1 Esa ee nadi é mɛkɛn tɔɔɔ ɛ, mena naazegwak yɛ, mena naabee yɛ nɛ mis, mena naabee nɛ ɛmɛt yɛ nɛ mɛmbɔ menaka. Ye nabɛ ɛ́ mɛkpa mɛ di esa náá, mot di nɛ tsik ɛ. 2 Zɛɛb naalyaal bot náá, mot tak ɛ́ mot di edjɛ tsik ɔ, bis naabee nyɛ. Bis ɛ́ bɛtyaasɛs etɛp bɛ, étɛp tak ɛ bis di egoola bin tsik na kɔm-kɔm nadi tɔ Zɛɛb Sɛɛg ɛ. Yɛ ɛ́ nyɛy Zɛɛb ɛ natel bis yɛ ɛ. 3 Sa bis nabee nɛ ɛgwak ɛ, bis ɛpegoola bin yɛ ɛ́, etɛɛ náá, bi needi sama nɛ nes tɔ ɛgwakel ɛ bis di nɛ yɛ nɛ Zɛɛb Sɛɛg dɔɔ nɛ Mɔn'ɛ Yezu Klisto ɛ. 4 É di'enek, bis kwyal etɛp bak ɛ etɛɛ náá, mɛmyaala mes needjala.

5 Bhaadal bis nagwak nɛ Yezu Klisto, da bis ɛ́ goola bin ɛ, yɛ ɛ́ náá, Zɛɛb ɛ́ mɛkas, ye tok nɛ ghooghom tɔ lɛ. 6 Mena keka náá, menaka ɛ́ nɛ ɛgwakel nɛ Zɛɛb da mena ɛ́ baadi ekekɛka tɔ ghooghom ɔɔ tin, menaka ɛ́ bot ɛ etsal, etsɛɛtsɛ tok tɔ lena. 7 Zɛɛb ɛ́ mɛkas. Tin, menabɛlka djas ɛ di ekɛ tɔ gwyɛ ngel dáa Zɛɛb nyɛy nyɛ ɛmet di ekɛ ɔɔ, menaka ɛ́ tɔ ɛgwakel pak'enaka. É di'enek, ghiya ɛ Yezu, Mɔn'ɛ waadis mena edhuud e mesyem djas.

8 Mena keka náá, mena tokeka nɛ mesyem ɔɔ, mena eekɔɔka mɛnyel mena met. Tin, etsɛɛtsɛ tok tɔ lena. 9 É di'enek, mena vaa mesyem mena pɛ daa Zɛɛb ɔɔ, mena ɛ́ nɛ ghwyil ɛdi nɛ ɛbwaalel etɛɛ náá, nyɛ ɛ́ mot epiki nɛ esosoob. Nyɛ waapel mesyem mena, nɛ ɛdis mena edhuud embee etɛp djas. 10 Mena keka náá, mena tok nɛ esyem ɔɔ, guka náá, mena eesaka náá, Zɛɛb di mot etsal. Tin, mɛkpa mɛ tok tɔ lena.