1 Deenek, Pilat eezɛlwom náá, bɛ nɔɔ Yezu, da bɛ ɛ́ nyuu nyɛ nɛ eghwyɛs. 2 Tin, wɔ gwaa esodja zokazɛsa kɔtɔ nɛ kel mɛgɔk, sɔm Yezu yɛ ɛ́ é lo. Bɛ eezɛbét nyɛ ndjookuwa na tɔɔbelaa. Kɔtɔ nɛ kel mɛgɔk

3 Bɛ moo tin etiila sok bhwoob'ɛ. Bɛ moo eswos nyɛ mɛswosel mɛ mɛduka náá: «Mɛ eeswos wɔ, mɛkoozi mɛ eYuda!» Tin bɛ moo epak nyɛ mɛbhɛɛz.

4 Tin, Pilat eebaazɛwyis pɛ kel wyisa sis. Nyɛ eezɛke nɛ ɛdhuu ɛ bot náá: «Gwakeka, mɛ ɛpezyɛ nɛ nɛ wak étɛp bi neegu náá, mɛ ààpabela lo mɛsɔ mɛ di egoka nɛ ɛdjɛ mot'ak epɛ́ɛ e ɛsyee dum nɛ tak ɛ.» 5 Tin, Yezu eezɛwyis, nyɛ eebɔt kɔtɔ mɛgɔk nɛ ndjookuwa na tɔɔbelaa é nyel. Tin, Pilat eezɛke náá: «Beeka mot tak é!»

6 Tin, é ghɛŋ eboo bɛghaa-Zɛɛb nɛ bɛmbaalel ɛ kok Ndjaa-ebuwa nabee nyɛ ɛ, wɔ gwaa, bɛ zɛtsim náá: «Bemka nyɛ é mɛlaaba! Bemka nyɛ é mɛlaaba!» É di'enek, Pilat eezɛke nɛ nɔɔ náá: «Kɛbemka nyɛ é mɛlaaba, biyɔ bɛmet. Etɛɛ náá, tɔ yam beea, mam ààbee lo mɛsɔ mɛ di egoka nɛ ɛdjɛ mot'ak epɛ́ɛ e ɛsyee dum nɛ tak ɛ.» 7 É di'enek, ekukuma eYuda eezɛke nɛ nɛ náá: «Bis ɛ́ nɛ etsi, dum nɛ etsi tak, nyɛ goka ɛ́ nɛ ɛsyee. Etɛɛ náá, nyɛ ke ɛ́ náá, nyɛ ɛ́ Mɔn ɛ Zɛɛb.»

8 Dáa Pilat nagwak elii bot binɔk ɛ, bwoo nabaazɛsa nyɛ ɛbuɛpe. 9 Nyɛ eezɛsik tɔ ndjaa, bhii tak, nyɛ eezɛdji Yezu náá: «Wɔ dus paa?» Tin, Yezu nabɛ ɛ́, ààbɔɔza nɛ nɛ. 10 Pilat eezɛke nɛ nɛ náá: «Wɔ ààkwyɛl ɛbɔɔza mɛdjin mam é? Wɔ ààgu náá, mɛ ɛ́ nɛ ghwyil ɛsa náá, wɔ betaa, nɛ ɛlwom ɛ́ náá, bɛ bem wɔ é mɛlaaba?» 11 Yezu eezɛbɔɔza nɛ nɛ náá: «Wɔ tok nɛ dhiiti ghwyil wat kɔ lam, bhii yii Zɛɛb nadjɛ wɔ ɛ. Étɛp tak ɛ di náá, mot zɛka mɛ é mɛmbɔ mɔ ɛ, nyɛ ɛ́ nɛ boo ndjɛ dhaa-dhaŋak yɔ.»

12 É di'enek, Pilat nabɛ ɛ́, nyɛ moo saa mɛpek etɛɛ nyɛ neebet Yezu. Tin, eYuda eebaazɛni é tsim náá: «Wɔ bet mot yenɔk ɔɔ, wɔ tok sɔ ɛ Sezaad boo mɛkoozi. Etɛɛ náá, mot ɛ ke wak náá, nyɛ ɛ́ mɛkoozi ɔɔ, yenɔk ɛ́ mot mɛbhuka ɛ Sezaad!» 13 Dáa Pilat nagwak mɛkpa menek ɛ, nyɛ ɛ́ boozɛwyisal Yezu pɛ kel. Bhii tak, nyɛ eezɛdisi kɔ bóó bɛtetɛp, é di bɛ nadi edjóo tɔ lii ebhele: «Ghabhata» ɛ, ye kwyɛl ɛlɛɛ ɛ: Ɛbɛsɛɛ ɛ mɛkok.

14 Ye nabɛ ɛ́ é ges dwoo saba, é ɛbyoŋ ɛ Pak, ye moo tɔ́ tyee ɛwala kuku mwos. Pilat eezɛke nɛ eYuda náá: «Beeka mɛkoozi men é!» 15 É di'enek bɔɔ djas eezɛtsim ɛlyelɛpe náá: «Góa nyɛ! Góa nyɛ! Bema nyɛ é mɛlaaba!» Pilat eezɛdji bɛ náá: «Bi kwyɛl ɛ́ náá, mɛ bem mɛkoozi men é mɛlaaba?» Eboo bɛghaa-Zɛɛb eezɛbɔɔza náá: «Bis tok nɛ dhiiti mɛkoozi bhii mɛkoozi Sezaad!» 16 Tin, Pilat eezɛka bɛ Yezu, étɛp bɛ neekɛbem nyɛ é mɛlaaba.

Bɛ eezɛtɔ́ nɛ Yezu. 17 Tin, Yezu nyɛ ɛmet eezɛbɛp mɛlaaba mɛ, étɛp ɛwyis kɔ dɛl, da nyɛ ɛ́ tɔ́ pɛ dhiiti di bɛ nadi edjóo tɔ lii eBhele, «Ghologhota» ɛ. Ye kwyɛl ɛlɛɛ ɛ: «Di Bhoobo Lo.» 18 É di tak ɛ esodja nabem Yezu é mɛlaaba. É ɛwala ɛ tak wat, bɛ zokabaabem bɛdhiiti bot ɛbá é mɛlaaba, nwyak pɛ yak kyee, nwyak ngɔt pɛ yii kyee. Yezu nadi ɛ́, kuku tak.

19 Pilat zokalwom náá, bɛ nɔɔ mɔɔ pɛt ɛbaya, da bɛ ɛ́ tsel kɔ mɛlaaba mɛ tak. Kɔ mɔɔ pɛt ɛbaya ɛ tak, bɛ nakwyal ɛ́ náá: «Yezu, mot Nazalɛt, mɛkoozi mɛ eYuda.» 20 Bɛtɛ nɛ bot ɛ mbyak eYuda naalaa Ekwyala e tak etɛɛ náá, di bɛ nabem Yezu é mɛlaaba ɔ, nabɛ ɛ́, é ngwoob dɛl, deenek, Ekwyala e tak nabɛ ɛ́ tɔ lii eBhele, nɛ tɔ lii bot ɛ mbyak Lɔm, dɔɔ nɛ tɔ lii eGhɛlɛk. 21 Tin, wɔ gwaa eboo bɛghaa-Zɛɛb zokazɛke nɛ Pilat náá: «Ye bɛ ààgoka náá, wɔ kwyal náá: "Mɛkoozi mɛ eYuda." Tin, wɔ goka nɛ ɛkwyal ɛ́ náá: "Mot tak ke ɛ́ náá: Mɛ ɛ́ mɛkoozi mɛ eYuda."» 22 Pilat eezɛbɔɔza nɛ nɔɔ náá: «Sa mɛ zekwyal ɛ, ye lik ɛ́ kwyala.»

23 Dáa esodja nasilal ɛbem Yezu é mɛlaaba ɛ, bɛ eezɛnɔɔ ekaad bɛ, wɔ gwaa, bɛ zɛkaa yɛ mɛkɛɛ mɛná, mot nɛ mot nɛ yɛ ɛkɛɛ. Bɛ zokabaazɛnɔɔ lɔbɔ yɛ nadi lata nɛ kel wat kana pɛ si kɛkum pɛ ɛko ɛ. 24 Tin, esodja moo tin eke pak'ɔɔ náá: «Sa mena àànyaaka lɔbɔ yak. Deenek djhoosaka ɛgwyeeg, étɛp mena neeguka mot aanɔɔ yɛ ɔ.» Yɛ ɛ́ deenek ɛ́, mɛkana ɛ Zɛɛb di elɛɛ náá:

«Bɛ naakaa ekaad bam.

Bɛ naasa ɛgwyeeg étɛp ɛnɔŋ ɛ́ kaad'am*.»

nabela ɛsuk. Beeka, dáa esodja nasa ɛ́, yɛ ɛ́ yenek.

25 Nyɛɛg ɛ Yezu nabɛ ɛ́ tin tetel, é ngwoob mɛlaaba, bɛ nɛ mɔn-nyɛɛg, zɛnɔɔ Maali mwaa Keleopas, dɔɔ nɛ Maali, moma dɛl ɛ Makdala. 26 Yezu eezɛbee nyɛɛg, tin, djekel nyɛ nadyeebakwyɛl ɔ é ngwoob'ɛ. Nyɛ ɛ́ boozɛke nɛ nyɛɛg náá: «Nyaagam, beea mɔn'ɔ.» 27 Bhii tak, nyɛ eezɛke nɛ djekel tak náá: «Beea nyoog é». Tin, kana ɛwala ɛlenek, djekel yenɔk eezɛnɔɔ nyɛ, tɔ́, kɛdi é di wat bɛ nɛ nɛ tɔ ndjaŋ'ɛ.

28 Bhii etɛp binek, dáa Yezu nadi egu náá, etɛp djas nabɛ ɛ́, ye naazesael ɛ, nyɛ ɛ́ boozɛke náá: «Mɛ ɛ́ nɛ gwyes mɛdii*.» Nyɛ nake deenek ɛ etɛɛ náá, etɛp djas nadi tɔ Ekwyala ɛ, neebela ɛsuk. 29 É di tak, ye nabɛ ɛ́ nɛ bhe mɛnyok mɛ na bwaaz-bwaaz tɔɔɔ. Tin, wɔ gwaa esodja zokaduu pes mɛnyuku tɔ mɛnyok mɛ tak, bɛ eezɛkɔl é lɛɛ mɔɔ le. Bhii tak, bɛ eezɛsɛɛb yɛ pɛ pak nuub ɛ Yezu. 30 Yezu eezɛdɛ mɛnyok mɛ na bwaaz-bwaaz menek, bhii tak, nyɛ zɛke náá: «Djas eedjala!» É di'enek, nyɛ eezɛsil lo si, bhii tak, nyɛ eezɛsil eswos.

31 Ye nabɛ ɛ́, é ges dwoo saba. Ekukuma e eYuda nabɛ ɛ́ ààkwyɛl náá, myoŋ di kɔ mɛlaaba é dwoo saba. Bela náá, ye nabɛ ɛ́ boo dwoo saba. Tin, bɛ ɛ́ boozɛke nɛ Pilat náá, nyɛ lwom bot, bɛ kɛbwak mɛko mɛ bot ɛ nadi é mɛlaaba ɔ, da bɛ ɛ́ dis myoŋ mɔɔ. 32 Tin, esodja naazɛzyɛ zɛbwak mɛko mɛ bot ɛbá nabemaa é mɛlaaba lɔɔg wat nɛ Yezu ɔ. 33 Dáa bɛ nakazyɛ étɛp ɛzɛbwak yɛ Yezu ɛ, bɛ kabee ɛ́, nyɛ eezegwyɛ. Yɛ ɛ́ étɛp tak ɛ bɛ nadi ààbwak nyɛ mɛko. 34 Tin, wɔ gwaa sodja ngɔt zokazɛlum nyɛ nɛ ɛkɔɔ é ebhaaz. Wɔ gwaa, ghiya nɛ mɛdii zokazɛwyis é sum di tak. 35 Mot nabee nɛ mis mɛ dáa étɛp bak djas nadi esael ɛ, nyɛy ɛ di ekaada etɛp bak. Etɛp ee nyɛ di elɛɛ wak ɛ, yɛ ɛ́ etɛp etsɛɛtsɛ. Nyɛ nɛ gu náá, nyɛ lɛɛ ɛ́ etɛp etsɛɛtsɛ, etɛɛ náá, biyɔ pe, bi neemyaal. 36 Etɛp bak djas nasael ɛ́, etɛɛ náá, sa nakwyalaa tɔ Mɛkana ɛ Zɛɛb náá: «Nyɛ aanàkwaabwakaa gwyes wat ɛ*» neebela ɛsuk. 37 É dhiiti di, Mɛkana ɛ Zɛɛb baalɛɛ ɛ́ náá: «Bɛ waabee mot bɛ lum nyɛ nɛ ɛkɔɔ ɔ*.»

38 Bhii tak, Zozɛf mot dɛl Aelimate eezɛwaab nɛ Pilat náá, nyɛ djɛ nyɛ ze étɛp ɛnɔɔ muu ɛ Yezu, nyɛ neekɛdel. Zozɛf nabɛ ɛ́ djekel ɛ Yezu tɔ syaab, etɛɛ náá, nyɛ nadi ekaab ekukuma eYuda. Pilat zokamyaal, bhii tak, nyɛ eezɛtɔ́, kɛnɔɔ muu ɛ Yezu. 39 Nikodhɛm, mot natɔ́ kɛboma nɛ Yezu dhiiti dwoo é pum ɔ, zokazyɛ. Nyɛ nazyɛ ɛ́ nɛ epuuza e bɛmɛnanas ekilo mɛkam-mɛlɛl ee nasael nɛ miid nɛ aloe ɛ*. 40 Tin, bɔɔ bɛbá eezɛnɔɔ muu ɛ Yezu. Wɔ gwaa, bɛ zɛpil yɛ tɔ epes e bheeza, nɛ ɛseso mɛnanas menek é tak. Bot ɛ mbyak eYuda dyeebazezyɛ nɛ ɛsa ɛ́ deenek, é sok bɛ di ekɛdel mot ɛ. 41 É ngwoob di bɛ nawa Yezu é mɛlaaba ɔ, ye nabɛ ɛ́ nɛ bok wat tin. Tɔ bok tak, ye nabɛ ɛ́ nɛ ɛvit ɛ na bes*, nadi náá, bɛ dinaa ààpawa mot tɔ tak sok ɛ. 42 Dáa ye nadi náá, ye nabɛ ɛ́ é ges dwoo saba eYuda ɛ, nɛ dáa ye nabela náá, ɛvit nadi ɛ́ ɛkunaaɛpe ɛ. Étɛp tak ɛ, bɛ nanɛɛg muu ɛ Yezu tɔ tak. Bɛ eetɔ́ kɛdel muu ɛ Yezu