1 É ghɛŋ sok, bi nadi ɛ́, bi naazegwyɛ ɛsyee ɛ sisim kɔ ɛsu ɛ ɛdjak ɛ len nɛ mesyem men. 2 Bi nadi ɛ́ si bhel embee mɛfulu mɛ bot ɛ bɔs'ak. Bi naadu kukuma embee esisim di pak gwoo nɛ bɔs ɛ. Kukuma tak ɛ di esa náá, bot djas di ààlooba nɛ Zɛɛb ɔ di si bhel'ɛ. 3 Tin, menabɛlka djas nasesaka esonok ɛ́ dáa bɔɔ. Mena nasesaka esonok ɛ́ dáa gwyes epuud nɛ embee esiiza bina nadi elwom mena ɛ. Deenek, Zɛɛb naazekpaa lyem kɔ ɛsu ɛ lena, dáa nyɛ nakpaa lyem nɛ bot ɛ sok ɛ.

4 Tin, Zɛɛb ɛ́ nɛ boo lyem ghoŋ, nyɛ nɛ kwyɛl mena ɛbuɛpe dhaa nyel. 5 Yɛ ɛ́ dum nɛ kwyɛl tak ɛ, nyɛ nasa náá, mena baadika nɛ tsik sama wat nɛ Klisto. Dáa ye di náá, mena naazegwyɛka étɛp ɛdjak ɛ lena ɛ, Zɛɛb natsik mena ɛ́ kɔ ɛsu ɛ enɛm nɛ embɛɛ bɛ. 6 Zɛɛb naagomal mena lɔɔg wat nɛ Yezu Klisto pak bɛmyoŋ, étɛp ɛdjɛ mena di sama wat nɛ nɛ pɛ tɔ gwoo. 7 Nyɛ eesa mena enɛm kɔ ɛsu ɛ Yezu Klisto, étɛp ɛlyaal bot aazyɛ djɛmɛn ɔ náá, mɛvu mɛ enɛm nɛ embɛɛ bɛ nɛ bɔk dhaa esonok djas. 8 Yɛ ɛ́ kɔ ɛsu ɛ enɛm nɛ embɛɛ e Zɛɛb ɛ, bi nabela tsik tɔ ɛdum ɛ koŋ ɛ len nɛ nɛ. Tsik tak ààpadus pɛ daa len, yɛ ɛ́ ɛkɛɛ ɛ Zɛɛb. 9 Ye tok etɛɛ náá, bi ɛpesa dhiiti enɛm esa. Tin, nyɛ djɛ bin yɛ ɛ́ yii toto. Ye nabɛ ɛ́, etɛɛ náá, bot needi ààbɛ nɛ ɛghɛɛa nyel. 10 Menaka ɛ́ bot ɛ Zɛɛb nakus ɔ. Dáa ye di náá, nyɛ nakus mena ɛ́, étɛp mena neesa embɛɛ mɛsa mɛ bot ɛ di tɔ ɛgwakel nɛ Yezu Klisto di egoka nɛ ɛsa ɛ. Yɛ ɛ́ embɛɛ mɛsa mɛ Zɛɛb nalookoobal náá, mena aasa ɛ.

11 Taalaka sa mɛ nalɛɛ nɛ nen é ghɛŋ sok ɛ. Bi nabɛ ɛ́ ààbyel tɔ bot ɛ mbyak eYuda. Bot ɛ mbyak eYuda nadi edjóo bin ɛ «bot ɛ nadi ààni beka ɔ». Bɔɔ kadjóoaa ɛ́ «bot ɛ zeni beka ɔ». Yɛ bɛ náá, bɛ nadjóoaa ɛ́ «bot ɛ zeni beka» ɔɔ, yɛ ɛ́ dum nɛ geka bot wa bɛ é mɛnyel ɛ. 12 É ghɛŋ tak, bi nabɛ ɛ́ ɛtsetaɛpe nɛ Klisto, bi nabɛ ɛ́ bɛdjoŋ, bi nabɛ ɛ́ ààdi tɔ mbyak Yisalaɛl. Tin, bi nabɛ ɛ́ ààlaŋaa tɔ ɛbhɛŋ ɛ nasael kɔ ekɛk e Zɛɛb ɛ. É di'enek, bi nabɛ ɛ́ ààbɛ nɛ ɛbwaalel, ààbɛ nɛ Zɛɛb kɔ ɛko ɛ bɔs. 13 Biyɔ bot ɛ nadi é ghɛŋ sok ɛtsetaɛpe nɛ Yezu Klisto ɔ, nenak yak, bi moo ɛ́ ɛkunaaɛpe nɛ nɛ. Nyɛ naaso ghiya yɛ kɔ ɛsu ɛ len étɛp bi neekunaa nɛ nɛ.

14 Etɛɛ náá, nyɛ ɛ́ di egwyem'enaka. Nyɛy ɛ́ mot nasa náá, bot ɛ mbyak eYuda nɛ bot ɛ di ààbɛ bot ɛ mbyak eYuda ɔ, di mbyak wat. É sok nyɛ naka nyel'ɛ ɛ, nyɛ naadis zyaala nadi ewa mbɛk pak membyak menek ɛ. 15 Tin, dum nɛ ɛsyee ɛ lɛ, nyɛ naadis ghwyil etsi nɛ mɛtiŋ mɛ eYuda étɛp ɛsa náá, bot ɛ mbyak eYuda nɛ bot ɛ di ààbɛ bot ɛ mbyak eYuda ɔ, di bot ɛ mbyak wat tɔ ɛgwakel nɛ nɛ. Yɛ ɛ́ deenek ɛ, nyɛ nawa egwyem tɔ membyak mɛmbá menek. 16 Kɔ ɛsu ɛ ɛsyee ɛ lɛ é mɛlaaba, Klisto naasɛɛg bɔɔ djas é nyel wat, da bulal bɛ tɔ ɛgwakel nɛ Zɛɛb. Yɛ ɛ́ tin é mɛlaaba ɛ, nyɛ nadis ɛbhina nadi pak'ɔɔ ɛ. 17 Klisto nazyɛ ɛ́ étɛp ɛgoola Mbɛɛ Bhaadal egwyem pɛ daa len, biyɔ bot ɛ nadi ɛtsetaɛpe nɛ Zɛɛb, dɔɔ nɛ bot ɛ nadi ɛkunaaɛpe nɛ Zɛɛb ɔ. 18 É di'enek, kɔ ɛsu ɛ Klisto, menabɛlka djas, bot ɛ di bot ɛ mbyak eYuda ɔ, nɛ bot ɛ di ààbɛ bot ɛ mbyak eYuda ɔ, menaka ɛ́ nɛ ghwyil ɛkatɔ́ pɛ daa Zɛɛb Sɛɛg'enaka, kɔ ɛsu ɛ mɛbwala mɛ Sisim na Dɛɛ.

19 Dáa ye di deenek ɛ́, biyɔ bot ɛ di ààbɛ bot ɛ mbyak eYuda ɔ, bi tokapɛ bɛdjoŋ. Bi tokapɛ bot ɛ dus pɛ kyee mɛdhik mɛ sis ɔ. Bi moo ɛ́ bot ɛ mbyak edɛɛ. Bi moo ɛ́ bot ɛ mɛbyel ɛ Zɛɛb. 20 Bi moo ɛ́ dáa ndjaa di náá, ghus-zumal tak ɛ́ bot ɛ lwoma nɛ bɛngoolel ɛ Mɛkpa ɛ Zɛɛb ɛ. Yezu Klisto, nyɛy ɛmet kadi ɛ́ ɛkok di epyet ndjaŋ ɛ. 21 Yɛ ɛ́ sama nɛ Klisto ɛ mɛkok mɛ zumal djas di epyet ndjaa. Ndjaa tak sumel ɛ́ étɛp ye needi di, Ndjaa-ebuwa na Dɛɛ yii Ghɛŋ. 22 Tɔ ɛgwakel ɛ len nɛ Yezu Klisto, biyɔ pe, bi ɛ́ bot ɛ zumal ndjaa-Zɛɛb. Tin, zɛɛga nɛ bɔn-nyɛɛg bin djas, bi moo ɛ́ ndjaa-Zɛɛb aadi tɔ tak é ze Sisim yɛ ɛ.