1 Ik’onat b́ mangsto b́ need’iwor kashon beyiruwotsnat k’irtsuwotsats angshituwo b́be’eoon Iyesus shinatse oona neen k’oniruwe, 2 Bí aap’ono naabúwee, b́ k’anoroo, k’ano b́ k’azoro jam aawo kup’de’er finowe, danifetsr, hadefetsr, izfetsr, k’amefetsr daniyon kup’owe. 3 Ashuwotssh kash daatsit danman shishosh geyo bok’azet aawo weetuwe, ernmó worewosh mirac’ar bo botookon boshunts keewo boosh keewr daniyituwotsi ko’idek’etunee. 4 Mansh ariko k’ebo k’ayr turur k’ebo shunetunee. 5 Neemó jam keewatse ni’atso korde, gond bek’orowere k’amdek’on kup’owe, doo shishiyo nabi keewono fin ishuwe, ni fin jamono s’eentswe.

6 Taayelee shukewosh t’iiniruwe, datsanatse tuur tiamet aawo bodre, 7 Kes’onere sheengsh dek’at kes’ree, wos’onowere nohewon b́ s’uufetsosh wos’ree, t imnetiyono kotre. 8 Eshe haniyak kááwi akliliyo taash k’anatniye taan b́ kotiri, aklilymanowere kááw angshiru doonzman manots taash imetuwe, b́ imetuwere t s’uzsh b́woterawo b́ be’ewo shuniru jamwotsshe.

9 Káári tiyok nweetwok’o wotowe, 10 Demas datsani shunt tiatse k’alewtsere, Teselonk’e maantsowere k’azamree, K’erk’is Gelatiy maants, Titowere Dlmat’i eteets datsomants amree. 11 Taanton fa’o Luk’as s’uziye, Mark’os Ik’i finosh taash b́dabish geede’er wowe. 12 Tikik’osi Efeson maants woshk’rere. 13 Nwoor T’iro’ad datsatse Karpusokee k’aztwaats kaaboo taash de’ewowe, b́ mas’aafwotsi bítsnor Branikuwotsi taash de’ewowe. 14 K’aaz k’is’fo Eskndr ayidek’tniye tiats gondo b́ betsi, doonzo b́ finok’o bísh dashetwe. 15 Bí noo nok’alirwo kup’sh dek’t b́ k’efiruwotse neewor ntokish bí’atse n tooko korde’e.

16 Boon s’amiyets keewatse shino moosho dek’at tt’iintstsok’on jametsuwots tiatsna k’az bok’aleyi bako taanton wotdek’t mooshtso konuwor aaliye b́teshi, keewmanor Ik’o naandok’o woshde boats taawk’aye. 17 Ernmó woshman t weeron s’eenon keeweyarr Ik' danaw ash jamó b́o k’ebetuwok’o doonzo taanton wotat́ taan kup’shre, Eeshi noonotsnowere taan ooriree. 18 Doonzo taan gond keew jamotse farire, darotse fa’o b́ mengstosh taan betsituwe, dúre dúron mango bísh wotowa! Amen.

19 P’rsk’lonat Ak’ilnsh, Onesiforum maa ashuwotssh t jamó t’intsuwe. 20 Erast’ros K’orontositse ooruwtsere, Profimos shodt Milit’itse k’azwaaree. 21 Joosho b́ kindfetsere tiyok nweetwok’o wotowe.

Ewubulos, P’udes, Linos, K’lawiyanat amants jamwotswor jamo neesh t’intsirune.

22 Doonzo it shayironton wotowe.

Ik’i s’aato itnton wotowe.