1 Ba mɛlu bhii tak, Yezu eebaazɛtel nyel tela sis nɛ bɛdjekel bɛ é ɛboŋ ɛ dii Tibeliaad. Beeka dáa ye nadhaŋ ɛ. 2 Simɔŋ Pyɛɛd, nɛ Toma nadi edjóoaa Ɛwas ɔ, zɛnɔɔ Natanaɛl mot ghaada Kana, pɛ kyee dik Ghalile, baazɛnɔɔ bɔn ɛ Zɛbɛdɛ bɛbá, nɛ bɛdhiiti bɛdjekel bɛbá, bɛ nadi ɛ́ sama wat. 3 Simɔŋ Pyɛɛd eezɛke nɛ nɔɔ náá: «Mɛ ɛpetɔ́ kɛlóo ngwyep.» Bɛ eezɛbɔɔza nɛ nɛ náá: «Djhookaka.»

É di'enek, bɛ eezɛwyis, zɛni tɔ boo elɛɛd. Tin, é pum yenek djas bɛ nabɛ ɛ́ ààkobela sonok. 4 É mɛlem kɛɛŋ, Yezu eezɛtyaa é ngwoob dii tak. Tin, bɛdjekel naabee nyɛ, ààgu náá, yɛ ɛ́ Yezu. 5 Nyɛ eezɛke nɛ nɔɔ náá: «Biyɔ mengbaaz, bi tok nɛ ba bɛsu?» Bɛ eezɛbɔɔza nɛ nɛ náá: «Hooo, bis tok nɛ yɛ.» 6 Nyɛ eezɛke nɛ nɔɔ náá: «Laka ɛwyet pɛ kyee mbɔ eghɛŋ e boo elɛɛd bin, bi ɛ́ waabela.» Tin, bɛ eezɛla ɛwyet, wɔ gwaa, bɛ zɛbela bɛtɛ nɛ bɛsu. Mɛbu mɛ tak ààdjala nɛ dáa bɛ aakwak ɛghɛɛ yɛ. 7 Djekel Yezu nadi ekwyɛl ɛbuɛpe ɔ, zokake nɛ Pyɛɛd náá: «Yɛ ɛ́ Ghɛŋ!»

Dáa Simɔŋ Pyɛɛd nagwak mɛkpa mɛ náá: «Yɛ ɛ́ Ghɛŋ ɛ!» Nyɛ eezɛkɔl ndjookuwa yɛ é kuu, etɛɛ náá, ye nabɛ ɛ́, nyɛ naadis ndjookuwa étɛp ɛla ɛwyet. Bhii tak, nyɛ eezɛghaaga tɔ dii. 8 Bɛdhiiti bɛdjekel eezɛbula tɔ boo elɛɛd, bɔɔ é dul ɛwyet tɔɔɔ nɛ bɛsu tɔ tak. Bɛ nabɛ ɛ́ ààdyeebatseta nɛ ɛboŋ, bɛ nadi ɛ́ tyee emɛtɛlɛ dhet (100) nɛ ɛboŋ. 9 Dáa bɛ nazesɛɛ nɛ elɛɛd é bɔs ɛ, bɛ kabee ɛ́ du nɛ su kɔ tak, zɛnɔɔ mapa. 10 Yezu eezɛke nɛ nɔɔ náá: «Dhaka nɛ bɛdhiiti bɛsu ɛ bi gó ɛ.»

11 Tin, Simɔŋ Pyɛɛd eezɛgo tɔ elɛɛd. Nyɛ eezɛdul ɛwyet ɛ nazelwood nɛ bɛsu ɛ, pɛ kyiid. Deenek, tɔ ɛwyet, ye nabɛ ɛ́ nɛ eboo bɛsu dhet nɛ mɛkam-mɛtɛn nɛ elɛl (153). Tin, nɛ eboo bɛsu binek, ɛwyet nabɛ ɛ́ àànyɛɛ. 12 Bhii tak, Yezu eezɛke nɛ bɛdjekel náá: «Dha dɛka!» Tin, tɔ bɛdjekel, ye nabɛ ɛ́ ààbɛ nɛ mot ngɔt naabɛɛ nuub'ɛ, dji náá: «Wɔ ɛ́ zɛ?» Etɛɛ náá, bɔɔ djas nadi egu náá, ye nabɛ ɛ́ Ghɛŋ. 13 Yezu eezɛtiila. Wɔ gwaa, nyɛ zɛnɔɔ mapa, kaa bɛ yɛ ɛ. Bhii tak, nyɛ eebaazɛnɔɔ su, kaa bɛ yɛ ɛ. 14 Yenek tak nabɛ ɛ́ tyee esok elɛl ee nyɛ nalyaal bɛdjekel bɛ nyel, bhii nyɛ nagom bhis ɛsyee ɛ.

15 Bhii bɛ nasilal ɛdɛ edee ɛ, Yezu eezɛke nɛ Simɔŋ Pyɛɛd náá: «Simɔŋ mɔn Zaŋ, wɔ nɛ kwyɛl mɛ dhaa bak bot é?» Simɔŋ eezɛbɔɔza náá: «Hɛɛɛ, Ghɛŋ, wɔy wɔ ɛmet nɛ gu náá, mɛ nɛ kwyɛl wɔ.» Tin, Yezu eezɛlɛɛ nɛ nɛ náá: «Wyela bɔɔ ebhata bam.» 16 Nyɛ eebaazɛdji-djia sis tyee esok ebá: «Simɔŋ, mɔn Zaŋ, wɔ nɛ kwyɛl mɛ?» Tin, Pyɛɛd eezɛbɔɔza nɛ nɛ náá: «Hɛɛɛ, Ghɛŋ, wɔ nɛ gu djas. Wɔ nɛ gu náá, mɛ nɛ kwyɛl ɛ́ wɔ!» Yezu eebaazɛbɔɔza nɛ nɛ náá: «dia mbaalel etaa bam.» 17 Nyɛ eebaazɛdji-djia sis tyee esok elɛl náá: «Simɔŋ, mɔn Zaŋ, wɔ nɛ kwyɛl mɛ?» Tin, lyem nabɛ ɛ́, ye kpaa Simɔŋ nɛ dáa nyɛ nabaadji mɛdjin mɛ tak djia sis náá: «Simɔŋ, mɔn Zaŋ, wɔ nɛ kwyɛl mɛ?» Tin, Pyɛɛd eezɛbɔɔza nɛ nɛ náá: «Ghɛŋ, wɔ nɛ gu djas, wɔ nɛ gu náá, mɛ nɛ kwyɛl wɔ!» Yezu eebaazɛbɔɔza nɛ nɛ náá: «Wyela ebhata bam. 18 Mɛ lɛɛ wɔ ɛ́ tsɛɛtsɛ náá, é ghɛŋ wɔ nadi, wɔ dinaa ngbaaz ɛ, wɔ nakokɔl bhɛtɛ yɔ é kuu ɛ, wɔy wɔ ɛmet. Wɔ natetɔ́ ɛ́, pɛ lyem'ɔ nadi ekwos ɛtɔ́ ɛ. Tin, é ghɛŋ yɛ aakabɛ náá, wɔ eezegeeb ɛ, wɔ aazokasesɛɛb ɛ́ mɛmbɔ, da mot sis ɛ́ kɔl wɔ bhɛtɛ. Da nyɛ ɛ́ tɔ́ nɛ nɔ pɛ lyem'ɔ aadi ààkwos ɛtɔ́ ɛ.» 19 Nɛ mɛkpa menek, Yezu nadi elyaal ɛ́ dáa ɛsyee ɛ Pyɛɛd aadi ɛ, dáa ɛsyee ɛ lɛ aadjɛ Zɛɛb duu ɛ. Bhii tak, Yezu eezɛke nɛ nɛ náá: «Dua mɛ!»

20 Pyɛɛd eezɛliig mis, nyɛ eezɛbee djekel ɛ Yezu nadi ekwyɛl ɛbuɛpe ɔ. Djekel tak ɛ́ mot namalal kɔ Yezu é sok bɛ nadi edɛ edee ɛ. Da nyɛ ɛ́ zɛdji Yezu náá: «Ghɛŋ, ɛzɛ aakɛka wɔ gha?» 21 Tin, beea Pyɛɛd nabee nyɛ ɛ, nyɛ eezɛdji Yezu náá: «Haaa nyɛy, Ghɛŋ, ɛyé aasa nyɛy?» 22 Yezu eezɛbɔɔza náá: «Mɛ kwyɛl náá, nyɛ di nɛ tsik kɛyaka nɛ dwoo mɛ aabula ɔɔ, ye gwyák wɔ wo? Wɔy, dua mɛ!» 23 Tin, lɛŋ tak eezɛkɛ pak bot ɛ nadi dum koŋ nɛ Zɛɛb ɔ náá, djekel yenɔk aanàkwaagwyɛ. Ghuna Yezu nabɛ ɛ́ ààke nɛ Pyɛɛd náá: «Nyɛ aanàkwaagwyɛ.» Nyɛy nake ɛ́ náá: «Mɛ kwyɛl náá, nyɛ di nɛ tsik, kɛyaka nɛ dwoo mɛ aabula ɔ, ye gwyák wɔ wo?»

24 Yɛ ɛ́ djekel tak nyɛ ɛmet ɛ di ekaada etɛp ee nyɛ bee ɛ. Nyɛ ɛ́ boowa yɛ tɔ Ekwyala. Deenek, mena nɛ guka náá, etɛp ee nyɛ di elɛɛ ɛ, yɛ ɛ́ tsɛɛtsɛ.

25 Yezu naabaasa bɛdhiiti bɛtɛ nɛ esonok. Yɛ pe di ɛ́ bɛ náá, etɛp binek djas nakwyalaa ɛ kwyalak ɔɔ, pe yɛ aanàkwaabelaaa di ɛkwom bɛmɛkana mɛ tak kɔ ɛko ɛ bɔs'ak djas.