1 Dum nɛ tɛp tak ɛ, mam Pɔl, mɛ ɛpedjaala Zɛɛb, mam mot di mot membok étɛp mɛsa mɛ Yezu Klisto ɔ. Mɛ ɛ́ wak mos é membok ɛ́, etɛɛ náá, mɛ naakɛgoola Mbɛɛ Bhaadal pɛ daa len, bot di ààbɛ bot ɛ mbyak eYuda ɔ. 2 Yɛ ɛ́ tsɛɛtsɛ náá, bi naazegwak mɛsa mɛ Zɛɛb nadjɛ mɛ étɛp ɛlyaal ɛ bin enɛm nɛ embɛɛ bɛ ɛ. 3 Zɛɛb naatel mɛ ɛkwosak ɛ lɛ nadi syela ɛ. Yɛ ɛ́ dáa mɛ nyɛl ɛlɛɛ bin yɛ tɔ mɛkana mak ɛ. 4 Laŋa bi aalaa yɛ ɛ́, biyɔ pe ɛ́ waagu etɛp ee mɛ zegu ɛ. Yɛ ɛ́ esonok nadi syela dum nɛ Klisto ɛ. 5 É ghɛŋ na mwa, Zɛɛb nabɛ ɛ́ ààtel bot etɛp nadi tɔ sɔ ɛ. Nenak, nyɛ eesa náá, Sisim lyaal yɛ popoopwon nɛ bot ɛ lwoma bɛ na dɛɛ, nɛ bɛngoolel ɛ Mɛkpa ɛ Zɛɛb. 6 Beeka sa nadi tɔ sɔ ɛ: kɔ ɛsu ɛ Mbɛɛ Bhaadal, esa e lyak ee Zɛɛb nadjɛ bot ɛ mbyak eYuda ɛ, biyɔ bot ɛ di ààbɛ bot ɛ mbyak eYuda ɔ, biyɔ pe ɛ́ waabaabela yɛ. Biyɔ nɛ bot ɛ mbyak eYuda, bi moo ɛ́ mot ngɔt. Sa Zɛɛb nakɛk kɔ ɛsu ɛ Yezu Klisto náá, nyɛ waadjɛ bot ɛ mbyak eYuda ɛ, biyɔ pe ɛ́ waabela yɛ.

7 Dum nɛ ɛkɛɛ ɛ Zɛɛb nadjɛ mɛ ɛ, mɛ moo ɛ́ mot-mɛsa mɛ, étɛp ɛgoola Mbɛɛ Bhaadal. Nyɛ nasa deenek tɔ lam ɛ́, nɛ ghwyil mɛbwala mɛ. 8 Ye nakoozodi náá, mam tok vaŋ mot tɔ lɔɔg bot djas nazedum koŋ nɛ Zɛɛb ɔ, tin, Zɛɛb eesa mɛ enɛm ɛgoola nɛ bot ɛ di ààbɛ bot ɛ mbyak eYuda ɔ, mɛvu ɛ Klisto di ààsi ɛ. 9 Nyɛ eebaasa mɛ enɛm, étɛp mɛ neelyaal bot djas dáa ɛkwosak ɛ Zɛɛb nadi tɔ sɔ aasael ɛ. Nyɛy mot nakus bhwak djas ɔ, nyɛ naasa náá, ye di tɔ sɔ membu nɛ mesee. 10 Nenak yak, Zɛɛb naatel yɛ tɔ zɛɛga mendjaala, etɛɛ náá, efofop nɛ edhiiti eghwyil e mɛbwala di tɔ gwoo ɔ neegu mɛbɔk mɛ mbi mɛ etsoŋ e Zɛɛb di nɛ yɛ ɛ. 11 Tin, etɛp binek djas nasael ɛ́, dáa Zɛɛb naloolɛɛ náá, nyɛ aasa ɛ. Nyɛ nasa yɛ ɛ́ kɔ ɛsu ɛ Ghɛŋ’enaka Yezu Klisto. 12 Tɔ ɛgwakel’ena nɛ Yezu Klisto, nɛ ɛdum ɛ koŋ ɛ lena nɛ nɛ, mena aanàbaadi nɛ bwoo ɛtyaa sok bhwoob ɛ Zɛɛb nɛ ɛbwaalel djas. 13 Étɛp tak ɛ, mɛ di ewaab bin náá, sa bi ààsyel mɛnyel, étɛp mezuk mɛ mɛ di ebee kɔ ɛsu ɛ len ɛ. Tin, mezuk menek ɛ́ étɛp ɛdjɛ bin duma.

14 Yɛ ɛ́ étɛp tak ɛ mɛ kwyit mɛboŋ si sok bhwoob ɛ Zɛɛb Sɛɛg. 15 Yɛ ɛ́ nyɛy ɛ di mot di ɛsuk ɛ membyak djas kɔ ɛko bɔs nɛ pɛ tɔ gwoo. 16 Deenek, mɛ ɛpedjaala nɛ nɛ náá, kɔ ɛsu ɛ mɛvu mɛ duma yɛ, nyɛ djɛ bin mɛghaaz é ze mɛbwala mɛ Sisim yɛ, 17 etɛɛ náá, Klisto neebela di tɔ ebhum e lyem bin, kɔ ɛsu ɛ ɛdum ɛ koŋ ɛ len nɛ Zɛɛb. Mɛ ɛpewaab náá, kwyɛl’en di nɛ ekaŋal étɛp bi neepyet ɛlyelɛpe. 18 Deenek, biyɔ nɛ bot ɛ zedum koŋ nɛ Zɛɛb ɔ djas, bi ɛ́ nɛ ghwyil ɛgu ɛnyɔɛpe dáa kwyɛl ɛ Klisto di ebɔk ɛ, dáa ye di edjaŋ ɛ, dáa ye di evyɛɛg ɛ, nɛ dáa, ye di edim ɛ. 19 Deenek, bi ɛ́ waagu kwyɛl’ɛ di edhaa esonok djas bot di egu ɛ. Bi ɛ́ waabela mɛvu mɛ tsik ɛ Zɛɛb, da yɛ ɛ́ lwood tɔ len.

20 Yɛ ɛ́ Zɛɛb ɛ di nɛ ghwyil ɛsa esonok tɔ lena dum nɛ mɛbwala mɛ di esa mɛsa tɔ lena ɛ, dhaa yii mena di ewaab ɛ nɛghu yii mena di esiiza ɛ. 21 Betka náá, duu di nɛ Zɛɛb kɔm-kɔm sii nɛ kɔm dum nɛ sa nyɛ lyaal tɔ zɛɛga mendjaala mɛ é ze ɛ Yezu Klisto ɛ! Amɛn.