1 Tu soni, frats sh-surãri, rugats-vã trã noi tsi zborlu al Domnu si s-arãspãndeascã trãoarã shi s-multumãreascã ashã cum s-featsi sh-namisa di voi. 2 Rugats-vã tra s-ascãpãm di oaminjlji anapudz sh-uruts, cã pistea nu easti la tuts. 3 Ma Domnul easti pistimen sh-elu va vã nvãrtusheascã sh-va vã apãrã di atsel arãulu. 4 Noi avem pistusini tu Domnul trã voi cã lucrili tsi vã dimãndãm ma li fãtsets sh-va li fãtsets. 5 Domnul si ndripteadzã ininjli a voastri cãtrã vrearea a Dumnidzãlui sh-la arãvdarea a Hristolui.

6 Tu numa a Domnului Isus Hristos, noi vã dimãndãm, frats sh-surãri, s-vã dipãrtats di cathi frat tsi imnã fãrã aradã sh-nu dupã adetea tsi avets loat di la noi. 7 Cã voi shtits cã cum s-nã urmats. Noi nu nã purtãm fãrã aradã cu voi, 8 sh-nu avem mãcat digeaba pãnea a vãrui, ma lucrãm cu curmari sh-cu munduiri noapti sh-dzuã, tra s-nu nã fãtseam sartsinã a vãrui di voi. 9 Nu cã nu avem ndriptati, ma tra s-vã dãm exemplu s-fãtsets ca noi. 10 Sh-cãndu earam cu voi, vã dimãndãm aestã: "Macã vãrã nu va lucreadzã, s-nu mãcã." 11 Noi avdzãm cã niscãntsã di voi imnã fãrã aradã, nu lucreadzã dip shi s-measticã cu lucri goali. 12 Aeshti lji dimãndãm sh-lji rugãm, prit Domnul Isus Hristos, tsi lucrãnda tu tãtseari s-mãcã pãnea a lor. 13 Voi, frats sh-surãri, s-nu vã curmats s-fãtsets ghini.

14 Macã tsiniva nu ascultã zborlu a nostru tu aestã epistolã, siminats-lu sh-nu vã sotsãsits cu nãsu, tsi elu s-arushineadzã. 15 Cu tut atsea, nu l-lugursits ca neamic, ma vãrghits-lu ca frat.

16 Domnul a paciljei s-vã da pace totãna tu itsido. Domnul s-hibã cu voi tuts!

17 Mini, Pavlu am scriatã salutarea cu mãna a mea. Aestu easti semnul a meu tu cathi carti.

18 Harul a Domnului a nostru Isus Hristos s-hibã cu voi tuts!