1 «Yɛ ɛ́ mam ɛ di tɛtɛ le vin. Saagam ɛ́ nakuma pyeeb tak. 2 Nyɛ waatsaal elɛɛ di ààdjɛ bhum ɛ djas. Tinaak, elɛɛ di edjɛ bhum ɛ, nyɛ kakoobal yɛ ɛ́ koobelak, etɛɛ náá, yɛ needjɛ bɛtɛ nɛ bhum. 3 Bi moo mos ɛ́ bot ɛ na dɛɛ dum nɛ mɛlyo mɛ mɛ djɛ bin ɛ. 4 Dika mot ngɔt nɛ nam, dáa mɛ di mot ngɔt bis nɛ Saagam ɛ. Lɛɛ le vin tok nɛ ghwyil ɛbya bhum, yɛ di ààdi naada é kuu le ɔɔ. Tyee wat nɛ nen, bi tok nɛ ghwyil ɛbya bhum, bi ɛ di ààdi nɛ nam sama wat ɔɔ. Kel vin nɛ sɛŋ tak

5 Yɛ ɛ́ mam ɛ di le vin, biyɔ ɛ́ elɛɛ. Mot di tɔ lam ɔ, mot mɛ di nɛ nɛ sama wat ɔ. Nyɛ waabya bɛtɛ nɛ bhum, etɛɛ náá, ye tok nɛ sa bi aasa, mam ààbɛ tak. 6 Mot di ààdi tɔ lam ɔ, nyɛ waamwasaa pɛ kel dáa esɔsela elɛɛ e le, nyɛ waatekaa, da mwasaa tɔ du, da nyɛ ɛ́ dyak. 7 Bi ɛ be di tɔ lam, da mɛkpa mam ɛ́ di tɔ len ɔɔ, waabka esonok djas bi aadi nɛ gwyes tak ɛ, deenek bi ɛ́ waabela yɛ. 8 É ghɛŋ bi aadjɛ bɛtɛ nɛ bhum ɛ, yɛ waalyaal nɛ bot náá, bi ɛ́ bɛdjekel bam. Deenek, bi ɛ́ waadjɛ Saagam boo duu. 9 Mɛ nɛ kwyɛl bin dáa Saagam di ekwyɛl mɛ ɛ. Dika tɔ kwyɛl’am. 10 Bi ɛ duwal mɛtiŋ mam dáa mam di eduwal mɛtiŋ Saagam ɔɔ, bi ɛ́ waadi tɔ kwyɛl’am, dáa mam di tɔ kwyɛl Saagam ɛ.

11 Mɛ lɛɛ bin etɛp binek ɛ́, etɛɛ náá, mɛmyaala mam needi mɛmyaala men, da mɛmyaala men ɛ́ di yii tsɛɛtsɛ nɛ lyem wat. 12 Beeka yam ɛtiŋ: Gheekwyekwyɛlaka pak’en. Kwyɛlaka pak’en dáa mɛ di eboozyɛ nɛ ɛkwyɛl bin ɛ. 13 Boo mɛkwyɛla mɛ mot di egoka nɛ ɛlyaal ɛ, yɛ ɛ́ ɛdjɛ nyel’ɛ ɛmet étɛp bɛsɔ. 14 Bi ɛ di esa etɛp ee mɛ di ekwyɛl náá bi sa ɔɔ, deenek, bi ɛ́ waadi bɛsɔ bam. 15 Tin, mɛ aanàkwaabaadjóo bin bot ɛ mɛsa, etɛɛ náá, mot-mɛsa ààgu sa kukuma yɛ di esa ɛ. Mɛ djóo bin ɛ́ bɛsɔ bam, etɛɛ náá, mɛ eezelyaal bin esa ee Saagam nalyaal mɛ ɛ djas. 16 Ye tok biyɔ natɔ mɛ. Yɛ ɛ́ mam ɛ natɔ bin. Mɛ eedjɛ bin lwomel bi tɔ́, bi kɛdjɛ bhum, bi kɛdjɛ bhum aabɔya ɛ. Deenek, Saagam ɛ́ waadjɛ bin esonok djas ee bi aawaab nɛ din ɛ lam ɛ. 17 Mɛ djɛ bin mɛtiŋ menek ɛ́, etɛɛ náá, bi neegheekwyekwyɛla pak’en.»

18 «Yɛ bɛ náá, bot ɛ bɔs’ak ɛpebhina bin ɔɔ, guka náá, bɛ naaloozebhina mɛ ɛsok nɛ biyɔ. 19 Bi ɛpedi bot ɛ bɔs’ak ɔɔ, pe bot ɛ bɔs’ak ɛpekwyɛl bin, dáa bot bɔɔ. Tin, ye nabɛ ɛ́, mam eesɛ́ɛ bin, mɛ eebɛk bin nɛ bot ɛ bɔs’ak. Deenek, bi tokapɛ bot ɛ bɔs’ak, yɛ ɛ́ étɛp tak ɛ bot ɛ bɔs’ak di ebhina bin. 20 Gheetaalaka sa mɛ nalɛɛ bin ɛ: "Ye tok nɛ mot-mɛsa ngɔt di edhaa kukuma yɛ." Etɛɛ náá, yɛ bɛ náá, bot naatiigal mɛ ɔɔ, guka náá, bɛ waatiigal bin pe. Yɛ bɛ náá, bɛ naawa elyem tɔ mɛlyo mam ɔɔ, bɛ waabaawa elyem tɔ mɛlyo men pe. 21 Tinaak, bɛ aasa bin etɛp binek djas ɛ́ kɔ ɛsu ɛ lam, etɛɛ náá, bɛ ààgu mot nadhis mɛ ɔ. 22 Mɛ ɛpedi ààzyɛ, étɛp ɛzɛlii nɛ nɔɔ etɛp bak ɔɔ, pe bɛ tok ekwyɛ ndjɛ sɔs. Tin, dáa bɛ di náá, bɛ naazegwak mɛ ɛ, mesyem mɔɔ aanàpelaa.

23 Mot di ebhina mɛ ɔ, nyɛ baabhina ɛ́ Saagam. 24 Ye ɛpedi ɛ́ náá, mɛ nabɛ ɛ́ ààsa endem e mɛbwala di náá, dhiiti mot dinaa ààpakosa sok é mis mɔɔ ɛ, é di’enek, pe bɛ tok nɛ mesyem. Tin, é dwoo pan mos’ak, bɛ eezebee endem e mɛbwala mɛ mɛ nasa ɛ, bhii tak, bɛ ɛ́ kadi ebhina bis nɛ Saagam. 25 Tin, etɛp binek sael ɛ́ etɛɛ náá, esa ee di kwyala tɔ mɛkana mɛ etsi ɛ, neebela ɛsuk ɛ tak. Yɛ ɛ́ kwyala náá: "Bɛ eebhina mɛ, ààbɛ nɛ lo tɛp*."

26 Mot-Mɛghɛm ɛ́ ɛpezyɛ. Yɛ ɛ́ Sisim e etsɛɛtsɛ Saagam aadhis ɛ. Sisim tak aadus ɛ́ pɛ daa Saagam, mɛ waadhis bin yɛ ɛ. Nyɛ waalyaal bin etsɛɛtsɛ dum nɛ mbi mot mɛ di ɛ. 27 Tin, dɔɔ nɛ biyɔ pe, bi ɛ́ waalɛɛ bot esa ee bi di egu kɔ ɛsu ɛ lam ɛ. Etɛɛ náá, mena eebɔyaka nɛ ɛgyee sama wat, kana mɛkɛn mɛ mɛsa mam.»