1 Bɔn bam, mɛ kwyal bin etɛp bak ɛ́ ekaab náá, bi ɛ́ zɛkɛsyem. Tin, mot ɛ syem ɔɔ, menaka ɛ́ nɛ Mot-Mɛghɛm é ngwoob Zɛɛb Sɛɛg'ena: yɛ ɛ́ Yezu Klisto mot epiki. 2 Nyɛy ɛ naka nyel'ɛ buwa étɛp ɛpelak ɛ mesyem mena. Ye tok étɛp mesyem nɛ mesyem mena met, yɛ ɛ́ dɔɔ nɛ mesyem mɛ bot ɛ bɔs djas.

3 Mena di eduwalka mɛtiŋ mɛ Zɛɛb ɔɔ, mena ɛ nɛ ghwyil dika nɛ ɛbwaalel náá, mena nɛ guka Zɛɛb. 4 Mot ɛ ke náá: «Mɛ nɛ gu Zɛɛb» da nyɛ ɛ́ kadi ɛ́ ààduwal mɛtiŋ mɛ ɔɔ, nyɛ ɛ́ mot etsal, etsɛɛtsɛ tok tɔ lɛ. 5 Yɛ kabɛ náá, mot ɛpeduwal Mɛkpa ɛ Zɛɛb ɔɔ, yenɔk tak nɛ kwyɛl Zɛɛb nɛ tsɛɛtsɛ. Yɛ ɛ́ deenek ɛ mena aaguka náá, menaka ɛ́ sama wat nɛ Zɛɛb. 6 Mot ɛ di eke náá, nyɛ ɛ́ tɔ ɛgwakel nɛ Zɛɛb ɔɔ, nyɛ goka ɛ́ nɛ ɛkɛ dáa Yezu.

7 Bɔn-nyɛɛg bam mɛ di ekwyɛl ɔ, ɛtiŋ ɛ mɛ di ekwyal bin wak'aak tok ɛtsiŋ ɛ na bes, yɛ ɛ́ ɛtsiŋ ɛ na mwa, bi nazegwak é mɛkɛn tɔɔɔ ɛ. Ɛtsiŋ ɛ na mwa tak ɛ́ mɛkpa mɛ bi nazegwak ɛ. 8 Bela náá, yii mɛ kabaadi ekwyal bin kwyala sis'aak ɛ́ ɛtiŋ na bes. Etsɛɛtsɛ e tak nyen ɛ́ tɔ tsik ɛ Klisto, dɔɔ nɛ tɔ tsik'en, etɛɛ náá, ghooghom ɛpetɔ́ nɛ ɛsi, tɛtɛ gwyɛ ngel moo kan ɛnyen.

9 Deenek, mot di eke náá, nyɛ ɛ́ tɔ gwyɛ ngel, da nyɛ ɛ́ kadi ɛ́ ebhina mɔn-nyɛɛg'ɔɔ, nyɛ dinaa ɛ́ tɔ ghooghom. 10 Mot ɛ di ekwyɛl mɔn-nyɛɛg ɔɔ, nyɛ ɛ́ tɔ gwyɛ ngel, ye tok nɛ dhiiti sonok aadul nyɛ tɔ esyem. 11 Tin, mot ɛ́ di ebhina mɔn-nyɛɛg'ɔɔ, nyɛ ɛ́ tɔ ghooghom, É di'enek, nyɛ ɛpekɛ tɔ ghooghom, ààgu pɛ kyee nyɛ di etɔ́ ɛ, etɛɛ náá, ghooghom eezenɛɛg nyɛ dáa mot edhim.

12 Bɔn bam, mɛ kwyal bin mɛkana mak ɛ́ etɛɛ náá,

mesyem men eezepelaa kɔ ɛsu ɛ din ɛ Yezu Klisto.

13 Biyɔ bɛpaa, mɛ kwyal bin mɛkana mak ɛ́ etɛɛ náá,

bi nɛ gu mot nadi é mɛkɛn tɔɔɔ ɛ.

Mengbaaz, mɛ kwyal bin mɛkana mak ɛ́ etɛɛ náá,

bi naazekwak Mbee Mot.

14 Bɔɔ bam, mɛ kwyal bin mɛkana mak ɛ́ etɛɛ náá,

bi nɛ gu Zɛɛb Sɛɛg.

Bɛpaa, mɛ kwyal bin mɛkana mak ɛ́ etɛɛ náá,

bi nɛ gu mot nadi é mɛkɛn tɔɔɔ ɛ.

Biyɔ mengbaaz, mɛ kwyal bin mɛkana mak ɛ etɛɛ náá,

bi ɛ́ nɛ ghwyil, Mɛkpa ɛ Zɛɛb ɛ́ tɔ len, bi eezekwak Mbee Mot.

15 Nàwaka lyem tɔ mbee tsik bot ɛ bɔs'ak nɛ embee esesɛɛ e bɔs'ak. Tin, mot ɛ di ewa lyem tɔ embee esesɛɛ e bɔs'ak ɔɔ, nyɛ tok nɛ ghwyil ɛkwyɛl Zɛɛb Sɛɛg. 16 Beeka esa ee di náá, yɛ ɛ́ yii tsik bɔs ɛ: Egwyes ɛsa sa lyem di ekwos ɛ, nɛghu gwyes ɛbela esa djas di ebeeaa nɛ mis ɛ, zɛnɔɔ ɛbet kɔ ɛsu ɛ esa e bɔs. Deenek, etɛp binek djas ààdus pɛ daa Zɛɛb Sɛɛg, ye dus ɛ́ tɔ embee esesɛɛ e bɔs. 17 Etɛp e bɔs ɛpetɔ́ pɛ mɛ mɛsik, nɛ embee egwyes bɛ. Tin, mot di esa ɛkwosak ɛ Zɛɛb ɔ, nyɛ aadi ɛ́ nɛ tsik na kɔm-kɔm.

18 Bɔn bam, bot moo wak ɛ́ é ɛwala mɛ mɛsik! Bi naazegwak náá, mot mɛbhuka ɛ Klisto ɛpezyɛ. Ghuna, é mɛwala mɛ bot dika mos'aak, bɛtɛ nɛ bot ɛ mɛbhuka ɛ Klisto eezetuula. Ye kwyɛl ɛlɛɛ ɛ́, bot moo ɛ́ é mɛwala mɛ mɛsik. 19 Nɛ tsɛɛtsɛ, bot ɛ mɛbhuka ɛ Klisto tak nabɛ ɛ́ ààbɛ bot bis, étɛp tak ɛ́ bɛ nadul mɛnyel mɔɔ tɔ les, tɔ́ yɔbɔ. Etɛɛ náá, bɛ ɛpedi ɛ́ di bot bina ɔɔ, pe bɛ naadi bis nɛ bɛnɔɔ. Yɛ ɛ́ deenek ɛ́ ye nasael étɛp ye neenyen náá, mot ngɔt tɔ lɔɔ nabɛ ɛ́ ààbɛ bis nɛ bɛnɔɔ.

20 Yɛ kabɛ biyɔ ɔɔ, bi naazebela ebotan e Sisim na Dɛɛ ee Klisto nadjɛ ɛ, etɛɛ náá, biyɔ djas neegu etsɛɛtsɛ. 21 Yɛ bɛ náá, mɛ eekwyal bin mɛkana mak ɔɔ, ye tok etɛɛ náá, bi ààgu etsɛɛtsɛ, yɛ ɛ́ etɛɛ náá, bi nɛ gu yɛ. Bi nɛ gu ɛnyɔɛpe náá, ye tok nɛ etɛp etsal di edus tɔ etsɛɛtsɛ.

22 É di'enek, ɛzɛ di mot etsal? Yɛ ɛ́ mot di eke náá, Yezu tok Klisto ɔ. Nyɛy ɛ di mot mɛbhuka ɛ Klisto, nyɛ ɛpebyen Sɛɛg nɛ Mɔn é ɛwala wat. 23 Tin, mot ɛ di ebyen Mɔn ɔɔ, nyɛ tokapɛ nɛ ɛgwakel nɛ Zɛɛb Sɛɛg. Mot ɛ di emyaal Mɔn ɔɔ, nyɛ ɛ́ tɔ ɛgwakel nɛ Zɛɛb Sɛɛg.

24 Dum nɛ tɛp tak ɛ, bi di egoka nɛ ɛbaal mɛkpa mɛ tak tɔ elyem bin. Yɛ ɛ́ mɛkpa mɛ bi nagwak é mɛkɛn tɔɔɔ ɛ. Bi ɛ baal mɛkpa mɛ bi nagwak é mɛkɛn tɔɔɔ, tɔ elyem bin ɔɔ, bi aadi ɛ́ sama wat nɛ Mɔn dɔɔ nɛ Zɛɛb Sɛɛg. 25 Beeka sa Klisto nakɛk bis ɛ: Yɛ ɛ́ tsik na kɔm-kɔm.

26 Mɛ kwyal bin etɛp bak ɛ́, kɔ ɛsu ɛ bot ɛ di esaa ɛkɔɔ bin ɔ. 27 Yɛ kabɛ biyɔ ɔɔ, ebotan e Sisim na Dɛɛ ee bi nabela nɛ Klisto ɛ, yɛ ɛ́ tɔ len. Tin, bi tokapɛ nɛ gwyes náá, dhiiti mot baazɛlyo bin. Etɛɛ náá, ebotan e tak ɛpelyaal bin esa djas. Tin, sa nyɛ di elyaal bin ɛ, yɛ ɛ́ etsɛɛtsɛ, ye tok etsal. Dum nɛ tɛp tak, dika sama wat nɛ Klisto dáa Sisim na Dɛɛ nalyaal bin ɛ.

28 Nɛ tsɛɛtsɛ bɔn bam, dika sama wat nɛ Klisto, étɛp mena needika nɛ ɛbwaalel é sok nyɛ aatuula ɛ. Yɛ ààgoka náá, mena gwyɛka nɛ sen é mis mɛ, dwoo nyɛ aazyɛ ɛ. 29 Tin, bi nɛ gu náá, Klisto ɛ́ mot epiki. É di'enek mot di esa etɛp epiki ɔ, nyɛ ɛ́ mɔn ɛ Zɛɛb.