1 Yɛ ɛ́ mam Pɔl nɛ Timote, bot ɛ mɛsa ɛ Yezu Klisto. Bis kwyal mɛkana mak ɛ́, étɛp bot ɛ di mos bot ɛ zedum koŋ nɛ Zɛɛb kɔ ɛsu ɛ Yezu Klisto pɛ ghaada Filip ɔ dɔɔ nɛ bot ɛ di edjɛɛd zɛɛga mendjaala ɔ, zɛnɔɔ edhyakɛlɛ. 2 Beta náá, Zɛɛb Sɛɛg'ena nɛ Yezu Klisto Ghɛŋ'enaka djɛ bin enɛm nɛ embɛɛ nɛ egwyem.

3 Mɛ nɛ bulal bhɔɔ nɛ Zɛɛb'am é mɛwala djas mɛ di etaala bin ɛ. 4 Mɛ nɛ dyeebamyaala é mɛwala djas mɛ di edjaala étɛp'en ɛ, 5 kɔ ɛsu ɛ mɛkwyeea mɛ bi nakwyee mɛ tɔ ɛgoola Mbɛɛ Bhaadal, kana dwoo bi nakan ɛmyaal Zɛɛb ɛ, kɛkum dwoo pan mos'ak. 6 Tin, mɛ ɛ́ nɛ ɛbwaalel náá, Zɛɛb mot nakan embɛɛ mɛsa mak pak'en ɔ, nyɛ aatɔ́ nɛ yɛ kɛkum ɛsik ɛ tak, dwoo ɛbula ɛ Yezu Klisto. 7 Mɛ ɛ́ nɛ gham nɛ ɛdi nɛ esiiza binek nɛ nen, etɛɛ náá, mɛ nɛ wa bin tɔ lyem'am. Etɛɛ náá, biyɔ djas ɛ́ sama nɛ nam tɔ ɛkɛɛ ɛ Zɛɛb nadjɛ mɛ ɛ. Nɛ tsɛɛtsɛ, bi ɛ́ sama nɛ nam ye nakoozodi, dáa mɛ di nenak é membok'aak nɛghu é sok mɛ di elyaal nɛ bot náá, Mbɛɛ Bhaadal mɛ di egoola ɛ yɛ ɛ́ etsɛɛtsɛ ɛ. 8 Zɛɛb ɛ́ tyaases'am, mɛ nɛ kwyɛl biyɔ djas, dáa Yezu Klisto di ekwyɛl bin ɛ.

9 Gwakeka sa mɛ di ewaab nɛ Zɛɛb tɔ mendjaala mam ɛ: Yɛ ɛ́ náá, bi di nɛ mɛkwyɛla pak'en dhaa tyɛ. Da bi ɛ́ di bot ɛ ɛtiibal nɛ bot ɛ ɛgu etɛp ɛnyɔɛpe. 10 Deenek ɛ, bi aapiibal sa di ɛnyɔɛpe ɛ. Tin, bi aadi ɛ́ ààbɛ nɛ edhuud, ààbɛ nɛ sa ɛbiyo wat dwoo Klisto aazyɛ ɛ. 11 Beta náá, bi di nɛ mɛsa mɛ epiki ɛbuɛpe kɔ ɛsu ɛ Yezu Klisto, étɛp ɛduwal ɛ Zɛɛb, nɛ ɛdjɛ nyɛ duma.

12 Bɔn-nyɛɛg, mɛ kwyɛl ɛ́ bi gu náá, sa mɛ naboma nɛ yɛ ɛ, ye naasa náá, Mbɛɛ Bhaadal goolaaa djala dik. 13 Deenek, esodja ee di ebaal ndjaa boo kukuma ɔ nɛ bɛdhiiti bot djas ɔ, nɛ kagu nenak náá, mɛ ɛ́ é membok ɛ́ etɛɛ náá, mɛ ɛ́ mot-mɛsa ɛ Klisto. 14 Dáa bɔn-nyɛɛg bis nabee mɛ é membok ɛ, bɛtɛ nɛ bot pak'ɔɔ naazɛwa ɛbwaalel ɛ lɔɔ nɛ Ghɛŋ, bɔɔ batabela mɛghaaz mɛ ɛgoola Mbɛɛ Bhaadal ɛ Zɛɛb, ààbɛ nɛ bwoo.

15 Yɛ ɛ́ tsɛɛtsɛ náá, bɛdhiiti bot pak'ɔɔ ɛpegoola Mbɛɛ Bhaadal ɛ Klisto nɛ mbee lyem. Etɛɛ náá, bɛ ɛ́ nɛ embee egeka nɛ nam. Tin, bɛdhiiti bɔn-nyɛɛg goola Mbɛɛ Bhaadal ɛ Klisto ɛ́ nɛ mbɛɛ lyem. 16 Bot ɛ di egoola Mbɛɛ Bhaadal nɛ mbɛɛ lyem ɔ, bɛ goola yɛ ɛ́ nɛ kwyɛl djas. Etɛɛ náá, bɛ nɛ gu náá, mɛsa mam wak ɛ́ ɛlyaal bot náá, Mbɛɛ Bhaadal mɛ di goola ɛ, yɛ ɛ́ tsɛɛtsɛ. 17 Tin, bɛdhiiti bot goola Mbɛɛ Bhaadal ɛ Klisto ɛ́ nɛ mbee lyem. Ɛkwosak ɛ lɔɔ ɛ́ ɛpul, bɛ saŋ ɛ náá, bɛ baabil mezuk mam tɔ membok.

18 Ye nakoozodi náá, egeka bɔɔ ɛ́ ɛnyɔɛpe nɛghu ɛbiyoɛpe ɔ, sa di enyɔ ɛ, yɛ ɛ́ náá, Mbɛɛ Bhaadal ɛ Klisto ɛpegoolaaa. Deenek, mɛ ɛ́ nɛ mɛmyaala, mɛ aazodidi ɛ́ tɔ mɛmyaala. 19 Etɛɛ náá, mɛ nɛ gu náá, etɛp binek djas lyaal ɛ́ náá, Zɛɛb ɛ́ waatsik mɛ kɔ ɛsu ɛ mendjaala men nɛ ghwyil Sisim ɛ Yezu Klisto di ekwyee mɛ ɛ. 20 Tin, sa mɛ di ebwood ɛ́, yii mɛ di nɛ boo ɛbwaalel ɛ, mɛ tok nɛ ghwyil ɛdi nɛ sen. Mos, mɛ nakoozogwyɛ, mɛ nakoozodi nɛ tsik, mɛ aazodi elyaal duma ɛ Klisto é edi djas mɛ aadi ɛ.

21 Etɛɛ náá, yɛ ɛ́ bɛ mam ɔɔ, Klisto ɛ́ di tsik'am. É di'enek, ɛsyee moo ɛ́ mbɛɛ sa. 22 Tin, yɛ bɛ náá, ɛdi nɛ tsik kɔ ɛko ɛ bɔs ɛpesa náá, mɛ sa enɛm esa ɔɔ, é di'enek, mɛ ààgu sa mɛ aasɛ́ɛ pak ɛsyee nɛ tsik ɛ. 23 Mɛ moo ɛ́ pak bɛman, mɛ ɛpekwyɛl ɛbet tsik mɛ di nɛ yɛ'aak, étɛp mɛ needi sama nɛ Klisto, deenek ɛ́ di ɛnyɔɛpe nɛ nam. 24 Tin, yɛ ɛ́ ɛnyɔɛpe kɔ ɛsu ɛ len náá, mɛ zodi nɛ tsik. 25 Dáa mɛ di nɛ ɛbwaalel ɛ tsik dáak ɛ, mɛ nɛ gu náá, mɛ aadidi ɛ́ sama nɛ nen, étɛp mɛ needjɛ bin mɛghaaz mɛ ɛtɔ́ sok, nɛ ɛdi ɛ́ tɔ mɛmyaala tɔ ɛdum ɛ koŋ nɛ Zɛɛb. 26 Etɛɛ náá, é ghɛŋ mɛ aabula zɛdi pak'en ɛ, bi aadi ɛ́ nɛ mɛmyaala kɔ ɛsu ɛ sa Yezu Klisto sa nɛ nam ɛ.

27 Bi goka ɛ́ nɛ ɛkɛ dáa Mbɛɛ Bhaadal ɛ Klisto di elɛɛ ɛ. Tin, mɛ zyɛ zɛbee bin nɛghu mɛ di ààzyɛ ɔɔ, ye nyɔ ɛ́, mɛ gwak náá, bi ɛ́ ghiŋ tɔ sisim wat. Ye nyɔ ɛ́ mɛ gwak náá, bi ɛpepyet nɛ lyem wat étɛp ɛdum ɛ koŋ nɛ Zɛɛb kɔ ɛsu ɛ Mbɛɛ Bhaadal. 28 Sa bi ààgwak bwoo bot ɛ mɛbhuka men. Yɛ aadi nɛ nɔɔ ɛ́ ndem di elyaal náá, bɛ eezewo ze, biyɔ ɛ́ kazebela tsik ɛ. Tin, etɛp binek djas dus ɛ́ pɛ daa Zɛɛb. 29 Etɛɛ náá, Zɛɛb naadjɛ bin mbɛɛ bhwoob ɛsa mɛsa ɛ Klisto, ààkabɛ náá, ee zosikɛ é ɛdum ɛ koŋ nɛ ɛdum ɛ koŋ nɛ nɛ, yɛ ɛ́ pe ɛ́ étɛp ɛdi tɔ mezuk kɔ ɛsu ɛ lɛ. 30 Mena ɛpeduuka tuub wat. Bi nɛ gu ɛnyɔɛpe náá, é ghɛŋ sok mɛ nadi eduu tuub tak, nenak, mɛ baazoduu ɛ́ tuub tak wat.