1 Dhiiti mot ngɔt din ɛ lɛ nabɛ ɛ́ Lazaad, nyɛy zokazɛbɛ́, nyɛ nadidi ɛ́ kɔ ghaada di edjóoaa Bhetani ɛ, dɛl ɛ Maali bɛ nɛ mɔn-nyɛɛg Maat. 2 Maali ɛ́ moma naso ɛlas ɛ mɛnanas kɔ mɛko ɛ Ghɛŋ Yezu ɔ, da bhii tak nyɛ ɛ́ zɛsuŋal nɛ bhoo'ɛ ɔ. Yɛ ɛ́ dhem, Lazaad ɛ́ nadi ebɛ́. 3 Boa binɔk bɛbá zokazɛlwom mot, nyɛ kɛlɛɛ nɛ Yezu náá: «Ghɛŋ, sɔ'ɔ wɔ di ekwyɛl ɔ ɛpebɛ́.» 4 Dáa Yezu nagwak bhaadal tak ɛ, nyɛ ɛ́ booke náá: «Lazaad ɛpebɛ́. Ɛbɛ́ ɛ́ tak tok étɛp nyɛ neegwyɛ. Yɛ ɛ́ etɛɛ náá, duma ɛ Zɛɛb neenyen é mis mɛ bot. Deenek, Mɔn ɛ Zɛɛb neebaabela duma é mis mɛ bot, dum nɛ tɛp tak.»

5 Bela tin náá, Yezu naadyeebakwyɛl Maali, nɛ Maat zɛnɔɔ dhem'ɔɔ Lazaad. 6 Ghuna, dáa nyɛ nagwak bhaadal náá Lazaad ɛpebɛ́ ɛ, nyɛ naabaadjaasi mɛlu mɛmbá bhii tak kɔ dɛl ɛ nyɛ nadi ɛ, nyɛy ààtɔ́. 7 Bhii tak, nyɛ eezɛke nɛ bɛdjekel bɛ náá: «Djhoosikeka pɛ kyee dik Yude.» 8 Tin, bɛdjekel eezɛke nɛ nɛ náá: «Labhi, ekukuma eYuda aaloo nɛ saŋ ɛgó ɛ́ wɔ nɛ mɛkok penek koko ɛ koko. Mos wɔ baakwyɛl ɛ́ ɛtɔ́ penek é?» 9 É di'enek, Yezu eezɛbɔɔza nɛ nɔɔ náá: «Mwos wat ɛ́ mɛwala kam nɛ ebá, ààbɛ deenek é? Mot ɛ kɛ tɔ gwyɛ mwos ɔɔ, nyɛ aanàkwaabema ɛbɛk. Etɛɛ náá, nyɛ ɛpebee gwyɛ bɔs'ak ɛnyɔɛpe. 10 Tin, mot ɛ kɛ é pum ɔɔ, nyɛ waabema ɛbɛk. Etɛɛ náá, nyɛ tok nɛ sa aasa náá, nyɛ bee ze ɛnyɔɛpe.»

11 Bhii Yezu nake deenek ɛ́, nyɛ ɛ́ boobaakɛl náá: «Mɔɔ sɔ yena Lazaad eedja gɔ́. Mɛ ɛpetɔ́, kɛdjem nyɛ.» 12 Bɛdjekel eezɛbɔɔza náá: «Ghɛŋ, yɛ bɛ náá, nyɛ eedja gɔ́ ɔɔ, nyɛ waatsak.» 13 Yezu nadi elii deenek ɛ́, étɛp ɛsyee ɛ Lazaad. Bɛdjekel bɛ nagek ɛ́ náá, nyɛ nadi elii ɛ́, dum nɛ tɛtɛ gɔ́. 14 Tin, Yezu ɛ́ boozɛlɛɛ bɛ popoopwon ààsyeeba náá: «Lazaad eegwyɛ. 15 Mɛ ɛpemyaala, etɛɛ náá, mɛ bɛ ɛ́ ààdi penek, etɛɛ náá, deenek ɛ́ bi aadum koŋ nɛ nam. Tin, djhookaka pɛ kyee nyɛ di ɛ.» 16 Tin, Toma nagetaa din ɛ Ɛwas ɔ, eezɛke nɛ bak bɛdhiiti bɛdjekel náá: «Djhootɔ́ka, yɛ bɛ ɛsyee ɔɔ, bɛ gó menabɛlka djas!»

17 Dáa Yezu nakum ɛ, nyɛ eezɛgwak náá, Lazaad moo ɛ́ nɛ mɛlu mɛná tɔ ɛvit. 18 Tinaak, nɛŋ pak dɛl ɛ Bhetani nɛ Yeluzalɛm nabɛ ɛ́ tyee ekilomɛtɛlɛ elɛl. 19 É di'enek, bɛtɛ nɛ bot ɛ mbyak eYuda nabɛ ɛ́, bɛ eezyɛ pɛ daa Maali nɛ Maat étɛp ɛzɛdjɛ bɛ mɛghaaz kɔ ɛsyee ɛ dhem'ɔɔ.

20 Dáa Maat nagwak náá, Yezu eetuula ɛ, wɔ gwaa, nyɛ zɛtɔ́ kɛboma nɛ nɛ. Tin, Maali eezɛlik yɛ ndiidel pɛ ndjaa. 21 Maat eezɛke nɛ Yezu náá: «Ghɛŋ, wɔ ɛpedi wak ɔɔ, pe dhem'am ààpagwyɛ. 22 Deenek, mɛ nɛ gu náá, dɔɔ nɛ nenak, esonok djas wɔ aawaab nɛ Zɛɛb ɛ, nyɛ waadjɛ wɔ.» 23 Tin, Yezu zɛbɔɔza náá: «Dhem'ɔ ɛ́ waagom tɔ ɛsyee.» 24 Maat eezɛbɔɔza náá: «Mɛ nɛ gu náá, nyɛ waagom tɔ ɛsyee é dwoo mɛsik, é sok bot djas aazɛgom tɔ ɛsyee ɛ.» 25 Yezu zokabaazɛbɔɔza náá: «Yɛ ɛ́ mam ɛ di gomel bot ɛ nagwyɛ ɔ. Mam ɛ́ di tsik. Mot ɛ dum koŋ nɛ nam ɔɔ, nyɛ waabela tsik, ye nakoozodi náá, nyɛ naazegwyɛ. 26 Tin, mot ɛ di nɛ tsik, da dum koŋ nɛ nam ɔɔ, nyɛ aanàkwaagwyɛ. Wɔ eemyaal é?» 27 Maat eezɛmyaal náá: «Iyooo Ghɛŋ, mɛ nɛ gu náá, wɔ ɛ́ Mɛsia, Mɔn ɛ Zɛɛb. Wɔy ɛ́ di mot Zɛɛb nakɛk náá, nyɛ ɛpezyɛ kɔ bɔs ɔ.»

28 Bhii mɛkpa menek, Maat eezɛsik pɛ ndjaa kɛdjóo mɔn-nyɛɛg Maali. Tin, nyɛ eezɛnyeŋal nyɛ tɔ ɛlɔ náá: «Lyoel eetuula, nyɛ ke ɛ́ náá, wɔ kɛboma nɛ nɛ.» 29 Dáa Maali nagwak deenek ɛ́, nyɛ eezɛwyɛl ngbat, nɔɔ nyel, tɔ́ pɛ pak Yezu nadi ɛ́. 30 Ghuna Yezu nabɛ ɛ́, nyɛ dinaa ààkotuula-tuulak kɔ dɛl ɛ tak. Nyɛ nabɛ ɛ́ nyɛ dinaa é di bɛ nɛ Maat naboma ɔ. 31 Dáa eYuda ee nazɛmɔ nɛ Maali tɔ ndjaa étɛp ɛdjɛ nyɛ mɛghaaz kɔ ɛsyee ɛ nabee dáa nyɛ nawyɛl deenek ngbat, wyis pɛ kel ɛ, bɛ eezɛdu nyɛ. Etɛɛ náá, bɛ nagek ɛ́ náá, nyɛ natɔ́ ɛ́ pɛ ɛvit kɛdje. 32 Bhii tak, Maali eezɛkum pɛ Yezu nadi ɛ́. Dáa nyɛ nabee nyɛ ɛ, nyɛ eezɛghaaga si mɛko mɛ. Nyɛy nɛ Yezu náá: «Ghɛŋ, wɔ ɛpedi ɛ́ di wak ɔɔ, pe dhem'am ààpagwyɛ.» 33 Dáa, Yezu nabee nyɛ edje, bɛ nɛ bot ɛ mbyak eYuda nadu nyɛ ɔ, ye naazɛsa nyɛ ghoŋ nɛ etuŋ dhaa nyel. 34 É di'enek, nyɛ eezɛdji bɛ náá: «Bi kɛnɛɛg muu ɛ́ paa?» Bɛ eezɛbɔɔza nɛ nɛ náá: «Ghɛŋ, dha, wɔ neezɛbee.» 35 Tin, Yezu eezɛdje. 36 Deenek, eYuda eezɛke náá: «Beeka dáa nyɛ nadi ekwyɛl nyɛ ɛ!» 37 Tin, bɛdhiiti bot pak eYuda binɔk moo tin eke náá: «Nyɛy mot di eebɛɛ bot ɛ edhim mis ɔ, nyɛ ààpakwak ɛlu náá, Lazaad nàgwyɛ?»

38 Yɛ eebaazɛsa Yezu boo ghoŋ tɔ lyem, wɔ gwaa nyɛ zɛtɔ́ pɛ ɛvit. Ɛvit ɛ tak nabɛ ɛ́ tɔ gho ɛkok kpaka. Ye nadi ɛ́ nɛ boo ɛkok nadi ediyal ɛniel ɛ tak ɔ. 39 Tin, Yezu eezɛke nɛ nɔɔ náá: «Diska ɛkok!» Wɔ gwaa Maat, kɛl mot nagwyɛ ɔ, zɛpesal náá: «Ghɛŋ, nyɛ moo mos ɛ́ nɛ mɛlu mɛná bhii nyɛ nazedelaa ɛ. Nyɛ ɛ́ nɛ ghwyil ɛka nuub ɛlyelɛpe.» 40 Yezu eezɛbɔɔza nɛ nɛ náá: «Mɛ bɛ ɛ́ ààlɛɛ wɔ náá, wɔ dum koŋ nɛ nam ɔɔ, wɔ aabee duma ɛ Zɛɛb é?»

41 Bhii tak, bɛ eezɛdis ɛkok nadi é ɛbɛ ɛ ɛvit ɛ. É di'enek, Yezu eezɛben mis pɛ ɛko, wɔ gwaa nyɛ ke náá: «Saagam, mɛ eeghaapɛɛ wɔ, etɛɛ náá, wɔ nɛ gwak mɛ. 42 Mɛ nɛ gu náá, wɔ eeloozyɛ nɛ ɛgwak ɛ mɛ. Tinaak, mɛ lii deenek ɛ́, etɛɛ náá, mɛdhuu mɛ bot ɛ di wak'aak neemyaal náá, wɔy ɛ́ nadhis mɛ.» 43 Dáa nyɛ nazɛke deenek ɛ́, wɔ gwaa, Yezu zɛbam ɛlyelɛpe náá: «Lazaad, wyisa!» Yezu eegomal Lazaad

44 É di'enek, mot nagwyɛ ɔ eezɛwyis tɔ ɛvit. Nyɛ eezɛwyis nɛ mɛmbɔ nɛ mɛko ewola nɛ epes e kaad nyɛ napilaa tɔ tak ɛ, dɔɔ nɛ bhwoob dipela nɛ epes e kaad e tak. Bhii tak, Yezu eezɛke nɛ nɔɔ náá: «Tiika nyɛ epes e kaad binek é nyel, nyɛ neekɛ ɛnyɔɛpe, da bi ɛ́ bet nyɛ, nyɛ tɔ́.»

45 EYuda ɛbuɛpe tɔ sama bot ɛ nazyɛ zɛmɔ nɛ Maali kɔ ɛsyee ɔ, naabee endem e mɛbwala mɛ Yezu nasa ɛ. Wɔ gwaa, bɛ zokazɛdum koŋ nɛ nɛ. 46 Tinaak, bɛdhiiti bot tɔ sama eYuda tak eezɛtɔ́, pɛ daa eFalizyɛ. Bɛ eekɛlɛɛ bɛ etɛp djas nasael ɛ. 47 Tin, wɔ gwaa eboo bɛghaa-Zɛɛb nɛ eFalizyɛ zokazɛsɛɛga tɔ boo kwan eYuda. Bɔɔ náá: «Mena saka dáa? Mot'ak dinaa esa bɛtɛ nɛ eboo endem e mɛbwala yenek! 48 Mena betka nyɛ, nyɛ gheesa endem e mɛbwala menek ɔɔ, bot djas ɛ́ waadum koŋ nɛ nɛ. Tin, ekukuma e Lɔm ɛ́ waazyɛ zɛwaaz Ndjaa-ebuwa bena nɛ mbyak yena.»

49 Mot ngɔt pak'ɔɔ, din ɛ lɛ nabɛ ɛ́ Kayif. Nyɛ nabɛ ɛ́ boo ghaa-Zɛɛb é mbu tak. Nyɛ eezɛke nɛ nɔɔ náá: «Bi ààtiibal ɛnyɔɛpe! 50 Bi ààgu sa di enyɔ nɛ nena ɛ? Ye goka ɛ́ mot ngɔt gwyɛ kɔ ɛsu ɛ bot djas. Yɛ ɛ́ deenek ɛ́ bot ɛ mbyak yena djas aadi ààwyɛɛza.»

51 Ghuna nyɛ nabɛ ɛ́ ààdi eke deenek nɛ mɛtselal mɛ met. Ye nabela ɛ́ náá, nyɛy ɛ́ nadi boo ghaa-Zɛɛb é mbu tak. Nyɛ nadi egoola etɛp binek ɛ́ tɔ Sisim. Nyɛ nadi eke ɛ́ náá, Yezu ɛ́ waagwyɛ kɔ ɛsu ɛ bot ɛ mbyak eYuda. 52 Tin, ɛsuk ɛsyee ɛ Yezu tak nabɛ ɛ́ ààbɛ étɛp eYuda bɔɔ bɛmet. Ye nabɛ ɛ́ dɔɔ nɛ étɛp ɛsɛɛg é nyel wat bɔn ɛ Zɛɛb djas zewyɛɛza «lapa-lapa» kɔ bɔs ɔ.

53 Kana dwoo tak, ekukuma eYuda naamyam ɛgó ɛ Yezu. 54 Yɛ ɛ́ étɛp tak ɛ Yezu nakat ɛduula é mis mɛ bot ɛ mbyak eYuda. Tin, nyɛ eezɛtɔ́ pɛ dhiiti dɛl é ngwoob bal. Din ɛ dɛl ɛ tak nabɛ ɛ́ Efalayim. Penek ɛ́ nyɛ nakɛkwɛɛg ba mɛlu bɛ nɛ bɛdjekel bɛ. 55 Ye nabɛ ɛ́, ɛbyoŋ ɛ eYuda di edjóoaa «Pak» ɛ eezekunaa. Bot ɛbuɛpe nadi edus pɛ mɛl mɔɔ, tɔ pɛ ghaada Yeluzalɛm. Bɛ natɔ́ ɛ́ étɛp bɛ neekɛsa mɛzel mɛ ɛdis ɛ edhuud ɛsok nɛ dwoo ɛbyoŋ kum. 56 É di'enek, bɛ moo tin esaa Yezu, ààbee nyɛ. Bɛ moo tin tɔ kok Ndjaa-ebuwa edjinel pak'ɔɔ náá: «Bi ke ɛ́ náá, nyɛ ɛ́ nɛ ghwyil ɛzyɛ é ɛbyoŋ ɛlak mos é?» 57 Kabela ɛ́ náá, eboo bɛghaa-Zɛɛb nɛ eFalizyɛ naazedjɛ ɛlee náá, mot ɛ bee Yezu ɔɔ, da nyɛ ɛ́ zɛlɛɛ bɛ. Etɛɛ náá, bɛ neemɛt nyɛ.