1 Wuli, wumi venu mu Kilisito ukuvagavila ludali? Wuli, lukelo lwake ukuvanamacha? Wuli, Muhe va Nguluvi agehe mugati lwenu na mwikwiwonela lusungu nyenye kwa nyenye? 2 Ngita nde peyigehe, ndemukunigite niveche na lukeduko, neke muveche na lihocho limwi, lukelo lumwi, numbula yimwi na mwikwidikile pamwi. 3 Mubihile kugita njowo lyolyonda kwa kwidumba, ila kwa kwikwisa, kila munu amwene muyage ndi giba hilo kuchumba yumwene. 4 Ubihile kuhocha pakyanya ga makani gyake yumwene, ila ayigumbanikile na njowo cha kumtanga muyage. 5 Mung'ang'a kugahocha makani ngita Kilisito Yesu peakali akugahocha.

6 Mwene kuvangila dahile akali Nguluvi,

ila seakahochile kuva akali ngita Nguluvi,

ila seakalolile kuva kula kuvecha ngita Nguluvi nde kinu kya kwidumbila hilo.

7 Ila mwene akagalekile ago gonda akagigitile mnyigendwa,

akali ngita munu,

na akawonike ngita munu.

8 Akayikwisile na kudikila mbaka kufuwa,

ata kufuwa pakipindilihicho.

9 Kwa ndena Nguluvi akamkang'icha kukyanya hilo,

akamtambucha litawa lyeligehe likomi hilo kuchumba matawa gyonda.

10 Neke kwa uginyange va litawa lya Yesu,

fiwumbe fyonda fya kuluhano na muinyi na kumafunde,

fifugame pautalo lyake,

11 na kila munu alonge kuva Yesu Kilisito ndi Mtwa,

kwa ukomi va Nguluvi Daada.

12 Vakolo vangu, chipindi pendikali na nyenye mkandidikile figono fyonda na ata nondee pendigehe patali na nyenye mwendelele kwidikila. Mugite kasi kwa wogofi na kutetema kwa ulowola venu, 13 kwakuva Nguluvi nde yeagita kasi mugati lyenu, kuvagavila umwimike va kung'ang'a na kugita makani geikela Nguluvi mugagite.

14 Mugite finu fyonda ngajila kung'ung'ula na ngajila kukwegana, 15 neke muwese kuva vanu va nofu, vevihela nongwa, ngita vana vanofu va Nguluvi vevikala mu inyi wofu na vevayagile. Mwilangala mugati lyao ngita nondwa peching'alika kuluhano, 16 kangi muveche mukuvalongele vanu Njowo cha Nguluvi chechileta wumi va mbapali. Nde nene dandivecha na kwakuva lya kukeduka hilo mukigono kila kwa Kilisito, yiwoneka pawelu sendikagitile kasi hela.

17 Ata ngita dandifuwa na danda lyangu ihechwe ngita usembe va kinyuwo pamwi na usembe va ludikilo lwenu kwa Nguluvi, nene ndikeduka kangi dandihekelala pamwi na nyenye, 18 Ndena ndena na nyenye mwing'ang'wa kukeduka na kuhekelela pamwi na nene.

19 Mukwiwunga pamwi na Mtwa Yesu ndigehe na luhuvilo kuva dandiwesa kumulagicha Timotewo kwa nyenye figono fya pepi, neke ndigangamichwe numbula kwa kupata njowo chenu. 20 Ndihela munu yungi yoyonda ngita Timotewo yeakuvagumbanikila kwa numbula lyake lyonda. 21 Vangi vakugumbanikila hela njowo chawo vavene badili lya kugungumbanikila njowo cha Yesu Kilisito. 22 Nyenye mwavene mwichela namuna Timotewo peakali munu mnofu, kwakuva agitile kasi lya Njowo nofu pamwi na nene ngita mwana na dadie. 23 Ndene ndihuvilila kumlagicha kwa nyenye chipindi pendichela makani gangu pegivecha. 24 Na ndikuhuvilila Mtwa kuva na nene dandiwesa kwacha kwa nyenye figono fya pepi.

25 Ndiwene nde unofu ndimlagiche kwa nyenye lukolo vetu Epafilodito, ndi muyangu mukasi na mufita na ndi mnanzi venu yeanitangile mufinu fyending'ang'ile. 26 Agehe na ng'elu hilo lwa kuvalola nyenye vonda na asugwime hilo kwakuva mkapatile makani kuva mwene akali mtamwa. 27 Ndakyene akali mtamwa pepi kufuwa. Ila Nguluvi akamwonele lusungu, semwene hela ila ata nene neke akandigumbanikile. 28 Suwe, nding'ang'a hilo kumlagicha kwa nyenye, neke pemkumlola mwese kukeduka kangi na numbula lyangu yitulule. 29 Mumwanuke kwa lukeduko ngita lukolo mu Mtwa. Mwing'ang'wa kuvaginya vanu ngita mwene, 30 kwakuva mwene akali pepi kufuwa kwakuva lya kasi lya Kilisito na akali pepi ata kufuwa neke awese kundigavila nene lutango wula wemkalemwile kunigavila.