1 Ye nabɛ ɛ́ é ges ɛbyoŋ ɛ Pak. Yezu nadi egu náá, ɛwala ɛ lɛ nabɛ ɛ́, eezekum. Ɛwala nyɛ aadus kɔ bɔs, tɔ́ pɛ daa Sɛɛg tɔ gwoo ɛ. Nyɛ nadi ekwyekwyɛl bɛsɔ bɛ di kɔ bɔs ɔ. Nyɛ naakwyɛl bɛ kɛkum mɛsik.

2 Yezu bɛ nɛ bɛdjekel bɛ nadi edɛ edee e bikoko. Ye nabɛ ɛ́, dim mot mɛkɔŋ eezewa tɔ lyem ɛ Yudas Iskaliɔt, mɔn ɛ Simɔŋ, gwyes ɛkɛka Yezu. 3 Tin, Yezu nadi egu náá, Zɛɛb ɛ́ nadhis nyɛ, nyɛ nawaabaazosik ɛ́ pɛ daa lɛ. Nyɛ nɛ baagu náá, Sɛɛg naadjɛ nyɛ eghɛŋ kɔ esa e bɔs djas. 4 Bɔɔ edɛ kɔ mesa, wɔ gwaa Yezu zɛwyɛl ngbat. Nyɛ eezɛdis kuwa é nyel. Bhii tak, nyɛ eezɛnɔɔ pes kaad pil é kuu dáa dhut. Yezu eegwyii bɛdjekel bɛ mɛko

5 Tin, nyɛ eezɛso mɛdii tɔ kongo. É di’enek, nyɛ moo egwyii bɛdjekel bɛ mɛko. Nyɛ eezɛnɔɔ pes kaad nyɛ napil é kuu dáa dhut ɛ, nyɛ moo tin esuŋal bɛ mɛko nɛ yɛ. 6 Dáa nyɛ nakum pɛ daa Simɔŋ di ebaadjóoaa Pyɛɛd ɛ, wɔ gwaa, nyɛ zɛke nɛ nɛ náá: «Ghɛŋ, wɔ kwyɛl ɛ wɔ neegwyii mɛ mɛko?» 7 Yezu eezɛbɔɔza nɛ nɛ náá: «Sa mɛ di esa nenak’aak, wɔ aanàkwaaleenyɔ ɛmɛt ɛsuk ɛ tak. Wɔ aaboomɛt ɛsuk ɛ tak ɛ́ ɛbhis.» 8 Tin, Pyɛɛd eezɛbɔɔza náá: «Ààbɛ, wɔy tok nɛ ghwyil gwyii mɛ mɛko!» É di’enek, Yezu eezɛbɔɔza nɛ nɛ náá: «Mɛ di ààgwyii wɔ mɛko ɔɔ, wɔ tok mot’am.» 9 Tin, Simɔŋ Pyɛɛd eezɛke nɛ nɛ náá: «Yɛ bɛ deenek ɔɔ, Ghɛŋ, nàgwyii mɛ mɛko nɛ mɛko. Zokagwyii mɛ dɔɔ nɛ mɛmbɔ nɛ lo!» 10 Yezu eebaazɛbɔɔza náá: «Mot di náá, nyɛ eezegwyiia ɔɔ, nyɛ tokapɛ nɛ gwyes ɛbaagwyiia, nyɛ aazokagwyii ɛ́ mɛko. Biyɔ, mɛnyel men djas moo ɛ́ dɛɛ. Tin, yɛ ɛ́ nɛ mot ngɔt tɔ len di ààbɛ dɛɛ ɔ.» 11 Yezu nadi egu, mot aakɛka nyɛ ɔ. Yɛ ɛ́ étɛp tak ɛ nyɛ nake náá: «Ye tok biyɔ djas di edɛɛ.»

12 Bhii nyɛ nazesilal ɛgwyii ɛ́ bɛ mɛko ɛ, Yezu eezɛnɔɔ kuwa yɛ sɔm é nyel. Nyɛ eebula zɛdisi é ngwoob mesa. Tin, nyɛ eebaazɛke nɛ nɔɔ náá: «Bi eemɛt ɛsuk ɛ sa mɛ sa bin ɛ? 13 Bi dyeebadjóo mɛ ɛ́ "Lyoel" nɛ "Ghɛŋ". Bi ɛ́ nɛ gham etɛɛ náá, mɛ ɛ́ yɛ. 14 Yɛ bɛ náá, mam Ghɛŋ, Lyoel’en, mɛ eegwyii bin mɛko ɔɔ, ye goka ɛ́ náá, bi gwyiiel mɛko pak’en. 15 Mɛ lyaal bin tin ɛ, dáa bi di egoka nɛ ɛbe bɔn-nyɛɛg bin pak’en ɛ. 16 Mɛ eelɛɛ bin étɛp e tsɛɛtsɛ náá, ye tok nɛ mot-mɛsa ngɔt di edhaa kukuma yɛ. Zɛbaanɔɔ náá, ye tok nɛ ngoola-ngoola di edhaa mot nalwom nyɛ ɔ. 17 Tin nenak yak, bi eezegu náá, yɛ ɛ́ deenek, bi aadi tɔ mɛmyaala ɛ́ bi ɛ́ di esa dáa mɛ lyaal bin ɛ.

18 Mɛ ààlii deenek nɛ biyɔ djas. Mɛ lii ɛ́ nɛ bot ɛ mɛ zesɛ́ɛ ɔ. Tin, ye goka ɛ́ náá, mɛkana ɛ Zɛɛb di elɛɛ náá: "Mot bis nɛ nɛ nadi epyaala pes tsim ɔ, nyɛ eeliig mɛ ɛkoŋ ɛ wak*" neebela ɛsuk. 19 Ɛsok nɛ etɛp bak nɛ sael, mɛ eezenyɛl ɛlɛɛ bin, etɛɛ náá, é sok esesɛɛ tak aazɛsael ɛ, bi neemyaal náá: "Mɛ ɛ́ Mɛsia." 20 Mɛ lɛɛ bin ɛ́ etɛp e tsɛɛtsɛ náá, mot aamyaal mot mam dhis ɔ, nyɛ myaal ɛ́ dɔɔ nɛ mam. Deenek, mot aamyaal mɛ ɔ, nyɛ myaal ɛ́ mot nadhis mɛ ɔ.»

21 Bhii Yezu nazelii deenek ɛ́, ye nabɛ ɛ́, ghoŋ naazɛmɛt nyɛ ɛbuɛpe. Nyɛ ɛ́ booke náá: «Mɛ lɛɛ bin ɛ́ etɛp e tsɛɛtsɛ náá, mot ngɔt pak’en ɛ́ waaka mɛ gha.» 22 Bɛdjekel moo tin zibiliii egwyákel pak’ɔɔ, ààgu mot nyɛ nadi eke deenek kɔ ɛsu ɛ lɛ ɔ. 23 Ngɔt tɔ bɛdjekel, mot Yezu nadi ekwyɛl ɛbuɛpe ɔ, nadisi ɛ́, é ngwoob ɛ Yezu. 24 Simɔŋ Pyɛɛd eezɛtut nyɛ dis, étɛp nyɛ needji Yezu mot nyɛ nadi elii deenek kɔ ɛsu ɛ lɛ ɔ. 25 Tin, djekel yenɔk eezɛsil lo, kɛl kɔ bet ɛ Yezu. Bhii tak nyɛ eezɛdji nyɛ náá: «Ghɛŋ, mot tak ɛ́ zɛ?» 26 É di’enek, Yezu eezɛbɔɔza nɛ nɛ náá: «Mɛ ɛpeduu pes mapa tɔ saan. Mot mɛ aadjɛ nyɛ pes mapa tak ɔ, mot tak ɛ́ yenɔk.» Bhii tak, Yezu eezɛnɔɔ pes mapa, duu tɔ saan, nyɛ eezɛnɔɔ yɛ, djɛ Yudas Iskaliɔt, mɔn ɛ Simɔŋ. 27 Dáa Yudas nanɔɔ pes mapa tak, dɛ ɛ, é di tak wat, Satan eezɛni tɔ lɛ. Yezu eezɛke nɛ nɛ náá: «Lela ɛsa, sa wɔ di ekwyɛl ɛsa ɛ!»

28 Tɔ sama bot ɛ nadi kɔ mɛsa ɔ, mot ngɔt pak’ɔɔ nabɛ ɛ́ ààmɛt ɛsuk ɛ etɛp ee nyɛ nadi elii deenek ɛ́. 29 Dáa nabela náá, Yudas ɛ nadi emɛt kpa epata ɛ, bɛsɔ nagu ɛ náá, Yezu naalwom nyɛ, nyɛ kɛɛbɔm dhiiti esa ee bɛ nadi nɛ gwyes tak etɛp ɛbyoŋ ɛ. Nɛghu bɛ kɛɛdjɛ dhiiti esonok nɛ bɛdjel ɛ bot. 30 Tin, Yudas eezɛnɔɔ pes mapa yenek zɛwyɛl ngbat, nyɛ eezɛwyis tɔ́. Ye nabɛ ɛ́ ɛgwyitok eezegwyiidela.

31 Bhii Yudas nakawyis ɛ, Yezu eezɛke náá: «É di mena kadi wak nenak’aak, duu ɛ Sɛɛŋɛlɛ Mɔn Mot eezenyen, deenek, Zɛɛb ɛpelyaal duu yɛ pɛ tɔ lɛ. 32 [Yɛ bɛ náá, duu ɛ Zɛɛb ɛpenyen tɔ mɔn ɔɔ,] Zɛɛb nyɛy nyɛ ɛmet pe ɛ́ waalyaal duu ɛ mɔn. Ye kalik ɛ́ batsa, nyɛ aalyaal yɛ. 33 Bɔn bam, mɛ kalik nɛ nen mos ɛ́ ba bɔɔ mɛlu batsa. Bi ɛ́ waasaa mɛ, dáa mɛ nalɛɛ nɛ ekukuma eYuda ɛ, yɛ ɛ́ mɛ baadi elɛɛ nɛ nen’aak. Bi tok nɛ ghwyil ɛtɔ́ pɛ pak mɛ di tɔ́ ɛ.

34 Yɛ ɛ́ mɛ di edjɛ bin ɛtiŋ ɛ na bes náá: Kwyɛlaka pak’en. Ye goka bi kwyɛlel pak’en dáa mɛ nakwyɛl bin ɛ. 35 Bi ɛ kwyɛlel pak’en ɔɔ, yɛ ɛ́ deenek ɛ́ bot aagu náá, bi ɛ́ bɛdjekel bam.»

36 Simɔŋ Pyɛɛd zokazɛdji Yezu náá: «Ghɛŋ, wɔ tɔ́ paa?» Yezu eezɛbɔɔza nɛ nɛ náá: «Nenak yak, wɔ tok nɛ ghwyil ɛdu mɛ pɛ pak mɛ di etɔ́ ɛ. Tin, wɔ waaboodi ɛ́ du mɛ.» 37 Tin, Pyɛɛd eezɛke nɛ nɛ náá: «Ghɛŋ, étɛp yé mɛ di ààgoka nɛ ɛdu ɛ́ wɔ nenak? É di mɛ di’aak, mɛ eezemyam ɛdjɛ tsik’am é di yɔ!» 38 Yezu eezɛdji nɛ náá: «Wɔ eezemyam ɛdjɛ tsik’ɔ kɔ ɛsu ɛ lam é? Tin, beta mɛ lɛɛ wɔ tsɛɛtsɛ náá, ɛsok nɛ kuu nɛ kɔk, yɛ aakabela ɛ́, wɔ eezeswonal mɛ tyee esok elɛl.»