1 Bhii nyɛ zelii deenek ɛ́, Yezu eezɛben mis pɛ ɛko, nyɛ eezɛke náá: «Saagam, ɛwala ɛ tak eezedjala. Djɛa Mɔn'ɔ duu etɛɛ náá, Mɔn'ɔ needjɛ wɔ duu pe. 2 Wɔy naadjɛ nyɛ eghɛŋ kɔ bot ɛ bɔs djas, étɛp nyɛ needjɛ bot ɛ wɔ nadjɛ nyɛ ɔ, tsik na kɔm-kɔm. 3 Tsik na kɔm-kɔm ɛ́ náá, bot gu wɔ, wɔy ɛ́ Zɛɛb etsɛɛtsɛ, Zɛɛb ngɔt, dɔɔ nɛ ɛgu ɛ́ Yezu Klisto, mot wɔ nadhis ɔ. 4 Mɛ eelyaal duma yɔ kɔ bɔs. Mɛ eesilal ɛsa mɛsa mɛ wɔ nalwom mɛ náá, mɛ zɛsa ɛ. 5 Nenak, Saagam, djɛ mɛ duma mɛ nadi nɛ yɛ sok bhwoob'ɔ é sok mɛ nadi é ngwoob'ɔ ɛ, ɛsok nɛ bɔs nɛ kusel.

6 Mɛ eelyaal wɔ nɛ bot ɛ wɔ nasɛ́ɛ tɔ sama bot ɛ di kɔ bɔs, da wɔ ɛ́ djɛ mɛ bak ɔ. Bɛ nabɛ ɛ́ bot bɔ, wɔ naadjɛ mɛ bak. Tin, ye nabɛ ɛ́ bot ɛ tak eegwak mɛkpa mɔ. 7 Nenak bɛ eezegu náá, esonok djas wɔ nadjɛ mɛ ɛ nadus ɛ́ pɛ daa lɔ. 8 Etɛɛ náá, mɛ eezelɛɛ bɛ mɛkpa mɛ wɔ nadjɛ mɛ ɛ. Tin, bɛ naamyaal yɛ, bɛ eegu náá, tsɛɛtsɛ mɛ nadus ɛ́ pɛ daa lɔ, bɛ eemyaal náá, wɔy ɛ nadhis mɛ.

9 Mɛ djaala nɛ nɔ, kɔ ɛsu ɛ lɔɔ. Mɛ ààdjaala nɛ nɔ kɔ ɛsu ɛ bot ɛ bɔs'ak. Yɛ ɛ́ étɛp bot ɛ wɔ nadjɛ mɛ ɔ, etɛɛ náá, bɛ ɛ́ bot bɔ. 10 Tin, bot djas mɛ di nɛ nɔɔ ɛ, bɛ ɛ́ bɔ. Deenek bot djas di bɔ ɛ, bɛ ɛ́ bam. Tin, bɛ eedjɛ mɛ duu.

11 Mɛ tokapɛ kɔ bɔs. Tin, yɛ kabɛ bɔɔ ɔɔ, bɛ ɛ́ kɔ bɔs. Yɛ bɛ mam ɔɔ, mɛ ɛpetɔ́ pɛ daa lɔ. Saagam na Dɛɛ, baala bɛ tɔ ghwyil din ɛ lɔ, din ɛ wɔ nadjɛ mɛ ɛ, etɛɛ náá, bɛ needi mot ngɔt dáa wɔy nɛ mam di mot ngɔt ɛ. 12 É sok bis nɛ bɛnɔɔ nadi, bis dinaa é di wat ɛ, mɛ nadi ebaal bɛ nɛ ghwyil mɛbwala mɛ din ɛ lɔ, din ɛ wɔ nadjɛ mɛ ɛ. Mɛ nabebaal bɛ ɛ́ nɛ yɛ. Ye tok nɛ mot ngɔt diib tɔ lɔɔ, bhii mot nabɛ náá, nyɛ waadiib, etɛɛ náá, Ekwyala e Mɛkana ɛ Zɛɛb neebela ɛsuk ɛ.

13 Deenek, nenak mɛ moo ezyɛ pɛ daa lɔ. Mɛ lii etɛp bak ɛ́, é sok mɛ di, mɛ dinaa kɔ bɔs ɛ. Etɛɛ náá, bɔɔ bɛmet needi nɛ mɛmyaala mam, da bɛ ɛ́ di nɛ mɛmyaala na tsɛɛtsɛ nɛ lyem wat. 14 Mɛ naadjɛ bɛ mɛkpa mɔ. Tin, bot ɛ bɔs ɛpebhina bɛ. Etɛɛ náá, bɛdjekel bam tok bot ɛ bɔs'ak, dáa mam di ààdi mot bɔs'ak ɛ. 15 Mɛ ààpawaab náá, wɔ dis bɛ kɔ bɔs'ak. Tin, mɛ kwyɛl ɛ́, wɔ baal bɛ sok bhwoob Mbee mot. 16 Bɛ tok bot ɛ bɔs'ak, dáa mam pe di ààdi mot bɔs'ak ɛ. 17 Lyaala bɛ etsɛɛtsɛ, bɛ needi bot bɔ nɛ lyem wat. Mɛkpa mɔ ɛ́ di etsɛɛtsɛ. 18 Mɛ eelwom bɛ pɛ kɔ bɔs, dáa wɔy nalwom mɛ kɔ bɔs ɛ. 19 Mɛ eedjɛ wɔ tsik'am djas kɔ ɛsu ɛ lɔɔ. Etɛɛ náá, bɔɔ pe bɛ needi bot bɔ na dɛɛ nɛ tsɛɛtsɛ.

20 Mendjaala mam tok étɛp bɔɔ bɛmet. Mɛ djaala ɛ́ dɔɔ nɛ étɛp bot ɛ aadi egwak mɛlyo mɔ, da bɛ ɛ́ dum koŋ nɛ nam ɔ. 21 Mendjaala mam ɛ́ náá, bɔɔ djas di mot ngɔt. Saagam, bɛ di mot ngɔt nɛ nena, dáa wɔ di pɛ tɔ lam, mam tɔ lɔ ɛ. Bɛ di mot ngɔt etɛɛ náá, bot ɛ bɔs neemyaal náá, yɛ ɛ́ wɔy ɛ nadhis mɛ.

22 Mɛ eedjɛ bɛ duu wɔ nadjɛ mɛ ɛ, etɛɛ náá, bɛ needi mot ngɔt dáa mena di mot ngɔt ɛ. 23 Mɛ eebe di tɔ lɔɔ, wɔy tɔ lam. Yɛ ɛ́ deenek ɛ́ bɛ aakwak ɛdi nɛ tsɛɛtsɛ mot ngɔt. Yɛ ɛ́ deenek ɛ́ bot ɛ bɔs'ak aagu náá, wɔy ɛ́ nadhis mɛ. Wɔ nɛ kwyɛl bɛ, dáa wɔ di ekwyɛl mɛ ɛ.

24 Saagam, wɔ naadjɛ mɛ bak. Ɛkwosak ɛ lam ɛ́ náá, bɛ di bis nɛ nɔɔ é di mɛ aadi ɛ, étɛp bɛ neebee duu'am. Yɛ ɛ́ duu wɔ nadjɛ mɛ ɛ, etɛɛ náá, wɔ nakwyɛl mɛ ɛ́ ɛsok nɛ bɔs nɛ kusel. 25 Saagam, wɔ mot epiki. Bot ɛ bɔs'ak nabɛ ɛ́ ààgu wɔ, yɛ ɛ́ kabɛ mam ɔ, mam naagu wɔ. Deenek, bɛdjekel bam bak eegu náá, yɛ ɛ́ wɔy ɛ nadhis mɛ. 26 Mɛ naasa náá, bɛ gu din ɛ lɔ. Tin, mɛ waabaasa náá bɛ gu yɛ, etɛɛ náá, bɛ neekwyɛla pak'ɔɔ dáa wɔ di ekwyɛl mɛ ɛ, deenek, mam ɛ́ waadi tɔ elyem bɔɔ.»