1 Tin, bis kabɛ ɛ́ eghɛɛ mɛnyel bisɔ bɛmet é? Nɛghu bis aadi ɛ́ nɛ gwyes ɛtel bin mɛkana mɛ di elyaal náá, bis ɛ́ bɛtɛtɛ bot ɛ lwoma? Nɛghu bis waab nɛ nen náá, bi kwyal bis mɛkana mɛ tak é? 2 Deenek, biyɔ bɛmet ɛ di mɛkana mes zekwyalaa tɔ ebhum elyem bis ɛ. Tin, bot djas ɛ́ nɛ ghwyil ɛgu nɛ ɛlaa. 3 Tsɛɛtsɛ, yɛ ɛ́ popoopwon náá, bi ɛ́ mɛkana ɛ Klisto nazekwyal, da bis ɛzyɛ nɛ yɛ ɛ. Tin, mɛkana mɛ tak ààpakwyalaa nɛ kwos, ye nakwyalaa ɛ́ nɛ Sisim Zɛɛb di nɛ tsik ɛ. Ye nabɛ ɛ́ ààkwyalaa kɔ ɛkok dáa etsi ɛ Moiiz nakwyalaa ɛ, tin, ye nakwyalaa ɛ́ tɔ ebhum elyem e bot.

4 Bis lii deenek ɛ́ kɔ ɛsu ɛ ɛbwaalel ɛ bis di nɛ yɛ nɛ Zɛɛb dum nɛ Klisto ɛ. 5 Bis tok nɛ egeka náá, bis ɛ́ nɛ ghwyil ɛsa mɛsa menek bisɔ bɛmet. Tin, Zɛɛb ɛ́ di edjɛ bis ghwyil ɛsa sa bis di egoka nɛ ɛsa ɛ. 6 Yɛ ɛ́ nyɛy ɛ nasa náá, mena dika bot ɛ mɛsa tɔ ɛbhɛŋ ɛ lɛ na bes. Ɛbhɛŋ ɛ tak ààbela ɛsuk tɔ mɛkana mɛ etsi, ye bela ɛsuk ɛ́ tɔ Sisim. Etɛɛ náá, etsi dul bot ɛ́ tɔ ɛsyee, yɛ kabɛ Sisim ɔɔ, ye djɛ bot ɛ́ tsik.

7 Etsi nakwyalaa ɛ́ kɔ mɛkok, deenek, duma ɛ Ghɛŋ naanyen é ɛwala ɛlenek. Bhwoob ɛ Moiiz nadi ekas kɔkɔ mbi mɛkas mɛ wat di náá, bot ɛ Yisalaɛl nabɛ ɛ́ ààbela ghwyil ɛdhwonal mis kɔ lɛ, étɛp ɛbee nyɛ. Tin, mɛkas mɛ tak nabɛ ɛ́ ààbɔya. Yɛ bɛ náá, etsi ee di edul bot tɔ ɛsyee naatuula nɛ boo yenek mɛkas ɔɔ, 8 haaa mɛkas mɛ duma mɛsa mɛ Sisim aakadi dáa? 9 Yɛ bɛ náá mɛsa mɛ etsi di ewa bot tɔ feŋ ɛpelyaal boo mɛkas ɔɔ, tin, mɛsa mɛ Sisim di esa náá, bot di piki é mis ɛ Zɛɛb ɛ, aadi ɛ́ nɛ mɛkas dhaa-dhaŋak. 10 Tin, mena ɛ́ nɛ ghwyil ɛke náá, duma nadi ekas sok ɛ, ye tokapɛ vaŋ sonok é mis mɛ duma di ekas tɔ mɛlu mak ɛ. Etɛɛ náá, mɛkas mɛ duma di mos ɛ, yɛ eedhaa-dhaŋak yii sok. 11 Yɛ bɛ náá, sa di ààbɔya naadi nɛ duma ɔɔ, haaa gwyata nɛ sa di náá, yɛ ɛ́ kɔm-kɔm ɛ!

12 Dáa ye di náá, bis ɛ́ nɛ mbi ɛbwaalel dáak ɛ, bis tokapɛ nɛ bwoo tɔ lyem. 13 Mena ààsaka dáa Moiiz, mot nadi ebutal bhwoob’ɛ nɛ bhɛɛ ɔ. Nyɛ nasa deenek ɛ́, etɛɛ náá, bɔn ɛ Yisalaɛl needi ààbee dáa mɛkas menek nadi etɔ́ nɛ ɛdiib ɛ. 14 Tin, kɛkum é dwoo ɛlak mos, mɛtselal mɔɔ nabɛ ɛ́ àànyɔ ɛmɛt ɛsuk ɛ tak. É ghɛŋ bɛ nadi elaa bɛmɛkana mɛ ɛbhɛŋ bɛ na mwa ɛ, bhɛɛ tak nabɛ ɛ́ ye dinaa kɔ mis mɔɔ. Yɛ aaboodus bɛ é mis ɛ́, é ghɛŋ ɛzyɛ ɛ mɛkas ɛ Klisto. 15 Dɔɔ nɛ dwoo pan mos’ak, é ghɛŋ bɛ aadi elelaa bɛmɛkana ɛ Moiiz ɛ, yɛ ɛ́ nɛ bhɛɛ wat di ebutal mɛtselal mɔɔ. 16 Ekwyala elɛɛ ɛ́ náá: «É ghɛŋ mot di eliig mis gwyák Ghɛŋ ɛ,✝3.16 Ɛwy 34.34 bhɛɛ ɛpedus é mis.» 17 Tin, Ghɛŋ ɛ́ Sisim. Deenek, é di Sisim ɛ Ghɛŋ di ɔ, mot tok si bhel etsi. 18 Tin, menabɛlka djas tokeka nɛ mɛbhwoob embutela, mena lyaalka ɛ́ mɛkas ɛ Ghɛŋ, mena eeswoolaka, étɛp ɛnɔŋel nɛ Ghɛŋ. Nenak, duma mena belaka ɛ, yɛ ɛ́ ɛpebyet, ɛbyet nɛ ɛbyet. Duma tak dus ɛ́ pɛ daa Ghɛŋ, nyɛy mot di Sisim ɔ.