1 ସଃଡେବଃଳ୍‌ ସେତି ରିଲା କଃତେକ୍‌ ଲକ୍‌ମଃନ୍‌ ଆସି, ପିଲାତ ଜୁୟି ଗାଲିଲିୟମଃନାର୍‌ ବଃନି ସେମଃନାର୍‌ ହୁଜା ସଃଙ୍ଗ୍ ମିସାୟ୍‌ ରିଲା, ସେମଃନାର୍‌ କଃତା ଜିସୁକେ ଜାଣାୟ୍‌ଲାୟ୍‌ । 2 ତଃବେ ଜିସୁ ସେମଃନ୍‌କେ କୟ୍‌ଲା, "ଇ ସଃବୁ ଗଃଟ୍‌ଲାକ୍‌ ଇ ଗାଲିଲିୟ୍‌ମଃନ୍‌ ବିନ୍‌ ସଃବୁ ଗାଲିଲିୟମଃନାର୍‌ ତଃୟହୁଣି ଅଃଦିକ୍‌ ହାହି ବଃଲି କି ତୁମିମଃନ୍ ମଃନେ କଃରୁଲାସ୍‌ ? 3 ମୁଁୟ୍‌ ତୁମିମଃନ୍‌କେ କଃଉଁଲେ, ନାୟ୍‌ ସେମଃନ୍ ସେନ୍‌କାର୍‌ ନଃରିଲାୟ୍‌, ମଃତର୍‌ ହାହେହୁଣି ମଃନ୍‌ ନଃବାଦ୍‌ଲାୟ୍‌ଲେକ୍‌ ତୁମିମଃନ୍ ସଃବୁଲକ୍‌ ସେରଃକମ୍‌ ନାସ୍‌ ଅଃଉଆସ୍‌ । 4 ସିଲହ ତଃୟ୍‌ ସେ ଜୁୟି ଅଃଟ୍ର ଲକାର୍‌ ଉହ୍ରେ ଜାଗ୍‌ତା ଗଃର୍‌ ଚଃହ୍‌ଳାୟ୍‌ ସେମଃନାର୍‌ ଜିବନ୍ ନିଲି, ସେମଃନାର୍‌ ବିସୟେ ତୁମି କାୟିରି ବାବୁଲାସ୍‌ ? ସେମଃନ୍ ସଃବୁ ଜିରୁସାଲମାର୍‌ ଲକ୍‌ମଃନାର୍‌ ତଃୟ୍‌ହୁଣି ଅଃଦିକ୍‌ ହାହି ବଃଲି ତୁମିମଃନ୍ ମଃନେ କଃରୁଲାସ୍‌ ? 5 ମୁଁୟ୍‌ ମଃତର୍‌ ତୁମିମଃନ୍‌କେ କଃଉଁଲେ, ହାହେହୁଣି ମଃନ୍‌ ନଃବାଦ୍‌ଲାୟ୍‌ଲେକ୍‌ ତୁମିମଃନ୍ ହେଁ ସେବାନ୍ୟା ନଃସ୍ଟ୍‌ ଅଃଉଆସ୍‌ ।"

6 ଆରେକ୍‌ ଜିସୁ ଇ କଃତା ହେଁ ସେମଃନ୍‌କେ କୟ୍‌ଲା, "ଗଟ୍ ଲକାର୍‌ ଅଙ୍ଗୁର୍‌ ବାଳେ ଗଟ୍ ଡୁମ୍ବୁର୍‌ ଗଃଚ୍‌ ଲାଗାୟ୍‌ରିଲା । ସାଉକାର୍‌ ଆସିକଃରି ଡୁମ୍ବୁର୍‌ ଗଃଚେ ହଃଳ୍‌ ଲଳ୍‌ଲା, ମଃତର୍‌ ସେ ହାଉଁ ନଃହାର୍‌ଲା । 7 ସେତାର୍‌ଗିନେ ସେମାନାୟ୍‌ ତାର୍‌ ଅଙ୍ଗୁର୍‌ ବାଳେ କାମ୍‌ କଃର୍ତା ମାନାୟ୍‌କେ କୟ୍‌ଲା, ‘ଦଃକ୍‌ ତିନି ବଃର୍ସ୍ ଅୟ୍‌ଲିବେ ମୁୟ୍‌ଁ ଆସି ଇ ଡୁମ୍ବୁର୍‌ ଗଃଚେ ହଃଳ୍‌ ଲଳୁଲେ, ମଃତର୍‌ ହାଉଁ ନଃହାରୁଲେ; ଇ ଡୁମ୍ବୁର୍‌ ଗଃଚ୍‌କେ ମାରିହଃକାଉ, ଇରି କାୟିତାକ୍‌ ବୁୟ୍‌ଁକ୍‌ ନଃସ୍ଟ୍‌ କଃରୁଲି ?’ 8 ମଃତର୍‌ ସେ ସାଉକାର୍‌କେ କୟ୍‌ଲା, ‘ସାଉକାର୍‌, ଆକ୍‌ ଇ ବଃର୍ସ୍ ହେଁ ଚାଡିଦେସ୍‌, ମୁଁୟ୍‌ ଇ ଗଃଚାର୍‌ ଚାରି ହାକ୍‌ କଃଣିକଃରି କାତ୍‌ ଦଃୟ୍‌ନ୍ଦ୍, 9 ଆର୍‌ ଜଦି ଇ ଗଃଚେ ହଃଳ୍‌ ହଃଳ୍‌ଲେକ୍‌ ବଃଲ୍‌ କଃତା, ମଃତର୍‌ ଜଦି ହଃଳ୍‌ ନଃହେଳେ ତଃବେ ତୁୟ୍‌ ଇ ଗଃଚ୍‌କେ ମାରିହଃକାଉ ।’"

10 ଗଟ୍‌ତର୍‌ ଜିସୁ ବିସାଉଁଣିବାର୍‌ ଦିନ୍‌ ଗଟେକ୍‌ ପାର୍ତ୍‌ନା ଗଃରେ ସିକ୍ୟା ଦେତିରିଲା । 11 ଆର୍‌ ଦଃକା ସେତି ଗଟେକ୍‌ ଦୁସ୍ଟ୍‌ ଆତ୍ମା ଡଃସିରିଲା ମାୟ୍‌ଜି ରିଲି, ସେ ଅଃଟ୍ର ବଃର୍ସ୍ ହଃତେକ୍‌ କୁବ୍‌ଳି ଅୟ୍‌ରିଲି, ସେ ସଃଳ୍‌କେ ଅୟି ଟିଆ ଅଃଉଁକେ ନଃହାର୍‌ତିରିଲି । 12 ଜିସୁ ତାକ୍‌ ଦଃକି ଲଃଗେ କୁଦି କୟ୍‌ଲା, "ଏ ଆୟା, ତୁୟ୍‌ ନିକ ଅୟ୍‌ଲିସ୍‌ !" 13 ଆର୍‌ ଜିସୁ ତାର୍‌ ଉହ୍ରେ ଆତ୍‌ ସଃଙ୍ଗାୟ୍‌ଲା, ଆର୍‌ ସେଦାହ୍ରେ ସେ ସଃଳ୍‌କ୍‌ ଅୟି ଟିଆ ଅୟ୍‌ଲି, ଆର୍‌ ସେ ଇସ୍ୱରାର୍‌ ଗୁଣ୍‌ଗାଉଁକେ ଦଃର୍ଲି ।

14 ମଃତର୍‌ ଜିସୁ ବିସାଉଁଣିବାର୍‌ ଦିନ୍‌ ଉଜ୍‌ କଃଲାକ୍‌ ପାର୍ତ୍‌ନାଗଃରାର୍‌ ମୁଳିକା ରିସା ଅୟ୍‌କଃରି ଲକ୍‌ମଃନ୍‌କେ କୟ୍‌ଲା, "କାମ୍‌ କଃରୁକେ ଚଅ ଦିନ୍‌ ଆଚେ, ତଃବେ ସେସଃବୁ ଦିନ୍‌ ଆସିକଃରି ନିକ ଅଃଉଆ, ମଃତର୍‌ ବିସାଉଣିବାରେ ନିକ ଅଃଉଁକେ ଆସା ନାୟ୍‌ ।"

15 ମଃତର୍‌ ମାପୁର୍ ତାକେ କୟ୍‌ଲା, "ରେ ହେଟ୍‌କପଟ୍ୟା, ତୁମିମଃନ୍ ସଃବୁଲକ୍‌ କାୟିରି ବିସାଉଁଣି ଦିନ୍‌ ତୁମାର୍‌ ବଃଇଲ୍‌ କି ଗଃଦ ସାଳେହୁଣି ମେଲି ନଃୟ୍‌ କାୟି ହାଣି ନଃକାଳାଉଆସ୍‌ ? 16 ତଃବେ ଦଃକା ଅଃଟ୍ର ବଃର୍ସ୍ ହଃତେକ୍‌ ସୟ୍‌ତାନ୍‌ ତଃୟ୍‌ହୁଣି କୁବ୍‌ଳି ଅୟ୍‌ରିଲି ଅବ୍ରାହାମାର୍‌ ବଃଉଁସାର୍‌ ଇ ମାୟ୍‌ଜିଟକି କାୟି ବିସାଉଁଣିବାରେ ନିଜାର୍ ବାନ୍ଦୁଣ୍‌ ତଃୟ୍‌ହୁଣି ମୁକୁଳ୍‌ତାର୍‌ ଦଃର୍‌କାର୍‌ ନଃରିଲି ?" 17 ଆର୍‌ ଜିସୁ ଇ କଃତାସଃବୁ କୟ୍‌ଲାକ୍‌, ତାର୍‌ ବିରଦିସଃବୁ ଲାଜ୍‌ ହାୟ୍‌ଲାୟ୍‌, ମଃତର୍‌ ଲକ୍‌ମଃନ୍ଦା ସେ କଃରିରିଲା ସଃବୁ କାବା କାମ୍‌ ଗିନେ ସଃର୍ଦା କଃରୁକେ ଦଃର୍ଲାୟ୍‌ ।

18 ସେତାକ୍‌ ଜିସୁ କୟ୍‌ଲା, "ମାପୁରାର୍‌ ରାଇଜ୍‌ କାର୍‌ ହର୍‍ ? ଆରେକ୍‌ କାର୍‌ ସଃଙ୍ଗ୍ ମୁଁୟ୍‌ ତାର୍‌ ତୁଳ୍‌ନା କଃରିନ୍ଦ୍‌ ? 19 ସେରି ଇବାନ୍ୟା ଗଟେକ୍‌ ସଃର୍ସୁ ମୁଞ୍ଜି ହର୍‍, ଜୁୟ୍‌ରି ନଃୟ୍‌ ଗଟ୍‌ଲକ୍‌ ତାର୍‌ ବାଳେ ବୁଣ୍‌ଲା, ଆର୍‌ ସେରି ବାଡି କଃରି ଗଃଚ୍‌ ଅୟ୍‌ଲି, ଆର୍‌ ଅଃଗାସ୍‌ ଉହ୍ରାର୍‌ ଚେଳେମଃନ୍ ଆସି ତାର୍‌ ଡାଳ୍‌ବିତ୍ରେ ଗୁଡା ଗାଲ୍‌ଲାୟ୍‌ ।"

20 ଜିସୁ ଆରେକ୍‌ କୟ୍‌ଲା, "ଇସ୍ୱରାର୍‌ ରାଇଜ୍‌କେ ମୁଁୟ୍‌ କାର୍‌ ସଃଙ୍ଗ୍ ତୁଳ୍‌ନା କଃରିନ୍ଦ୍‌ ? 21 ସେରି ଗଟେକ୍‌ କମିର୍‌ ହର୍‍, ଗଟେକ୍‌ ମାୟ୍‌ଜି ସେରି ନଃୟ୍‌କଃରି ମାଣେକ୍‌ ଗମ୍‌ଗୁଣ୍ଡ୍‌ ସଃଙ୍ଗ୍ ମିସାୟ୍‌ କଃରି ଚଃଟ୍‌କ୍‌ଲି, ଆର୍‌ ତାର୍‌ହଃଚେ ସେ ସଃବୁ କମିର୍‌ ହର୍‍ ଅୟ୍‌ଲି ।"

22 ଜିସୁ ଜିରୁସାଲମେ ଜାତିରିଲା ବଃଳ୍‌ ସେ ଗଃଳେ ଗଃଳେ ଆର୍‌ ଗାଉଁଏ ଗାଉଁଏ ବୁଲି କଃରି ଲକ୍‌ମଃନ୍‌କେ ସିକ୍ୟା ଦେତି ରିଲା । 23 ଗଟ୍ ଲକ୍‌ ତାକ୍‌ କୟ୍‌ଲା, "ମାପୁର୍, ହାହେହୁଣି ମୁକ୍ତି ହାଉତା ଲକ୍‌ମଃନ୍‌ କାୟି ଅଃଳକ୍‌ ?" ତଃବେ ଜିସୁ ସେମଃନ୍‌କେ କୟ୍‌ଲା, 24 "ସାକୁଳ୍‌ ଦୁଆର୍‌ ଦଃୟି ଜଃଉଁକେ ହାରୁ ସଃକାତ୍‌ ଉପାୟ୍‌ କଃରା, ବଃଲେକ୍‌ ମୁଁୟ୍‌ ତୁମିମଃନ୍‌କେ କଃଉଁଲେ, ଗାଦେକ୍‌ ଲକ୍‌ମଃନ୍‌ ମାପୁରାର୍‌ ରାଇଜେ ଜଃଉଁକେ ହାରୁ ସଃକାତ୍‌ ଉପାୟ୍‌ କଃର୍ତି, ମଃତର୍‌ ଜଃଉଁକେ ନାହାର୍ତି । 25 ଗଃରାର୍‌ ମୁଳିକା ଉଟି ଦୁଆର୍‌ ଡାହ୍‌ଲା ହଃଚେ, ଜଃଡେବଃଳ୍‌ ତୁମିମଃନ୍ ହଃଦାୟି ଟିଆ ଅୟ୍‌ରିଆସ୍‌ ଆର୍‌ ଏ ମାପୁର୍ ଅଃମାର୍‌ ଗିନେ କାହାଟ୍‌ ଉଗାଳ୍‌, ଇରି କୟ୍‌ କଃହାଟେ ମାରୁକେ ଦଃରାସ୍‌, ସଃଡେବଃଳ୍‌ ସେ ତୁମିକେ କୟ୍‌ଦ୍‌, ତୁମିମଃନ୍ କୁୟ୍‌ତିର୍‌ ଲକ୍‌, ସେରି ମୁୟ୍‌ଁ ନଃଜାଣି । 26 ସଃଡେବଃଳ୍‌ ତୁମିମଃନ୍ କଃଉଁକେ ଦଃରାସ୍‌ ଅଃମିମଃନ୍‌ ତର୍‌ ସଃଙ୍ଗ୍ ଗଟେ ଟାଣେ କାୟ୍‌ଲୁ ଆଚୁ, ଆର୍‌ ତୁୟ୍‌ ଅଃମାର୍‌ ଡଃଣ୍ଡେ ବାଟେ ସିକ୍ୟା ଦଃୟ୍‌ରିଲିସ୍‌ । 27 ମଃତର୍‌ ସେ ତୁମିକେ କୟ୍‌ଦ୍‌, ତୁମିମଃନ୍ କୁୟ୍‌ତିର୍‌ ଲକ୍‌ ସେରି ମୁଁୟ୍‌ ନଃଜାଣି, ରେ ଅଃଦଃର୍ମିମଃନ୍‌ ସଃବୁ ମର୍‌ ମୁଏଁହୁଣି ଦୁର୍‌ ଅଃଉଆ । 28 ✝✝ଜଃଡେବଃଳ୍‌ ତୁମିମଃନ୍ ଅବ୍ରାହାମ୍‌, ଇସାକ୍‌, ଜାକୁବକ୍‌ ଆର୍‌ ବିନ୍‌ ସଃବୁ ବାବ୍‌ବାଦିମଃନ୍‌କେ ଇସ୍ୱରାର୍‌ ରାଇଜେ ରିଲାର୍‌ ଦଃକାସ୍‌ ଆର୍‌ ନିଜ୍‌ ନିଜ୍‌କେ ହଃଦାୟି ହଃକାଉତାର୍‌ ଦଃକାସ୍‌, ସଃଡେବଃଳ୍‌ ସେତି ତୁମିମଃନ୍ କାନ୍ଦାସ୍‌ ଆର୍‌ ଦାତ୍‌ ଚାବି ଅଃଉଆସ୍‌ । 29 ଆରେକ୍‌ ଉଦ୍‌ତି ଆର୍‌ ବୁଡ୍‌ତି, ଉତୁର୍‌ ଆର୍‌ ଦଃକିଣ୍‌ବାଟ୍ୟାର୍‌ ଲକ୍‌ମଃନ୍‌ ଆସି ମାପୁରାର୍‌ ରାଇଜେ କାଉଁକେ ବଃସ୍ତି । 30 ✝ଆର୍‌ ଦଃକା, ଜୁୟି ଲକ୍‌ମଃନ୍‌ ଅଃବେ ହଃଚେ ଆଚ୍‌ତି ସେମଃନ୍ ଆଗାଳି ଅଃଉତି ଆର୍‌ ଆଗାଳି ରିଲା ଲକ୍‌ମଃନ୍‌ ହଃଚେ ଅଃଉତି ।"

31 ସଃଡେବଃଳ୍‌ କଃତେକ୍‌ ପାରୁସିମଃନ୍ ଆସି ଜିସୁକେ କୟ୍‌ଲାୟ୍‌, "ତୁୟ୍‌ ଇ ଟାଣ୍ ଚାଡିକଃରି ବାରାୟ୍‌ଜାଆ, କାୟିତାକ୍‌ବଃଲେକ୍‌ ହେରଦ୍‌ ତକେ ମଃର୍ଣ୍ଣେ ମାରୁକ୍‌ ମଃନ୍‌ କଃରୁଲା ।"

32 ତଃବେ ଜିସୁ ସେମଃନ୍‌କେ କୟ୍‌ଲା, "ତୁମିମଃନ୍ ଜାୟ୍‌ ସେ କଲ୍ୟାକ୍‌ କଃଉଆ, ଦଃକା ମୁଁୟ୍‌ ଆଜି ଆର୍‌ କାଲି ବୁତ୍‌ ଚାଡାଉଁଲେ ଆର୍‌ ରଗିମଃନ୍‌କେ ନିକା କଃରୁଲେ, ଆର୍‌ ତିନି ଦିନ୍‌କେ ମର୍‌ କାମ୍‌ ହୁରା ଅୟ୍‌ଦ୍‌ । 33 ଜଃନ୍‌ଅଃଅ, ଆଜି, କାଲି ଆର୍‌ ହଃରିଦିନ୍‌ ମକ୍‌ ଜଃଉଁକେ ହଃଳେଦ୍‌, ବଃଲେକ୍‌ ଜିରୁସାଲମ୍‌ ଗଃଳାର୍‍ ହଃଦାୟି ବାବ୍‌ବାଦି ମଃର୍ତା କଃତା ନାୟ୍‌ ।"

34 "ଏ ଜିରୁସାଲମ୍‌, ଏ ଜିରୁସାଲମ୍‌, ବାବ୍‌ବାଦିମଃନ୍‌କେ ମଃର୍ଣ୍ଣେ ମାରି ରିଲା ଜିରୁସାଲମ୍‌ ଆର୍‌ ମାପୁର୍ ହଃଟାୟ୍‌ ରିଲା ଲକ୍‌ମଃନ୍‌କେ ଟେଳା ଚେଚି ମଃର୍ଣ୍ଣେ ମାରି ରିଲା ଜିରୁସାଲମ୍‌, ମାୟ୍‌କୁକ୍‍ଡ଼ା ଜଃନ୍‌କଃରି ଡେଣା ତଃଳେ ତାର୍‌ ହିଲାମଃନ୍‌କେ ରୁଣ୍ଡାୟ୍‌ଦ୍‌, ସେବାନ୍ୟା ମୁଁୟ୍‌ କଃତେକ୍‌ ତର୍‌, ତର୍‌ ହିଲାମଃନ୍‌କେ ଗଟେ ଟାଣେ କଃରୁକେ ମଃନ୍‌ କଃଲେ, ମଃତର୍‌ ତୁମିମଃନ୍ ମଃନ୍‌ ନଃକେଲାସ୍‌ । 35 ଦଃକା, ତୁମାର୍‌ ଗଃର୍‌ ତୁମିମଃନାର୍‌ ଆତେ ଚାଡିଦିଆ ଅଃଉଁଲି; ଆର୍‌ ମୁଁୟ୍‌ ତୁମିମଃନ୍‌କେ କଃଉଁଲେ, ‘ମାପୁରାର୍‌ ନାଉଁଏ ଜେ ଆସୁଲା, ସେ ବାୟ୍‌ଗ୍‌, ତୁମିମଃନ୍ ଜୁୟି ଦିନ୍‌ ଇ କଃତା କଃଉଆସ୍‌, ସେଦିନ୍ ନାଆସ୍ତା ହଃତେକ୍‌ ମକ୍‌ ତୁମିମଃନ୍ ଆରେକ୍‌ ନଃଦେକାସ୍‌ ।’"