1 Nenak, bɔn-nyɛɛg bam, dika nɛ mɛmyaala tɔ ɛgwakel ɛ len nɛ Ghɛŋ. Yɛ bɛ náá, mɛ ɛpebasal ɛlɛɛ bin sa mɛ nazekwyal ɔɔ, yɛ ɛ́ étɛp ɛdjɛ bin mɛghaaz. 2 Dika ɛtsetaɛpe nɛ bot ɛ di esa ɛbiyo ɔ, bot ɛ di dáa bɛbhyɛ ɔ, bɛ bee beka ɛ́ dáa boo sonok! 3 Ghuna, yɛ ɛ́ menabɛlka ɛ́ di nɛ tɛtɛ beka, etɛɛ náá, mena ɛpesaka mɛsa mɛ Zɛɛb tɔ Sisim yɛ. Menaka ɛ́ nɛ mɛmyaala étɛp ɛdi ɛ́ sama nɛ Yezu Klisto. Mena ààwaka ɛbwaalel ɛ lena kɔ mɛzel mɛ bot ɛ bɔs di esa ɛ. 4 Mam pe ɛ́ nɛ ghwyil ɛdiig bet kɔ ɛsu ɛ membi mɛ mɛzel mɛ bot ɛ bɔs di esa ɛ. Mɛ aadi ɛ́ nɛ boo gham ɛsa yɛ dhaa bɔɔ.

5 Mɛ naniigelaa beka ɛ́, mɛlu mɛtɛn nɛ elɛl bhis ɛbyel ɛ lam. Mɛ ɛ́ mot kyee dik Yisalaɛl, mot mbyak ɛ Bhɛzamɛ. Lii yam ɛ́ ebhele, mɛ ɛ́ dha bot ɛ mbyak ebhele. Mɛ nadi eduwal etsi eYuda dáa tɛtɛ Falizyɛ. 6 Mɛ nadi ɛ́ nɛ zii dhaa tyɛ, é sok mɛ nadi etiig bot ɛ ezɛɛga mendjaala ɛ. Dum nɛ tsik epiki nakwyalaa tɔ mɛkana mɛ etsi ɛ, mɛ nadi ɛ́ ààbɛ nɛ ndjɛ.

7 Tin, sa mɛ nadi ebee náá, yɛ ɛ́ ɛnyɔɛpe nɛ nam ɛ, mɛ kabee yɛ mos é mis ɛ́ toto kɔ ɛsu ɛ Klisto. 8 Esa djas mɛ nazesa ɛ, mɛ kabee yɛ é mis ɛ́ toto, kɔ ɛsu ɛ sa di nɛ boo mɛtaŋ dhaa esonok djas ɛ. Sa tak ɛ́ ɛgu ɛ Yezu Klisto Ghɛŋ’am. Dum nɛ nɛ, mɛ eezekat dhiiti esonok djas. Étɛp ɛdi ɛ́ sama nɛ Klisto, mɛ kabee esonok binek djas ɛ́ dáa eput esonok di egoka nɛ ɛmwasaa kɔ ɛkwyiid ɛ, 9 étɛp mɛ needi sama nɛ nɛ ɛnyɔɛpe. Mɛ ààkakwyɛɛg nyel’am met, mɛ tokapɛ mot epiki kɔ ɛsu ɛ ɛduwal ɛ́ etsi. Mɛ ɛ́ mot epiki, etɛɛ náá, mɛ ɛpedum koŋ nɛ Klisto. Mbi yenek epiki dus ɛ́ nɛ Zɛɛb, nyɛ ɛ́ di esa náá, mot di piki kɔ ɛsu ɛ ɛdum ɛ koŋ nɛ nɛ. 10 Sa djas mɛ di ekwyɛl ɛ, yɛ ɛ́ náá, mɛ gu Klisto, dɔɔ nɛ mɛbwala mɛ ɛgom ɛ lɛ bhis ɛsyee, yɛ ɛ́ náá, mɛ zuk dáa nyɛy, da mɛ ɛ́ gwyɛ dáa nyɛy. 11 Mɛ ɛ́ nɛ ɛbwaalel náá, mam pe ɛ́ waagomelaa pak myoŋ.

12 Mɛ ààpake náá, mɛ eezebela efute ee mɛ di esaŋ ɛ, nɛghu mɛ ɛ́ mot zesa mɛsa djas di egoka náá, mɛ sa ɛ. Tin, mɛ dinaa tɔ ɛsum ɛ́ kaab étɛp ɛbela efute, etɛɛ náá, Yezu Klisto eezebela mɛ, wa mɛ tɔ ze yɛ. 13 Ààbɛ, bɔn-nyɛɛg, mɛ ààbee náá, mɛ eezebela efute tak. Tin, mɛ zosa ɛ́ sa wat, mɛ kagwyák ɛ́ pɛ sok, mɛ ààkagwyák pɛ bhis koŋ’am. É di’enek, mɛ dyeebasa mɛghaaz ɛ́ étɛp ɛdu etɛp di pɛ sok ɛ. 14 Deenek, mɛ dyeebasum kaab ɛ́, étɛp mɛ neebela efute ee Zɛɛb nakwom mɛ tɔ gwoo ɛ. Yɛ ɛ́ dum nɛ sa Yezu Klisto nasa kɔ ɛsu ɛ lam ɛ. 15 Menabɛlka djas bot ɛ di náá, mena eezepyetka tɔ ɛdum ɛ koŋ nɛ Zɛɛb ɔ, mena goka ɛ́ nɛ ɛsiiza deenek. Tin, bi ɛ kabaadi nɛ dhiiti egeka sis ɔɔ, Zɛɛb ɛ́ waalyaal dáa bi di egoka nɛ ɛsa ɛ. 16 Ye nakoozodi dáa, djhoogheeduka ze Zɛɛb nalyaal mena ɛ, yii bot di boozezyɛ nɛ ɛdu dɔɔ nɛ mos ɛ.

17 Bɔn-nyɛɛg, biyɔ djas, baŋaka mɛfulu mam. Baŋaka mɛfulu mɛ bot ɛ di ebaŋa mɛfulu mes ɔ. 18 Mɛ nɛ dyeebalɛɛ bin yɛ ngwyis. Nenak yak, mɛ ɛpebaabasal nɛ meŋal é mis náá: Yɛ ɛ́ nɛ bɛtɛ nɛ bot ɛ di ekɛ dáa bot ɛ mɛbhuka mɛ mezuk ɛ Klisto kɔ mɛlaaba ɔ. 19 Bɛ waaboowo ze, etɛɛ náá, yɔbɔ zɛɛb ɛ́ emɔ bɔɔ. É di’enek, bɛ nɛ myaala nɛ esa e sen bɛ di esa ɛ. Tɔ esiiza bɔɔ, yɛ ɛ́ esa e bɔs. 20 Yɛ kabɛ menabɛlka ɔɔ, menaka ɛ́ bot ɛ gwoo. Dum nɛ tɛp tak ɛ, mena dika ebhwood Mɛtsik-bot’enaka, Ghɛŋ Yezu Klisto. 21 Deenek, nyɛ waaswoola mena mbee nyel ee bot dika nɛ yɛ’aak, étɛp ye neenɔŋel nɛ nyel’ɛ di nɛ duma ɛ. Tin, nyɛ aasa yɛ ɛ́ nɛ ghwyil di esa náá, esonok djas di si eghɛŋ bɛ ɛ.