1 Lukololo vetu, nyenye mwavene mwichela kuva kuvagendela kwa nefwe kwa nyenye seikali hela. 2 Mwichela kuva tukagudilwe na kuligwa ukoya Filipi petukali twave kufika kwa nyenye Tesalonike. Ingava tukapatile upinjani mkomi, ila Nguluvi akatugaviye ukakatima va kudalika Njowo Nofu lyake. 3 Njowo chetudalike kwa nyenye sechikali njowo cha udesi awu kwa unjanganifu, vala setusaka kumchanga munu yeyonda, 4 ila nefwe twilonga ngita peikela Nguluvi, kwakuva mwene atuidikiye nefwe na akatugaviye ichi Njowo Nofu. Setusaka kuvakelesa vanu haa, ila twisaka kumkelesa Nguluvi yeichela numbula chetu. 5 Kangi mwichela kuva setukachile kwa nyenye kwa njowo cha kuvagita mutukele vala setukatumiye njowo ichi kwifiya unenga tunga, Nguluvi yumwene ndi mswida vetu! 6 Setukasakile njuma kuhuma kwa vanu, vala kuhuma kwa nyenye, vala kuhuma kwa munu yeyonda yula, 7 ata ngita tukali vanjagila va Kilisito, tukali na ludali lwa kutumila umwimike vetu kusaka finu kuhuma kwa nyenye, ila nefwe tukali vayigafu mugati lyenu ngita maye peakuvalela vana vake. 8 Kwakuva tukavakeliye hilo nyenye ata kuvagavila Njowo Nofu lya Nguluvi, ila ndeni ndeni kugita makani gyetu gyonda gyakuvatanga nyenye, kwakuva mukali vaganja vetu! 9 Lukololo vetu, nyenye mwikwiwuka petukagitile kasi kwa kugangamala hilo. Petukavaletiye Njowo Nofu cha Nguluvi tukagitile kasi pamunyi na pamiye neke tubihile kuva mchigo kwa munu yeyonda pagati penu.

10 Nyenye mwivesa kuva vaswida vetu pamwi na Nguluvi, kuva magito gyetu pagati lyenu nyenye yemumdikiye Kilisito ukali mnofu na vasanzi pautalo lya Nguluvi bila mang'ung'unilo. 11 Mwichela petukali tukimgitila kila munu, ngita daada peakuvagitila vana vake yumwene. 12 Tukavagangamicha na tukavanamacha, neke mubihile kuleka kugita ngita peikela Nguluvi, mwene yeakuvakemela mwingile mu ung'achale na mu ukomi vake.

13 Kangi tukumhongecha Nguluvi figono fyonda, kwakuva pemkali mwipulikicha luchowo lwake kuhuma kwa nefwe, semkawanuke ngita luchowo lwa munu, ila mukawanuke ngita luchowo lwa Nguluvi na undakyene ilyo nde luchowo lwa Nguluvi. Kwakuva Nguluvi igita kasi pagati penu nyenye yemumdikiye Kilisito. 14 Vakololo vangu, nyenye muhumilwe na makani chichila gegavahumie lipinga lya vanu vevamdikiye Kilisito va ukoya ku Yudeya, yeva Kilisito Yesu. Nyenye mkagudile ndeni ndeni kuhuma kwa vanu venu vavene ngita vadikila avo pevagudisilwe na Vayawudi, 15 avo vakamdochile Mtwa Yesu na vavichi va Nguluvi, vakatugudisile na nefwe kangi. Vanu avo vakumvipisa Nguluvi, kangi ndi vachindwama va kila munu, 16 kwakuva vakagechile kutukanila kuvadalikila vanu se Vayawudi unanzi daukuvaletela ulowa. Ndena viginicha topu sambi, ila nondee Nguluvi avavipiye na dakuvahiga nongwa.

17 Vakololo vangu, kulekana kwa nefwe na nyenye kukali kwa chipindi hela, kangi kulekana kuno kukali kwa mvili hela na se kwa numbula. Chipindi chonda ichi, tukali twidoboka kutang'ana na nyenye. 18 Ndena tung'ang'ile kuvagendelela kangi. Nene Paulo ndikagechile kwacha kwa nyenye mala chongofu, ila Setani akatukaniye. 19 Kwa undakyene nyenye hela nde mukutugita nefwe tuveche na luhuvilo na lukeduko na kwinjuma pautalo lya Mtwa vetu Yesu, chipindi peikwacha. 20 Ndakyene nyenye ndi unjuma vetu na lukeduko lwetu.