1 Yɛ ɛ́ mam Pɔl, mot-lwoma ɛ Yezu Klisto tɔ ɛkwosak ɛ Zɛɛb. Mɛ kwyal mɛkana mak ɛ́ étɛp bɔn ɛ Zɛɛb di pɛ ghaada Efɛɛz ɛ, bot ɛ di edum koŋ nɛ Yezu Klisto ɔ. 2 Beta náá, Zɛɛb Sɛɛg'enaka nɛ Ghɛŋ'enaka Yezu Klisto djɛ bin enɛm nɛ embɛɛ nɛ egwyem.

3 Duu nɛ Zɛɛb, Sɛɛg ɛ Ghɛŋ'enaka Yezu Klisto! Yɛ ɛ́ nyɛy ɛ nazesɛɛ mena mɛtel kɔ ɛsu ɛ embɛɛ esonok di edus tɔ gwoo ɛ. Etɛɛ náá, menaka ɛ́ tɔ ɛgwakel nɛ Klisto. 4 Tin, ɛsok nɛ bhwak nɛ kusel, Zɛɛb naazeloosɛ́ɛ mena étɛp mena needika bot bɛ, étɛp mena needi dɛɛ ààbɛ nɛ ndjɛ é mis mɛ. Tɔ boo lyem kwyɛl'ɛ, 5 Zɛɛb naaloozemyaal náá, nyɛ waasa náá, mena dika bɔn bɛ kɔ ɛsu ɛ Yezu Klisto. Yɛ ɛ́ deenek ɛ nyɛ nakwyɛl náá, ye sael tɔ ɛkwosak ɛ lɛ. 6 Djhoodjɛka duu nɛ Zɛɛb kɔ ɛsu ɛ boo ɛkɛɛ nyɛ nazedjɛ mena nɛ lyem wat kɔ ɛsu ɛ Mɔn'ɛ nyɛ di ekwyɛl ɔ.

7 Yɛ ɛ́ kɔ ɛsu ɛ ghiya ɛ Klisto ɛ, menabɛlka di pɛka tɔ ɛbiyo, mesyem mena eebaapelaa. Deenek, Zɛɛb naatel mena dáa enɛm nɛ embɛɛ bɛ di ebɔk ɛ. 8 Nyɛ naalwoodal mena nɛ enɛm nɛ embɛɛ bɛ, étɛp mena needika bot ɛ etsoŋ, nɛ bot ɛ mɛtselal dhaa nyel. 9 Tin, tɔ enɛm esa bɛ, nyɛ eesa náá, mena guka sa nadi syela ɛ. Ɛkwosak ɛ lɛ nabɛ ɛ́ náá, yɛ aasael ɛ́ nɛ Klisto. 10 Sa tak ɛ́, yii Zɛɛb aasa é ghɛŋ mɛlu aadjala ɛ. Yɛ aadi ɛ́ ɛsɛɛg esa djas di kɔ ɛko ɛ bɔs nɛ yii di tɔ gwoo ɛ, etɛɛ náá, Klisto needi kukuma esa binek djas.

11 Tɔ ɛgwakel ɛ lena nɛ Klisto, mena naabelaka ɛkɛɛ nakɛkaa mena ɛ. Etɛɛ náá, Zɛɛb naaloozesɛ́ɛ mena tɔ ɛkwosak ɛ lɛ. Tin, Zɛɛb sa esonok djas ɛ́ dáa nyɛ di ekwyɛl ɛ, nɛ dáa nyɛ di ekwos ɛ. 12 Menabɛlka, bot ɛ nadi bot ɛ mɛkɛn é ɛwa ɛbwaalel ɛ lena nɛ Klisto ɔ, djhoodjɛka duu nɛ Zɛɛb, etɛɛ náá, nyɛ ɛ́ boo kukuma.

13 Biyɔ pe, é sok bi nagwak mɛkpa mɛ etsɛɛtsɛ ɛ, Mbɛɛ Bhaadal nadjɛ bin tsik ɛ, bi naadum koŋ nɛ Klisto. Dáa bi nadum koŋ nɛ nɛ ɛ, Zɛɛb naawa geka yɛ tɔ len. Geka tak ɛ́, Sisim na Dɛɛ yii nyɛ nakɛk bin ɛ. 14 Sisim na Dɛɛ ɛpedjɛ mena ɛbwaalel ɛ esa ee Zɛɛb nakwom étɛp bot ɛ mbyak'ɛ ɛ. Tin, nyɛ lɛɛ nɛ nena ɛ́ náá, menabɛlka bot ɛ di bot bɛ ɔ, mena aabelaka yɛ djas ɛ́, é sok nyɛ aasilal ɛpɛk ɛ mena tɔ ɛbiyo ɔ. Tin, djhooduwalka Zɛɛb!

15 Yɛ ɛ́ dum nɛ tɛp tak ɛ, ye di náá, mɛ naagwak dáa bot nadi elii kɔ ɛsu ɛ ɛdum ɛ koŋ ɛ len nɛ Ghɛŋ Yezu ɛ, dɔɔ nɛ kwyɛl bi baadi nɛ yɛ nɛ bot djas zedum koŋ nɛ Zɛɛb ɔ, 16 mɛ ààkat ɛbulal bhɔɔ nɛ Zɛɛb kɔ ɛsu ɛ len. Mɛ nɛ taala bin tɔ mendjaala mam. 17 Mɛ ɛpedjaala nɛ Zɛɛb, Sɛɛg mot duma, Sɛɛg ɛ Ghɛŋ'enaka Yezu Klisto, nyɛ djɛ bin Sisim etsoŋ, étɛp bi neegu nyɛ ɛnyɔɛpe. 18 Tin, mɛ ɛpebaadjaala étɛp náá, Zɛɛb neebɛɛ bin mis tɔ mɛkas mɛ, étɛp bi neegu mɛbɔk mɛ ɛbwaalel ɛ nyɛ djóo bin étɛp tak ɛ. Deenek, bi neegu mɛnyɔ mɛ esa e lyak, yii nyɛ aadjɛ nɛ bot ɛ mbyak na dɛɛ ɛ. 19 Deenek ɛ, bi aagu mɛbɔk mɛ mɛbwala mɛ nyɛ di nɛ yɛ, étɛp menabɛlka bot ɛ di edum koŋ nɛ nɛ ɔ. Tin, mɛbwala mɛ tak ɛ́, yii Zɛɛb nabatalyaal nɛ ghwyil djas, 20 é ghɛŋ nyɛ nagomal Klisto pak myoŋ ɛ. Bhii tak, nyɛ naadil Klisto é mbɔ eghɛŋ bɛ tɔ gwoo. 21 Klisto naanɛɛgaa kɔ efofop djas, kɔ esisim djas, kɔ ghwyil djas, kɔ mɛbwala djas. Din ɛ Klisto ɛ́ di ekɔk kɔ min djas di kɔ ɛko ɛ bɔs ɛ, ààkobɛ-bɛak é bhwak bot di mos'aak, yɛ ɛ́ dɔɔ nɛ é bhwak di ezyɛ ɛ. 22 Zɛɛb eesa náá, Klisto kɔk kɔ esonok djas, Zɛɛb naadjɛ nyɛ eghɛŋ tɔ zɛɛga mendjaala. 23 Bot ɛ zɛɛga mendjaala ɛ́ dáa nyel ɛ Klisto. Tin, Klisto ɛ́ tɔɔɔ tɔ lɔɔ dáa nyɛ di tɔɔɔ tɔ esonok djas ɛ.