Atos 12

Krstiyaniwotsats bodts een gishewo

1 Man dúr nuguso Herodis Ik’i maa ash ik ikuwotsi gisho dek' b́tuwi, 2 Yohans eshuwi Yak’obi shikon b́ úd’iyi. 3 Keewu manuwere ayhudiwotsi b́ geneeúshtsok’o b́bek’tsok’on P’et’rosi ando aani detsi b́k’ri, man b́wotuwere ayhudiwots tush meyi baaliyo bomangif aawwotsitsna b́tesh. 4 ✝12:4 Kesh. 12:1-2 P’et’rosi b́detsiyehakon tipi moots kindshb́k’ri, ayhudiwots Fazigi baaliyoniye hakon ash ashuwotsok b́ t’intsfetso kes' kes’fwots awd awdon bokotetuwok’o awd jirwotssh imb́k’ri. 5 Mann P’et’ros tipi mootse detseyatni b́ kotefoni, ernmó Ik’i moowu b́ jangosh Ik’o maants kup’idek’atni b k’onfoni.

Ik’i melakiyo tipi mootse P’et’rosi b́bitstsok’o

6 Yaats guurok’on Herodis P’t’rosi ash ashosh t’intso gawudek’tni b́tesh, t’úmanots P’et’ros Habliyion tipeyat kes' kes’f giti dagotsa b́k’eyiri b́tesh, k’osh wotaderwotsuwere wee maa fengeshoni bokotiri. 7 Manoor doonzo melkiyo bíats be’eyat, tipi moots c’eesho shaano gol b́wutsi, melakiwonwere P’etros lalk’o t’awit tuzt «Káári tuuwe!» bíeti, habiliyonu b́ kishotsere fed’b́gutsi. 8 Melakiyonu «Ntaho tahade’er! nc’amono gerde’e!» bí eti. P’et’rosuwere azazetsok’o b́ k’ali, melakiyonu «N nat’alo tahader tshuutso wowe!» bí eti. 9 P’et’ros waat b́ shuutso b́tuwi, bek’a b́ bek’iri bísh bíari bako melakiyo b́ k’alts jamo ar areratse. 10 Iknonat gitl koteyiruwokere beshat kitootsan damiru biri is’ok bobodi. Is’onuwere asho b́ t’awirawo hank’on bíaal k’esheb́gutsere kesht ik weridon beshat k’az boami, b́ gawurawo melakiyo P’t’rosatse k’aleyat bíami.

11 P’et’rosu b́ atso dant, «Doonzo b́ melakiyo woshat Herodis kishotsnat Ayhudi ashuwots bo kotiru keewu jamotse taan b́ kashitsok’o and taa arikon danre!» bí eti.

12 Man dan b́k’rihakon ay ashuwots ikok kakuwedek’t Ik’o bok’oniruwok Mariyam mook bíam, Mariyam manuwere Mark’osi eteetso Yohans indi btesh. 13 P’et’ros manok bodt úriweertso fengesho b́k’oftsok’oon Rodayi eteets gon iku koni b́wottsok’o danosh fengeshomants bweyi. 14 P’et’ros k’aar b́wottsok’o danbk’rtsok’on b gene’úwi aytsatse tuwtson fengesho b k’eshrawon wos’aat gitsomaand kindat «P’et’ros fengeshatse b́need’iri!» etaat b keewi. 15 Bowere «Geeniya nwutsi!» bo eti. Bimó «Arikon bíne!» arikon bín bek’re etaat bkeewi, boowere bere «Bín kotiru melakiye b́wotiti» boeti.

16 P’et’rosmó maa fengsho k’ofo ned’iratse, boowere fengesho k’eshdek’t bos’iloor bo’adi. 17 Bímó s’k boetetuwok’o b́kishon kitst doonzo awuk’o k’aldek’t tipi mootse bín b́kishtsok’o boosh keewut «Keewan Yak’obnat oorts amantsuwotssho keewwere» bíet. Boatse k’aleyat k’osh beyok k’az bími.

18 B́gatstsok’onowere kes' kes’fwots «P’et’rosats eege b́woti k’úna?» ett ayidek’t kic’bowutsi. 19 Herodisuwere b́weeron P’et’rosi geyit b́t’ut’tsok’on fengesh kotiruwotsi b́ maramariyakon boon úd’etuwok’o bíazazi, maniyere hakon Herodis Yhud datsatse tuut K’isariyi maants amt manoke beeb́wutsi.

Herodis k’ir k’iro

20 Herodis T’irosnat Sidon dats ashuwotsats ayidek’t fayatni b́tesh, boowere ikwotdek’t waat, Nugúsok karnts guutso Blast’osi bonton b́tep’ish k’ondek’t eeki bodek’iyakon Nugúso manosh bo aati, man bok’aluwere bodatsuu misho bdaatsfo Nugúso datsatse b́ teshtsosha.

21 Detsets aawmanots Herodis b́ naashi taho kardek’t naashi jorats be’dek’t ash ashosh keewo b́keewi. 22 Ash ashonwere «Hanuwo Izar Izewer k’aara bako ash k’aaraliye!» ett bokuhi. 23 Herodis Ik’osh mango b́ imaawo b́ oortsotse manoor doonzo melakiyo togb́k’rere shipro gedt b́k’iri.

24 Ik' aap’onmo aawu aawon eenfetst gawunfera bíamfo. 25 Bernabasnat Sa’oln boamts fino isht Iyerusalemitsere Ans’oki datsomand k’azboaan, Mark’osi eteetso Yohansnowere bonton dek’t boweyi.