1 Multu-vruts, aestã easti a doaua carti tsi ma vã scriu. Li am scriat doauli cãrtsi tra s-tsãnã dishtiptat mintea a voastrã limpidã, acljimãnda amintirea a voastrã. 2 Tsãnets minti zboarili tsi s-dzãsirã ma nãinti sãmtsãlji prufits sh-dimãndarea datã di la Domnul a nostru sh-Ascãpãtorlu prit apostulji a voshtri.

3 Ma nãinti di tuti prindi si shtits aestã, cã tu dzãlili di soni va yinã niscãntsã pizuitori, tsi bãneadzã dupã orixili a lor arãi, 4 sh-va vã dzãcã: "Iu easti vinita a lui tsi eara tãxitã? Cã, di-cãndu pãrintsãlji murirã, tuti lucrili armasirã ca tu apãrnjita a adãrãmintului." 5 Cã elji cu vreari agãrshãrã cã prit zborlu a Dumnidzãlui tserurili eara faptã di mult chiro ma nãinti, sh-loclu si ncljigã di apã sh-prit apã. 6 Di aestã apã lumea di atumtsea s-nicã sh-chiru. 7 Tserurili di azã sh-loclu di azã cu idyiul zbor suntu vigljeati di foclu, tsãnuti di dzua a giudicatãljei sh-a chireariljei a oaminjlor apisti.

8 Ma unã tsiva s-nu agãrshits, multu-vruts: cu Domnul unã dzuã easti ca unã njilji di anji, sh-unã njilji di anji ca unã dzuã. 9 Domnul nu amãnã cu tsãnearea a tãxiriljei a lui, cum minduescu niscãntsã cã elu amãnã. Ma easti arãvdãtor cu voi, sh-nu va tra s-chearã vãrã, ma tsi tuts s-toarnã tu mitãnjiusiri. 10 Dzua a Domnului va yinã ca un fur. Atsea dzuã tserurili va chearã cu vrondu, elementili a naturãljei va s-aspargã di foclu, sh-loclu sh-itsido tsi suntu tu nãsu va s-ardã tuti.

11 Macã tuti aesti va s-aspargã, atumtsea tsi oaminji prindi s-hits voi? Voi prindi s-fãtsets unã banã sãmtã sh-dumnidzãsitã, 12 ashtiptãnda sh-cilistisãnda ti apruchearea a dzuãljei a Dumnidzãlui, di la cai tserurili ljea foc sh-va s-aspargã, sh-elementili a naturãljei arsã di dugoarea va s-tucheascã. 13 Ma noi, dupã tãxirea a lui ashtiptãm tseruri nolji sh-loc nou, tu cai bãneadzã ndriptatea.

14 Trã atsea, multu-vruts, ashtiptãnda aesti cilistisits-vã s-hits nãinti a lui nilirusits, ni vãrghits sh-tu pace cu nãsu. 15 Sh-arãvdarea a Domnului a nostru lugursits-u ca ascãpari, di cum vã ari scriatã sh-fratili a nostru vrut Pavlu, dupã mintimeniljea tsi Dumnidzãlu lji deadi a lui. 16 Elu scrii idyili tu tuti epistolili a lui trã aesti lucri. Niscãnti lucri tu epistolili a lui suntu greli trã aduchiri, tsi nishtiutslji sh-niarãvdatslji li strãmbu, ashã di cum fac cu alti Scrituri trã aspãrgãciunea a lor.

17 Iarã voi, multu-vruts, shtinda di ma nãinti, afirits-vã s-nu cãdets tu cãbãtsili a nipistimenjilor, shi tra s-nu cãdets nghios di sigurantsa a voastrã. 18 Ma crishtets-vã tu harul sh-tu cunushtearea a Domnului a nostru shi a Ascãpãtorlui Isus Hristos.

A lui s-lji hibã mãrirea, tora sh-tu eta a etilor! Amin.