1 କାୟିତାକ୍‌ବଃଲେକ୍‌ ଅଃମି ଜାଣିଆଚୁ, ଜୁୟି ତୁମ୍‌ ହର୍‍ ହୁର୍ତିବିର୍‌ ଗଃରେ ଅଃମି ଅଃବେ ବାସା କଃରୁଲୁ, ସେରି ନାସ୍‌ ଅୟ୍‌ଗଃଲେକ୍‌, ଇସ୍ୱର୍‌ ଅଃମିକ୍‌ ସଃର୍ଗେ ସଃବୁ ଦିନ୍‌ ରେତା ଗଃର୍‌ ଜାଗାୟ୍‌ ଦଃୟ୍‌ଦ୍‌ । ସେରି ମାନାୟ୍‌ ଆତେ ତିଆର୍‌ କଃଲାର୍‌ ନାୟ୍‌, ମଃତର୍‌ ସେରି ନିଜେ ଇସ୍ୱର୍‌ ତିଆର୍‌ କଃଲାର୍‌, ଜୁୟ୍‌ରି ସଃବୁ ଦିନ୍‌ ରଃୟ୍‌ଦ୍‌ । 2 ଜୁୟ୍‌ତାର୍‌ ଗିନେ ଅଃମିମଃନ୍‌ ତ ଅଃମିମଃନାର୍‌ ସଃର୍ଗାର୍‌ ଗଃର୍‌ହର୍‌ ବଃସ୍ତର୍‌ ହିନ୍ଦୁକ୍‌ ଗଟେକ୍‌ ମଃନେ ଇଚା କଃରି ଇ ଗଃରେ ରେଉଁରେଉଁ ଦୁକେ କାନ୍ଦୁଲୁ । 3 ମଃତର୍‌ ସେ ସଃର୍ଗାର୍‌ ଗଃରେ ଗଃଲେକ୍‌, ଅଃମିମଃନ୍‌ ନଃଗ୍‌ଳା ନଃଡିସୁ । 4 କାୟିତାକ୍‌ବଃଲେକ୍‌ ଅଃମିମଃନ୍‌ ଇ ତୁମ୍‌ ତଃୟ୍‌ ବାସା କଃରି ବଜ୍‌ ବୟ୍‌ ଦୁକେ କାନ୍ଦୁଲୁ; ଜୁୟ୍‌ତାର୍‌ ଗିନେ ଅଃମିମଃନ୍‌ ଜେ ହୁର୍ତିବିର୍‌ ବଃସ୍ତର୍‌ ଚାଡୁକ୍‌ ମଃନ୍‌ କଃରୁଲୁ, ସେରି ନାୟ୍‌, ମଃତର୍‌ ଜିବନ୍ ଜଃନ୍‌କଃରି ମଃର୍ନ୍‌କେ ଡାହେଦ୍‌, ଇତାର୍‌ ଗିନେ ଇ ବଃସ୍ତର୍‌ ଉହ୍ରେ ସଃର୍ଗାର୍‌ ବଃସ୍ତର୍‌ ହିନ୍ଦୁକ୍‌ ଅଃମିମଃନ୍‌ ମଃନ୍‌ କଃରୁଲୁ । 5 ଆର୍‌ ଜେ ଇତାର୍‌ ଗିନେ ଅଃମିମଃନ୍‌କେ ଜଃଗ୍ରାତ୍‌ କଃରି ଆଚେ, ସେ ଇସ୍ୱର୍‌, ସେ ଅଃମିମଃନ୍‌କେ ସଃୟ୍‌ତ୍‌ ହଃର୍କାରେ ପବିତ୍ର ଆତ୍ମା ହେଁ ଦାନ୍‌ କଃରିଆଚେ ।

6 ତଃବେ ଅଃମିମଃନ୍‌ ସଃବୁବଃଳ୍‌ ସାସ୍‌ ଦଃରି ଆଚୁ, ଆର୍‌ ଇ ଗଃଗାଳାର୍‌ ଗଃରେ ଜୁୟି ହଃତେକ୍‌ ବାସା କଃରୁଲୁ, ସେ ହଃତେକ୍‌ ଜେ ଅଃମିମଃନ୍‌ ମାପୁରାର୍‌ ଗଃରେହୁଣି ଦୁରିକ୍‌ ବାସା କଃରୁଲୁ, ଇତି ଜାଣିଆଚୁ । 7 କାୟିତାକ୍‌ବଃଲେକ୍‌ ଅଃମିମଃନ୍‌ ଡିସ୍ତା କଃତାୟ୍‌ ଜିବନ୍ ନଃକାଟି, ବିସ୍ୱାସେ ଜିବନ୍ କାଟୁଲୁ । 8 ହିଁ ଅଃମିମଃନ୍‌ ସାସି, ଆର୍‌ ଇ ଗଃଗାଳେ ହୁଣି ଦୁରିକ୍‌ ବାସା କଃରି ମାପୁରାର୍‌ ତଃୟ୍‌ ବାସା କଃରୁଲାକ୍‌ ଅଃମିମଃନାର୍‌ ବୁତେକ୍‌ ସଃର୍ଦା । 9 ଇତାର୍‌ ଗିନେ ହେଁ ବାସା କଃର୍ତା ଲକ୍‌ ଅଃଉଆ କି ହଃର୍‌ଦେସ୍ୟା ଅଃଉଆ, ତାର୍‌ ତଃୟ୍‌ ସଃର୍ଦାର୍‌ ଲକ୍‌ ଅଃଉଁକେ ଅଃମିମଃନାର୍‌ ବଃଡେ ମଃନ୍‌ । 10 ✝କାୟିତାକ୍‌ବଃଲେକ୍‌ ନିକ ଅଃଉଅ କି କଃରାପ୍‌ ଅଃଉଆ, ହଃତିଲକ୍‌ ଅଃହ୍‌ଣାର୍‌ ହୁର୍ତିବିର୍‌ ଗଃଗାଳ୍‌ କଃଲା କାମ୍‌ ହଃର୍କାରେ ହଃଳ୍‌ ହାଉଁକ୍‌ କ୍ରିସ୍ଟର୍‌ ବିଚାର୍‌ କଃର୍ତା ଟାଣେ ଅଃମି ସଃବୁ ଲକେ ଜାଣାୟି ଅଃଉଁକେ ଅୟ୍‌ଦ୍‌ ।

11 ତଃବେ ମାପୁର୍‌କେ ଡିର୍‌ତା କଃତା ଜାଣ୍‌ଲାକ୍‌ ଅଃମିମଃନ୍‌ ଲକ୍‌ମଃନ୍‌କେ ସିକାଉଁଲୁ, ମଃତର୍‌ ଅଃମିମଃନ୍‌ ଇସ୍ୱରାର୍‌ ଚଃମେ ନିକ କଃରି ଜାଣାୟି ଅୟି ଆଚୁ, ଆର୍‌ ତୁମିମଃନାର୍‌ ବାବ୍‌ନା ତଃୟ୍‌ ହେଁ ଜେ ନିକକଃରି ଜାଣାୟି ଅୟି ଆଚୁ, ଇରି ମୁୟ୍‌ଁ ଆସା କଃରୁଲେ । 12 ଅଃମିମଃନ୍‌ ଆରେକ୍‌ ଗଟ୍‌ତର୍‌ ତୁମାର୍‌ ଚଃମେ ନିଜାର୍ ଗୁଣ୍‌ଗିତ୍‌ ନଃକଉଁ, ମଃତର୍‌ ଜୁୟି ଲକ୍‌ମଃନ୍‌ ମଃନ୍‌ବିତ୍ରାର୍‌ କଃତାକ୍‌ ଗଃର୍ବ୍‌ ନଃକେରି ହଃଦାର୍‌ କଃତାୟ୍‌ ଗଃର୍ବ୍‌ କଃର୍ତି, ସେମଃନ୍‌କେ ଜଃନ୍‌କଃରି ଉତୁର୍‌ ଦେଉଁକ୍‌ ହାରାସ୍‌, ଇତାର୍‌ ଗିନେ ଅଃମିମଃନାର୍‌ ବାଟ୍ୟା ଗଃର୍ବ୍‌ କଃରୁକେ ତୁମିମଃନ୍‌କେ ବାଟ୍‌ ଦେଉଁଲୁ । 13 କାୟିତାକ୍‌ବଃଲେକ୍‌ ଜଦି ଅଃମିମଃନ୍‌ ନିର୍ବୁଦିଆ, ସେରି ଇସ୍ୱରାର୍‌ ଗିନେ, କି ଜଦି ଅଃମିମଃନ୍‌ ବୁଦିଆ, ସେରି ତୁମିମଃନାର୍‌ ଗିନେ । 14 କାୟିତାକ୍‌ବଃଲେକ୍‌ କ୍ରିସ୍ଟର୍‌ ଲାଡ୍‌ ଅଃମିମଃନ୍‌କେ ଆୟ୍‌ତ୍‌ କଃରି ଚାଲାଉଁଲି, ଜୁୟ୍‌ତାର୍‌ ଗିନେ ଅଃମିମଃନ୍‌ ଇ ବିଚାର୍‌ କଃରୁଲୁ ଜେ, ଏକ୍ଲା ସଃବୁ ଲକାର୍‌ ଗିନେ ମଃର୍ନ୍‌ ବୟଃଗ୍ କଃରି ରିଲାକ୍‌ ସଃବୁ ଲକ୍‌ ମଃନାର୍‌ ବାଗିଦାରି ଅୟ୍‌ଲାୟ୍‌ । 15 ଆର୍‌ ସେ ସଃବୁ ଲକାର୍‌ ଗିନେ ମଃର୍ନ୍‌ ବୟଃଗ୍ କଃଲା, ଜଃନ୍‌କଃରି ଜୁୟି ଲକ୍‌ମଃନ୍‌ ଜିବନ୍ ଆଚ୍‌ତି, ସେମଃନ୍ ଆର୍‌ ଅଃହ୍‌ଣା ଅଃହ୍‌ଣାର୍‌ ଗିନେ ଜିବନ୍ ନଃକାଟି, ଜେ ସେମଃନାର୍‌ ଗିନେ ମଃର୍ନ୍‌ ବୟଃଗ୍ କଃଲା ଆର୍‌ ଉଟ୍‌ଲା, ତାର୍‌ ଗିନେ ଜିବନ୍ କାଟ୍‌ତି ।

16 ତଃବେ ଆଜିହୁଣି ଅଃମିମଃନ୍‌ ଗଃଗାଳ୍‌ ହଃର୍‌କାରେ କାକେ ବିଚାର୍‌ ନଃକେରୁ, ଜଦି କ୍ରିସ୍ଟକେ ଗଃଗାଳ୍‌ ହଃର୍କାରେ ଅଃମିମଃନ୍‌ ବିଚାର୍‌ କଃରିରିଲୁ, ଅୟିଲେକ୍ ହେଁ ଅଃବେ ଆର୍‌ ତାକେ ସେ ହଃର୍କାରେ ବିଚାର୍‌ ନଃକେରୁ । 17 ଇତାର୍‌ ଗିନେ ଜେ କ୍ରିସ୍ଟର୍‌ ତଃୟ୍‌ ଆଚେ, ତଃବେ ସେ ନଃଉଆଁ କଃରି ଜଃଲମ୍‌ ଅୟିଆଚେ; ହଃର୍ନା କଃତା ସଃବୁ ନଃସ୍ଟ୍‌ ଅୟିଆଚେ, ଦଃକ୍‌, ସଃବୁ କଃତା ନଃଉଆଁ ଅୟିଆଚେ । 18 ମଃତର୍‌ ସଃବୁ କଃତା ଇସ୍ୱର୍‌ ତଃୟ୍‌ହୁଣି ଅୟିଆଚେ; ସେ କ୍ରିସ୍ଟର୍‌ ତଃୟ୍‌ ଅଃହ୍‌ଣାର୍‌ ସଃଙ୍ଗ୍ ଅଃମିମଃନ୍‌ ମିସାୟ୍‌ ଆଚେ ଆର୍‌ ସେ ମିସାୟ୍‌ଲା ତଃୟ୍‌ ସେବା କଃର୍ତା ହଃଦ୍‌ ଅଃମିମଃନ୍‌କେ ଦଃୟ୍‌ଆଚେ । 19 ସେ ମିସ୍‌ଲା ତଃୟ୍‌ର୍‌ କବୁର୍ ଇରି, ଇସ୍ୱର୍‌ କ୍ରିସ୍ଟର୍‌ ତଃୟ୍‌ ଜଃଗତ୍‌କେ ଅଃହ୍‌ଣାର୍‌ ସଃଙ୍ଗ୍ ମାପ୍ରୁସାଦ୍‌ କଃଲା; ସେ ଜଃଗତେ ବାସାକଃର୍ତା ଲକାର୍‌ ହାହ୍‌ କାମ୍‌ ନଃଗେଣି ସେ ମିସ୍‌ଲା ତଃୟ୍‌ର୍‌ କବୁର୍ ଅଃମିମଃନାର୍‌ ଚଃମେ ସଃହ୍ରି ଦଃୟ୍‌ଆଚେ ।

20 ତଃବେ ଇସ୍ୱର୍‌ ଅଃମିମଃନ୍‌କେ କୁଦ୍‌ଲାର୍‌ ଗିନେ ଅଃମିମଃନ୍‌ କ୍ରିସ୍ଟର୍‌ ବାଟ୍ୟା ରଃଜାଦୁତାର୍‌ କାମ୍‌ କଃରୁଲୁ; କ୍ରିସ୍ଟର୍‌ ବାଟ୍ୟା ଅୟି ଅଃମିମଃନ୍‌ ଗଃଉଆରି କଃରୁଲୁ, ଇସ୍ୱର୍‌ ତୁମିକେ ସଃତ୍ରୁ ତଃୟ୍‌ହୁଣି ମାପ୍ରୁସାଦ୍‌ କଃରି ବାଦ୍‌ଲାଅ । 21 ଜାର୍‌ ତଃୟ୍‌ ହାହାର୍‌ ଚିନା କଃଣ୍ଡେକ୍ ନଃରିଲି, ତାକେ ସେ ଅଃମିମଃନାର୍‌ ଗିନେ ହାହାର୍‌ ହୁଜା ହର୍‍ କଃଲା, ଜଃନ୍‌କଃରି ଅଃମିମଃନ୍‌ ତାର୍‌ ଦଃୟି ଇସ୍ୱରାର୍‌ ଚଃମେ ଦଃର୍ମି ହର୍‍ ଅଃଉଁନ୍ଦ୍‌ ।