1 Zɛɛb tɔ enɛm esa bɛ, nyɛ naadjɛ mena mɛsa mak. Tin, dum nɛ tɛp tak ɛ́ di náá, yɛ ɛ́ ààgoka náá, mena bulaka pɛ bhis. 2 Bis eelum koŋ nɛ embee etɛp ee di esael tɔ sɔ ɛ, etɛp ee di edjɛ sen ɛ. Bis ààsa mɛkɔŋ, bis ààswoola Mɛkpa ɛ Zɛɛb. Tin, yii bisɔ di elyaal popoopwon ɛ, yɛ ɛ́ etsɛɛtsɛ. Ɛkwosak ɛ les ɛ́ náá, elyem bot djas gu náá, sa bisɔ di elyo bot ɛ, yɛ ɛ́ etsɛɛtsɛ é mis ɛ Zɛɛb. 3 Yɛ bɛ náá, Mbɛɛ Bhaadal bis di egoola ɛ syela ɔɔ, deenek, yɛ aazodi ɛ́ syela étɛp bot ɛ di ewo ze ɔ. 4 Bot binɔk di ààmyaal Zɛɛb ɛ, etɛɛ náá, Satan, zɛɛb ɛ bot ɛ bɔs'ak ɛpedipal mɛtselal mɔɔ. Nyɛ ɛpesa náá, bɛ nàbee mɛkas mɛ Mbɛɛ Bhaadal duma ɛ Klisto, mot di mbaŋa-mbaŋa Zɛɛb ɔ. 5 Bis ààgoola wak Mbɛɛ Bhaadal mɛnyel mes, bis goola wak ɛ́, Ghɛŋ Yezu Klisto. Yɛ kabɛ bisɔ ɔɔ, bis ɛ́ bɛkwom ɛ mɛsa men kɔ ɛsu ɛ Yezu. 6 É ghɛŋ sok, Zɛɛb nalɛɛ ɛ́ náá: «Beta náá mɛkas djɛ gwyɛ tɔ ghooghom✝!» Nyɛ nasa deenek ɛ́, etɛɛ náá, nyɛ ɛ́ di edjɛ mɛkas tɔ bhum elyem bina, étɛp mena neesiizaka duma Zɛɛb di ekas kɔ bhwoob ɛ Klisto ɛ.

7 Tin, menabɛlka bot ɛ di nɛ ekum e tak ɔ, mena bɛpka yɛ ɛ́ tɔ mɛbhe mɛ dyak. Mena saka deenek ɛ́, étɛp ɛlyaal náá, boo mɛbwala mɛ tak dus ɛ́ pɛ daa Zɛɛb, ààkabɛ náá, ye dus ɛ́ pɛ daa les. 8 Bis naasusaa mbee mɛsusa, tin, bis nabɛ ɛ́ ààtwakaa. Bis nadi ɛ́ nɛ ba tɔ elyem, tin, bis nadi ɛ́ nɛ ɛbwaalel. 9 Bis naatiigaa, Zɛɛb nabɛ ɛ́ ààdhuugal bis. Bis naadumaa si, bis nabɛ ɛ́ ààgwyɛ. 10 Tsɛɛtsɛ, mɛlu djas, bis nadi ebebɛp mezuk mɛ ɛsyee ɛ Yezu tɔ mɛnyel mes. Etɛɛ náá, tsik ɛ Yezu neenyen tɔ mɛnyel mes. 11 Ye nakoozodi náá, bis ɛ́ nɛ tsik, bot ɛpewun ɛgó bis kɔ ɛsu ɛ Yezu, etɛɛ náá, tsik ɛ Yezu neenyen tɔ mɛnyel mes, mɛnyel mɛ di náá, yɛ waaboogwyɛ ɛ. 12 Yɛ ɛ́ deenek ɛ ɛsyee di esa mɛsa mɛ tɔ les, etɛɛ náá, tsik neesa mɛsa tɔ len.

13 Tin, Ekwyala lɛɛ ɛ́ náá: «Mɛ eedum koŋ nɛ Zɛɛb, yɛ ɛ́ étɛp tak ɛ mɛ di elii✝.» Dɔɔ nɛ bisɔ pe, bis eedum koŋ nɛ Zɛɛb, yɛ ɛ́ étɛp tak ɛ bis di elii. 14 Nɛ tsɛɛtsɛ, bis nɛ gu náá, Zɛɛb mot nagomal Ghɛŋ Yezu tɔ ɛsyee ɔ, nyɛ waagomal bisɔ nɛ biyɔ pe. Bhii tak, nyɛ waatɔ́ nɛ nena é di nyɛ di ɔ. 15 É di'enek, mezuk djas bis di eboma nɛ yɛ'aak, yɛ ɛ́ kɔ ɛsu ɛ len. Yɛ ɛ́ etɛɛ náá, enɛm nɛ embɛɛ Zɛɛb neebu dhaa tyɛ. Deenek, bɛtɛ nɛ bot ɛ́ waabulal bhɔɔ nɛ Zɛɛb nɛ ɛduwal nyɛ.

16 Dum nɛ tɛp tak ɛ́ bis di ààbula pɛ bhis. Ye nakoozodi náá, mɛnyel mes ɛpetɔ́ nɛ ɛsila batsa-batsa, é di'enek, Zɛɛb ɛpedjɛ esisim bis mɛghaaz mɛlu djas. 17 Deenek, bɔɔ mezuk mɛ bis di emaad é ba mɔɔ ɛwala ɛlak'aak aabodi ɛ́ si. Bis ɛ́ waabela boo duma kɔ ɛsu ɛ mezuk mɛ tak. Duma tak aadi ɛ́ kɔm-kɔm sii nɛ kɔm. É ghɛŋ bis di etaala duma bot aabela ɛ, mezuk menek tok dhiiti vaŋ sonok. 18 Etɛɛ náá, bis ààdyeebawa esiiza kɔ esa ee di beeaa nɛ mis ɛ. Bisɔ kwyɛl ɛ́ esa ee bot di ààbee nɛ mis ɛ. Etɛɛ náá, esa ee di ebeeaa nɛ mis ɛ, yɛ ààdi kɔm-kɔm. Tin, esa ee di kɔm-kɔm ɛ, yɛ ɛ́ esa ee di ààbeeaa nɛ mis ɛ.