1 Baluwa iyi ndi kuhuma kwa nene Paulo, muwopwa kwajili lya Kilisito Yesu na kuhuma kwa Timotewo lukolo vetu.

Ndikukusimbila baluwa veve Filimoni mganja vetu na mnyigendwa muyetu, 2 veve muhacha Afia na Alikipo mpuga muyetu mu Kilisito na lipinga lya vanu vevamwidikiye Kilisito, lyelitang'ana mukaye lyako.

3 Tukuvang'ang'ila usangi na lutengamaso kuhuma kwa Nguluvi, Daada vetu na kwa Mtwa Yesu Kilisito.

4 Kila chipindi pendikumlumba Nguluvi ndikukuviwuka veve Filimoni na ndikumuhongecha Nguluvi, 5 kwakuva ndipulika njowo cha kwidikila kwa veve kwa Mtwa Yesu na lukelo lwako kwa vang'alile vonda va vevahaguliwe kwajili lya mdikiye Nguluvi. 6 Ndikukulumba neke udikilo ulo veugita pamwi na nefwe yikutange kuchela hilo lufunyo chonda chetukwanuka kwa kuhumila na kwiwungana na Kilisito. 7 Lukolo vangu, ukelo vako undiletie lukelo ngomi na kuninamacha hilo. Veve nondee ubuludise numbula cha vanu vevahaguliwe kwajili lya Nguluvi.

8 Kwakuwa ndiwesile kwa ukakatima hilo, ata ngita ndikuswitilicha mu Kilisito, ugite cheung'ang'wa kugita, 9 ila kwakuva lya lukelo, ndi ngiba hilo ndikusuke. Ndigita ndena kwakuva nene Paulo ata ngita ndi mvaha na kangi nene ndi muwopwa kwajili lya Kilisito Yesu. 10 Suwe, ndukusuka kwajili lya Onesimo, mwene ndi mwana vangu, ambaye ndivechile daada vake mu Kilisito pendigehe mukiwopo. 11 Nde Onesimo yuyula ambayo kigono kya kumbele seakutangile kinu kyokyonda, ila kwa nondee akukutanga veve na akunitanga na nene.

12 Nondee ndikumlagilicha kwa veve, kwakuva ndikumkela kwa numbula lyangu lyonda. 13 Ndikeliye akale na nene baha anditange badili lyako chipindi pendigehe mukiwopo kwakuva lya kulanducha Njowo Nofu, 14 ila dasendigita kyokyonda bila veve kudikila, sendikela kukuswitilicha unditangile, kwakuva usanzi vako wing'ang'wa kuhuma mu numbula lyako veve yuve na sekwakuswitilichwa na munu. 15 Pangi Onesimo akahegile kwa veve kwa chipindi chidodo, neke uveche pamwi nave mbepali, 16 nondee mwene se msutu hela, ila ndi ngiba kuchumba msutu, mwene ndi lukolo mkelwa. Ndi munu yendimkeliye hilo, ila veve dakumkela hilo, ngita msutu na ngita lukolo mu Mtwa. 17 Kwakuva ukunichela kuva nene ndi mgita kasi myago mu Kilisito, mwanuke Onesimo ngita fila ngauniwanuka nene lukolo vako. 18 Ngita akali akugitile nongwa lyolyonda awu akali na deni lyako suwe ndilongele nene ndikuhombe. 19 Ndisimba luchowo ulu kwa liwoko lyangu, nene Paulo dandihomba! Kangi ndihela kwakuva lya kukwiwusa kuva una deni pakyanya lya kwikala kwa veve. 20 Ndakyene lukolo vangu, ugite luchowo ulu kwa ajili lya litawa lya Mtwa, ndikusuka ukeduse numbula lyangu ngita lukolo vako mu Kilisito. 21 Ndisimba kwa kwidikila kuva ndichela daudikila lusoko lyangu, ndena ndichele kuwa daugita makomi hilo kugina ago ndikusukile. 22 Pamwi na ago, nditayalisiye kyumba cha kufikila kwakuva ndihuvila kuva mukulumba kwa nyenye, Nguluvi akunitanga ndache kwa nyenye.

23 Epafula, muwopwa muyangu kwajili lya Kilisito Yesu akuhungila. 24 Na vangita kasi pamwi na nene kina, Maliko na Alisitaliko na Dema na Luka vakuhungila.

25 Ndikuvang'ang'ila nyenye vonda usangi va Mtwa Yesu Kilisito.