1 Bɛwɛn bam, yak ɛ́ mɛkana mam yii bhɔɔba mɛ di ekwyal bin ɛ. Tɔ bɛmɛkana menek djas ebá, mɛ nadi ekwyɛl ɛsa náá, esisim bin di nɛ esiiza na dɛɛ dum etɛp djas mɛ di elyo bin ɛ. 2 É di'enek, mɛ kwyɛl ɛ́ náá, bi tetaala mɛkpa mɛ bɛngoolel ɛ Mɛkpa ɛ Zɛɛb na dɛɛ nagoola ɛ. Da, bi ɛ́ baataala mɛtiŋ mɛ Ghɛŋ Mɛtsik-bot nadjɛ bot ɛ lwoma náá, bɛ lyo bin ɛ.

3 Bi goka ɛ́ nɛ ɛgu sok náá, é mɛlu mɛ mɛsik mɛ bɔs, yɛ aadi ɛ́ nɛ bot ɛ di esuu mɛso, bot ɛ ebeme di esa mɛkwosak mɛ elyem bɔɔ ɛ. 4 Bɛ waadi eke náá: «Nyɛ naakɛk ɛbula, etsal é? Haaa nenak nyɛ ɛ́ paa? Etɛɛ náá, bɛbhaab bis eezegwyɛ, etɛp djas ààpaswoola kana mɛkɛn mɛ bhwak.» 5 Tin, é sok bɛ di eke deenek ɛ́, bɛ ɛpedjisa sa wat náá: é ghɛŋ sok, Zɛɛb nakus gwoo nɛ bɔs ɛ́ nɛ mɛkpa mɛ. Deenek, nyɛ naazɛbɛk bɔs nɛ mɛdii, bɔs nakusaa ɛ́ nɛ mɛdii. 6 Yɛ ɛ́ tyee wat nɛ mɛdii, mɛdii mɛ boo bhyoŋ ɛ nadesal bɔs, yii nagó bot ɛ na mwa. 7 Yɛ kabɛ gwoo nɛ bɔs yii bot dika mos'aak ɔɔ, Mɛkpa ɛ Zɛɛb naazelɛɛ nɛ nes náá, yɛ aagóaa ɛ́ nɛ du. É di'enek, du tak ɛ́ nɛɛga étɛp dwoo epɛ́ɛ, bot ɛ mesyem ɛ́ waagóaa tɔ tak.

8 Bɛwɛn bam, yɛ ɛ́ nɛ sa wat di náá, sa bi ààdjisa ɛ. Guka náá:

«Pɛ daa Ghɛŋ ɛlu wat ɛ́ dhatyee membu mil,

membu mil ɛ́ dhatyee ɛlu wat pɛ daa lɛ✝.»

9 Deenek, Ghɛŋ aanàbaabɔya nɛ ɛsa sa nyɛ nakɛk ɛ, dáa bɛdhiiti bot di ebee náá, ye ɛpebɔya ɛ. Deenek, nyɛ ɛpemaad lyem kɔ ɛsu ɛ len, etɛɛ náá, nyɛ ààpakwyɛl náá, bɛdhiiti bot gwyɛ tɔ mesyem. Tin, nyɛ kwyɛl ɛ́ náá, bot djas bela ze ɛswoola mɛfulu mɔɔ, da bɛ ɛ́ bula pɛ daa Zɛɛb. 10 Deenek, dwoo ɛlu ɛ Ghɛŋ aazyɛ ɛ, yɛ aadi ɛ́ zaka, dáa mot djii di ezyɛ zɛdjii ɛ. Dwoo lɛɛg, bhwak djas ɛ́ waadiib nɛ esa bɛ djas, bot ɛ́ waagwak boo ndum é ghɛŋ esonok binek djas aadyak ɛ. Tin, bɔs nɛ esa bɛ djas ɛ́ waadhaa é ɛpɛ́ɛ.

11 Dáa ye di náá, esonok djas ɛ́ waadiib ɛ, guka ɛnyɔɛpe sa bot di egoka nɛ ɛsa ɛ. Ye nyɔ ɛ́ náá, mɛfulu mena di embɛɛ mɛfulu mɛ edɛɛ. Mɛfulu tak, goka ɛ́ nɛ ɛlyaal ɛ́, ɛgwakel ɛ lena nɛ Zɛɛb. 12 Tɔ ɛgwaal ɛ ɛlu ɛ Zɛɛb, saka mɛghaaz, etɛɛ náá, nyɛ neeleebula. Dwoo lɛɛg, gwoo ɛ́ waadyak tɔ du, esa djas di tɔ gwoo ɛ, ye waadjin tɔ ngel du. 13 Tin, sa mena di egwaalka ɛ, yɛ ɛ́ ekɛk e gwoo na bes, nɛ bɔs na bes yii Zɛɛb nakɛk mena pɛ kyee bot ɛ di ekɛ tɔ epiki aakɛdi ɔ.

14 Bɛwɛn bam, tɔ ɛgwaal ɛ ɛlu ɛlenek, saka mɛghaaz mɛ ɛdi dɛɛ, etɛɛ náá, bi needi ààbɛ nɛ mbee ɛtɔn é mis ɛ Zɛɛb, étɛp ɛdi tɔ ɛgwakel nɛ nɛ. 15 Guka náá, lyem bhwood Ghɛŋ'enaka ɛpedjɛ mena ze tsik. Tin, Pɔl mɔn-nyɛɛg'ena mena di ekwyɛl ɔ nakwyal bin mɛkana ɛ́, nɛ etsoŋ djas Zɛɛb nadjɛ nyɛy ɛ. 16 Nyɛ nazolɛɛ ɛ́ sa wat tɔ bɛmɛkana mɛ djas nyɛ di elii tɛp'ak ɛ. Tin, yɛ ɛ́ nɛ mɛlaŋel di náá, bot àànyɔ ɛtiibal ɛ. Bot ɛ di ààgu sonok, ààtɔ́ mɛdjek ɔ, bɛ nɛ dyeebakwyɛl ɛswoola mɛsuk mɛ tak. Deenek, bɛ ɛ́ nɛ mɛfulu mɛ ɛsa yɛ nɛ edhiiti Ekwyala na dɛɛ. Tin, bɛ saab ɛ́ mɛnyel mɔɔ.

17 Bɛwɛn bam, yɛ kabɛ biyɔ ɔɔ, nenak, bi eezedulaa mɛlɔ. Dika ndjem, sa bi ààwo ze kɔ ɛsu ɛ ɛdjak ɛ bot ɛ di ààkaab etɛp e Zɛɛb ɔ. Tin, sa bi ààpul ɛpyet ɛ ɛdum ɛ koŋ ɛ len nɛ Zɛɛb. 18 Bi goka ɛ́ nɛ ɛtɔ́ sok tɔ enɛm nɛ embɛɛ, nɛ ɛgu ɛ Ghɛŋ'enaka Yezu Klisto, Mɛtsik-bot'enaka.

Beta náá, duu di nɛ nɛ, kana nenak kɛtɔ́ kɔm-kɔm sii nɛ kɔm! Amɛn.