1 É ghɛŋ na mwa, ye nadi ɛ́ nɛ bɛngoolel ɛ Mɛkpa ɛ Zɛɛb yii mɛkɔŋ pɛ tɔ ɛdhuu ɛ bot ɛ Yisalaɛl. Yɛ aabaadi ɛ́ nɛ bɛmbee bɛlyoel tɔ len. Bɛ waalyo bin mɛlyo mɛ esua-esua, étɛp bi neewo ze. Tin, bɛ waaswonal tɛtɛ lyoel, mot natsik bɛ ɔ. Bɛ waadul mbee baka kɔ lɔɔ zaka. 2 Deenek, bɛtɛ nɛ bot ɛ́ waadu embee mɛfulu mɛ mɛzɔ mɔɔ. Tin, kɔ ɛsu ɛ lɔɔ, mbula bot ɛ́ waadhusal ze etsɛɛtsɛ. 3 Dum nɛ dɔɔb mɛvu, bɛ waasa náá, bɛ wyisal bin epata nɛ embee mɛlyo mɛ esua-esua. Deenek, ye nabɛ ɛ́, Zɛɛb naaloozewa bɛ é feŋ, tin, ye kalik ɛ́ batsa bɛ bee mezuk mɔɔ.

4 Tin, Zɛɛb nabɛ ɛ́ ààpel efofop nasyem ɔ, nyɛ naamwas bɛ tɔ guk na dim-dim di ààbɛ nɛ ɛsik ɛ, pɛ kyee bɛ di kɔɔla nɛ ekel e eghwooz tɔ ghooghom, ebwood epɛ́ɛ bɔɔ ɛ. 5 Tyee wat, Zɛɛb nabɛ ɛ́ ààpel bot ɛ na mwa, é sok nyɛ nadesal bɔs nɛ boo bhyoŋ ɛ. É ghɛŋ tak, bɔs nabɛ ɛ́ tɔɔɔ nɛ bot ɛ di esa etɛp ee Zɛɛb di ààkwyɛl ɔ. Tin, nyɛ nazotsik ɛ́ Noe, mot nadi egoola mɛkpa mɛ epiki ɔ, zɛnɔɔ bɛdhiiti bot bɛtɛn nɛ bɛbá. 6 Zɛɛb naakwyesal eghaada Sodɔm nɛ Ghomɔɔd ndjɛ sɔs. Deenek, nyɛ nasaab yɛ ɛ́ nɛ du. Tin, yɛ ɛ́ dhatyee nyɛ aasa nɛ bot ɛ mesyem ɛ. 7 Tin, Zɛɛb naapɛk Lɔt mot epiki, mot nadi ekpaa lyem kɔ ɛsu ɛ embee mɛfulu mɛ mɛzɔ mɛ bot ɛ eghaada binek di esa ɛ. 8 Yɛ kabɛ Lɔt mot epiki yenɔk ɔɔ, nyɛ nadidi ɛ́ pak bot ɛ nadi nɛ mbee tsik ɔ, tin, nyɛ nadi ebee nɛ ɛgwak ɛ bɛ mɛlu nɛ mɛlu. É di'enek, lyem epiki bɛ nadi ezuk é ɛbee embee mɛfulu menek. 9 Deenek, ye kwyɛl ɛlyaal ɛ́ náá, Ghɛŋ ɛ́ nɛ ghwyil ɛpɛk bot ɛ di sosoob nɛ nɛ tɔ mezuk ɔ. Tin, nyɛ aanɛɛg bot ɛ mbee tsik étɛp ɛwa bɛ é feŋ dwoo epɛ́ɛ. 10 Tin, nyɛ waawa bot djas di nɛ gwyes ɛdi tɔ edhuud ɔ é feŋ, bot ɛ di ekɛ tɔ gwyes epuud, da bɛ ɛ́ byen eghɛŋ e Zɛɛb ɔ.

Bɛmbee bɛlyoel binɔk, bɛ ɛ́ nɛ ɛbet, bɛ nɛ ghɛɛa mɛnyel, bɛ tok nɛ bwoo ɛnyek ɛ esisim duma di tɔ gwoo ɛ. 11 Bela náá, efofop tok nɛ ghwyil ɛkolee-leeak esisim e tak é mis ɛ Ghɛŋ. Dhi bot di egu náá, bɛ eedhaa bɛlyoel binɔk nɛ ghwyil nɛ mɛbwala. 12 Tin, bot binɔk ɛ́ dáa bɛtit, ààbɛ nɛ etsoŋ. Bɛ nabyel ɛ́ étɛp bɛ neebel é elaab, bhii tak, da bɛ ɛ́ góaa. Mɛsa mɔɔ ɛ́, ɛlee sa bɛ di ààgu ɛ, bɛ aagwyɛ ɛ́ dáa bɛtit. 13 Mbee mɛsa mɛ bɛ nasa nɛ bɛsɔ bɔɔ ɛ, yɛ aadi ɛ́ bulelaa bɛ. Bɛ kwyɛl ɛ́ ɛmyaala tɔ embee etɛp é mwos dwoo. É ghɛŋ bi di ebɔl mɛbyoŋ bi nɛ bɛnɔɔ ɛ, yɔbɔ mɛsa kɔ mɛbyoŋ ɛ́, ɛkɔɔ bin étɛp bɛ neegheesesa etɛp e sen elyem bɔɔ di ekwyɛl ɛ. 14 Mis mɔɔ ɛ́ mis mɛ mɛzɔ, bɛ ààdjil tɔ syem. Mɛsa mɔɔ ɛ́, ɛkɔp bot ɛ di etyak mis ɔ. Bɛ ɛ́ bɛ na ghaa dɔɔb mɛvu. Tin, mbee baka Zɛɛb ɛ́ kɔ lɔɔ. 15 Bhii bɛ nadus kɔ tɛtɛ ze ɛ, bɛ eezewo ze. Bɛ kadu ɛ́ ze ɛ Bhalaam mɔn ɛ Bhozɔɔd, mot nadyeebakwyɛl epata ee bɛ nadi edjɛ nyɛ, étɛp nyɛ neesa sa ɛbiyo ɔ. 16 Tin, Zɛɛb nabiyo nɛ nɛ kɔ ɛsu ɛ ɛdjak ɛ lɛ. Wɔ gwaa, mɔɔ yaaga di edjóoaa an ɛ moo tin elii dáa mot, nyɛ eelu ewo ee Bhalaam nadi esa ɛ✝.

17 Bɛmbee bɛlyoel binɔk ɛ́ dáa esɔɔgɔ di ààbɛ nɛ mɛdii ɛ, dáa eguud di ewaazel nɛ pup tɔ gwoo ɛ. Zɛɛb naazekoobal bɛ di pɛ kyee bɛ aabookɛdi tɔ mbee mɛghomela ɛ. 18 Tin, mɛlyo mɔɔ ɛ́ ɛgwyaŋɛpe, ye bu ɛ́ boo mɛnyeka. Bɛ ɛpebatakɔp bot tɔ tsik epuud, nɛ tɔ mɛzɔ mɔɔ, bot ɛ di náá, bɛ aaloo nɛ dus tɔ bot ɛ mbee tsik ɔ. 19 É di'enek, bɛ kɛk bɛ ɛ́ mɛpɛka, ghuna bɔɔ bɛmet ɛ́ tɔ ekwom e bhel embee mɛfulu mɔɔ. Etɛɛ náá, mot nɛ mot ɛ́ kwom sa di edhaa nyɛ nɛ ghwyil ɛ. 20 Deenek, bot ɛ zegu Ghɛŋ Yezu Klisto Mɛtsik-bot yenaka ɔ, bɛ eezebet embee mɛfulu mɛ bɔs. Tin, bɛ baabet náá, bɛ baaduma tɔ etɛp binek ɔɔ, é di'enek, ekwom bɔɔ aadhaa yii sok. 21 Ye nabɛ ɛ́ ààgoka náá, bɛ gu ze epiki. Ààbɛ náá, bɛ gu, da bhii tak, bɛ ɛ́ zɛliig koŋ nɛ mɛtiŋ mɛ na dɛɛ nagoolaaa bɛ ɛ. 22 Tin, sa di esa bɛ mos ɛ, yɛ ɛ́ sa nadi kwyala tɔ ekana ɛ:

«Bhyɛ ɛpebaadɛ sa nyɛ gó ɛ✝,

ghwyee zegwyiiaa ɔ,

nyɛ eebaabula tɔ bhɔtɔ.»