1 Yɛ ɛ́ mam Pɔl, mot-lwoma ɛ Yezu Klisto tɔ ɛkwosak ɛ Zɛɛb, nɛ mɔn-nyɛɛg'enaka Timote ɛ di kwyal bin mɛkana mak.

2 Bis kwyal mɛkana mak ɛ́, étɛp bot ɛ zedum koŋ nɛ Zɛɛb di pɛ tɔ ghaada Kolɔs ɔ, bɔn-nyɛɛg bina, bot ɛ di sosoob tɔ ɛgwakel nɛ Klisto ɔ. Beta náá, Zɛɛb Sɛɛg'enaka djɛ bin enɛm nɛ embɛɛ nɛ egwyem.

3 Mɛlu djas, bis nɛ bulal bhɔɔ nɛ Zɛɛb, Sɛɛg ɛ Ghɛŋ'enaka Yezu Klisto, é sok bis di edjaala etɛp'en ɛ. 4 Etɛɛ náá, bis naagwak bot elii kɔ ɛsu ɛ ɛdum ɛ koŋ ɛ len nɛ Yezu Klisto, zɛnɔɔ kwyɛl bi di nɛ yɛ nɛ bot djas zedum koŋ nɛ Zɛɛb ɔ. 5 Bi sa deenek ɛ́, etɛɛ náá, bi ɛ́ nɛ ɛbwaalel náá, bi ɛ́ waabela sa Zɛɛb nazekoobal bin yɛ pɛ tɔ gwoo ɛ. É ghɛŋ bi nagwak Mbɛɛ Bhaadal, di mɛkpa mɛ etsɛɛtsɛ ɛ, ye naasa náá, bi di nɛ ɛbwaalel. 6 Mbɛɛ Bhaadal tak ɛpekɛ kɔ ɛko ɛ bɔs djas. Yɛ ɛpedjɛ bhum é edi djas. Yɛ ɛ́ dáa ye nasa pɛ yebɔ é ghɛŋ bɛ nagoola bin enɛm nɛ embɛɛ e Zɛɛb, da bi ɛ́ gu náá, Zɛɛb ɛpelyaal enɛm nɛ embɛɛ bɛ nɛ bot djas ɛ. 7 Yɛ ɛ́ Epafalas, mɔn-nyɛɛg'es bis di ekwyɛl ɔ, mot bis nɛ bɛnɔɔ di esa mɛsa ɔ, nyɛ ɛ́ nadjɛ bin mɛlyo menek. Nyɛ ɛpesa mɛsa tɔ esosoob étɛp'en dáa mot-mɛsa ɛ Klisto. 8 Nyɛ eelɛɛ bis dáa Sisim na Dɛɛ di esa náá, bi kwyɛl bɔn bɛsɔ bina tɔ ɛdum ɛ koŋ nɛ Zɛɛb ɛ.

9 Yɛ ɛ́ étɛp tak ɛ, bis di ààkat ɛdjaala etɛp'en, kana ɛlu ɛ bis nagwak menduk men ɛ. Bis ɛpedjaala nɛ Zɛɛb náá, nyɛ lyaal bin ɛkwosak ɛ lɛ ɛnyɔɛpe, kɔ ɛsu etsoŋ nɛ mɛtselal mɛ Sisim'ɛ di edjɛ ɛ. 10 Bis djaala Ghɛŋ Zɛɛb ɛ́, etɛɛ náá, bi needi nɛ embɛɛ mɛfulu nɛ ɛsesa mɛsa dáa nyɛ di ekwyɛl ɛ. Bi ɛ́ waasa membi mɛ enɛm esa djas, bi ɛ́ waatɔ́ sok tɔ ɛgu etɛp e Zɛɛb ɛnyɔɛpe. 11 Bis ɛ́ ɛpebaadjaala nɛ Zɛɛb náá, nɛ duma mɛbwala mɛ, nyɛ djɛ bin mɛghaaz, étɛp bi needjisal etɛp djas nɛ ɛmaad ɛ lyem. 12 Nɛ mɛmyaala djas, bulalka bhɔɔ nɛ Zɛɛb Sɛɛg'enaka. Yɛ ɛ́ nyɛy ɛ nasa náá, bi di bot aabela mɛvu mɛ nyɛ nakɛk ɛ. Yɛ ɛ́ étɛp bi needi bot bɛ tɔ ɛyoŋ ɛ mɛkas. 13 Tsɛɛtsɛ nyɛ naapɛk mena si bhel mɛbwala mɛ Satan di tɔ ghooghom ɛ, étɛp ɛtɔ́ nɛ nena tɔ ɛyoŋ ɛ Mɔn'ɛ nyɛ di ekwyɛl ɔ. 14 Yɛ ɛ́ dum nɛ Mɔn'ɛ tak ɛ, nyɛ napɛk mena tɔ ɛbiyo, yɛ ɛ́ kɔ ɛsu ɛ lɛ ɛ mesyem mena napelaa.

15 Klisto ɛ́ mbaŋa-mbaŋa ɛ Zɛɛb,

mot di ààbeeaa ɔ.

Nyɛ ɛ́ Mɔn'ɛ mɛgwyak,

nyɛ eedhaa esa djas nakusaa ɛ.

16 Yɛ ɛ́ nɛ nɛ ɛ Zɛɛb nakus esa djas:

esa ee di pɛ tɔ gwoo nɛ yii di kɔ ɛko ɛ bɔs ɛ,

esa ee di ebeeaa nɛ mis ɛ, nɛ esa ee di ààbeeaa nɛ mis ɛ,

esisim, nɛ eghwyil mɛbwala di tɔ gwoo ɛ

embee esisim ee di pɛ ɛko nɛ ekukuma ɛ.

Esonok djas nakusaa ɛ́ nɛ Klisto, ye nakusaa ɛ́ étɛp'ɛ.

17 Ɛsok nɛ esonok djas nɛ kusel,

Klisto nadi ɛ́ nyɛ moo tak.

Yɛ ɛ́ kɔ ɛsu ɛ lɛ ɛ,

esa e bhwak djas di ekɛ ɛnyɔɛpe.

18 Yɛ ɛ́ nyɛy ɛ di eedjɛɛd zɛɛga mendjaala,

dáa lo mot di edjɛɛd nyel ɛ.

Yɛ ɛ́ nyɛ ɛ di ɛsuk ɛ tsik.

Nyɛ ɛ́ Mɔn mɛgwyak,

nyɛ ɛ́ mot mɛkɛn nagomelaa pak bot ɛ nazegwyɛ ɔ,

étɛp nyɛ neekɔk kɔ esonok djas.

19 Zɛɛb eekwyɛl náá,

nyɛ di tɔɔɔ tɔ Mɔn'ɛ kɛdjala.

20 Yɛ ɛ́ deenek ɛ́ Zɛɛb nakwyɛl ɛbulal ɛgwakel pak bhwak djas nɛ nɛ.

Yɛ ɛ́ kɔ ɛsu ɛ ghiya Mɔn'ɛ naso kɔ mɛlaaba ɛ,

nyɛ naadjɛ egwyem étɛp bhwak djas,

ye nakoozodi kɔ ɛko ɛ bɔs nɛghu pɛ tɔ gwoo.

21 É ghɛŋ sok, biyɔ pe nadi ɛ́ ɛtsetaɛpe nɛ Zɛɛb, bi nadi ɛ́ bot ɛ mɛbhuka mɛ kɔ ɛsu ɛbiyo bi nadi egek ɛsa ɛ, nɛ yii bi nasa ɛ. 22 Tin, nenak Zɛɛb eesa náá, ɛgwakel bula pak biyɔ nɛ nɛ. Yɛ ɛ́ kɔ ɛsu ɛ ɛsyee ɛ Mɔn'ɛ mot naka nyel'ɛ buwa, etɛɛ náá, bi needi bot ɛ edɛɛ é mis ɛ Zɛɛb, bot ɛ di ààbɛ nɛ ndjɛ, ààkobɛ-bɛak nɛ ɛtɔn ɛ wat ɔ. 23 Tin, bi goka ɛ́ nɛ ɛdi tɔ ɛdum ɛ koŋ nɛ Zɛɛb, ɛdum ɛ koŋ ɛ di náá, ye pyet ɛ́ kɔ ghus-zumal na lyel-lyel ɛ. Deenek, sa mot ààbet náá, bi di ɛtsetaɛpe nɛ ɛbwaalel ɛ len bi nabela tɔ ɛgwak ɛ Mbɛɛ Bhaadal ɛ. Yɛ ɛ́ sa nagoolaaa kɔ ɛko ɛ bɔs djas ɛ. Yɛ ɛ́ kɔ ɛsu ɛ tak ɛ mam Pɔl, mɛ moo mos mot-mɛsa ɛ Zɛɛb.

24 Mɛ moo nenak ɛ́ nɛ mɛmyaala étɛp mezuk mɛ mɛ zezuk étɛp'en ɛ. Dáa Klisto nazuk ɛ, nyel'am pe ɛ́ tɔ mezuk étɛp zɛɛga mendjaala. Ye kwyɛl ɛlɛɛ ɛ́ náá, mɛ eemyaal ɛzuk kɔ ɛsu ɛ nyel ɛ Klisto. Mɛ zuk deenek ɔɔ, yɛ ɛ́ étɛp ɛkɛl yam bim mezuk kɔ mezuk mɛ. 25 Mɛ moo mos ɛ́ mot-mɛsa mɛ zɛɛga mendjaala. Zɛɛb nalwom mɛ ɛ́, étɛp ɛgoola bin Mɛkpa ɛ Zɛɛb djas. 26 Mɛkpa mɛ tak ɛ́ mɛkpa mɛ nyɛ naloosyel ebhokak nɛ bot ɛ bhwak djas ɛ. Nenak, nyɛ eelyaal yɛ nɛ bot ɛ zedum koŋ nɛ Zɛɛb ɔ. 27 Etɛɛ náá, Zɛɛb nadi ekwyɛl náá, bɛ gu mbɛɛ sa nadi syela ɛ, esa ee nakobelaa étɛp bot ɛ membyak djas ɛ. Beeka sa syela tak é: Klisto ɛ́ tɔ len, nyɛ ɛpedjɛ bin ɛbwaalel náá, bi ɛ́ waadi tɔ duma ɛ Zɛɛb. 28 Tin, bis ɛpegoola Mbɛɛ Bhaadal ɛ Klisto nɛ bot djas. Bis ɛpedul mɛlɔ nɛ ɛlyo mot nɛ mot nɛ etsoŋ djas, étɛp mot nɛ mot neewoozal tɔ tsik Sisim, tɔ ɛgwakel bɛ nɛ Klisto. 29 Yɛ ɛ́ étɛp tak ɛ, mɛ di eghuula tɔ mɛsa nɛ ghwyil ɛ Klisto di esa mɛsa tɔ lam nɛ mɛbwala mɛ djas ɛ.