1 Bi naazegom pak bot ɛ nazegwyɛ ɔ, sama nɛ Klisto. É di'enek, saaka esa ee di pɛ tɔ gwoo ɛ, pɛ kyee Klisto di ndiidel pɛ mbɔ eghɛŋ ɛ Zɛɛb ɛ. 2 Waka esiiza bin tɔ esa ee di pɛ tɔ gwoo ɛ, ààbɛ tɔ esa ee di kɔ ɛko ɛ bɔs ɛ. 3 Etɛɛ náá, bi eezegwyɛ, deenek, tsik'en ɛ́ syela é mɛmbɔ mɛ Klisto, pɛ daa Zɛɛb. 4 Tɛtɛ tsik'en ɛ́ Klisto. É ghɛŋ Klisto aatuula ɛ, biyɔ pe ɛ́ waatuula sama nɛ nɛ étɛp ɛdi tɔ duma yɛ.

5 Saka náá, esa ee di edjɛ bin gwyes ɛsa ɛkwosak ɛ epuud ɛ, gwyɛ. Esa é tak ɛ́: mɛzɔ, sa di edjɛ edhuud ɛ, ekaa, embee mɛkwosak, dɔɔb mɛvu. Etɛɛ náá, ekaa ɛ́ dhatyee ɛduwal ɛ bɛnaghisɛ. 6 Mbi mɛfulu menek ɛ di esa náá, Zɛɛb kpaa ɛbuk nɛ bot ɛ di ààlooba nɛ nɛ ɔ*. 7 Yɛ ɛ́ deenek ɛ́ bi nadi ekɛ, é sok tsik'en nadi ye dinaa si bhel mesyem menek ɛ.

8 Nenak, bi goka ɛ́, bi kat etɛp bak: ɛbuk, ɛkpaŋ ɛ lyem, mbee lyem. Sa mbee ɛkpa ɛ wat, nɛghu mɛlee ààwyis tɔ enuub bin. 9 Sa bi ààdi nɛ elɛŋ etsal pak'en, etɛɛ náá, bi naazekat mɛfulu mɛ na mwa, nɛ esesɛɛ bi nasesa sok ɛ. 10 Bi moo ɛ́ nɛ mɛfulu mɛ na bes, bi moo ɛ́ bot ɛ na bes ɛ Zɛɛb Mɛkus-bot yenaka. Yɛ ɛ́ nyɛy ɛ di esa náá, bi gheenɔŋel nɛ nɛ, étɛp bi neegu nyɛ ɛnyɔɛpe. 11 Ye tokapɛ nɛ mbɛk pak bot ɛ mbyak eYuda, nɛ bot ɛ di ààbɛ bot ɛ mbyak eYuda ɔ, pak mot zeni beka, nɛ mot di ààni beka ɔ. Ye tokapɛ nɛ mbɛk pak ndjoŋ, nɛ mot di ààgu mɛkana ɔ, ye tokapɛ nɛ mbɛk pak kwom nɛ mot di ààdi kwom ɔ. Tin, sa di nɛ mɛtaŋ ɛbuɛpe ɛ, yɛ ɛ́ Klisto, nyɛy ɛ́ djas tɔ etɛp djas.

12 Bi moo ɛ́ bot ɛ edɛɛ ɛ Zɛɛb, nyɛ naazesɛ́ɛ bin nɛ ɛkwyɛl ɛ bin. Yɛ ɛ́ étɛp tak ɛ di náá, bi goka ɛ́ di nɛ mɛsila, nɛ lyem ghoŋ, nɛ enɛm esa, nɛ mɛtela zɛnɔɔ ɛmaad ɛ lyem. 13 Djiselka pak'en, da bi ɛ́ pelel pak'en. Yɛ bɛ náá, mot ngɔt ɛ́ nɛ ndjɛ nɛ mɔɔ sɔ mot ɔɔ, dáa Ghɛŋ napel bin ɛ, nyɛy pe goka ɛ́ nɛ ɛpel mɔɔ sɔ. 14 Daŋ-daŋ ɛ́ náá, kwyɛlelka pak'en, etɛɛ náá, kwyɛl ɛ di esa náá, bi di tɔ ɛgwakel ɛnyɔɛpe.

15 Beta náá, egwyem ɛ Klisto djɛɛd ebhum elyem bin. Etɛɛ náá, yɛ ɛ́ kɔ ɛsu ɛ egwyem binek ɛ Zɛɛb nadjóo bin, étɛp bi needi ekyes e nyel wat. Deenek, bulalka nyɛ bhɔɔ é mɛwala djas. 16 Beta náá, mɛkpa ɛ Klisto nɛ mɛvu mɛ tak djas di tɔ len. Lyoelka pak'en, dulelka mɛlɔ pak'en nɛ etsoŋ djas. Tiika membi mɛ mɛdjeeb mɛ Zɛɛb djas nɛ lyem wat, nɛ ɛbulal ɛ bhɔɔ tɔ mɛdjeeb djas: mɛdjeeb mɛ di edjɛ ɛbwaalel, mɛdjeeb mɛ di edjɛ duu nɛ Zɛɛb ɛ, zɛnɔɔ mɛdjeeb mɛ Sisim na Dɛɛ di etel bin ɛ. 17 Mɛsa mɛ bi aadi esa djas ɛ, nɛ mɛkpa aadi ewyis tɔ enuub'en ɛ, saka yɛ nɛ din ɛ Ghɛŋ Yezu tɔ ɛbulal ɛ́ bhɔɔ nɛ Zɛɛb Sɛɛg kɔ ɛsu ɛ lɛ.

18 Biyɔ boa, loobaka nɛ botom bin, dáa di egoka náá, ye sael é mis ɛ Ghɛŋ ɛ. 19 Yɛ kabɛ biyɔ botom ɔɔ, kwyɛlka bɛl bin, sa bi ààlyel elyem nɛ nɔɔ.

20 Bɔn, loobaka nɛ bɛbyael bin, etɛɛ náá, yɛ ɛ́ sa Ghɛŋ di emyaala nɛ yɛ ɛ. 21 Biyɔ bɛsɛɛg nɛ bɛnyɛɛg ɛ bɔn, sa bi ààsa náá, bɔn bin kpaa elyem, ekaab náá, esiiza bɔɔ ɛzɛkɛpulel.

22 Ekwom, loobaka nɛ etɛp djas ekukuma bin di kɔ ɛko ɛ bɔs aalɛɛ bin ɛ. Yɛ ààgoka náá, mɛsa mɛ bi di esa ɛ zosael ɛnyɔɛpe é sok bɛ di nɛ mis kɔ len ɛ, étɛp bɛ neemyaala nɛ nen. Tin, loobaka nɛ nɔɔ nɛ lyem sɛŋ, kɔ ɛsu ɛ ɛduwal ɛ bi di eduwal Ghɛŋ ɛ. 23 Ye nakoozodi mɛsa men djas bi di esa ɛ, saka yɛ nɛ lyem wat dáa bot ɛ di esa mɛsa ɛ Ghɛŋ ɛ, ààbɛ nɛ mɛnwyaad dáa bot ɛ di esa mɛsa mɛ bot ɛ. 24 Guka náá, Ghɛŋ ɛ́ waadjɛ bin efute, bi ɛ́ waabela ekum ee nyɛ nakwom étɛp bot bɛ ɛ. Etɛɛ náá, tɛtɛ kukuma bi di esa mɛsa mɛ ɔ, yɛ ɛ́ Ghɛŋ Klisto. 25 Tin, mot di esa ɛbiyo ɔ, nyɛ aabela efute e ɛbiyo ɛ mɛsa mɛ, etɛɛ náá, Zɛɛb ààwa mbɛk pak bot.