1 Nɛ tsɛɛtsɛ mena nɛ guka náá, mɛnyel mɛ mena dika nɛ yɛ kɔ bɔs'ak aanàdi kɔm-kɔm. Yɛ ɛ́ dáa bɔɔ epɛt, yɛ ààbɔya nɛ ɛbik. Yɛ bik ɔɔ, Zɛɛb ɛ́ waadjɛ mena dhiiti mendjaa pɛ tɔ gwoo. Mendjaa mɛ na kɔm-kɔm tak, tok zumal mɛmbɔ mɛ bot. 2 Nenak, mena ɛpesimka etɛɛ náá, ɛkwosak ɛ lena ɛ́ náá, mena tɔ́ka kɛsyel mɛnyel tɔ mendjaa di pɛ tɔ gwoo ɛ. 3 Mena ɛ syel mɛnyel mena tɔ mendjaa me tak ɔɔ, mena aanàkabaadika mɛnyel toto. 4 É di'enek, dáa ye di náá, mena dinaaka ɛ́ tɔ epɛt kɔ ɛko ɛ bɔs'ak ɛ, mena aazodi ɛ́ esim ɛkɛɛ mot ɛpezuk nɛ mɛdil mɛ kɔm. Yɛ ààkwyɛl ɛlyaal náá, mena ɛpekwyɛl ɛbɛkaka nɛ mɛnyel mɛ bot di nɛ yɛ'aak. Tin, ye kwyɛl ɛlɛɛ ɛ́ náá, mena ɛpekwyɛl ɛsyel ɛ mɛnyel mena pɛ tɔ mendjaa mɛ di pɛ tɔ gwoo ɛ, etɛɛ náá, tsik neenɔɔ di ɛsyee. 5 Yɛ ɛ́ Zɛɛb, nyɛy nyɛ ɛmet ɛ́ zekoobal mena étɛp ɛdi tɔ tsik tak. Nyɛ naleedjɛ mena ɛ sok Sisim na Dɛɛ, étɛp ɛlyaal náá, nyɛ waadjɛ mena dhiiti esonok sis.

6 Deenek, menaka mɛlu djas ɛ́ nɛ mɛghaaz. Mena nɛ guka náá, é ghɛŋ mena dika nɛ nyel'ak ɛ, menaka ɛ́ ɛtsetaɛpe nɛ Ghɛŋ. 7 Tin, mena kɛka ɛ́ tɔ ɛdum ɛ koŋ nɛ Zɛɛb, ààkabɛ-bɛak kɔ esa ee mena di ebee ɛ. 8 Menaka ɛ́ nɛ mɛghaaz, tin, ɛkwosak ɛ lena ɛ́ náá, mena betka mɛnyel mɛ bɔs'ak, étɛp ɛkɛdi sama nɛ Ghɛŋ. 9 Tin, ye nakoozodi náá, menaka ɛ́ tɔ nyel mena dika nɛ yɛ'aak, nɛghu mena eeduska tɔ nyel mena dika nɛ yɛ'aak, ɛkwosak ɛ lena ɛ́ náá, Ghɛŋ myaala nɛ nena. 10 Etɛɛ náá, menabɛlka djas ɛ́ waadika sok bhwoob ɛ Klisto, étɛp nyɛ neepɛ́ɛ mena. Tin, mot nɛ mot aabela yɛ efute dum nɛ embɛɛ mɛsa nɛghu embee mɛsa mɛ nyɛ nasa kɔ ɛko ɛ bɔs ɛ.

11 Mena nɛ guka sa ɛlooba nɛ Ghɛŋ di ekwyɛl ɛlɛɛ ɛ. Dum nɛ tɛp tak ɛ, mena di esaa náá, bot ɛ bɔs dum koŋ nɛ nɛ. Deenek, Zɛɛb nɛ gu mena ɛnyɔɛpe, mɛ nɛ gu náá, biyɔ pe, bi nɛ baagu mɛ ɛnyɔɛpe tɔ ebhum elyem bin. 12 Bis ààpabaasaa ɛlyaal ɛ mɛnyel pɛ daa len, tin bis kwyɛl ɛ́ ɛlyaal bin ɛ́, ze étɛp bi neediig bet kɔ ɛsu ɛ les. Deenek ɛ, bi aabela ghwyil ɛbɔɔza nɛ bot ɛ di eghɛɛ mɛnyel kɔ ɛsu ɛ esa ee di ebeeaa nɛ mis, ààbee esa ee di tɔ ebhum elyem bɔɔ ɛ. 13 Yɛ bɛ náá, bis ɛpelyet ɔɔ, yɛ ɛ́ kɔ ɛsu ɛ Zɛɛb. Tin, yɛ bɛ náá, bis ɛ́ nɛ tɛtɛ esiiza ɔɔ, yɛ ɛ́ kɔ ɛsu ɛ len. 14 É di'enek, kwyɛl ɛ Klisto ɛ́ tɔ elyem bena, etɛɛ náá, mena nɛ guka náá, mot ngɔt naagwyɛ étɛp bot djas. Deenek, menabɛlka djas pe eezegwyɛ sama nɛ nɛ. 15 Nyɛ nagwyɛ ɛ́ étɛp bot djas, etɛɛ náá, bot ɛ di nɛ tsik ɔ, bɛ ààdi nɛ tsik étɛp'ɔɔ met. Tin, bɛ di nɛ tsik ɛ́, étɛp mot nagwyɛ da gom étɛp'ɔɔ ɛ.

16 Étɛp tak ɛ ye di náá, bis aanàbaabee mot nɛ mis mɛ epuud. Ye nakoozodi náá, é ghɛŋ sok, bis nabee Klisto ɛ́ nɛ mis mɛ epuud, nenak, bis ààkabee nyɛ deenek. 17 Mot ɛ di tɔ ɛgwakel nɛ Klisto ɔɔ, mot yenɔk moo ɛ́ mot na bes. Etɛp e na mwa eesi tɔ lɛ, nyɛ moo ɛ́ tɔ etɛp e na bes✝. 18 Etɛp binek djas dus ɛ́ pɛ daa Zɛɛb. Yɛ ɛ́ nyɛy ɛ di mot nadhis Klisto étɛp ɛbulal ɛgwakel pak mena nɛ nɛ ɔ. Bhii tak, nyɛ naadjɛ mena mɛsa mɛ ɛkɛgoola bhaadal ɛ ɛbulal ɛgwakel nɛ nɛ. 19 Zɛɛb nadhis Klisto ɛ́, étɛp ɛbulal ɛgwakel pak bɛ nɛ bot ɛ bɔs. Nyɛ nasa deenek ɛ, étɛp nyɛ needi ààkabaabis mesyem mɛ bot. Nyɛ eekyeed mena étɛp ɛkɛgoola bhaadal ɛ ɛbulal ɛgwakel nɛ nɛ.

20 Bis moo ɛ́ engoola-ngoola ɛ Klisto. Zɛɛb nyɛy nyɛ ɛmet ɛ di edjóo bin tɔ mɛkpa mɛ bis di egoola bin ɛ. Bis ɛpedjaala nɛ nen nɛ din ɛ Klisto náá: «Myaalka ɛbulal ɛgwakel nɛ Zɛɛb.» 21 Klisto nabɛ ɛ́ ààbɛ nɛ mesyem. Tin, Zɛɛb naanɔɔ mesyem mena, djɛ nyɛ. Zɛɛb nasa deenek ɛ, etɛɛ náá, mena needika bot ɛ epiki é mis mɛ.