1 Bhii tak, Yezu eezɛtɔ́ pɛ yii kyeed boo soob na djato-djato kyee dik Ghalile. Boo soob tak baadjóoaa ɛ́ Tibeliaad. 2 Wɔ gwaa, zukamwaa nɛ mot zɛdu nyɛ, etɛɛ náá, bɛ nadi ebee endem e mɛbwala mɛ nyɛ nadi esa nɛ ɛtsik ɛ membel ɛ. 3 Tin, Yezu eezɛbyet kɔ ɛtsok. Bhii tak nyɛ eezɛnɔɔ nyel disi bɛ nɛ bɛdjekel bɛ. 4 Tin, ye nabɛ ɛ́ dwoo Pak, ɛbyoŋ ɛ eYuda eezekunaa. 5 Dáa Yezu naben mis, bee náá, ɛdhuu ɛ bot nadi ezyɛ pɛ pak nyɛ nadi ɛ. Nyɛ ɛ́ boozɛke nɛ Filip náá: «Mena kɛbɔm emapa paa, étɛp bot bak needɛ?» 6 Nyɛ nake nɛ Filip deenek ɛ́, étɛp nyɛ neebee dáa nyɛ aasa ɛ. Etɛɛ náá, nyɛy nyɛ ɛmet nadi egu dáa nyɛ aasa étɛp bɛ needɛ ɛ.

7 Filip eezɛbɔɔza náá: «Nɛ edhenye bɛdhet-ɛbá (200) e epata* bis tok nɛ ghwyil ɛbɔm emapa ee aadjala nɛ dek bot bak djas ɛ.» 8 Mot ngɔt tɔ bɛdjekel bɛ, yɛ din nabɛ ɛ́ Andele. Nyɛ nadi ɛ́ dhyeeb ɛ Simɔŋ Pyɛɛd, nyɛy zokazɛke nɛ Yezu náá: 9 «Tɔ sama bot ɛ di wak’aak, yɛ ɛ́ nɛ mɔɔ ngbaaz ngɔt di nɛ emapa etɛn yii ɔɔghɛ*, zɛnɔɔ bɔɔ bɛsu ɛ ɛbá. Yenek aakosa yé nɛ zukamwaa nɛ mot di wak’aak?» 10 Tin, Yezu eezɛke náá: «Dilka bɛ si mendiindil.» É di tak, ye nabɛ ɛ́, nɛ mɛso-mɛgwyii ɛbuɛpe. Tin, bɛ eezɛnɔɔ mɛnyel, disi kɔ tak. Bot ɛ nadi tin ɔ nabɛ ɛ́ tyee botom bɛmil ɛtɛn (5 000). 11 Bhii tak, wɔ gwaa Yezu zɛnɔɔ mapa, ghaapɛɛ Zɛɛb. Nyɛ eezɛnɔɔ, kaa bot binɔk yɛ ɛ. Bhii tak, nyɛ eebaazɛnɔɔ bɛsu, kaa bot binɔk yɛ ɛ. Bot djas naadɛ dáa elyem bɔɔ kwyɛl ɛ. 12 Dáa bot nadɛ djil ɛ, nyɛ ɛ́ booke nɛ bɛdjekel bɛ náá: «Bulaka nɛ epes lik ɛ, ekaab náá, yɛ ɛ́ zɛkɛpulel.» 13 Tin, bɛdjekel moo tin etek ebhil e tak. Wɔ gwaa, bɛ zokazɛlwoodal mɛbhwaa kam nɛ ebá nɛ mɛbhubhwak mɛ ebil e emapa etɛn bot nakat ɛdɛ ɛ.

14 Dáa bot nabee endem e mɛbwala mɛ Yezu nasa ɛ, wɔ gwaa, bɛ zɛke náá: «Nɛ tsɛɛtsɛ, nwyak ɛ́ ngoolel-Mɛkpa ɛ Zɛɛb nakeaa náá, nyɛ waazyɛ kɔ bɔs’ak ɛ.» 15 Tin, Yezu naazɛgu náá, bɛ nadi esuu ɛzɛ mɛt nyɛ nɛ ghwyil, étɛp ɛkɛdil nyɛ kɔ bóó mɛkoozi nɛ bhel. Nyɛ ɛ́ boozɛkaab, byet kɔ ɛtsok, nyɛy nyɛ ɛmet.

16 Dáa dwoo nabɛ ye moo sila ɛ, bɛdjekel bɛ eezɛwyeed, tɔ́ pɛ ɛboŋ ɛ boo soob na djato-djato. 17 Bhii tak, bɛ eezɛni tɔ boo elɛɛd. Tin, bɛ moo tsaal dii tɔ́ pɛ yii kyiid pɛ kyee Kapɛlnaum. Ye nabɛ ɛ́, ɛgwyitok eezegwyiidela. Yezu nadi ɛ́, nyɛ dinaa ààzɛbela bɛ. 18 Tin, boo ghuu moo tin epupal kɔ boo soob na djato-djato, bhuuge moo tin eghɛɛ mɛdii ɛlyelɛpe. 19 Bhii bɛ naduk tyee enɛŋ etɛn ɛ, bɛ kabee ɛ́ Yezu ekɛ kɔ dii. Nyɛy ezyɛ pɛ kyee bɛ nadi tɔ elɛɛd ɛ. Ye nabɛ ɛ́ bwoo nɛ bɛbebwol naamɛt bɔɔ djas. Yezu eekɛ kɔ boo dii

20 Tin, Yezu ɛ́ boozɛke nɛ nɔɔ náá: «Yɛ ɛ́ mam, nàbemka ba!» 21 Bɛ nadi ekwyɛl ɛniigal nyɛ tɔ boo elɛɛd tak. É di tak wat, elɛɛd eezɛkum é ɛboŋ ɛ bɛ nadi ekwyɛl ɛsɛɛ ɛ.

22 Yak dwoo bhii tak, ɛdhuu ɛ bot ɛ nalik pɛ yii kyiid boo soob na djato-djato ɔ, bɛ eezɛbee náá, ye nazokalik é ɛboŋ ɛ́, elɛɛd wat. Bɛ nadi egu náá, Yezu nabɛ ɛ́ ààtɔ́ tɔ elɛɛd wat bɛ nɛ bɛdjekel bɛ. Bɛ natɔ́ ɛ́ bɔɔ bɛmet. 23 Edhiiti elɛɛd nadi edus pɛ ghaada Tibeliaad. Yɛ eezɛkum pɛ pak bɛ nadi edɛ emapa bhii mendjaala mɛ Ghɛŋ naghaapɛɛ Zɛɛb ɛ. 24 É ghɛŋ mɛdhuu mɛ bot binɔk nabee náá, Yezu nɛ bɛdjekel bɛ nabɛ ɛ́ ààbɛ tin ɛ, bɛ ɛ́ boozɛni tɔ mɛlɛɛd kɛsaa Yezu bɔɔ bɛmet pɛ kyee dik Kapɛlnaum.

25 Bot naazɛboma nɛ Yezu pɛ nyɛ nadi pɛ yii kyiid boo soob na djato-djato ɛ. Bɛ eezɛdji nyɛ náá: «Labhi, wɔ kaleezyɛ kak é yaa ɛwala?» 26 Tin, Yezu eezɛbɔɔza náá: «Tsɛɛtsɛ nɛ tsɛɛtsɛ mɛ lɛɛ bin ɛ́ etɛp e tsɛɛtsɛ náá: Bi ààsaa mɛ etɛɛ náá, bi naabee endem e mɛbwala mam. Bi saa mɛ ɛ́, etɛɛ náá, ye nabɛ ɛ́ bi naadɛ emapa, bi naadjil ɛnyɔɛpe. 27 Nàsaka mɛsa étɛp ɛsaŋ ɛ edee ee di náá, yɛ waapulel ɛ. Saka mɛsa étɛp ɛbela edee di ebɔya ɛ, edee di edjɛ tsik na kɔm-kɔm ɛ, edee Sɛɛŋɛlɛ Mɔn Mot aadjɛ bin ɛ. Etɛɛ náá, Zɛɛb Sɛɛg nyɛy nyɛ ɛmet naadjɛ nyɛ ze ɛsa mɛsa mɛ nyɛ di esa yenek.» 28 Bɛ eezɛke nɛ Yezu náá: «Bis goka nɛ ɛsa dáa étɛp bis neesa etɛp Zɛɛb di ekwyɛl ɛ?» 29 Tin, Yezu eezɛbɔɔza náá: «Sa Zɛɛb di ekwyɛl ɛ, yɛ ɛ́ náá, bi dum koŋ nɛ mot nyɛ nadhis ɔ.» 30 Bot binɔk eezɛke nɛ Yezu náá: «Lyaala bis dhiiti ndem mɛbwala, étɛp bis needum koŋ nɛ nɔ. Yaa embɛɛ mɛsa mɛ wɔ di esa? 31 Bɛbhaab binaka naadɛ emapa ee nadus tɔ gwoo ɛ, pɛ tɔ kyee bɔs bɛsyɛ di ààbɛ nɛ mɛdii ɛ. Dáa ye nakwyalel náá: "Zɛɛb naadjɛ bɛ emapa ee nadus tɔ gwoo ɛ*."» 32 Yezu eezɛbɔɔza náá: «Tsɛɛtsɛ nɛ tsɛɛtsɛ mɛ eelɛɛ bin etɛp e tsɛɛtsɛ náá, ye tok Moiiz nadjɛ bin mapa nadus pɛ tɔ gwoo ɛ. Yɛ ɛ́ Saagam ɛ di edjɛ bin tɛtɛ mapa di edus pɛ tɔ gwoo ɛ. 33 Etɛɛ náá, mapa Zɛɛb di edjɛ bot ɛ, yɛ ɛ́ mapa di edus pɛ ɛko ɛ. Yɛ ɛ́ di edjɛ tsik nɛ bot ɛ bɔs djas.» 34 Tin, bɛ ɛ́ boozɛke nɛ nɛ náá: «Ghɛŋ, gheedjedjɛ bis mapa tak mɛlu djas!» 35 Yezu eezɛbaake nɛ nɔɔ náá: «Yɛ ɛ́ mam ɛ di mapa di edjɛ tsik ɛ. Mot aazyɛ pɛ daa lam ɔ, nyɛ aanàkwaabaagwak za. Deenek, mot aadum koŋ nɛ nam ɔ, nyɛ aanàkwaabaagwak gwyes mɛdii. 36 Tin, mɛ lɛɛ bin ɛ́ náá, bi eebee mɛ, saabɛgɔs kabɛ ɛ́ náá, bi ààdum koŋ nɛ nam. 37 Bot djas Saagam di edjɛ mɛ ɔ, bɛ waazyɛ pɛ daa lam. Deenek, mam, mɛ àànakwaasɔ mot aazyɛ pɛ daa lam ɔ. 38 Nɛ tsɛɛtsɛ, mɛ nabɛ ɛ́ ààdus pɛ tɔ gwoo, sul kɔ bɔs étɛp ɛsa ɛkwosak ɛ lam. Tsɛɛtsɛ, mɛ nadus pɛ tɔ gwoo, sul kɔ bɔs ɛ, étɛp ɛsa ɛkwosak ɛ Saagam mot nadhis mɛ ɔ. 39 Tinaak, ɛkwosak ɛ mot nadhis mɛ ɔ, yɛ ɛ́ náá, sa mɛ ààdiibal mot ngɔt, pak bot ɛ nyɛ nadjɛ mɛ ɔ. Ɛkwosak ɛ lɛ ɛ́ náá, mɛ gomal bot bhis ɛsyee é dwoo mɛsik. 40 Etɛɛ náá, ɛkwosak ɛ Saagam ɛ́ náá, mot nɛ mot aabee Mɔn, da bhii tak nyɛ ɛ́ dum koŋ nɛ nɛ ɔ, mot tak ɛ́ waabela tsik na kɔm-kɔm. Tin, mɛ waagomal nyɛ bhis ɛsyee ɛ lɛ é dwoo mɛsik.»

41 Tin, ekukuma eYuda moo nyiiŋela pak’ɔɔ dum nɛ nɛ. Etɛɛ náá, nyɛ naake náá: «Mapa nadus pɛ ɛko, sul kɔ bɔs ɛ, yɛ ɛ́ mam.» 42 Tin, bɛ eebaazɛbil náá: «Mot’ak tok wak Yezu mɔn ɛ Zozɛf, mot mena di eguka sɛɛg nɛ nyɛɛg ɔ? Kɔ ɛsu ɛ yé nyɛ di eke nenak náá: mɛ nadus ɛ́ pɛ ɛko, sul kɔ bɔs?» 43 Yezu eezɛbɔɔza nɛ nɔɔ náá: «Nànyiiŋelaka pak’en! 44 Etɛɛ náá, mot tok nɛ ghwyil ɛzyɛ pɛ daa lam, yɛ di ààbɛ náá, Saagam mot nadhis mɛ ɔɔ, dhis nyɛ pɛ daa lam. Mɛ waagomal nyɛ bis ɛsyee ɛ lɛ é dwoo mɛsik. 45 Tɔ mɛkana mɛ bɛngoolel ɛ Mɛkpa ɛ Zɛɛb, Ekwyala lɛɛ ɛ́ náá: "Zɛɛb ɛ́ waalyo bɔɔ djas*." Tinaak bot aagwak Sɛɛg, da bɛ ɛ́ myaal mɛlyo mɛ ɔɔ, bɛ ɛ́ waazyɛ pɛ daa lam. 46 Yɛ ààkwyɛl ɛlɛɛ náá, dhiiti mot eezebee Sɛɛg, yɛ di ààbɛ mot nadus pɛ daa Zɛɛb ɔɔ. Yɛ ɛ́ nyɛy nyɛ ɛmet ɛ zebee Sɛɛg.

47 Mɛ lɛɛ bin ɛ́ etɛp e tsɛɛtsɛ náá, mot ɛ dum koŋ nɛ nam ɔɔ, nyɛ waabela tsik na kɔm-kɔm. 48 Yɛ ɛ́ mam ɛ di mapa di edjɛ tsik ɛ. 49 Bɛsɛɛg bin naadɛ mapa nadus tɔ gwoo ɛ́ bɔɔ tɔ bal. Saabɛgɔs ɛ́ náá, bɛ naagwyɛ. 50 Tin, mot aadɛ mapa dus pɛ tɔ gwoo, sul kɔ bɔs ɔ, mot tak aanàkwaagwyɛ. 51 Yɛ ɛ́ mam ɛ di mapa di edjɛ tsik nɛ bot ɛ, mapa di edus pɛ tɔ gwoo, sul kɔ bɔs ɛ. Mot ɛ dɛ mapa tak ɔ, nyɛ ɛpebela tsik na kɔm-kɔm. Tinaak, mapa mɛ aadjɛ ɛ, yɛ ɛ́ epuud e nyel’am. Mɛ waadjɛ epuud e nyel’am étɛp ɛtsik ɛ bot ɛ bɔs.»

52 Dáa bɛ nagwak deenek ɛ́, eYuda eezɛbe mɛso pak’ɔɔ ɛlyelɛpe. Bɛ nadi ekeke ɛ́ náá: «Mot’ak aasa dáa, étɛp nyɛ needjɛ mena nyel’ɛ, mena needɛka?» 53 Yezu eezɛbɔɔza náá: «Gwakeka ɛnyɔɛpe sa mɛ di lɛɛ bin’aak. Bi ɛ di ààdɛ epuud e nyel nɛ ghiya ɛ Sɛɛŋɛlɛ Mɔn Mot ɔɔ, bi tok nɛ tsik tɔ len. 54 Mot aadɛ epuud e nyel nɛ ghiya yam ɔ, mot tak ɛ́ waabela tsik na kɔm-kɔm. Tin, mɛ waagomal nyɛ bhis ɛsyee ɛ lɛ é dwoo mɛsik. 55 Etɛɛ náá, mɛ lɛɛ bin ɛ́ náá, yɛ ɛ́ tsɛɛtsɛ náá, epuud e nyel ɛ́ mbɛɛ edee, da ghiya yam ɛ́ kadi, mbɛɛ mɛnyok. 56 Mot ɛ dɛ epuud e nyel’am, nɛ ghiya yam ɔɔ, bis nɛ yenɔk aakadi ɛ́, mot ngɔt. Nyɛy tɔ lam, mam tɔ lɛ. 57 Mɛ ɛ́ nɛ tsik ɛ kɔ ɛsu ɛ Saagam, mot nadhis mɛ ɔ. Nyɛ ɛ́ di nɛ tsik. Tyee wat, mot aadɛ mɛ ɔ, nyɛ aadi nɛ tsik kɔ ɛsu ɛ lam. 58 Beeka mapa dus pɛ ɛko, sul kɔ bɔs ɛ. Nyɛ tok dáa mapa nadus tɔ gwoo, yii bɛsɛɛg bin nadɛ ɛ. Etɛɛ náá, bhii bɛ nadɛ yɛ ɛ, bɛ naagwyɛ. Yɛ kabɛ yak mapa ɔɔ, mot ɛ dɛ yɛ ɔɔ, nyɛ ɛpebela tsik na kɔm-kɔm.» 59 Etɛp binek djas naliiel ɛ́, tɔ mɛlyo mɛ Yezu nalyo bot tɔ ndjaa mendjaala mɛ eYuda pɛ Kapɛlnaum ɛ.

60 Bhii bɛtɛ nɛ bɛdjekel nazegwak etɛp ee Yezu nadi elii ɛ, wɔ gwaa bɛ zɛke náá: «Mɛlyo mɛ nɛ lyel. Nwyaa mot aakwaagwak yɛ?» 61 Dáa Yezu nyɛ ɛmet nagu náá, bɛdjekel bɛ nadi elii ɛbiyoɛpe dum nɛ mɛlyo mɛ nyɛ nalyo ɛ, nyɛ ɛ́ boodji bɛ náá: «Haaa etɛp yé, mɛlyo mam di ekpaa bin tɔ lyem? 62 Bha bi ɛ́ bee Sɛɛŋɛlɛ Mɔn Mot ebyet tɔ gwoo pɛ kyee nyɛ nadi sok ɛ, bi aasa dáa? 63 Yɛ ɛ́ Sisim Zɛɛb ɛ di edjɛ tsik. Epuud e mot ààval dhiiti sonok. Etɛp ee mɛ di elɛɛ bin ɛ́, yɛ ɛ́ etɛp e Sisim. Yɛ ɛ́ etɛp di edjɛ bot tsik ɛ. 64 Tin, pak’en, yɛ ɛ́ nɛ bɛdhiiti bot ɛ di ààdum koŋ nɛ nam ɔ.»

Yezu nake deenek ɛ́ etɛɛ náá, nyɛ nadi egu bot aaboodi ààdum koŋ nɛ nɛ ɔ. Nyɛ nabaadi egu mot aakɛka nyɛ gha ɔ. 65 Nyɛ eebaazɛbil ɛkpa náá: «Yɛ ɛ́ étɛp tak ɛ mɛ di elɛɛ bin náá: "Mot tok nɛ ghwyil ɛzyɛ pɛ daa lam, Saagam ɛ di ààmyaal náá, nyɛ zyɛ ɔɔ."»

66 Kana dwoo tak, bɛtɛ nɛ bɛdjekel zokazɛdus yɔbɔ. Bɛ eezɛkat ɛgyee nɛ Yezu lɔɔg. 67 Tin, Yezu ɛ́ booke nɛ bɛdjekel bɛ kam nɛ bɛbá náá: «Haaa biyɔ, bi ààpatɔ́?» 68 É di’enek, Simɔŋ Pyɛɛd eezɛbɔɔza náá: «Ghɛŋ, bis aatɔ́ paa? Wɔy ɛ́ di nɛ mɛkpa mɛ di edjɛ tsik na kɔm-kɔm ɛ. 69 Bisɔ, bis eedum koŋ nɛ nɔ. Tin, bis nɛ gu náá, wɔy ɛ di Mot na Dɛɛ Zɛɛb nadhis ɔ.» 70 É di’enek, wɔ gwaa Yezu zɛbɔɔza nɛ nɔɔ náá: «Yɛ ɛ́ mam ɛ nasɛ́ɛ bin, biyɔ bot ɛ lɔɔg kam nɛ bɛbá. Deenek, mot ngɔt tɔ sama yen ɛ́ lyeeb.» 71 Nyɛ nalii deenek ɛ́ nɛ Yudas, mɔn Simɔŋ Iskaliɔt. Etɛɛ náá, nyɛy ɛ́ kwaakɛka nyɛ gha. Ye nakoozodi náá, nyɛ nadi ɛ́ ngɔt tɔ sama bɛdjekel kam nɛ bɛbá.