1 Mɛ kwyɛl ɛ bi gu tuub mɛ di eduu kɔ ɛsu ɛ len ɛ, étɛp ekeletyɛ e ghaada Laodhise zɛnɔɔ bɛdhiiti ekeletyɛ di ààgu mɛ ɔ. 2 Mɛ ɛpelyel bham étɛp ɛdjɛ bin mɛghaaz, étɛp bi neekwyɛla pak’en nɛ lyem wat. Mɛ baakwyɛl pe ɛ́, Zɛɛb sɛɛ bin mɛtel, etɛɛ náá, bi needi nɛ bɛtɛ nɛ etsoŋ. Deenek ɛ bi aagu sa Zɛɛb di syela ɛ, ye kwyɛl ɛlɛɛ ɛ́, Klisto nyɛy ɛmet. 3 Ekum e etsoŋ djas nɛ yii ɛgu, yɛ ɛ́ syela tɔ Klisto. 4 Mɛ lɛɛ bin etɛp bak ɛ, ekaab náá, bot ɛzɛkɛkɔp bin nɛ elɛŋ etsal. 5 Ye nakoozodi náá, mɛ ɛ́ ɛtsetaɛpe nɛ nen tɔ epuud, tin, mɛ ɛ́ é ngwoob’en tɔ Sisim. Mɛ ɛ́ nɛ mɛmyaala dáa mɛ di ebee bin tɔ ɛgwakel ɛnyɔɛpe nɛ dáa bi di epyet tɔ ɛdum ɛ koŋ nɛ Klisto ɛ.

6 Deenek, dáa ye di náá, bi eezemyaal Yezu Klisto dáa Ghɛŋ ɛ, kɛka tɔ ɛgwakel nɛ nɛ. 7 Pyetka tɔ lɛ dáa ekaŋal e le di epyet tɔ bɔs ɛ, da bi ɛ́ dil tsik’en djas kɔ lɛ. Dika ghiŋ tɔ ɛdum ɛ koŋ nɛ Zɛɛb, dáa bɛ nalyo bin ɛ, da bi ɛ́ gheebubulal bhɔɔ nɛ Zɛɛb.

8 Bi ɛkobaka, sa mot ààkɔp bin nɛ elɛŋ e etsal, yii etsoŋ e bot ɛ bɔs di ààval dhiiti sonok ɛ. Yɛ ɛ́ elɛŋ e etsal di ebela ɛsuk tɔ etɛp e bot ɛ bɔs ɛ, tɔ embee esisim ee di edhek bot ɛ bɔs ɛ. Yɛ ààbela ɛsuk tɔ Klisto. 9 Etɛɛ náá, sa djas di tɔ Zɛɛb ɛ, yɛ eezebe di tɔ nyel ɛ Klisto. Yɛ ɛ́ tɔɔɔ tɔ lɛ. 10 Yɛ ɛ́ nɛ nɛ ɛ bi nabela esa djas. Nyɛy ɛ́ mot di ekɔk kɔ ekukuma djas nɛ bɛmɛbwala djas ɔ.

11 Dáa bi moo tɔ ɛgwakel nɛ Klisto ɛ, Zɛɛb eewa geka tɔ len. Geka tak ɛ́ ɛni ɛ beka, ye tok beka epuud bot ɛ bɔs di esa ɛ. Tin, yɛ ɛ́ beka di edus pɛ daa Klisto ɛ, étɛp ɛpɛk mena tɔ nyel epuud e syem bot di nɛ yɛ’aak. 12 Etɛɛ náá, é ghɛŋ bi naduwa Zɛɛb ɛ, bi nabɛ ɛ́, bi eedelaa sama nɛ Klisto. Tin, biyɔ pe, bi naabaagom sama nɛ nɛ, etɛɛ náá, bi naadum koŋ nɛ mɛbwala mɛ Zɛɛb, mot nagomal Klisto pak bot ɛ nazegwyɛ ɔ. 13 É ghɛŋ sok, bi nadi ɛ́, bi eezegwyɛ tɔ sisim kɔ ɛsu ɛ ɛdjak ɛ len, dɔɔ nɛ, etɛɛ náá, bi nabɛ ɛ́ ààniigelaa beka di edus pɛ daa Zɛɛb ɛ. Tin, Zɛɛb eedjɛ bin tsik sama nɛ Klisto, nyɛ eepel ɛdjak ɛ lena djas. 14 Nyɛ naazenyaa mɛkana mɛ nakwyalaa étɛp ɛkwyesal mena ndjɛ sɔs ɛ. Mɛkana mɛ tak nabɛ ɛ́ ààbɛ nɛ tɛtɛ ɛgwakel nɛ nena kɔ ɛsu ɛ mɛtiŋ mɛ nawaaa tɔ tak ɛ. Zɛɛb naazewaaz yɛ, bem yɛ é mɛlaaba ɛ Klisto. 15 É ghɛŋ Yezu nagwyɛ kɔ mɛlaaba ɛ, ye nabɛ ɛ́, Zɛɛb naadis ghwyil mɛbwala mɛ nadi pɛ tɔ embee esisim ɛ. Deenek, Zɛɛb naakɔl bɛ nɛ ekel e eghwooz dáa bot ɛ membok, da waal bɛ é mis mɛ bot djas, étɛp ɛlyaal náá, nyɛ naakwak bɛ kɔ mɛlaaba ɛ Klisto.

16 É di’enek, sa bi ààbet náá, mot pɛ́ɛ bin kɔ ɛsu ɛ sa dek. Sa bɛ ààkopɛ́ɛ bin pɛ́ɛak kɔ ɛsu ɛ mɛbyoŋ: mɛbyoŋ mɛ ngɔn na bes, nɛghu mɛbyoŋ mɛ dwoo saba. 17 Djas’enek lyaal ɛ́, esa ee aaboosael ɛ, tin, etsɛɛtsɛ e tak ɛ́ tɔ Klisto. 18 Sa bi ààbet náá, bot ɛ mɛdjhaaz pɛ ɛko bhimis pɛ si di eduwal efofop ɔ sa náá, bi su efute bi di egoka nɛ ɛbela ɛ. Bɛ nɛ dyeebaghɛɛ mɛnyel dum nɛ etɛp bɛ di ebee tɔ mɛdhyam ɛ. Mbi bot binɔk nɛ ben mɛnyel mɔɔ tɔ toto, etɛɛ náá, yɛ ɛ́ esiiza e bot ɛ bɔs. 19 Bɛ tokapɛ sama nɛ Klisto, mot di kukuma yɔbɔ ɔ. Ghuna nyɛy ɛ́ dáa lo, bot ɛ di dum koŋ nɛ nɛ ɔ kadi ɛ́ dáa epuud nɛ mɛtii mɛ nyel’ɛ. É di’enek, bɔɔ djas ɛ́ mbaata é nyel ɛ Klisto, bɛ ɛpewyee dáa Zɛɛb di ekwyɛl ɛ.

20 Bi naazegwyɛ sama nɛ Klisto, étɛp bi needi pɛka si ghwyil embee esisim di kɔ ɛko ɛ bɔs ɛ. Deenek, haaa étɛp yé bi di dáa bot ɛ́ di si bhel esa e bɔs’ak? Bi ɛpemyaal náá, bot besal bin náá, bi myaal mbi mɛtiŋ mak: 21 «Sa wɔ ààdɛ yak mbi sonok», «Sa wɔ ààbowal yak mbi sonok», nɛghu «Ààmɛt-mɛtak!» 22 Esonok binek djas ɛ́ esa ee di náá, yɛ waapulel, bhii bɛ aabe yɛ ɛ! Yenek djas ɛ́ mɛtiŋ nɛ mɛlyo mɛ bot ɛ bɔs di ekus ɛ. 23 Yɛ ɛ́ tsɛɛtsɛ náá, mɛtiŋ menek ɛpenɔŋel nɛ mɛlyo mɛ etsoŋ, etɛɛ náá, yɛ ɛ́ mɛsa mɛ etsi e bɛbhaab, ɛdi ɛ́ tɔ mɛsila, da gel mɛnyel étɛp ɛduwal ɛ Zɛɛb. Tin, mɛtiŋ mɛ tak ààval dhiiti sonok, yɛ ààsa náá, bot kat embee mɛkwosak mɛ bot di nɛ yɛ ɛ.