1 Dimbro b́ neediyakon P’awlos amantsuwotsi ikok s’eegt izon boon b́kup’iyi, boon jamik’ratnuwere Mek’edoni eteets datso maantsan bíami. 2 B́ beshiru datsmanotsatsno amantsuwotsi ay izon kup’ifere Grik datso maants bíami. 3 Manokno keez shasho b́ teshi, maniyere hakon markabon Soriy datso maats amoosh b́gawi, ayhudiyitsmó bín fayosh botutsok’o b́dantsotse Mek’edoni weeron anoosh k’ut’b́dek’i.

4 P’irhus naay Sop’at’ros Beriyotse, Arst’rokosnat Sikondusn Teselonk’en, Gayyosn Derben, T’imotiwos, Tikik’osnat T’rofimosn Isiyon bínton tohaat boami. 5 Bowere shin shino amt T’iroadn noon bokoti. 6 Noomó tush meyet baalio b́ beshiyakon Filp’isyusitse Markabats keshat úúts aawon bo bobeyiruwok T’iro’adayits bodat bíyokere shawat aawo nobeshyi.

7 Torbanotsere shnts aawots misho tishde’er iknon moowosh nokakweyi, P’awlos yats gúrok’on bíametwootse ko’ets ashuwotssh b́ keewiri, b́ keewono talitiitso b́borfetso b́geezi. 8 No no ko’ets dadratse ay c’eesho fa’e b́teshi. 9 Ewut’ek’isi eteets jawets na’iko meskotiyatse beedek’tniye b́ teshi, P’awlos b́ keewo b́ geezitsotse jawetsman tokri eeno detsb́dek’i, tokro bín b́ datsotse keezl dadratsere dashan b́dihi, ashuwots bok’awere k’irt b́datseyi. 10 Ernmó P’awlos oot’t na’ats tuumt matdek’t «And kashone b́ fa’oni bíeti, tek’k’ayere!» bí eti. 11 P’awlos dadrats aani kesh waat misho tiitsdek’t amantsuwotsnton b́meyi, datso b́gatsfetsosh ashuwotsnton keewefetst b́teshiyakon k’azbíami. 12 Ashuwotswere kashts jawetso moots dek’boami, mannowere ayidek’t kup’bowutsi.

13 P’awlosi markabots kindshosh nogawutsatse noo shinat markabots Asosits noami, man nok’aluwere P’awlos Asosits b́borfetso b́ tufoon amoosh bí ettsosh hank’o no k’alituwok’o noon b́ azaztsotsne. 14 Bínton Asositse nogonkewor markabots bín kindshdek' milit’its maants towaat noami. 15 Yaats guurok’on manoke tuwat Kiyositse shinatse fa’a datsuwats markabon amnobodi, yaatsok’o Samos maants kimaat yaats guurok’on Milit’iyits amnobodi. 16 P’awlos Isiyotse t teyawok’wa ett Efesoniyere beshat k’ay amo b́ geyi, man b́ k’aluwere P’ent’ek’ost’yi baaliyo Iyerusalemitse daatseyo gawut b́teshtsotsna b́tesh.

17 P’awlos Milit’itsere Efeson maants asho woshat Ik’i maa eenashuwotsi b́ s’eegiyi, 18 Bíyok bowatsok’on boosh hank’o bíeti, «Isiyots tkindts aawotstson tuut jam aawo itnton awuk’o tbeetsok’o itwoor danfte, 19 Ayhudiwots tiats bo malts k’od’atse tuutson gondbek’o tiats b́bodaloru ttooko dashan detsonat eeponee doonzo fino t finefoni. 20 Jebatsnowere it maa mootsnowere itsh tdaniyor itsh t’ak’amitu jamoni tkeewi bako eegoru itsh t shapitso aaliye. 21 Ayhudiyotsi wotowa Ik' ash woterawwots naandrone err Ik’o maants bo aanituwok’o doonzo Iyesus Krstosi bo amanituwok’oye b́gawi. 22 Andoor bíyok tbodor tiyats bodetwo eeg b́wto t dartsotse s’ayn shayirosh aleyat Eyerusalem maats ti amoniye. 23 Wotowa eree kit kitotse tipewonat gond bek’on taan b́kotiruwok’o S’ayin shayiro taash keewure. 24 ✝20:24 2 T’im. 4:7 Doo shishi keewo Ik' s’aaton daniyosh doonzo Iyesusoke t k’aaútdek’ts fino tishink’ere t kashi jango k’awuntsots gerawunk’e, t kashoshowere kis’o deshawnk’e.

25 «Andish b́borfetso it jamets dagotse ananat Ik’i mengsti jango t nabiri, haniyere okonomó ititsere konuworu t shiitso b́ jamon b́ be’awok’o danfee. 26 Mansh ititsere ikdonzworu b́t’afiyal b́ s’atsotse taan aaterawok’o hambets aawon itsh danirwe. 27 Ik’o bí’asabts jamo itsh keewuni tishi bako eegoru t oorits keewo aaliye. 28 S’ayn shayiro jintswotsi woshdek’t iti naashire, eshe it tokonat it jiniru gizi s’eeni jangosh it atso korde’ere, Ik’o b́ naay s’atson keewudeb́k’ts Ik’i moo korere. 29 Taa ti amiyakon gizi s’eenosh máác' k’ewerawo elahok’o maac' kup' wotts ashuwots bits bokindituwok’o danfee. 30 Mank’owore ash ik ikwots ititse tuur k’úúr daniyo daniyir ayi amantsuwotsi bomaants geetsitune. 31 Eshe it ik iketsi keez natosh t’úwonat aawon ti aac’uwo kuut’fetsat itn ti’iztsok’o gawufetsr itatso korde’ere.

32 «Andoor iti kup’shr S’ayinwots dagotse rstiyo imosh falitu b́s’aati aap’onshowere adaro iti imre. 33 Taa kon ambaaronowere, awntsonowere wee taho tewunratse. 34 T took kishon finefetsat ttooko wotowa ttohuwotsi t tep’fok’o it tookon danfte. 35 ‹Dek’iruwoniyere bogo imiruwo deereke› etiru doonzo Iyesus aap’tso gawufetsr, nokishon angmaawtswotsi tep’o noosh b́ geyituwok’o ay weerindon itsh kitsre.»

36 Maniyere hakon P’awlos jametsuwotsnton tuk’maldek’t Ik’o b́k’oni. 37 Jametsuwots eept P’awlosi matdek’t bojoobi. 38 Dabtnu aydek’t shiyanatnuwere, «Haniyak tshitso be’atste» boosh bí’ettsatse tuutsone, Markabok b́ borfetsosho bín bodeni.