1 Yezu eezɛtɔ́ pɛ ɛtsok pyeeb oliv*. 2 Kɛɛŋ tɔ mɛlem, nyɛ eebaazɛsik pɛ kok Ndjaa-ebuwa. Tin, bot ɛbuɛpe eezɛzyɛ pɛ daa lɛ. Nyɛ eezɛnɔɔ nyel, disi, nyɛ moo tin elyo bɛ. 3 É di'enek, bɛghaŋ ɛ mɛkana mɛ etsi, nɛ eFalizyɛ eezɛzyɛ nyɛ nɛ dhiiti moma ngɔt namɛtaa esa ɛzɔ ɔ. Bɛ eezɛnɛɛg nyɛ kuku ɛbwak, 4 bɛ eezɛke nɛ Yezu náá: «Lyoel, bis mɛt moma yak ɛ́, nyɛy esa ɛzɔ. 5 Tɔ etsi ɛ Moiiz, ye lɛɛ ɛ́ náá, ye goka ɛ́ náá, moma yak góaa nɛ mɛkok*. Yɛ kabɛ wɔy ɔɔ, wɔ ke náá, bɛ sa moma yak dáa?»

6 Bɛ nadi eke deenek ɛ́, étɛp ɛlóo ɛ́ nyɛ pɛ ɛko, da bwood nyɛ pɛ kyɛ. Etɛɛ náá, bhii tak bɛ neekɛpit nyɛ. É di'enek, Yezu eezɛsil mis si, nyɛ moo ekwyal é bɔs nɛ djin. 7 Dáa bɛghaŋ ɛ mɛkana mɛ etsi, nɛ eFalizyɛ nadi ebelal nyɛ nɛ mɛdjin ɛ, nyɛ ɛ́ booben lo, gwyák bɛ. Bhii tak, nyɛ eezɛke nɛ nɔɔ náá: «Pak biyɔ djas di tin yenek, mot di náá, nyɛ dinaa ààpasa mesyem ɔ, nyɛ di mot mɛkɛn e ɛwus moma yak ɛkok!» 8 Bhii tak nyɛ eebaazɛmalal, tin nyɛ eebaakan ɛkwyal é bɔs. 9 Dáa bɛ nagwak deenek ɛ́, tin kili, mot nɛ mot naazɛliig mis, sik, kan nɛ eboo bot, zɛnɔɔ mengbaaz nɛ bɔɔ dhyeeb. Bhii tak, Yezu nazokalik ɛ́ bɔɔ bɛbá, bɛ nɛ moma nadi tetel sok bhwoob'ɛ ɔ.

10 É di'enek, Yezu eezɛben lo bhii tak, nyɛ eezɛke nɛ moma tak náá: «Wɛn moma, bot ɛ zɛpit wɔ ɔ moo wo? Tɔ sama yɔɔ, ye tok nɛ mot kwyesal wɔ ndjɛ sɔs é?» 11 Moma tak eezɛbɔɔza náá: «Ààbɛ, Ghɛŋ! Mot ààpakwyesal mɛ ndjɛ sɔs.» Deenek Yezu ɛ́ boozɛke nɛ nɛ náá: «Dɔɔ nɛ mam pe, mɛ ààpakwyesal wɔ ndjɛ sɔs. Tɔ́a yɔ, sa wɔ ààbaasa mesyem.»]

12 Bhii tak, Yezu eebaazɛlii nɛ mɛdhuu mɛ bot ɛ nadi tin ɔ náá: «Yɛ ɛ́ mam ɛ di gwyɛ ngel bot ɛ bɔs djas. Mot aadu mɛ ɔ, nyɛ aanàkwaabaakɛ tɔ ghooghom. Nyɛ waabela gwyɛ ngel di edjɛ tsik ɛ.» 13 EFalizyɛ eezɛdji nyɛ náá: «Wɔ lɛɛ etɛp e nyel'ɔ wɔy wɔ ɛmet ɔɔ, ye kwyɛl ɛlɛɛ ɛ́ náá, etɛp ee wɔ di elɛɛ ɛ, ye tok nɛ ghwyil ɛmyaalaa.» 14 Tin, Yezu eezɛbɔɔza nɛ nɔɔ náá: «Yɛ kobɛ náá, mɛ ɛpelɛɛ etɛp e nyel'am mam ɛmet ɔɔ, etɛp mɛ di elɛɛ ɛ, yɛ ɛ́ tsɛɛtsɛ. Etɛɛ náá, mɛ nɛ gu pɛ pak mɛ dus ɛ, nɛ pɛ pak mɛ di etɔ́ ɛ. Deenek, biyɔ, bi ààgu pɛ pak mɛ nadus ɛ, nɛ pɛ pak mɛ di etɔ́ ɛ. 15 Bi pɛ́ɛ mɛ ɛ́ nɛ etsoŋ ee bi di epɛ́ɛ bot ɛ bɔs ɛ. Mam ààpɛ́ɛ bot. 16 Guka náá, mam ɛ pɛ́ɛ bot ɔɔ, epɛ́ɛ bam aadi ɛ́, tɛtɛ epɛ́ɛ. Etɛɛ náá, tɔ epɛ́ɛ bam, mɛ tok mam mɛ ɛmet. Mɛ pɛ́ɛ bot ɛ, bis nɛ Saagam, mot nadhis mɛ ɔ. 17 Tɔ etsi bin, yɛ ɛ́ kwyala náá, bot ɛbá ɛ di ekaada tɛp tyee wat ɔɔ, tɛp tak ɛ́ tsɛɛtsɛ*. 18 Yɛ ɛ́ mam nakuma nyel ɛ di elɛɛ bin etɛp bam. Dɔɔ nɛ Saagam, mot nadhis mɛ ɔ, nyɛ ɛpebaalɛɛ etɛp bam.» 19 Tin, wɔ gwaa eFalizyɛ zɛdji nyɛ náá: «Soog ɛ́ wo?» Yezu eezɛbɔɔza náá: «Bi ààgu mɛ. Bi ààbaagu pe Saagam. Bi ɛpedi ɛ́ di egu mɛ ɔɔ, pe bi nɛ gu pe Saagam.»

20 Yezu nadi edjɛ bot mɛlyo deenek ɛ́, nyɛy tɔ kok Ndjaa-ebuwa. Nyɛ nadi ɛ́ é ngwoob ɛbɔɔl ɛ bot nawewa epata e ɛkɛɛ ɛ Zɛɛb ɛ. Tin, Yezu nabɛ ààmɛtaa etɛɛ náá, ɛwala nabɛ náá, nyɛ aamɛtaa ɛ, nabɛ ɛ́ ye dinaa ààkum.

21 Yezu eebaazɛke nɛ nɔɔ náá: «Mɛ waatɔ́, bi ɛ́ waasaa mɛ. Tin, bi ɛ́ waagwyɛ tɔ esyem bin. Bi aanàkum pɛ pak mɛ aatɔ́ ɛ́.» 22 Tin, ekukuma eYuda eezɛdjinel pak'ɔɔ náá: «Nyɛ aatɔ́ bilak ɛ́, kɛyeeda, etɛɛ náá, nyɛ ke ɛ́ náá: "Bi tok nɛ ghwyil ɛtɔ́ pɛ pak mam aatɔ́ ɛ́".» 23 É di'enek, Yezu eezɛbɔɔza nɛ nɔɔ náá: «Biyɔ, bi ɛ́ bot ɛ si, mam ɛ́ mot ɛko. Bi ɛ́ bot ɛ bɔs'ak, mam tok mot bɔs'ak. 24 Etɛp tak ɛ́ mɛ ke nɛ nen náá, bi aagwyɛ tɔ mesyem men. Bi ɛ di ààmyaal náá, yɛ ɛ́ mam ɛ di mot mɛ di elɛɛ náá, "yɛ ɛ́ mam ɔɔ", tsɛɛtsɛ bi ɛ́ waagwyɛ tɔ mesyem men.» 25 EFalizyɛ zokabaazɛdji Yezu náá: «Wɔy ɛ́ yɔ zɛ?» Yezu eezɛbɔɔza náá: «Mɛ ɛ́ mot mɛ nanyɛl ɛlɛɛ bin é mɛkɛn mɛ mɛlyo mam ɔ. 26 Mɛ ɛ́ nɛ bɛtɛ nɛ etɛp kɔ ɛsu ɛ len, nɛ yii ɛpɛ́ɛ bin. Tin, mot nalwom mɛ ɔ lɛɛ ɛ́ etɛp e tsɛɛtsɛ, etɛp ee mɛ nadjek pɛ daa lɛ ɔ, mɛ ɛpegoola yɛ nɛ bot kɔ bɔs.»

27 É ghɛŋ nyɛ nadi elii deenek ɛ́, bɛ nabɛ ɛ́ ààsiiza náá, nyɛ nadi elii ɛ́, dum nɛ Sɛɛg. 28 É di'enek, Yezu eezɛke nɛ nɔɔ náá: «É sok bi aakan ɛben Sɛɛŋɛlɛ Mɔn Mot ɛ, é di'enek ɛ bi aagwyak náá, mam ɛ́ di mot mɛ di elɛɛ náá, "mam ɛ́ mot di ɔ". Bi ɛ́ waagu náá, mam ààsa esonok nɛ ɛkwosak ɛ lyem'am. Mɛ lɛɛ ɛ́ etɛp ee Saagam nalyo mɛ ɛ. 29 Mot nalwom mɛ ɔ, nyɛ ɛ́ lɔɔg wat bis nɛ nɛ. Nyɛ ààpabet mɛ mam ɛmet, etɛɛ náá, mɛ dyeebasa ɛ́, esa ee lyem'ɛ di ekwyɛl ɛ.» 30 Dáa Yezu nadi elii deenek ɛ́, bot ɛbuɛpe naadum koŋ nɛ nɛ.

31 Tin, Yezu eezɛke nɛ eYuda nadum koŋ nɛ nɛ ɔ náá: «Bi ɛ kɛ tɔ esosoob dáa mɛkpa mam di ekwyɛl ɔɔ, bi ɛ́ bɛdjekel bam nɛ tsɛɛtsɛ. 32 Étɛp tak ɛ di náá, bi ɛ́ waagu etsɛɛtsɛ, bhii tak, etsɛɛtsɛ waapɛk bin tɔ ekwom.» 33 Bɛ eezɛbɔɔza náá: «Bis ɛ́ bɔn bɛdha ɛ Abalaam, bis dinaa ààpakodi ekwom e mot dhiiti dwoo. Étɛp yé wɔ di eke náá: "Bi ɛ́ waapɛkaa tɔ ekwom"?» 34 Tin, Yezu eezɛbɔɔza nɛ nɔɔ náá, «Nɛ tsɛɛtsɛ mɛ lɛɛ bin ɛ́ náá, bot djas di esa mesyem ɔ, bɛ ɛ́ ekwom e mesyem. 35 Deenek, mot di kwom ɔ, tok nɛ ghwyil ɛliiza mot mɛbyel na kɔm-kɔm. Tin, mɔn di mot mɛbyel ɔ, nyɛ ɛ́ mot mɛbyel na kɔm-kɔm. 36 É di'enek, yɛ bɛ náá, mɔn eepɛk wɔ tɔ ekwom ɔɔ, wɔ moo ɛ́ pɛka nɛ tsɛɛtsɛ.

37 Mɛ nɛ gu náá, bi ɛ́ bɔɔ bɛdha ɛ Abalaam. Haaa étɛp yé bi di esaŋ ɛgó ɛ mɛ? Yɛ ɛ́ etɛɛ náá, bi ààmyaal etɛp ee mɛ di elɛɛ bin ɛ. 38 Mam lɛɛ bin ɛ́ etɛp ee mɛ nabee pɛ daa Saagam ɛ. Yɛ kabɛ biyɔ ɔɔ, bi sa ɛ́ etɛp sɛɛg'en nalɛɛ bin ɛ.» 39 Wɔ gwaa, bɛ baazɛbɔɔza nɛ Yezu: «Yesɔ sɛɛg ɛ́ Abalaam.» Deenek, Yezu eezɛke nɛ nɔɔ náá: «Bi ɛpedi ɛ́ bɔn ɛ Abalaam nɛ tsɛɛtsɛ ɔɔ, pe bi sa etɛp ɛ dáa nyɛy. 40 Mɛ eelɛɛ bin etsɛɛtsɛ ee Zɛɛb nalyaal mɛ ɛ. Tin, bi kakwyɛl ɛ́ ɛgó ɛ mɛ. Abalaam nabɛ ɛ́ ààsa deenek. 41 Biyɔ, bi sa ɛ́ mɛsa mɛ wat bi nɛ sɛɛg'en.» Bɛ eezɛbaayala nɛ Yezu náá: «Bis tok bɔn mbel, bis ɛ́ bɔn du etɛɛ náá, Sɛɛg'es ɛ́ Zɛɛb nyɛ ɛmet.» 42 Yezu eebaazɛbɔɔza nɛ nɔɔ náá: «Zɛɛb ɛpedi Sɛɛg'en ɔɔ, pe bi ɛpekwyɛl mɛ. Etɛɛ náá, Zɛɛb ɛ́ nadhis mɛ. Mɛ di wak ɛ́ é di ɛ Zɛɛb. Mɛ nabɛ ɛ́ ààzyɛ kɔ ɛkwosak ɛ lam. Yɛ ɛ́ Zɛɛb ɛ nadhis mɛ.

43 Étɛp yé bi di ààmɛt etɛp ee mɛ di elɛɛ bin ɛ? Yɛ ɛ́ etɛɛ náá, bi tok nɛ ghwyil ɛgwak mɛkpa mam. 44 Deenek sɛɛg'en ɛ́ dim mot mɛkɔŋ. Tin, bi dyeebasa ɛ́, mɛsa mɛ sɛɛg'en di ekwyɛl ɛ. Nyɛ nadi ɛ́, mot ɛgó ɛ bot, kana bɔs nakusaa ɛ. Nyɛ dinaa ààpakokɛ tɔ etsɛɛtsɛ etɛɛ náá, etsɛɛtsɛ tok tɔ lɛ. É sok nyɛ di, nyɛ moo elɛɛ elɛŋ etsal ɛ, nyɛ lɛɛ yɛ ɛ́ nɛ lyem wat. Etɛɛ náá, nyɛ ɛ́ mot etsal, nyɛ ɛ́ sɛɛg mɛkɔŋ. 45 Tin, yɛ kabɛ mam ɔɔ, mɛ dyeebalɛɛ ɛ́ etɛp ee di tsɛɛtsɛ ɛ. Yɛ ɛ́ étɛp tak ɛ bi di ààmyaal mɛ. 46 Tɔ lɔɔg'en, ɛzɛ aaben djin náá, mɛ eesa mesyem? Yɛ bɛ náá, mɛ eelɛɛ etɛp ee di náá, yɛ ɛ́ etsɛɛtsɛ ɔɔ, étɛp yé bi di ààmyaal mɛ? 47 Mot di mot Zɛɛb ɔ, nɛ gwak Mɛkpa ɛ Zɛɛb. Tin, dáa bi di ààgwak mɛkpa mam ɛ, ye lyaal ɛ́ náá, bi tok bot ɛ nadus pɛ daa Zɛɛb ɔ.»

48 Tinaak eYuda zokazɛke nɛ Yezu náá: «Bis ɛ́ nɛ gham nɛ ɛke ɛ́ náá, wɔ ɛ́ mot kyee dik Samaali, wɔ ɛ́ nɛ mbee sisim tɔ lɔ.» 49 Yezu eezɛbɔɔza nɛ nɔɔ náá: «Ààbɛ! Mɛ tok nɛ mbee sisim tɔ lam. Mɛ kwyɛl ɛ́ ɛdjɛ duu nɛ Saagam. Kabela ɛ́ náá, biyɔ, bi ààkwyɛl ɛdjɛ mɛ duu. 50 Mam ààsaa duu kɔ ɛsu ɛ lam met. Etɛɛ náá, yɛ ɛ́ nɛ mot ngɔt di esaa duu'am ɔ. Nyɛ ɛ́ di epɛ́ɛ bot tɔ epiki. 51 Tsɛɛtsɛ mɛ lɛɛ bin etɛp e tsɛɛtsɛ ɛ́ náá, mot di ekɛ dáa mɛkpa mam di elɛɛ ɔ, nyɛ aanàkwaagwyɛ.»

52 EYuda eebaazɛke nɛ nɛ náá: «Tin, bis eemyaal tsɛɛtsɛ náá, yɛ ɛ́ mbee sisim ɛ di edhek wɔ! Etɛɛ náá, Abalaam naazegwyɛ. Bɛngoolel ɛ Mɛkpa ɛ Zɛɛb naabaazegwyɛ yɔbɔ pe. Bɔɔ djas naazegwyɛ, wɔ kabaake ɛ́ náá: "Mot di ekɛ dáa mɛkpa mam di elɛɛ ɔ, nyɛ aanàkwaagwyɛ." 53 Abalaam, sɛɛg'es, naazegwyɛ. Wɔ kwyɛl ɛlɛɛ náá, wɔ ɛ́ boo-mot nɛ nɛ? Bɛngoolel ɛ Mɛkpa ɛ Zɛɛb naabaazegwyɛ yɔbɔ. Wɔ gek náá, wɔ ɛ́ zɛ?» 54 Tin, Yezu eezɛbɔɔza nɛ nɔɔ náá: «Yɛ bɛ náá, mɛ duwal nyel'am ɛ́ mam ɛmet ɔɔ, yenek duu tak ààval sonok wat. Mot di edjɛ mɛ duu ɔ, yɛ ɛ́ Saagam. Bi dyeebake kɔ ɛsu ɛ́ lɛ náá: "Nyɛ ɛ́ Zɛɛb'es". 55 Ghuna bi ààgu nyɛ. Tin, bela náá, mam nɛ gu nyɛ. Mɛ pe di ɛ́ ke náá: "Mɛ ààgu nyɛ" ɔɔ, pe mɛ ɛ́ mot etsal dáa biyɔ. Tin, ye tok deenek, etɛɛ náá, mam nɛ gu nyɛ, mɛ nɛ looba nɛ mɛkpa mɛ nyɛ di elyo ɛ. 56 Abalaam sɛɛg'en naamyaala, etɛɛ náá, nyɛ nadi ebwood dwoo ɛzyɛ ɛ lam. Nyɛ naabee yɛ, bhii tak, lyem'ɛ naadyeebamyaala ɛbuɛpe.» 57 Tin, eYuda eebaazɛke nɛ Yezu náá: «Wɔ dinaa ààpakokum-kumak membu mɛkam-mɛtɛn. Wɔ lɛɛ ɛ́ náá, wɔ naabee Abalaam é?» 58 Yezu eezɛbɔɔza nɛ nɔɔ náá: «Iyooo, mɛ lɛɛ bin ɛ́ etɛp e tsɛɛtsɛ náá, ɛsok nɛ Abalaam nɛ byel, "mam ɛ́ mot di ɔ".» 59 É di'enek, bɛ ɛ́ boozɛtek mɛkok etɛp ɛwus ɛ́ Yezu. Nyɛ eezɛsɔwa, bhii tak, nyɛ eezɛwyis tɔ kok Ndjaa-ebuwa.