1 Tu soni, frats sh-surãri, vã rugãm sh-vã urnipsim tu Domnul Isus tsi, di-cum nvitsatã cum prindi s-bãnats sh-cum s-lji arsits a Domnului, s-bãnats shi s-artirsits sh-ma multu. 2 Cã voi li shtits dimãndãciunjili tsi vã avem datã cu autoritatea a Domnului Isus.

3 Cã aestã easti vrearea al Dumnidzãu: sãmtsãrea a voastrã, s-mutats mintea di curvãrilji, 4 tsi cathiun di voi si shtibã s-lu tsãnã truplu a lui sãmtsãsit sh-cu tinjii, 5 sh-nu cu sivdaia a orixilor ca pãngãnjlji tsi nu cunoscu Dumnidzãlu. 6 Vãrã s-nu vã arãdã shi s-lji facã arãu cu zilii tu aestu lucru a fratilui a lui, cã Domnul easti arãzgãnãtor trã tuti aesti, ashã cum vã dzãsim sh-mãrtirsim sh-ma nãinti. 7 Cã Dumnidzãlu nu nã acljimã tu ni-chischineatsã, ma tu sãmtsãri. 8 Trã atsea, atsel tsi lã arucã hima aesti, nu arucã hima un om, ma Dumnidzãlu tsi nã deadi sh-Duhlu a lui atsel Sãmtu.

9 Trã vrearea frãtseascã nu avets ananghi s-vã scriu, cã voi idyilji hits nvitsat di la Dumnidzãlu tsi s-vrets un-alantu. 10 Cã voi u fãtsets aestã trã tuts fratslji tsi suntu tu tutã Machidunia. Noi vã rugãm, frats sh-surãri, tsi s-artirsits ma multu. 11 Cilistisits-vã s-bãnats tu pace, s-videts lucrili a voastri shi s-lucrats cu mãnjili a voastri, ashã di-cum vã avem ursitã. 12 Ashãtsi, va s-bãnats cu tinjii cãtrã atselji tsi suntu nafoarã sh-nu avets ananghi di vãrã.

13 Ma nu vrem, frats sh-surãri, tsi s-hits tu nishtiri trã atselji tsi murirã, tra s-nu vã nvirinats ca alantsãlji cai nu au nãdii. 14 Cã, ma s-pistipsim cã Isusul muri sh-s-nyie, tutashã pistipsim cã Dumnidzãlu va li aducã deadun cu nãsu atselji, tsi au muritã tu Isusul. 15 Aestã ma vã-u dzãtsem dupã zborlu a Domnului, noi tsi va armãnem yiu pãnã la vinita a Domnului, nu va him nãintea atsilor tsi murirã, 16 cã idyiul Domnu cu ursirea, cu boatsea a arhanghilui sh-cu trumbeta a Dumnidzãlui, va dipunã dit tser sh-mortsãlji tu Hristos va s-nyeadzã protslji. 17 Deapoea noi tsi him ninga yiu sh-avem armas, va him arãchit deadun cu nãshi tu niori tsi s-adunãm Domnul tu tser. Sh-ashã va him totãna deadun cu Domnul. 18 Diznjirdats-vã cu un-alantu cu aesti zboari.