1 Yezu eezɛke náá: «Mɛ lɛɛ bin ɛ́ etɛp e tsɛɛtsɛ náá, mot ɛ di ààni tɔ beeba ebhata pɛ ɛniel ɔɔ, nyɛ tsel peeb tselak é dhiiti di ɔɔ, yenɔk mot ɛ mot djii, nyɛ ɛ́ mot ɛzɛm. 2 Deenek, mot di eni pɛ ɛbɛ ɛ beeba ebhata ɔ, nyɛy ɛ́ di mbaalel ebhata. 3 É di’enek, mbaalel beeba ebhata ɛ́ waadii nyɛ ɛbɛ ɛ beeba. Deenek, ebhata ɛ́ waagwak gwood’ɛ, nyɛ kadjóo bɛ ɛ́, ngɔt-ngɔt nɛ min mɔɔ. Bhii tak, nyɛ ɛ́ wyisal bɛ pɛ kel. 4 Bhii nyɛ aazewyisal bɔɔ djas pɛ kel ɛ, nyɛ kakɛ ɛ́ pɛ sok, ebhata edu nyɛ pɛ bhis, etɛɛ náá, bɛ nɛ gu gwood’ɛ. 5 Tin, ebhata tok nɛ ghwyil ɛdu ndjoŋ mot. Deenek, bɛ waakaab nyɛ, tɔ́ ɛtsetaɛpe, etɛɛ náá, bɛ ààgu gwood’ɛ.»

6 É sok Yezu di elɛɛ bɛ kana yenek ɛ, bot ɛ nadi egwak nyɛ ɔ, nabɛ ɛ́ àànyɔ ɛmɛt ɛsuk ɛ kana tak.

7 Yezu eebaazɛke náá: «Mɛ lɛɛ bin ɛ́ etɛp e tsɛɛtsɛ náá, yɛ ɛ́ mam ɛ di ɛbɛ ɛ ɛniel beeba ebhata. 8 Bot djas nazyɛ ɛsok nɛ nam ɔ, nabɛ ɛ́ bot ɛ djii, bot ɛ ɛzɛm. Deenek, ebhata nabɛ ɛ́ ààgwak bɛ.

9 Yɛ ɛ́ mam ɛ di ɛbɛ ɛ ndjaa. Mot aadhaa pɛ daa lam etɛp nyɛ neeni ɔ, nyɛ waabela tsik. Nyɛ ɛ́ nɛ ghwyil ɛni nɛ ɛwyis dáa nyɛ kwyɛl ɛ. Nyɛ waabela edee e dek. 10 Etɛɛ náá, mot djii zyɛ ɛ́ étɛp ɛzɛdjii, nɛ ɛzɛgó, nɛ ɛzɛsaab. Mam nazyɛ ɛ́, etɛɛ náá, bot neebela tsik, bɛ neebela esa djas di egoka nɛ nɔɔ étɛp bɛ needi tɔ mbɛɛ tsik ɛ.

11 Yɛ ɛ́ mam ɛ di mbɛɛ mbaalel ebhata, mbɛɛ mbaalel ka tsik’ɛ gha ɛ́ kɔ ɛsu ɛ ebhata bɛ. 12 Mot di ebaal ebhata, étɛp nyɛ neetuudaa nɛ epata ɔ, nyɛ tok mbaalel ebhata nɛ tsɛɛtsɛ, etɛɛ náá, ebhata tok bɛ. Nyɛ bee eben ezyɛ ɔɔ, nyɛ ɛ́ nɛ ghwyil ɛdhuugal ɛsaŋ ɛ ebhata, da nyɛ ɛ́ kpaa nɛ kaab. É di’enek, eben ɛ́ waaghaaga ɛsaa ebhata binɔk é nyel, nɔɔ bɛ, dɛ bɛ nɛ ɛtwak ɛ bɛ. 13 Beeka, ye sael deenek ɛ́, etɛɛ náá, mot tak sa mɛsa ɛ, etɛp nyɛ neetuudaa. Nyɛ ààbem ba nɛ tɛp ebhata.

14 Yɛ ɛ́ mam ɛ di mbɛɛ mbaalel ebhata. Etɛɛ náá, mɛ nɛ gu ebhata bam, ebhata bam pe nɛ gu mɛ. 15 Tyee wat nɛ dáa Saagam di egu mɛ ɛ, mam pe nɛ gu Saagam. Yɛ ɛ́ deenek ɛ́ mɛ di eka tsik’am gha kɔ ɛsu ɛ ebhata bam. 16 Mɛ ɛ́ nɛ edhiiti ebhata di náá, bɛ dinaa ààpani tɔ beeba ɛ. Ye goka ɛ́ náá, mɛ kɛnɔɔ bɛ, etɛp ɛdjɛɛd ɛ́ bɛ. Bɛ waagwak gwood’am. Bhii tak bɛ waazyɛ bɔɔ bɛmet zɛsɛɛga nɛ bɔɔ bɛsɔ bɔɔ, si mɛko mɛ mbaalel ngɔt.

17 Saagam dyeebakwyɛl mɛ ɛ́, etɛɛ náá, mɛ nɛ ka tsik’am gha, bhii tak da mɛ ɛ́ baanɔɔ yɛ. 18 Mot tok nɛ ghwyil ɛnɔɔ tsik’am. Yɛ ɛ́ mam mɛ ɛmet ɛ di eka yɛ nɛ ɛkwosak ɛ lyem’am. Mɛ ɛ́ nɛ ghwyil ɛdjɛ yɛ, mɛ ɛ́ nɛ ghwyil ɛbaanɔɔ yɛ. Yɛ ɛ́ ɛtiŋ ɛ Saagam nadjɛ mɛ ɛ.»

19 Mɛkpa menek ɛ́ nabaazɛwa mɛbɛka ɛlyelɛpe pak eYuda. 20 Kyee wat eYuda náá: «Mot’ak ɛ́ nɛ mbee sisim tɔ lɛ! Nyɛ ɛ́ mot mɛlyet! Étɛp yé bi di egwak etɛp bɛ?» 21 Yak kyee náá: «Mot di nɛ embee esisim tɔ lɛ ɔ, tok nɛ ghwyil ɛlii dáa nyɛ di elii’aak. Embee sisim ɛ́ nɛ ghwyil ɛtsik mot edhim nyɛ nyaasok é?»

22 Ye nabɛ ɛ́, é mbu kwol, pɛ Yeluzalɛm bɛ nadi ebɔl ɛbyoŋ ɛ bɛ nadi etaala dwoo Ndjaa-ebuwa nadiiaa ɛ. 23 Yezu nadi eduula si mɛbhaaz mɛ kok Ndjaa-ebuwa nagetaa din «bhaaz ɛ Salomɔŋ» ɛ. 24 Tin, wɔ gwaa eYuda zɛsɛɛga é ngwoob’ɛ, bɛ ɛ́ boozɛdji nyɛ náá: «Wɔ kwyɛl ɛ́ náá, bis di é bhwood kɛkum yaa ɛwala? Nɛghu wɔ ɛ́ Mɛsia ɔɔ, lɛɛa bis ɛnyɔɛpe, étɛp bis neegwak.» 25 Yezu eezɛbɔɔza nɛ nɔɔ náá: «Mɛ nabɛ ɛ́, mɛ eezelɛɛ bin, bi ààkwyɛl ɛmyaal ɛ mɛ. Sonok esa e mɛbwala mɛ mɛ di esa nɛ din ɛ Saagam ɛ, yɛ ɛpetaŋal é di yam. 26 Tin, bi di ààmyaal mɛ ɛ́, etɛɛ náá, bi tok tɔ ɛsaa ɛ ebhata bam. 27 Ɛsaŋ ɛ ebhata bam nɛ gwak gwood’am, mɛ nɛ gu bɛ, bɛ nɛ du mɛ. 28 Mɛ ɛpedjɛ bɛ tsik na kɔm-kɔm, bɛ aanàkwaadiib dhiiti dwoo. Mot tok nɛ ghwyil ɛdɛk mɛ bak. 29 Sa Saagam nadjɛ mɛ ɛ, eedhaa esonok djas. Étɛp tak ɛ di náá, dhiiti mot tok nɛ ghwyil ɛdɛk sa tak tɔ mbɔ Saagam. 30 Mam nɛ Saagam, bis ɛ́ mot ngɔt.»

31 Tin, wɔ gwaa eYuda baazɛtek mɛkok, étɛp bɛ neegó nyɛ nɛ yɛ. 32 É di’enek, Yezu eezɛke nɛ nɔɔ náá: «Mɛ eedyeebazelyaal bin embɛɛ mɛsa mɛ Saagam. Tɔ mɛsa menek djas, kɔ esu ɛ yaa mɛsa, bi di ekwyɛl ɛgó ɛ́ mɛ nɛ mɛkok?» 33 Tin, eYuda eezɛbɔɔza nɛ nɛ náá: «Bis ààsaŋ ɛgó ɛ́ wɔ nɛ mɛkok étɛp embɛɛ mɛsa. Bis saŋ ɛgó ɛ́ wɔ etɛɛ náá, wɔ ɛpebyasal Zɛɛb! Dhi wɔ di mot, wɔ kwyɛl ɛlyaal bot ɛ náá, wɔ ɛ́ Zɛɛb!» 34 É di’enek, Yezu ɛ́ boozɛbɔɔza nɛ nɔɔ náá: «Tɔ etsi bin, Ekwyala ke náá: "Mɛ ke ɛ́ náá, bi ɛ́ bɛzɛɛb*10.34 Mɛd 82.6." 35 Mena nɛ guka náá, mena tokeka nɛ ghwyil ɛdis sa Ekwyala di elɛɛ ɛ. Deenek, Zɛɛb djóo bot ɛ di egwak mɛkpa mɛ ɔ, "bɛzɛɛb". 36 Yɛ kabɛ mam ɔɔ, Saagam naazetɔ mɛ, bhii tak, nyɛ eezɛlwom mɛ kɔ bɔs. Étɛp yé bi di eke náá, mɛ eelee Zɛɛb, etɛɛ náá, mɛ eelɛɛ náá: "Mɛ ɛ́ Mɔn ɛ Zɛɛb" é? 37 Yɛ bɛ náá, mɛsa mɛ mɛ di esa ɛ, tok mɛsa mɛ Saagam ɔɔ, yɛ ɛ́ deenek ɛ́ bi aadi ààdum koŋ nɛ nam. 38 Tin, mɛ kosa mɛsa mɛ Saagam ɔɔ, bi aanàdum koŋ nɛ nam. Dumka koŋ dum nɛ endem e mɛbwala mɛ mɛ di esa ɛ. Étɛp bi neegu gua wat náá, Saagam ɛ́ tɔ lam, deenek mam ɛ́ tɔ Saagam.» 39 Deenek, bɛ nabaadi ɛ́, esaa dáa bɛ mɛt nyɛ. Tin, nyɛ naadus bɛ é mɛmbɔ.

40 Bhii tak, Yezu eebaazɛtɔ́ pɛ yii kyiid dii Yuldɛn, é di Zaŋ Nduuel-bot nadi eduu bot Zɛɛb sok ɔ. Nyɛ eekɛdi ba mɛlu penek. 41 Tin, wɔ gwaa mɛdhuu mɛ bot zokazyɛ pɛ nyɛ nadi ɛ́. Bot ɛ tak eezɛke nɛ nɛ náá: «Zaŋ nabɛ ɛ́ ààsa dhiiti ndem mɛbwala mɛ wat. Beeka náá, etɛp djas nyɛ nadi elɛɛ dum nɛ mot tak ɛ, djas ɛ́ tsɛɛtsɛ.» 42 É di’enek, bot ɛbuɛpe naazɛdum koŋ nɛ Yezu.