1 Mam Pɔl, mɛ lii nɛ nen ɛ́ nɛ din ɛ Klisto, nyɛy mot di mot mɛtela nɛ mbɛɛ lyem ɔ. Bot nɛ lii nɛ din ɛ lam náá: «É ghɛŋ mena dyeebadika é di wat nɛ nɛ ɛ, nyɛ nɛ tela lyem. Yɛ kabɛ é ghɛŋ mena nɛ bɛnɔɔ di ààdika é di wat ɔɔ, nyɛ nɛ goo lyem.» 2 Mɛ ɛpedjaala nɛ nen, sa bi ààsa náá, mɛ goo lyem é ghɛŋ mɛ aadi pak'en ɛ. Tin, bɛdhiiti bot ke ɛ́ náá, bis sa etɛp ɛ́ dáa bot ɛ bɔs. Deenek, nɛ mbi binɔk bot, mɛ waagoo lyem nɛ nɔɔ. 3 Yɛ ɛ́ tsɛɛtsɛ náá, menaka ɛ́ bot nɛ nyel epuud. Tin, tuub mena di eduuka'aak, ye tok tuub epuud. 4 Tin, bɛghɛl ɛ mena di eduuka nɛ yɛ ɛ, ye tok bɛghɛl ɛ bot ɛ bɔs. Yɛ ɛ́ eboo bɛghɛl ɛ Zɛɛb. Yɛ ɛ́ nɛ ghwyil ɛtwaal elyel-lyel mendjaa mɛ bot ɛ mɛbhuka ɛ Zɛɛb di kɛsɔwa tɔ tak ɛ. Yɛ ɛ́ tyee wat, dáa mena di esaabka esiiza ee di ààbɛ tɔ etsɛɛtsɛ ɛ. 5 Mena ɛpekwyesalka embee egeka e bot ɛ ɛghɛɛa nyel djas di esa étɛp ɛlu náá, bɛdhiiti bot needi ààgu Zɛɛb ɛ. Mena kwyɛlka ɛ́, ɛswoola egeka e bot djas, étɛp bɛ neelooba nɛ Klisto. 6 É ghɛŋ bi aadi bi moo elooba nɛ Klisto dáa ye di egoka nɛ sael ɛ, mena aadika nɛ ghwyil ɛwa bot djas di ààlooba ɔ é feŋ.

7 Bɛɛka mis ɛnyɔɛpe, mot ɛ myaal nɛ lyem'ɛ met náá, nyɛ ɛ́ mot ɛ Klisto ɔɔ, ye goka ɛ́ nyɛ gu nɛ tsɛɛtsɛ náá, bisɔ pe ɛ́ bot ɛ Klisto. 8 Yɛ kobɛ náá, mɛ naasa ɛghɛɛa nyel kɔ ɛsu ɛ ekukuma ee Ghɛŋ Yezu nadjɛ mena ɔɔ, mɛ tok nɛ sen étɛp tak. Yɛ ɛ́ etɛɛ náá, Zɛɛb nabɛ ɛ́ ààdjɛ mɛ ekukuma e tak, étɛp mɛ neepul bin, nyɛ nadjɛ mɛ yɛ ɛ́, étɛp mɛ needjɛ bin mɛghaaz. 9 Tin, mɛ ààkwyɛl náá, bi gek náá, mɛ ɛpebɛɛg bin nɛ bɛmɛkana mam. 10 Etɛɛ náá, bɛdhiiti bot ke ɛ́ náá: «Bɛmɛkana mɛ Pɔl nɛ lyel ɛ mɛkpa. Tin, é ghɛŋ nyɛ di tɔ lena ɛ, nyɛ ààgoo lyem, nyɛ lii ɛ́ dáa mot di ààlyel bham ɛ.» 11 Ye goka ɛ́ mot di elii deenek ɔ gu náá, sa bis di elɛɛ tɔ bɛmɛkana mes é sok bis di ɛtsetaɛpe nɛ nen ɛ, bis aabaazosa ɛ́ deenek é ghɛŋ bis aakum pak'en ɛ.

12 Bɛdhiiti bot nɛ kwyɛl ɛduwal ɛ mɛnyel mɔɔ. Tin, bis tok nɛ ghwyil ɛke náá, bis nɛ bɛnɔɔ ɛ́ tyɛ wat. Bɛ nɔɔ egeka ɛ́ nɛ mɛnyel mɔɔ met. Bɛ zobaŋa ɛ́ mbi kyeed'ɔɔ met. Yenek tok ewo? 13 Yɛ kabɛ bisɔ ɔɔ, bis tok nɛ ghwyil ɛghɛɛ mɛnyel kɛdhaa. Yɛ bɛ náá, bis ɛpeghɛɛ mɛnyel ɔɔ, bis goka nɛ ɛghɛɛ mɛnyel ɛ́ kɔ ɛsu ɛ mɛsa mɛ Zɛɛb nadjɛ bis pɛ daa len ɛ. 14 Deenek, é ghɛŋ bis nazyɛ pɛ daa len nɛ Mbɛɛ Bhaadal ɛ Klisto ɛ, bis nabɛ ɛ́ ààdi nɛ «tɔɔɔ kɛsee» kɔ mɛsa mɛ Zɛɛb nadjɛ bis ɛ. 15 Bis ààghɛɛ nyel ɛbuɛpe dum nɛ mɛsa mɛ bɛdhiiti bot nasa ɛ. Tin, bis ɛ́ nɛ ɛbwaalel náá, ɛdum koŋ ɛ len nɛ Zɛɛb ɛ waatɔ́ sok. Deenek, bis ɛ́ nɛ ghwyil ɛsa náá, mɛsa mis pak'en tɔ́ sok, tin, ààkabɛ náá ye dhaa mɛtsek mɛ Zɛɛb nadjɛ bis ɛ. 16 Nenak, bis moo kwyɛl ɛtɔ́ kɛgoola Mbɛɛ Bhaadal pɛ kyee mɛdhik mɛ di ɛtsetaɛpe nɛ nen ɛ. Bis aanàghɛɛ mɛnyel nɛ mɛsa mɛ bɛdhiiti bot nasa ɛ.

17 Tin, Ekwyala lɛɛ ɛ́ náá: «Yɛ bɛ náá, mot ɛpekwyɛl ɛghɛɛ nyel ɔɔ, nyɛ sa yɛ kɔ ɛsu ɛ sa Ghɛŋ sa ɛ✝.» 18 Etɛɛ náá, mot Ghɛŋ di myaala nɛ nɛ ɔ, tok mot di eghɛɛ nyel'ɛ nyɛy nyɛ ɛmet ɔ, tin, yɛ ɛ́ mot Ghɛŋ di eghɛɛ nyɛ ɔ.