1 Iuda sclavul al Isus Hristos shi fratili al Iacov, a acljimatslor tsi suntu vruts di la Tatãl Dumnidzãu sh-vigljeatã di Isus Hristos.

2 Njila, pacea shi vrearea si s-avdagã la voi.

3 Multu-vruts, aveam unã vreari marã s-vã scriu ti ascãparea a noastrã comunã, avui ananghi s-vã scriu a voauã shi s-vã ursescu s-alumtats ti pistea tsi eara datã a sãmtsãlor un oarã sh-ti totãna. 4 Cã intrarã ascumtu namisa di voi niscãntsã oaminji tsi eara arãdãpsits di cu chiro ti aestã condamnã, nipistipsits, tsi u toarnã harul a Dumnidzãlui a nostru tu disfrãnari sh-aleapid singurlu Mastru, sh-Domnul-a nostru Isus Hristos.

5 Ma voi s-vã aduc aminti, cu tutã cã tora li shtits tuti aesti, tsi Domnul, dupã tsi u ascãpã populu a lui di loclu-a Eghyptului, deapoea lji dãrãmã atselji tsi nu pistipsirã. 6 Anghilji, tsi nu l-tsãnurã pozitsili a lor di ma nãinti, ma li alãsarã locurili a lor iu bãna, elu lji apãrã tu scutidi, ligats cu prãnghi eternã ti giudicata a Dzuãljei atsiljei mari. 7 Ashã cum Sodom sh-Gomora shi cãsãbadzli avãrliga s-deadirã dupã putãnlichili shi imnarã dupã disfãrnãrili sexuali. Aesti s-featsirã exemplu trã atselji tsi pãtsãrã pidipsirea a foclui ti totãna.

8 Tut ashã sh-aeshtsã yisãnda lãvushescu truplu, arniseascã putearea a Dumnidzãlui sh-blastimã creaturili tsereshti. 9 Ma arhanghilul Mihail cãndu si ncãcea cu draclu zbura trã truplu a Moisiului sh-nu cutidzã s-dzãtsea un zbor ti ngiurari ma dzãsi: "Domnul s-ti vãrgheascã!" 10 Ma aeshtsã greascã arãu ti tuti lucrili tsi nu cunoscu di la natura, ca agrinjili fãrã minti, tsi facã arãu ti vetea a lor.

11 Cavai di nãshi! Cã au loatã calea a Cainlui, sh-trã amintatic s-arcarã dupã cãbatli a Balaamlui, sh-chirurã tu rebilipsirea al Coreu.

12 Aeshtsã suntu lãvushituri la sãrbãtoarili a voastri di vrearea frãtseascã, cãndu mãcã sh-bea deadun cu voi fãrã rushãni, pãshtãnda vetea a lor. Atselji suntu niori fãrã apã, pimtu nclo shi nculea di vimturi, ponji di toamna fãrã fruti, disrãdãtsinati sh-di doauã ori mortsi. 13 Atselji suntu vãljuri turbati a amariljei tsi spumeadzã arushãnili a lor, steali dispãrtsãti di la cai easti rezervat scutidlu ti totãna.

14 Shi trã aeshtsã prufitipsi shi Enocu, al shaptili dupã Adam, dzãcãnda: "Ia, ma yini Domnulu cu njiljlji a lui sãmtsã, 15 ti fãtseari giudicarea contra a tutulor shi ti cãndãrsiri tuts nipistimenjlji namisa di nãshi trã tuti faptili a lor arãli shi trã tuti zboarili a lor arushinoasi, tsi amãrtioshlji fãrã pisti greascã contra a lui." 16 Aeshtsã suntu murmurãtori tsi plãngã ti itsido tsi imnã dupã orixea a lor shi gura a lor greashti zboari alãvdati shi culãchipseascã oaminji trã amintatic.

17 Ma voi, multu-vruts, adutsets-vã aminti zboarili tsi vã au dzãsã apostulji a Domnului a nostru Isus Hristos. 18 Elji vã dzãtsea tsi tu chirolu di ma napoi va s-aibã pizuitori tsi va s-imnã dupã orixili a lor anapudzi. 19 Aeshtsã suntu atselji tsi fac dispãrtsãri, oaminji amãrtioshi, tsi nu au Duhlu. 20 Ma voi, multu-vruts, adrãnda bana pri pistea a voastrã multu-sãmtã, pãrãcãlsinda tu Duhlu Sãmtu, 21 afirits-vã tu vrearea al Dumnidzãu, ashtiptãnda njila a Domnului a nostru Isus Hristos tsi adutsi bana eternã.

22 Shi avets njilã di omlu tsi easti turbulat. 23 Shi ascãpats-lã alantsãlji trãgãnda di focu, shi avets njilã la alantsi deadun cu fricã, aurãnda stranjilu pangãnit di carnea.

24 Ma atsilui tsi poati s-vã veaglji di cathi cãdeari shi s-vã scoatã nãinti a mãririljei a lui ni-lãvushit shi cu harauã, 25 a singurlui Dumnidzã, a Ascãpãtorlui a nostru, s-lji hibã mãriri, multu-mãriri, puteari shi autoritati, tora shi tu eta a etilor. Amin.