1 Yɛ ààgoka náá, mɛ baakwyal bin mɛkana kɔ ɛsu ɛ mɛtom mɛ nakyeedaa étɛp bot ɛ zedum koŋ nɛ Zɛɛb pɛ Yeluzalɛm ɔ. 2 Etɛɛ náá, mɛ nɛ gu mbɛɛ ɛkwosak ɛ len. Yɛ ɛ́ étɛp tak ɛ mɛ nadyeebaghɛɛ nyel kɔ ɛsu ɛ len é mis mɛ bot ɛ kyee dik Masedwan. Mɛ naalɛɛ bɛ náá: «Bɔn-nyɛɛg bina pɛ kyee dik Akayi naaloozekoobal mɛtom mɔɔ é mbu nadhaŋ'enek, étɛp ɛkwyee bɔn-nyɛɛg pɛ Yeluzalɛm.» Tin, zii yen naadjɛ mɛghaaz nɛ bɛtɛ nɛ bot pak'ɔɔ. 3 Bela náá, mɛ dhis bɔn-nyɛɛg bina tak ɛ́, etɛɛ náá, ɛghɛɛ mɛnyel mɛ bis naghɛɛ kɔ ɛsu ɛ len nàdi yii toto. Ɛkwosak ɛ lam ɛ́ náá, esa ee bi kwom ɛ, ye di koobela dáa mɛ nake ɛ. 4 Bis nɛ bot ɛ kyee dik Masedwan ɛ zyɛ sama wat pɛ daa len ɔɔ, bis ɛdi ààkabela náá, bi eezekoobal esa djas ɔɔ, é di'enek, yɛ aadi ɛ́ boo sen nɛ nes, etɛɛ náá, bis naadyeebawa ɛbwaalel nɛ nen. Mɛ bee ɛ́ ɛkɛɛ, biyɔ bɛmet aazobaadi ɛ́ nɛ sen é mis mɔɔ. 5 Étɛp tak ɛ mɛ gek náá, mɛ lel ɛdhis bɔn-nyɛɛg bina, étɛp bɛ needjɛ bin mɛghaaz tɔ ɛkwom ɛ esa ee bi nakɛk ɛ. Deenek, é ghɛŋ mɛ aazyɛ ɛ, mɛ aabela ɛ́ esonok djas moo sɛɛga. É di'enek, yɛ waalyaal náá, bi djɛ yɛ ɛ́ nɛ lyem wat, ààbɛ nɛ bhel.

6 Guka náá, tɔ pyeeb, mot ɛ bɛ bhek batsa ɔɔ, nyɛ aazogó edee ɛ́ batsa. Tin, mot ɛ bɛ bhek ɛbuɛpe tɔ pyeeb ɔɔ, nyɛ aagó edee ɛ́ ɛbuɛpe. 7 Ye nyɔ ɛ́ náá, mot nɛ mot djɛ dáa nyɛ gek tɔ lyem'ɛ ɛ, ààbɛ nɛ bhel, ààbɛ nɛ ɛbuk. Etɛɛ náá, Zɛɛb kwyɛl ɛ́ mot di egwyena tɔ mɛmyaala ɔ. 8 Tin, Zɛɛb ɛ́ nɛ ghwyil ɛdjɛ bin membi mɛ mɛvu djas. Etɛɛ náá, mɛlu djas bi needi ààdi tɔ pwom sa wat, bi needi nɛ bɛtɛ esa djas bi di egoka nɛ ɛsa membi mɛ enɛm esa djas nɛ yɛ ɛ. 9 Yɛ ɛ́ dáa Ekwyala di elɛɛ:

«Nyɛ nɛ dyeebagwyena nɛ bɛdjel ɛ bot,

enɛm esa bɛ ɛ́ kɔm-kɔm sii nɛ kɔm✝.»

10 Zɛɛb ɛ di djɛ bhek nɛ mbɛel pyeeb, nyɛ ɛ baadi edjɛ nyɛ edee nyɛ di edɛ ɛ, deenek, nyɛ waadjɛ bin membi mɛ mɛbhek djas bi di nɛ gwyes tak ɛ. Nyɛ waasa náá, ye wyee ɛnyɔɛpe etɛɛ náá, bi neegó bɛtɛ nɛ edee tɔ epyeeb. Yɛ ɛ́ deenek ɛ́, enɛm esa ee bi di esa ɛ, yɛ aabu. 11 Zɛɛb ɛ́ waasa náá, bi gheedidi nɛ kɔkɔ mbi ekum djas, etɛɛ náá, bi neegheesesa enɛm esa. Deenek, bɛtɛ nɛ bot ɛ́ waaghaapɛɛ Zɛɛb, étɛp esa ee bi di edhis nɛ nes náá, bis djɛ bɛ ɛ.

12 Etɛɛ náá, enɛm esa ee bi di esa ɛ, ye tok étɛp ɛkwyee bot ɛ Zɛɛb nɛ bot ɛ Zɛɛb toto, yɛ waabaasa náá, bɛtɛ nɛ bot gheebubulal bhɔɔ nɛ Zɛɛb. 13 Bɛ waabee náá, enɛm esa bin nɛ bɔk. Tin, bɛ waabulal bhɔɔ nɛ Zɛɛb etɛɛ náá, bi naadjɛaa mɛsa mɛ ɛgoola Mbɛɛ Bhaadal ɛ Klisto, bi ɛpelooba nɛ nɛ. Bɛ waabaadjɛ duu nɛ Zɛɛb, étɛp ɛgwyena ɛ len nɛ nɔɔ, dɔɔ nɛ bot djas. 14 Bɛ waadjaala Zɛɛb étɛp'en, nɛ ɛlyaal bin kwyɛl'ɔɔ kɔ ɛsu ɛ bɛtɛ nɛ enɛm nɛ embɛɛ ee Zɛɛb sa bin ɛ. 15 Djhoobulalka bhɔɔ nɛ Zɛɛb etɛɛ náá, enɛm esa bɛ nyɛ di sa mena ɛ nɛ bu mɛtaŋ.