1 Frats sh-surãri, la yinita a Domnului a nostru Isus Hristos sh-la adunarea a noastrã cãtrã nãsu, vã rugãm 2 s-nu vã ascuturats lishor tu minduirili a voastri shi s-nu vã tulburats di vãrã duh, di vãrã zbor icã di vãrã carti cã taha si-scriu di la noi, tsi vã dzãtsi cã ari vinit dzua a Domnului. 3 Vãrã s-nu vã arãdã cu vãrã ilei, cã atsea dzuã nu va yinã, ni vinit ma nãinti rebilipsirea sh-ni discupirit omlu a amãrtiiljei, hiljiu a aspãrdzeariljei. 4 Elu va s-ncuntreadzã sh-va s-analtsã pristi itsido tsi s-acljeami dumnidzã icã tsi s-tinjiseashti tu ncljinari, ahãntu cãt s-apunã tu templul a Dumnidzãlui shi s-aspunã ca Dumnidzã. 5 Nu vã adutsets aminti, cã cãndu earam ninga cu voi vã li dzãtseam aesti lucri? 6 Tora voi shtits cã di tsi s-ncheadicã elu, tra s-aspunã tu chirolu tsi prindi. 7 Putearea atsea ascumta a anapudiiljei easti tora tu lucrari. Atsel tsi l-ncheadicã va fac ashã, pãnã cãndu s-mutã dit cali. 8 Atumtsea va s-aspunã atsel anapudu tsi Domnul Isus va lu vatãmã cu suflarea a gurãljei a lui sh-va lu chearã cu fãnirusirea a vinitãljei a lui. 9 Vinita a anapudlui va hibã dupã lucrarea al Satan, sh-elu va s-facã cu cathi puteari seamni sh-thavmati arãdioasi. 10 Elu va s-arãdã cu arãutati tuts atselji tsi s-ducã tu chireari, cã arnisirã vrearea trã alihea tsi lji ascapã. 11 Trã atsea Dumnidzãlu va lã pitreacã a lor unã puteari arãdzãtoarã tsi s-pistipseascã la arãdearea, 12 shi s-giudicã tuts atselji tsi nu lji pistipsirã a alihiljei, ma arsirã arãutatea.

13 Ma noi prindi s-lu hãristisim totãna Dumnidzãlu trã voi, frats shi-surãri vruts di la Domnul, cã Dumnidzãlu vã aleapsi tra s-hits prots trã ascãpari, prit sãmtsãrea a Duhlui sh-prit pistea tu alihea. 14 Elu vã acljimã prit evanghelu a nostru, tsi s-loats mãrirea a Domnului a nostru Isus Hristos. 15 Trã atsea, frats sh-surãri, s-hits vãrtoshi shi s-tsãnets adetsili tsi vã nvitsãm, cum dupã zborlu, ashãtsi sh-dupã epistola a noastrã. 16 Domnul a nostru Isus Hristos sh-Dumnidzãlu Tatãl a nostru tsi nã vru sh-nã deadi diznjirdari eternã sh-nãdii bunã prit harul a lui, 17 s-diznjirdã ininjli a voastri shi s-vã nvãrtusheascã tu itsi zbor sh-lucru bun.