Atos 24

Ayhudiwots P’awlosi bo s’aamitsok’o

1 Úúts aawoniyere il kahni naasho Hanani eenash ikikuwotsnat T’ert’elusi eteef Nemo sheengshdek' dantsonton K’isari maants bíami, boowere dats k’eeziruwo Filiksok t’int P’awlosi bo s’aami, 2 P’awlosi s’eegdek’t t’intsetsok’on T’ert’elus hank’o eton s’aamiyo dek’t b́tuwi.

«Shiimetso Filikso! niyatse tuwtson ay jeeno daatsrone, n sheeng k’eezonowere noashosh sheeng wonewo daatsere, 3 Ayidek’at mangtso Filikso n k’alts sheeng keewan jamoke jam weeron een údone nodek’iri. 4 Andmó t ja’irawo k’awunon neesh t keewit keewo n doon noon nk’ebetuwok’o neen k’oniruwe, 5 Ashaan noosh gondshoodo wotwutsere, datsatse fa’a Ayhudi jamwotsats dimbiro b́tuuziri, noimnetiyatse k’aldek’ets naazrawiwotsi eteefwotsshowere boon jishirwooniye. 6-8 Ik' moonowere kimshosh bíetfere bín nodetsi, bíyats not’intsts s’aami jaman ar b́ wottsok’o nee ntookon bín aatr dano falitune.» ik ik bitsuwotsitsere han boyits dabfno [No nemok’on bíyats angsheyish gawurone b́teshi, Ernmó gin jishiruwo Lusyos waat angnon nookishotse fos’dek’t bíami, bín s’aamirwotsu níyok boweetwok’o bíazazi] 9 Ayhudiyots «Jam keewan aree» Etfetst s’amiyosh ik wotbowtsi.

P’awlos Filiks shinatse keewdek’t aani b́dek’tsok’o

10 Dats k’eeziruwo Filiks b́kishon kolat P’awlos b́ keewitwok’owa bíeti, P’awlos hank’o ett bíaaniy.

«Ay dúrosh datsan keewutso nwoto tdantsosh taan s’amiyets keewosh aani tdek’etuwok’o nshinaats tt’intsor ayidek’at geneeúwefetsatniye, 11 Ik' k’onosh Iyerusalem maants ti’amron tatse git aawoniyere b́bowok’o nee ntookon danofalfnee, 12 Ik’i mootse wotowa ayhudiwots Ik' k’oni mootse wee kitotse kontonuwor t mooshfere wee asho dimbirosh ttuuzfere taan daatsratsne, 13 And tiats bot’intsts s’amiyosh gawo b́jamon neesh t’intsosh falratsne. 14 Ernmó han neesh kish kitso shunfee, bo kooti dana bo etiru imnetiyi kayo no nihotsko Izar Izeweri Ik’irwe, Muse nemonat Nebiyiwots mas’aafotse guut’ets jamo amanirwe. 15 Bowere bojangirwok’o taawor kaawwotsnat morretsuwots k’irotse botuwitwok’o Ik’on jangirwe. 16 Mansha Ik’onat ash shinatse nib s’ayino tdetsetuk’o jamaawo kup’irwe.

17 «Iyerusalemitsnowere tkeshiyak ay natuwots bobeshiyakon t jirwotssh tep’wotit gizonat Ik’osh imet mebi gizo dek’at tweyi. 18 ✝24:17-18 Wosh. 21:17-28 Ik’o mootsnowere taan daatstsuwots man tk’alfere, manoori gizeyonuwere s’ayini fino fin tk’rtsok’one, taantonuwere ay asho aaliye b́teshi, dimbironwere tuuratse. 19 Ernmó Isiyon waats ayhudiwots manoke fa’ane boteshi, bo taan bos’aamit keewo detsfno wotiyal nshinaats t’inr keewune. 20 Haniyakonowere moosh mooshiyiruwots shinats tt’iinoor t t’afitso fa’ewotiyal t’ints ashaanots keewune. 21 ✝24:21 Wosh. 23:6 Arikon bo taalotse need’dek’at ‹K’irtsuwots tuwo fa’e tiettsosh hambets angshosh it shinats t’inre› etaat een k’aaron keewure, haniyere okoon k’osho tk’alts keewo aaliye.»

22 Filiksmó Krstiyani imnetiyi jango sheengshdek’t b́dantsotse «Kes' azazefo Lusyos b́waatsok’on itjangosh angshituwe» ett boon deenb́k’ri. 23 P’awlosi kotiru bali naashoshowere «Ayide b́ kic’irawonat b́ jaguwotswere bish k’alo bogetso baziyerawon b́kotetuwok’wa» bí eti.

P’awlos Fliknat Drusila shinats b́t’intsok’o

24 Muk' aawwotsiyere hakon Filkis Dursili eteets b́mááts ayhudiyunton b́weyi, P’awlosnowere s’egiydek’t Iyesus Krstos shútson amani jango b́keewufere b́shshi. 25 P’awlos kááwu woti jangonat took kewdek’i jango weet angshonowere b́keewor Filiks shatt «And k’ayamee, taash b́k’anoor k’osh aawots neen s’eegituwe» bí eti. 26 Filiks P’awlosoke gubo dek’osh jangitniye b́tesh, mansh ayoto P’awlosi s’eegiyir b́keewifoni.

27 Git natoniyere okoon P’ork’iyos Fist’os Filikis shegro b́beyok b́beeyi, Filiks ayhudiwotsi geneúshosh geeyat P’awlosi b́ tipetsok’on k’azb́k’ri.