1 Bɔn-nyɛɛg bam mɛ di ekwyɛl ɔ, Zɛɛb nakɛk esa binek djas ɛ́ étɛp'enaka. Étɛp tak, djhoodiska edhuud é mɛnyel mena nɛghu tɔ elyem bena. Djhoosaka mɛghaaz mɛ ɛdi ɛ́ dɛɛ, tɔ ɛkaab ɛ Zɛɛb.

2 Saka náá, bis bela di tɔ elyem bin. Bis ààpasa ɛbiyo nɛ mot, bis ààpazuk mot, bis ààpakɔɔ mot étɛp ɛnɔɔ sa yɛ. 3 Mɛ ààlii deenek étɛp ɛkwyesal bin ndjɛ sɔs. Tin, yɛ ɛ́ dáa mɛ ke sok ɛ, bi ɛ́ tɔ elyem bis, ye nakoozodi ɛsyee nɛghu tsik, mena aazodika ɛ́ sama. 4 Mɛ ɛ́ nɛ boo ɛbwaalel nɛ nen. Mɛ nɛ dyeebamyaala nɛ nen. Mɛ ɛ́ nɛ bɛtɛ nɛ mɛghaaz, mɛmyaala ɛ́ tɔ lam tɔɔɔ ye nakoozodi náá, mena naazukeka ɛbuɛpe.

5 É ɛkum ɛ les pɛ kyee dik Masedwan, bis nabɛ ɛ́ ààkowala batsa, bis naazɛboma nɛ membi mɛ mezuk djas. Ye nakadi ɛ́ nɛ mɛwɔ pak bis nɛ bɛdhiiti bot, nɛ bwoo tɔ elyem bis. 6 Tin, Zɛɛb mot di edjɛ mɛghaaz nɛ bot ɛ di ààbɛ nɛ mɛghaaz ɔ naazɛdjɛ bis mɛghaaz, é sok Tit nakum ɛ. 7 Yɛ ɛ́ tsɛɛtsɛ náá, ɛzyɛ ɛ Tit naadjɛ bis mɛghaaz, yɛ ɛ́ dɔɔ nɛ ɛbaŋa nyɛ baŋa bis dáa bi djɛ nyɛ mɛghaaz penek ɛ. Nyɛ eelɛɛ bis dáa bi di nɛ gwyes ɛbaabee mɛ ɛ. Nyɛ naabaalɛɛ bis dáa bi di edjɛ elyem bin mɛbɛ, dum nɛ embee esesɛɛ bi nadi esesa sok ɛ. Nyɛ eebaalɛɛ bis zii bi di nɛ yɛ é ghɛŋ bi di ekɛm mɛ ɛ. Étɛp tak ɛ, mɛ di nɛ mɛmyaala ɛbuɛpe.

8 Tin, yɛ bɛ náá, mɛkana mɛ mɛ nakyeed bin yɛ sok ɛ, naakpaa bin elyem ɔɔ, nenak yak, mɛ ààkadjɛ nyel'am mɛbɛ. Yɛ ɛ́ tsɛɛtsɛ náá, é mɛkɛn, mɛ naadjɛ lyem'am mɛbɛ, é ghɛŋ mɛ nagu náá, mɛkana mɛ tak naakpaa bin elyem é dhiiti bɔɔ mɛwala ɛ. 9 Nenak, lyem'am ɛ́ tɔ mɛmyaala, ààbɛ, etɛɛ náá, elyem bin naakpaa. Tin, mɛ myaala ɛ́, etɛɛ náá, ɛkpaŋ ɛ lyem nakpaa bin ɛ naaswoola bin mɛfulu. Deenek, ɛkpaŋ ɛ lyem tak nabɛ ɛ́ ɛkwosak ɛ Zɛɛb, deenek, bis ààpasa bin sa ɛbiyo. 10 Etɛɛ náá, ɛkpaŋ ɛ lyem di tɔ ɛkwosak ɛ Zɛɛb ɛ nɛ sa náá, mot swoola mɛfulu étɛp ɛbela tsik. Deenek ɛ, mena ɛ́ waabela tsik, ààdjɛ lyem mɛbɛ. Tin, ɛkpaŋ ɛ lyem di ààswoola mɛfulu ɛ, ye djɛ ɛ́ ɛsyee. 11 Nenak yak, beeka sa ɛkpaŋ ɛ elyem bin di edus tɔ ɛkwosak ɛ Zɛɛb kadjɛ ɛ: Haaa mbɛɛ ɛkwosak nɛ nen, haaa boo zii tɔ etaŋal bin, haaa bhyen mesyem tɔ len, haaa bwoo ɛsa embee etɛp tɔ len, haaa boo gwyes ɛboma nɛ nam, haaa mbi yenek zii nɛ bas ɛwa ɛbiyo é feŋ. Bi eelyaal popoopwon náá, bi nabɛ ɛ́ ààbɛ tɔ tɛp'enek.

12 Yɛ bɛ náá, mɛ naakwyal bin mɛkana ɔɔ, ye nabɛ ààbɛ kɔ ɛsu ɛ mot nasa ɛbiyo ɔ, ààkobɛ-bɛak kɔ ɛsu ɛ mot bɛ nasa nyɛ ɛbiyo ɔ. Tin, ye nabɛ ɛ́, étɛp bi neebee popoopwon é mis ɛ Zɛɛb zii bi di nɛ yɛ kɔ ɛsu ɛ les ɛ. 13 Étɛp tak ɛ mɛfulu men djɛ bis mɛghaaz.

Yɛ ɛ́ tsɛɛtsɛ náá, bis naadyeebamyaala dum nɛ sa bi nasa ɛ. Tin, bis nabaabela boo mɛmyaala kɛdhaa, é sok bis nabee Tit tɔ mɛmyaala ɛ. Yɛ bɛ náá, nyɛ nabɛ ɛ́ tɔ mɛmyaala ɔɔ, yɛ ɛ́ etɛɛ náá, bi naadjɛ nyɛ mɛghaaz. 14 Tin, mɛ eedyeebaduwal bin é mis ɛ Tit. Bi nabɛ ɛ́ ààdjɛ mɛ sen. É di'enek, bis dyeebalɛɛ bin ɛ́ etɛp e tsɛɛtsɛ. Yɛ ɛ́ tyee wat nɛ ɛduwal ɛ mɛ nadi eduwal bin é mis ɛ Tit ɛ, yɛ ɛ́ tsɛɛtsɛ. 15 Deenek, nyɛ ɛpebaakwyɛl bin dhaa tyɛ, é ghɛŋ nyɛ di etaala nɛ ɛlooba ɛ len, nɛ dáa bi nabe nyɛ nɛ duu djas ɛ. 16 Mɛ ɛ́ nɛ mɛmyaala nɛ dáa mɛ di ewa ɛbwaalel ɛ lam nɛ nen tɔ etɛp djas ɛ.