Atos 17

Teselonk’eyitse P’awlosnat Silasnats waats kic’o

1 P’awlosnat Silasn Anfip’olisnat Ap’olon weeron beshat Teselonk’e maants boami, manoknowere ayhudiwots Ik' k’oni moo fa’ee b́teshi. 2 P’awlos maniyere shin b́ k’alfok’o ayhudiwots Ik' k’oni moots b́ kindi, keez gawuyiwoshowere b́k’ut’raawon S’ayin mas’aafotse ash ashosh kish kitsfetstni b́ danifo. 3 Krstos gond bek’o de’er k’irotse tuwo bín b́geyituwok’o kitsit danifetst «Taa itsh b́ jangosh doo tshishyiru Iyesus Krstosiye» bíetfera b́tesh. 4 Mann boyitse ik ikuwots b́ aap’o t’iwintsdek’t P’awlosnat Silasnton ikbowoti, mank’owere Ik' Ik’iruwotswere aydek’t ayts Ik’i ash woterawwots, kitutse daneets ay máátsuwots b́ aap’o t’iwintsdek’t bínton ik bowoti.

5 Ayhudiwotsmó okoort fay tizitu fin deshawwotsi weer weeratse kakudek’t tuuz bok’ri. Kitutse fayo b́tuwitwok’o bo woshi, P’awlosnat Silasn kishde’er ash ashosh imosh Iyason moo guurbodeki. 6 Ernmó boon bo t’ut’tsok’oon Iyasonnat amants ik ikuwotsi kitmanitsi naashuwotssh t’intsosh geetsfere dek’t boami, hank’o etfetst bokuhiri boteshi, «Hanots datsjamo gaak rne ando hanok waarnee! 7 Iyasonwere boon dek’t ibiree, ‹Iyesusi eteets k’osh nugúso fa’ee› ett Rom Naashi Naasho alo bok’efiri.» 8 Ash ashonat kitutsi naash naashuwots man boshishtsok’on dimbr bowutsi 9 Iyasonnat k’oshuwotsn wusho s’eegiyit fakshbokri.

P’awlosnat Silasn Beriyitse

10 Eshu eshuwots P’awlosnat Silasn káári t’úwon Bery maants bo amtuwok’o bowoshi, Manok bo bodtsok’on ayhudiyots Ik' k’oni moots bokindi. 11 Beriyan fa’a ayhudiyots Teselonk’en fa’wotsiyere bogo kááwu finek boteshtsotse b́ aap’o gene’úwi eenon bodek’i, b́ aap’o ar b́ wotok’o kitsosh aawu aawon S’ayn mas’afotsi bos’ilfoni. 12 Mansh boyitsere ayuwots boamani, ay Grik datsatsi gaaletswots máátswots ay Grik datsatsi nungushuwots boamani. 13 Ernmó Teselok’en fa’a ayhudiyots P’awlos Beriyon Ik’i keewuts keewo b́ nabiruwok’o bodantsok’on manoor waat ashuwotsi gondon tizt bowaac’rituwok’o botizi. 14 Manoor eshu eshuwots káári P’awlos aats k’ari ganok b́ ametuwok’o bowoshi Silasnat T’imotiyosnmó manoke Beriyon bo oori. 15 P’awlosi deents ashuwots Ateni bobetsi «Silasnat T’imotoyosn ja’araniye káári tiyok woonee» etiru P’awlos tzaziyo detsdek’t Beriyo maants boaani.

P’awlos Atenitse

16 P’awlos Atenon wotdek’t Silasnat T’imotiyosn b́ kotfere kitutsere dozets ik’uwots bos’entsok’o b́bek’tsotse ayidek’t nibo b́k’uni. 17 Mansh ayhudiyots Ik' k’oni mootse ayhudiyotsnat Ik’osh Ik’iru ashuwotsnton jebatse aawu aawon b́ daatsiru ashuwotsnton b́mooshiri b́tehi. 18 Epikorosotsnat Istokotsi eteets bog danetuwots b́ maants waatni bomooshfoni. Ik ikuwots «Ooshiyiruwan eeg etee b́geyi?» bo etor, k’oshuwotsmó «Handr ik’uwots janga arefee b́ keewiri? boetiri, man boetiruwere P’awlos Iyesusnat k’irotse b́tuwi doo shishi keewi jango b́ danitsoshe. 19 Mansh P’awlosi detsdek’t Ariyosfagosi eteets beyokoke kakuwets ash ashok dek’wat bísh hank’o boeti, Nee ndaniyiru handr danan eeg b́wottsok’o dano falituwonowáá? 20 Ib wotts ik ik keewwotsi noosh shiyirnee, mansh keewanots eeg bowottsok’o dano geefone.» 21 Man etts Atenitse beyirwotsnat Atenitse beyiru úridatsi ash jamwots handr keewu keewonat k’eboke bogizeyo beshiyo boshunfotsne.

22 Manoor P’awlos Aryosfagosn kakweetswots shinatse need’dek’t hank’o bíet, «Ateen ashuwotso! jam weeron ayidek’at ik’uwotsi shatiru itwottsok’o t’iwintsdek’at dandek’re, 23 It kitotse gúúrat ananat it Ik' it ik’irwoko t s’iile ‹Danerawo Izar Izeweri› ett guut’etsoko wosh biyatse t’intseyiru t’arap’ezo daatsre, eshe taa and itsh t keewir it danawo bín it ik’iruwo Izar Izewer jangoniye. 24 Bíye Datsonat datsatse fa’a jamo aztsoniyee, Daronat datsonsh doonze, bíye ash kishon ageets Ik’i moots beerake, 25 ✝17:24-25 1 Naash. 8:27; Isa. 42:5 Kashonat kash jongon, k’osh keewwotsnowere ash jamosh imfo bí b́wottsotse bísh eegor shaprake, asho bín b́ tep’onowere bísh geyiratse. 26 Bíye ash naar jamone ik ashaatse azree, dats jamatsnowere bo beetuwok’o woshre, tiitsets duruwotsnat beyokuwotsnowere boosh b́ beezi. 27 Man b́ k’aluwere ashuwots doonzo geeyar daatso bofalituwok’owe, b́wotiyalor bí no ik iketsatse woka etaliye.

28 ‹Kasho daatsir nogiwit,

Noo beetuwere bíne,›

Manuwere itk wotts jááwetswots

‹Noo noúnets b́ nana' noone› bo ettsok’onee.

29 Eshe noo b́ nana’a nowotiyakon ‹Ik’o ash danon, hasabiyon awntson wee ambaron wee shútson dozets aroniye bíari› err gawo noosh geyiratse. 30 Eshe ashuwots yoots dúr dáron bok’altso Ik’o kabiraniyere k’az beshere, andomó dats datsatse fa’a ash jamwots naandrone boetetuwok’o azazere, 31 Bí b́marat’ts asho weeron dats jamatse arikon b́angshit aawo beezdek’re, hanowere jametsosh daniyidek’t b́bek’sh b́marat’ts ashman k’irotse b́tuztsotsnee.»

32 «K’irotse tuuwa» etiru aap’o boshishtsok’on ik ikuwots bín boaatsni, k’oshuwotsmó «Han jango k’osh aawots nkeewure k’ebetuwonee» boeti. 33 Maniyere hakon P’awlos kakuwets ashuwotsoke kesht k’az bíami, 34 Ash ik ikuwotsmó bínton ik wotat boamani, amants ashuwotsitsnowere Aryosfagosn kakuwetsuwotsitso Diyonasyosi eteets ashonat Demarisi eteets mááts ikunu, k’oshuwotswere boyitse fa’ano.