୨ କରନ୍ତି 6

1 ଆରେକ୍‌ ହେଁ ଇସ୍ୱରାର୍‌ ଦଃୟା ହାୟ୍‌ଲାର୍‌ ଜଃନ୍‌କଃରି ତୁମିମଃନାର୍‌ ତଃୟ୍‌ ହଲ୍ୟା ନୟେ, ଇତାର୍‌ ଗିନେ ଇସ୍ୱର୍‌ ସଃଙ୍ଗ୍ ଗଟେକ୍‌ ତଃୟ୍‌ କାମ୍‌ କଃରୁ କଃରୁ ଅଃମିମଃନ୍‌ ଗଃଉଆରି କଃରୁଲୁ । 2 କାୟିତାକ୍‌ବଃଲେକ୍‌ ଇସ୍ୱର୍‌ ଜାୟ୍‌ରି କଃଉଁଲା ସୁଣା,

"ମୁୟ୍‌ଁ ଦଃୟାର୍‌ ବଃଳ୍‌

ତୁମାର୍‌ ପାର୍ତ୍‌ନା ସୁଣ୍‌ଲେ,

ଆର୍‌ ମୁକ୍ଳାଉଁଣିର୍‌ ଦିନ୍‌

ମୁୟ୍‌ଁ ତୁମାର୍‌ ଉହ୍‌କାର୍ କଃଲେ ।"

ଦଃକା, ଅଃବେ ବଃଡେ ଦଃୟାର୍‌ ବେଳା; ଅଃବେ ମୁକ୍ଳାଉଁଣିର୍‌ ଦିନ୍‌ । 3 ଜଃନ୍‌କଃରି ଅଃମିମଃନାର୍‌ ସେବାକଃର୍ତା ହଃଦ୍‌ ବାଦା ନାହାୟ୍‌, ସେତାର୍‌ଗିନେ ଅଃମିମଃନ୍‌ କୁୟି କଃତାୟ୍‌ ହେଁ ବାଦା ନଃଦେଉଁକେ ଚେସ୍ଟା କଃରୁଲୁ । 4 ମଃତର୍‌ ଅଃମି ସଃବୁ ଅବୁସ୍ତାୟ୍‌ ନିଜ୍‌କେ ଇସ୍ୱରାର୍‌ ସେବାକାରି ହର୍‍ ଚିନାୟ୍‌ ଦେଉଁଲୁ । ବୁତେକ୍‌ ସାସ୍‌ ସଃଙ୍ଗ୍ ଅଃମି ସଃବୁ ରଃକମାର୍‌, କଃସ୍ଟ ତଃୟ୍‌, ଦୁର୍‌ଦଃସା ତଃୟ୍‌, ବିପ୍‌ତି ତଃୟ୍‌ ସଃମ୍ବାଳି ଆଚୁ, 5 ✝୬:୫ ପେରି ୧୬:୨୩.ମାଡ୍ ତଃୟ୍‌, ଜଃଇଲେ ହୁର୍ଲା ତଃୟ୍‌, ଗଃଣ୍ଡ୍‌ଗଳ୍‌ ତଃୟ୍‌, ହାୟ୍‌ଟି କଃର୍ତା ତଃୟ୍‌, ନଃସଉତା ରାତି ତଃୟ୍‌, ବୁକାର୍‌ ତଃୟ୍‌, 6 ପବିତ୍ର ତଃୟ୍‌, ଗ୍ୟାନ୍ ତଃୟ୍‌, ସଃମ୍ବାଳ୍‌ତା ତଃୟ୍‌, ଦିରାବାବ୍‌ ତଃୟ୍‌, ପବିତ୍ର ଆତ୍ମାର୍‌ ତଃୟ୍‌, ନିକ ଲାଡ୍‌ ତଃୟ୍‌, 7 ସଃତ୍‌ କଃତା ତଃୟ୍‌, ଇସ୍ୱରାର୍‌ ସଃକ୍ତି ତଃୟ୍‌ । ଅଃମାର୍‌ କାତା ଆର୍‌ ଡେବ୍ରି ଆତେ ଦଃର୍ମାର୍‌ କଃଣ୍ଡାକାତି ଆଚେ । 8 ଅଃମି ମାନ୍‌ତି ଆର୍‌ ଅମାନ୍ୟାର୍‌ ହାୟ୍‌ଆଚୁ । ଅଃମି ଲାଜ୍‌ ହାୟ୍‌ଆଚୁ ଆର୍‌ ଗୁଣ୍‌ଗିତ୍‌ ହାୟ୍‌ଆଚୁ । ମିଚ୍ କଃଉତା ଲକାର୍‌ ହର୍‍ ଅୟି ଆଚୁ ମଃତର୍‌ ଅଃମି ସଃତ୍‌ କଃଉତା ଲକ୍‌, 9 ନଃଚିନ୍‌ଲା ଲକାର୍‌ ହର୍‍ ମଃତର୍‌ ଚିନଃଲା ଲକ୍‌, ମଃଲା ଲକାର୍‌ ହର୍‍, ମଃତର୍‌ ଦଃକା, ଅଃମିମଃନ୍‌ ଜିବନ୍ ଆଚୁ, ଡଃଣ୍ଡ୍‌ ହାୟ୍‌ଲା ଲକାର୍‌ ହର୍‍, ମଃତର୍‌ ମାରାୟ୍‌ ନଃଉଁ, 10 ଦୁକାର୍‌ ଲକ୍‌ ହର୍‍, ମଃତର୍‌ ସଃବୁବଃଳ୍‌ ସଃର୍ଦା, ଗଃରିବ୍‌ ଲକାର୍‌ ହର୍‍, ମଃତର୍‌ ଗାଦେକ୍‌ ଲକ୍‌କେ ଦଃନ୍ ଦେଉଁକେ ଲକ୍‌, କାୟିରି ନଃହାଉତା ଲକାର୍‌ ହର୍‍, ମଃତର୍‌ ସଃବୁ ହାୟ୍‌ଲା ଲକ୍‌ ।

11 ଏ କରନ୍ତିର୍‌ ଲାଡାର୍‌ ବାୟ୍‌ ଆର୍‌ ବେଣିମଃନ୍‌, ତୁମିମଃନ୍‌କେ ଅଃମିମଃନାର୍‌ ସଃବୁ କଃତା କୟ୍‌ଆଚୁ, ଅଃମିମଃନ୍‌ ତୁମିକେ ମଃନ୍‌ ଦଃୟି ଲାଡ୍‌ କଃରୁଲୁ । 12 ତୁମିମଃନାର୍‌ ହାକ୍‌ ଅଃମିମଃନାର୍‌ ଲାଡ୍‌ ଉଣା ନାୟ୍‌, ମଃତର୍‌ ତୁମିମଃନାର୍‌ ଲାଡ୍‌ ଉଣା । 13 ନିଜାର୍ ହିଲାମଃନ୍‌କେ କୟ୍‌ଲା ହର୍‍ ମୁୟ୍‌ଁ କଃଉଁଲେ, ଅଃମିମଃନ୍‌ ତୁମିକେ ଜଃନ୍‌କଃରି ଲାଡ୍‌ କଃରୁଲୁ ସେବାନ୍ୟା ଅଃମିମଃନ୍‌କେ ହେଁ ଲାଡ୍‌ କଃରା । ତୁମିମଃନାର୍‌ ମଃନ୍‌ ହେଁ ଅଃସାର୍‌ କଃରି ଉଗାଳା ।

ଅଃବିସ୍ୱାସି ମଃନ୍‌କେ ଜାଚାୟ୍‌ ନଃଉଆଁ

14 ଅବିସ୍ୱାସିମଃନାର୍‌ ସଃଙ୍ଗ୍ ସଃମାନ୍ ବାବେ ନିଜ୍‌କେ ଗଃଣାୟ୍‌ ଅଃଉଆ ନାୟ୍‌, କାୟିତାକ୍‌ବଃଲେକ୍‌ ଦଃର୍ମ୍‌ ଆର୍‌ ଅଃଦଃର୍ମ୍‌ ବିତ୍ରେ କାୟି ମିଳାମିସା ? କି ଅଃନ୍ଦାର୍‌ ସଃଙ୍ଗ୍ ଉଜାଳାର୍‌ କାୟି ମିଳାମିସା ? 15 ସୟ୍‌ତାନ୍ ସଃଙ୍ଗ୍ କ୍ରିସ୍ଟର୍‌ କାୟି ମିଳାମିସା ? କି ଅବିସ୍ୱାସି ସଃଙ୍ଗ୍ ବିସ୍ୱାସିର୍‌ କାୟି ବାଗ୍ ? 16 ✝୬:୧୬ ୧ କର ୩:୧୬; ୬:୧୯.ମୁର୍ତି ସଃଙ୍ଗ୍ ଇସ୍ୱରାର୍‌ ମନ୍ଦିରାର୍‌ କାୟି ମିସାଣ୍ ଆଚେ ? କାୟିତାକ୍‌ବଃଲେକ୍‌ ଆମିମଃନ୍ ଜିବନ୍ ଇସ୍ୱରାର୍‌ ମନ୍ଦିର୍‌,

ଜଃନ୍‌କଃରି ଇସ୍ୱର୍‌ କୟ୍‌ଆଚେ, "ମୁୟ୍‌ଁ ସେମଃନାର୍‌ ବିତ୍ରେ ବାସା କଃରିନ୍ଦ୍‌,

ଆର୍‌ ସେମଃନାର୍‌ ବିତ୍ରେ ଚାଲାବୁଲା କଃରିନ୍ଦ୍‌;

ମୁୟ୍‌ଁ ସେମଃନାର୍‌ ଇସ୍ୱର୍‌ ଅୟ୍‌ନ୍ଦ୍‌,

ଆର୍‌ ସେମଃନ୍ ମର୍‌ ଲକ୍‌ ଅଃଉତି ।"

17 ଇତାର୍‌ ଗିନେ ମାପୁର୍ ଇରି କଃଉଁଲା,

"ତୁମିମଃନ୍‌ ସେମଃନାର୍‌ ବିତ୍ରେ ହୁଣି ବାରାୟ୍‌ ଆସା,

ଆର୍‌ ଅଃଲ୍‌ଗା ଅଃଉଆ, ଆର୍‌ ବିଟାଳ୍‌ରି ଚିଉଆ ନାୟ୍‌,

ଆରେକ୍‌ ମୁୟ୍‌ଁ ତୁମିମଃନ୍‌କେ ଆଗଳି ଦଃରିନ୍ଦ୍ ।

18 ମୁୟ୍‌ଁ ତୁମିମଃନାର୍‌ ଉବାଦି ଅୟ୍‌ନ୍ଦ୍‌,

ଆରେକ୍‌ ତୁମିମଃନ୍ ମର୍‌ ହଅ ଜିଇ ଅଃଉଆସ୍‌

ଇରି ସଃବ୍‌କେ ଜିଣା ସଃକ୍ତିମାନ୍ ମାପୁର୍ କଃଉଁଲା ।"