1 Mam mot di mot membok, etɛɛ náá, mɛ ɛ́ mot-mɛsa ɛ Ghɛŋ ɔ, mɛ ɛpedjaala nɛ nen, biyɔ bot ɛ Zɛɛb nadjóo ɔ, kɛka tɔ embɛɛ mɛfulu dáa Zɛɛb di ekwyɛl ɛ. 2 Dika tɔ mɛsila, dika tɔ mɛtela, dika tɔ ɛmaad ɛ lyem. Djiselka pak'en nɛ kwyɛl djas. 3 Saka mɛghaaz étɛp ɛbaal ɛgwakel ɛ Sisim na Dɛɛ djɛ mena ɛ. Dika tɔ egwyem pak'en étɛp bi needi tɔ egwakel. 4 Nyel ɛ́ ngɔt, Sisim na Dɛɛ pe ɛ́ ngɔt. Yɛ ɛ́ tyee wat, ɛbwaalel yii Zɛɛb nadjóo bot tɔ tak ɛ pe ɛ́ ngɔt.

5 Yɛ ɛ́ nɛ Ghɛŋ ngɔt,

ɛdum ɛ koŋ nɛ Zɛɛb ɛ́ wat,

ɛduwa Zɛɛb ɛ́ wat.

6 Zɛɛb ɛ́ ngɔt, nyɛ ɛ́ Sɛɛg bot djas.

Nyɛ ɛ́ kɔ bot djas,

nyɛ ɛpesa mɛsa tɔ bot djas,

nyɛ ɛ́ tɔ menabɛlka djas.

7 Tin, mot nɛ mot pak'ena naabela yɛ enɛm nɛ embɛɛ, yii Klisto nadjɛ mot nɛ mot nɛ lyem wat ɛ. 8 Ekwyala na Dɛɛ lɛɛ ɛ́ náá:

«É ghɛŋ nyɛ nabyet tɔ́ pɛ tɔ gwoo ɛ,

nyɛ naatɔ́ nɛ bot ɛ nadi é ekwom ɔ,

nyɛ naadjɛ bot ɛ bɔs mɛkɛɛ✝.»

9 Tin, ɛbyet tɔ gwoo kwyɛl ɛlɛɛ yé? Ye kwyɛl ɛlɛɛ ɛ́ náá, nyɛ naasul sok tɔ esum edi na dim-dim di kɔ bɔs ɛ. 10 Mot sul kɔ bɔs ɔ, yɛ ɛ́ pe ɛ́ mot byet tɔ gwoo di ɛvyɛɛgɛpe dhaa tyɛ ɔ. Etɛɛ náá, nyɛ neelwoodal bhwak djas. 11 Nyɛy ɛ́ nadjɛ bot mɛkɛɛ mɛ di esa náá, bɛdhiiti bot di bot ɛ lwoma, bɛdhiiti bɛngoolel ɛ Mɛkpa ɛ Zɛɛb, bɛdhiiti kadi ɛ́ bɛgoolel ɛ Mbɛɛ Bhaadal, bɛdhiiti bɛdjɛɛdel ɛ zɛɛga mendjaala, bɛdhiiti kadi ɛ́ bɛlyoel. 12 Yɛ ɛ́ deenek ɛ́, nyɛ nasa náá, bot ɛ zedum koŋ nɛ Zɛɛb ɔ, bela ghwyil ɛsa mɛsa mɛ, étɛp ɛbek ɛ nyel ɛ Klisto. 13 Yɛ ɛ́ deenek ɛ́, menabɛlka djas aadika sama tɔ ɛdum ɛ koŋ wat dɔɔ nɛ tɔ ɛgu ɛ Mɔn ɛ Zɛɛb. Tin, mena kadika ɛ́ dáa eboo bot ɛ di náá, ɛtiibal ɛ lena ɛ́ waakum dáa yɛ Klisto. 14 Tin, mena aanàkabaadika tyee bɔɔ dhyeeb. Mena aanàbaadika ewo dáa bhuuge di edheeg elɛɛd ɛ, mena aanàbaadika edheegel nɛ pup embee mɛlyo. Bot ɛ mɛlyo mɛ mɛkɔŋ ààkabaadul mena étɛp ɛwa mena tɔ ɛdjak. 15 Tin, mena ɛ di elɛɛelka etsɛɛtsɛ tɔ kwyɛl ɔɔ, mena aawyeeka tɔ etɛp djas dáa Klisto nyɛy mot di ɛsuk ɛ zɛɛga mendjaala ɔ. 16 Yɛ ɛ́ kɔ ɛsu ɛ Klisto ɛ, ekyes e nyel djas di ghiŋ sama. Mɛtii mɛ nyel sa ɛ́ mɛsa mɛ ɛbaata ekyes e nyel. Tin, é ghɛŋ ekyes djas di esa mɛsa mɛ dáa ye di goka ɛ, nyel djas ɛpewyee, nɛ ɛbɔk tɔ kwyɛl.

17 Beeka sa mɛ di ebasal nɛ ɛwaab nɛ nen nɛ din ɛ Ghɛŋ'enaka ɛ: nàduka mɛfulu mɛ bot ɛ di ààdum koŋ nɛ Zɛɛb ɔ. Etɛɛ náá, egeka bɔɔ tɔ́ ɛ́ tɔ esa e toto. 18 Tin, bɛ tok nɛ mɛtselal ɛmɛt etsɛɛtsɛ e Zɛɛb, ààkomɛt-mɛtak tsik na bes yii Zɛɛb di edjɛ bot ɛ, etɛɛ náá, bɛ ààgu sonok, bɛ nɛ lyel elyem. 19 Bɛ eezegwyiia sen, bɛ eezewa lyem tɔp tɔ mɛzɔ, batakɛsa membi mɛ esa e sen djas, bɛ di emyaala nɛ yɛ ɛ. 20 Yɛ kabɛ biyɔ ɔɔ, mbi yenek mɛfulu tok yii bi nadjek pɛ daa Klisto ɛ. 21 Mɛ nɛ gu náá, bi naagwak etɛp ee di eliiaa dum nɛ nɛ ɛ. Bela náá, bi naazelyoaa etsɛɛtsɛ dum nɛ Yezu. 22 Bi goka ɛ́ nɛ ɛkat embee mɛfulu mɛ bi nadi nɛ yɛ sok ɛ. Bɛkaka nɛ mɛfulu mɛ na mwa, yii embee egwyes tak di edul bin tɔ ɛsyee ɛ. 23 Betka náá, Sisim Zɛɛb swoola mɛfulu men, 24 ɛkɛɛ bi eebɔt kaad na bes. Tin, bi moo ɛ́ bot ɛ na bes. Mot na bes yenɔk kusaa ɛ́ dáa Zɛɛb di ekwyɛl ɛ. Deenek, etsɛɛtsɛ ɛpesa náá, nyɛ di mot epiki, mot edɛɛ.

25 Tin, nàsaka mɛkɔŋ, mot nɛ mot goka ɛ́ nɛ ɛlɛɛ etsɛɛtsɛ nɛ sɔ mot, etɛɛ náá, menabɛlka djas ɛ́ ekyes e nyel wat. 26 É ghɛŋ bi di nɛ ɛbuk ɛ, sa bi ààsyem. Ye goka ɛ́, ɛbuk ɛ len sila, ɛsok nɛ dwoo nɛ sila. 27 Nàbetka náá, dim mot mɛkɔŋ be di tɔ len. 28 Mot djii goka ɛ́ nɛ ɛkat ɛdjii. Nyɛ goka ɛ́ nɛ ɛsa mɛghaaz étɛp ɛsa embɛɛ mɛsa nɛ mɛmbɔ mɛ. Deenek, nyɛ ɛ́ nɛ ghwyil ɛkwyee bot ɛ di tɔ edjel ɔ.

29 Deenek, sa mbee ɛkpa ɛ wat ààtuula tɔ nuub'en. Bi goka nɛ ɛlóo ɛ́ embɛɛ mɛkpa di ekwyee nɛ ɛdjɛ ghwyil nɛ bɛsɔ bin ɛ, mɛkpa mɛ di enyɔ nɛ bot ɛ di egwak bin ɔ. 30 Zɛɛb naawa bin ndem nɛ Sisim na Dɛɛ yɛ. Tin, nàtuŋka Sisim yenek. Bela náá, yɛ ɛ́ nyɛy ɛ di elɛɛ bin náá, yɛ aadi ɛ́ nɛ dwoo di náá Zɛɛb ɛ́ waapɛk mena tɔ mesyem ɛ. 31 Nàbaalka tɔ elyem bin ɛbuk kɔ ɛsu ɛ embee esonok bɛ nasa bin ɛ, sa bi ààkpaa elyem, sa bi aadi nɛ ɛbuk. Diska tɔ elyem bin, mɛwɔɔbela, mɛlee zɛnɔɔ membi mɛ esesɛɛ e mbee lyem djas. 32 Dika nɛ mbɛɛ lyem nɛ ghwyikwyee pak'en, pelelka pak'en dáa Zɛɛb napel bin é ze ɛ Klisto ɛ.