Woshetswotsi 25

P’awlos Fist’os shinats b́t’iintsok’owo

1 Fist’os bí alguro K’isariyotse kindt keez aawo b́ teshiyakon manokere Iyerusalm maants bíami 2,3 Manoknowere kahni naashwotsnat ik ik een een Ayhudi jirwots Pawlosats bo s’aamiyo bot’intsi, «P’awlosi Iyerusalemi deewáár noosh sheeng keewo k’aluwe» ett bok’oni, han boettsonuwere P’awlosi weerindatse korde’er úd’osh bo geetsotsne. 4 Fist’osmó «P’awlos K’isariyon tipi mootsne koteyiri, taawere kaari and aanar b́maants ametuwe, 5 It naash naashuwotsuwere taanton K’isariyo maants amnee, P’awlos b́ fints gond fino b́beyal manoke s’amiwune» bí eti.

6 Fist’os shmt aawoniye wee tats aawoniye bowawu aawwotsi bonton b́ beshiyakon K’isariyo maants no ami, manok nobodtsok’on yaatsok’on naashi jorats bedek’t P’awlosi bíyok de’er bot’inetuwok’o bíazazi. 7 P’awlos b́ t’intsok’on Iyerusalemn waats ayhudiyots gúrdek’t need’at gaawu deshaw ay een een s’amiyotsi bí’ats bot’intsi, 8 P’awloswere «Taa ayhudiyots Nemats wotowa Ik' maats wee Rom nugúsats t fints gond fino aaliye» ett bí’atse bíaniyit keewo b́keewi.

9 Fist’osmó ayhudiyotsi geneúsho geeyat P’awlosi «Iyerusalem maants amr han jangosh manoke tshinatse angsho dek’osh geefneya?» bí eti. 10 P’awlosmó hank’o ett bíaani, «Hambe! taa b́shinaatse mooshosh Rom nugúso angshi jori shinatse t need’iri, nee sheengsh dek’at ndantsok’on ayhudiyotsats t fints gond fino aaliye. 11 Morretso twotiyal wee k’irosh betsit fayo tiats betsit morro finere wotiyal woruna eraatse, ernmó bo s’amiyan k’awuntsalka wotiyalmó konuwor bosh taan beshide’er imo falratse, taa Rom nugúsosh taash s’iilewe etaat t’intsree.»

12 Manoor Fist’os bín izfwotsnton keewedek’t «Romko nugúso taash s’iile etri wotiyal nugúsok ametunee» bí eti.

P’awlos Agrip’nat bernik’e shinats bt’intsok’o

13 Muk' aawwotsiyere hakon Nogúso Agrip’nat Bernik’e Fist’ossh «Dan jeenon waarne» etosh K’isari maants boweyi. 14 Manoknowere ay aawosh beyat boteshtsosh Fist’os P’awlos jango hank’o ett Nuguso Agrip’sh b́ keewi, «Filks tipk’rat k’az b́k’rts ash iko hanoke fa’e b́teshi, 15 Taa Iyerusalemitse tteshor kahni naashuwotsnat Ayhudi eenashuwotsn ashaan bos’amiye hakon bíats t angshituwok’o boaati. 16 Taamó ‹Ash iko bín s’amiruwots shinats t’inr bín bos’amirumansh b́keewude’aniyere s’amiyetsman beshide’er imo Rom datsatsi ashuwots neemaliye› etaat boosh tiaanyi. 17 Mansh ashaan s’amiruwots ko’eyat hanok bowatsok’on ja’araniyere yaatsok’on angshi jorats bedek’at P’awlosi t shinats bot’intsituwok’o ti azazi, 18 Bín s’aamirwots keewosh b́ganok need' bodek’tsok’on bí gond fino finere ett tgawtsok’o bín s’amiyosh betsit keew eegonoru bíats t’intsratsne. 19 Ernmó bínton bomooshiru moosho bo haymanoti jangonat k’irt teshtso P’awlos ‹Kashetsiye› bí etiruwo Iyesus jange. 20 Taawere hannaari keewo s’ilosh taan b́kic’ire P’awlosi ‹Iyerusalem maants amr bíyoke keewan jango angsho daatso shunfiya?› tieti. 21 Bímó bí jango Rom nugúsoke bísh s’ileyish geeyat nugúsok taash s’iilewe bíettsosh manok tdaamifetsosh tipi moots b́teshetuwok’o tiazazi.»

22 Agrip’were Fist’ossh «Taawor ashaan b́keewufere k’ebo geefe» bí eti. Fist’osuwere «Yaats bín k’ebetunee» bíet.

23 Mansh yatsok’on Agrip’nat Bernik’e bo naashi taho tahdek’t een baatson wotdek’t kes’iruwotsatse naashuwotsnat kit kitotsi een een ashuwotsn deneyat waat angshi maa eenots bokindi, maniyere hakon Fist’os P’awlosi b́ s’eegiyi. 24 Hank’owere bíeti, «Nugúso Agrip’o! Itwere noonton fa’a ash jametsuwotso! ayhudiwots ‹Ashaan haniyere hakon kashon beyo bísh geyiratse› ett kuhefetst Iyerusalemitse, hanoknowere ti angshituwok’o taan boaattso it bek’iru ashaaniye. 25 Taayere bíyatse k’irosh bín betsit gond fino daatsratse, bí Rom naashi naashosh ‹t jango taash s’iilewe› bíettsotse hanok woshosh t k’ut’i. 26 Wotowa eree b́jangosh t doonzsh tguut’etwo daneets keewo deshatse, mansha s’ileyakon tguut’etuwo tdaatsituwok’owa etaat it shinats bítsnor iki Nugúso Agrip’o! nshinaats t’intsree. 27 Tipetso danbaan dameeyor bí s’amiyets jango kits k’azo dartsi araatniye taash b́be’eyi.»