dáa lyem'ɛ kwyɛl ɛ. 21 Ye tok nɛ sa bɛngoolel ɛ Mɛkpa ɛ Zɛɛb nalɛɛ náá, yɛ aasael, di edus nɛ ɛkwosak bɔɔ bɛmet ɛ. Yɛ ɛ́ Sisim na Dɛɛ ɛ nadi edjɛ bɛ ghwyil ɛlii etɛp binek.