1 Dhiiti dwoo eFalizyɛ nɛ bɛghaŋ ɛ mɛkana mɛ etsi naadus pɛ Yeluzalɛm zɛboma nɛ Yezu, bɛ ɛ́ boozɛdji nyɛ náá: 2 «Étɛp yé bɛdjekel bɔ di ààduwal etsi e bɛbhaab bina nalik ɛ? Etɛɛ náá, bɔɔ, bɛ ààgwyii mɛmbɔ, é ghɛŋ bɛ di edɛ edee ɛ.» 3 Yezu ɛ́ boozɛbɔɔza nɛ nɔɔ náá: «Étɛp yé bi di ààkɛ dáa etsi e Zɛɛb di lɛɛ ɛ? Bi kwyɛl ɛkɛ ɛ́ dáa etsi e mbyak'en di elɛɛ ɛ! 4 Etɛɛ náá, Zɛɛb ke ɛ́ náá: "Dila soog nɛ nyoog, mot ɛ di ekal sɛɛg nɛ nyɛɛg ɔɔ, nyɛ goka ɛ́ nɛ ɛsyee." 5 Yɛ kabɛ biyɔ ɔɔ, bi lyo bot ɛ́ náá, mot ɛ́ nɛ ghwyil ɛlɛɛ nɛ sɛɛg nɛ nyɛɛg náá: "Esa ee mɛ waakwyee bin nɛ yɛ ɛ, mɛ eenɔɔ kɛdjɛ étɛp ɛtuud ɛ Zɛɛb nɛ yɛ." 6 Mot ɛ ke deenek ɔɔ, nyɛ tok nɛ gwyes ɛkwyee sɛɛg nɛ nyɛɛg. É di'enek, bot ɛbuɛpe ɛpesa náá, Mɛkpa ɛ Zɛɛb zɛhoola, étɛp ɛsaŋ ɛ́ ɛduwal etsi bin biyɔ bɛmet. 7 Bot ɛ mɛdjhaaz pɛ ɛko, bhimis pɛ si! Ngoolel-Mɛkpa ɛ Zɛɛb Ezayi nabɛ ɛ́ nɛ gham nɛ nyɛ nɛ ke náá:

8 "Bot ɛ mbyak'ak duwal mɛ ɛ́ duwela mɛkɔŋ,

elyem bɔɔ ɛ́ pɛ kyee sis.

9 Zɛɛga mendjaala mɔɔ,

yɛ ɛ́ yii toto é mis mam,

etɛɛ náá, mɛlyo mɛ bɛ di elyo ɛ́,

yɛ ɛ́ mɛlyo mɛ epuud*."»

10 Wɔ gwaa, Yezu zokazɛdjóo ɛdhuu ɛ bot, nyɛ ɛ́ boozɛke nɛ bɔɔ djas náá: «Biyɔ djas, gwakeka mɛ, da bi ɛ́ mɛt sa mɛ di elii'aak: 11 Ye tok sa mot di ewa tɔ nuub'ɛ di esa náá mot di nɛ edhuud é mis ɛ Zɛɛb. Yɛ ɛ́ sa wyis tɔ nuub ɛ di esa náá mot tak di nɛ edhuud é mis ɛ Zɛɛb.» 12 Tin, bɛdjekel ɛ́ boozyɛ, zɛlɛɛ Yezu náá: «Wɔ nɛ gu náá, etɛp ee wɔ lii'enek eedyeebakpaa eFalizyɛ tɔ lyem é?» 13 Nyɛ ɛ́ boozɛbɔɔza nɛ nɔɔ náá: «Mɛbhek djas di náá, ye tok Saagam di tɔ gwoo ɛ nabɛ ɛ́, yɛ aadi ɛ́ guaa.» 14 Yezu ɛ́ boozɛke náá: «Betka bɛ, yɛ ɛ́ mot edhim ɛ di edul bɛsɔ bɔɔ bɛ na edhim. Tin, ye nyɔ ɛ́ bi gu náá: Yɛ bɛ náá, yɛ ɛ́ mot edhim ɛ di edul sɔ mot edhim ze ɔɔ, ɛsik ɛ tak ɛ náá, bɔɔ djas bɛbá ɛ́ waadjoola tɔ guk.» 15 Tin, Pyɛɛd ɛ́ boozɛke náá: «Lɛɛa bis sa ekana binek di ekwyɛl ɛlɛɛ ɛ.» 16 Yezu ɛ́ boozɛbɔɔza náá: «Dɔɔ nɛ biyɔ pe, bi tok nɛ etsoŋ ɛtiibal é? 17 Bi ààgu náá, esa djas mot di ewa tɔ nuub ɛ, dhaŋ ɛ́ tɔ mɔ yɛ. Bhii tak, ye kakɛwyis ɛ́ tɔ́ ɛbyeed é? 18 Sa di ewyis tɔ nuub mot ɛ, ye dus ɛ́ tɔ lyem, yɛ ɛ́ sa di edjɛ edhuud. 19 Etɛɛ náá, embee egeka dus ɛ́ tɔ lyem mot. Yɛ ɛ́ esiiza ɛ di elwom bot náá, bɛ gó bot, bɛ sa mɛzɔ, bɛ sa mɛpam, bɛ djii, nɛ ɛsu bɔn-nyɛɛg bɔɔ etɛp nɛ mɛbhekel. 20 Yenek ɛ́ esesɛɛ ee di epul ɛgwakel pak bot nɛ Zɛɛb ɛ. Yɛ kabɛ tɛp ɛdɛ edee ààgwyii mɛmbɔ ɔɔ, yɛ aanàsa náá mot di nɛ edhuud é mis ɛ Zɛɛb.»

21 Yezu zokadus tin, tɔ́ pɛ kyee mɛdhik mɛ eghaada Tiid nɛ Sidɔn. 22 Dhiiti moma dɛl ɛ Kanan nadidi kɔ kyee dik tak ɔ, zokazyɛ pɛ daa lɛ, nyɛ moo tin etsim náá: «Ghɛŋ, Mɔn ɛ Dhavid, geka mɛ ghoŋ, dhiiti kwaambi mbee sisim ɛpedhek mɔɔ ɛsyes ɛ lam, nyɛ tok ɛnyɔɛpe!» 23 Tin, Yezu gwyem ààbis moma tak. Wɔ gwaa bɛdjekel bɛ zokazɛke nɛ Yezu náá: «Sɔa nyɛ, étɛp yé lookɛbok mos, nyɛ ɛpedu mena nɛ etsim!» 24 É di'enek, Yezu ɛ́ boozɛbɔɔza náá: «Mɛ nadhisaa ɛ́, kɔ ɛsu ɛ bot ɛ mbyak Yisalaɛl di náá, bɛ eezewo ze dáa bɔɔ ebhata ee di ààbɛ nɛ mbaalel ɔ.»

25 Tin, wɔ gwaa moma yenɔk zɛkwyit mɛboŋ si mɛko ɛ Yezu. Nyɛ ɛ́ boozɛke nɛ nɛ náá: «Ghɛŋ, kwyeea mɛ!» 26 Yezu ɛ́ boozɛbɔɔza nɛ nɛ náá: «Yɛ àànyɔ náá, bɔɔ bɛbhyɛ djɛaa emapa di náá, yɛ ɛ́ yii bɔn ɛ bot ɛ.» 27 Wɔ gwaa moma yenɔk baazɛpesal náá: «Wɔ ɛ́ nɛ gham, Ghɛŋ! Tin, bɛbhyɛ aazodedɛ ɛ́ bɔɔ eghutu-ghutu e mapa dyeebakwyit é mesa kukuma yɔɔ ɛ.» 28 Tin, Yezu eezɛke nɛ moma yenɔk náá: «Heee moma! Ɛdum ɛ koŋ ɛ lɔ nɛ Zɛɛb nɛ bɔk. Étɛp tak ɛ, Zɛɛb waadjɛ wɔ sa lyem'ɔ di ekwos ɛ.» É di tak wat, wɔ gwaa mɔn zokatsak.

29 Bhii tak, Yezu eezɛdus tin, nyɛ eezɛtɔ́ pɛ ɛboŋ ɛ boo soob na djato-djato e Ghalile. Nyɛ eezɛbyet kɔ mɔɔ ɛtsok, nɔɔ nyel, disi. 30 Bot mɛdhuu-mɛdhuu zokazyɛ nɛ bot ɛ edjam, bot ɛ edhim, eboka e bot, ebubu e bot, nɛ bɛtɛ nɛ membel. Bɛ eezɛsil bɛ sok bhwoob'ɛ. Tin, Yezu zokazɛtsik bɛ. 31 Ɛdhuu ɛ bot naadyeebadjoka dáa bɛ nadi ebee ebubu moo lii ɛ, bot ɛ edjam nɛ eboka moo kɛ ɛ, bot ɛ edhim moo nyaasok ɛ. Bɛ moo tin eduwal Zɛɛb Yisalaɛl.

32 Yezu eezɛdjóo bɛdjekel bɛ, nyɛ ɛ́ booke nɛ nɔɔ náá: «Haaa kpaa-ghoŋ nɛ ɛdhuu ɛ bot bak! Mena nɛ bɛnɔɔ moo mos ɛ́ mɛlu mɛlɛl é di wat. Bɛ tokapɛ nɛ edee e dek. Mɛ tok nɛ ghwyil ɛswaal bɛ pɛ mendjaa mɔɔ tɔ emɔ toto, bɛ waazuk, ze ɛ ze.» 33 Tin, bɛdjekel bɛ ɛ́ boozɛke nɛ nɛ náá: «Mena aabela edee ee ɛdhuu ɛ bot bak djas aadɛ djil nɛ yɛ ɛ paa? Menabɛl ɛ́ dika kuku kakoŋ'aak?» 34 Yezu eezɛdji bɛ náá: «Bi ɛ́ nɛ emapa edhen?» Bɛ ɛ́ boozɛbɔɔza náá: «Etɛn nɛ ebá nɛ ba bɔɔ bɛsu.» 35 Nyɛ ɛ́ boozɛlɛɛ nɛ ɛdhuu ɛ bot náá, bɛ disi é bɔs. 36 Bhii tak, nyɛ eezɛnɔɔ emapa etɛn nɛ ebá nɛ bɛsu binek, nyɛ eezɛbulal bhɔɔ nɛ Zɛɛb. E di'enek, nyɛ eezɛpyak yɛ ebil-ebil. Nyɛ eezɛnɔɔ yɛ náá, djɛ bɛdjekel bɛ, bɛ neekaa bot djas yɛ ɛ. 37 Mot nɛ mot naadɛ, djil. Bɛdjekel bula nɛ yii nabwak ɛ. Mɛbhubhwak naalwoodal bɛbhwaŋ ɛtɛn nɛ ebá. 38 Mɛtaŋ mɛ bot ɛ nadɛ ɔ, naakum botom bɛmil ɛná (4 000), ààlaa-laŋak boa nɛ bɔɔ dhyeeb. 39 Bhii tak, Yezu ɛ́ boozɛswaal bot ɛ tak bɛ sik pɛ mendjaa mɔɔ. É di'enek wat, nyɛ eezɛni tɔ elɛɛd, bɛ nɛ bɛdjekel bɛ zokazɛtɔ́ pɛ kyee dik Maghadan.