1 P’et’rosnat Yohansn ash ashosh keewoke bobefere kahniwotsnat Ik’i maa kotfuwotsatsi naashosh aaninuwere Seduk’awiwots bomaants waat 2 Wosheets gitetsúwots Iyesus k’irotse b́ tuwo ash ashosh bodanitsonat k’irtsuwots k’irotse botwitwok’owo kish bokeewutsotse bofayi. 3 Mansh boon dets bodek’iyakon datso ilat b́teshtsotse yaatsish b́ borfetsosh tipimoots boteshetuwk’o bok’ali. 4 Ernmó bokeewuts keewo k’ebts ashuwotsitse ayuwots amanerno, amants ashuwots taawonwere úts kumo maants dambaan b́ t’iini.

5 Yaats guurok’on Ayhudi naashuwotsnat eenashuwotsn, Muse nemo danifwotswere Iyerusalemits kakuwe bowutsi. 6 Kahniwots naasho Hananat K’eyafn, Yohansnat Indriyasn, Kahni maa naashwotsatsi k’aabo jag jamwots fa’ano, 7 Bowere wosheets gitetsuwotsi botaalotse need’idek’t, «Han it k’al eegi angoneyamó kon shútsoneya?» ett boon boaati.

8 Manoor P’et’ros S’ayin shayiron s’eent hank’o ett boosh bíaaniy, «It ash ashaatse naashtswotsonat eenashwotso! 9 Noo hambets no aateyirwo ash dúr ikosh k’aleets sheeng keewonat awuk’on b́ kashtsok’oniyee. 10 Ashaan kashat it shinatse b́ need’ir, it it jiire Ik’onmó k’irotse b́ tuuztso Nazrettso Iyesus Krstos shútson b́ wottsok’o it únetsnat Israe’el ash jamo dane. 11 ✝ It gimbi agfwots gac’at it juuts shútso bí nee, ernmó bí gimbiman tungúshatse shútswotsi kaatsde detset shúts eeno wotere. 12 Mansha kasho bína bako k’oshon konnor aaliye, noo bín nokashish geyitso Ik’o ashuwotssh b́ imts shútso bíyere okoon dats jamatse konwor aaliye.»

13 P’et’rosnat Yohansn aawshuk’on bokeewtsok’o moosh mooshiyruwots bos’iltsok’on danaawonat daneraw ash bowoto bo dantsotse bo’adi, Iyesusntonwere bo teshtsok’o danbodek’i. 14 Kashts ashonwere bonton b́ned’efere bo bek’tsosh boatsats bokeewituwo bot’ut’i. 15 Mansha moosh mooshifwotsoke úromaants bokeshetwok’o azazat muk’i boteshiyakon hank’o ett boshiyeyi. 16 «Eshe ashaanotsatse eeg k’aluwono? Adits keewi enan bo kishon b́ fiinetsotse Iyerusalemitse beyiru jamwotsoke danere, mansh keewan haalo falatsonee. 17 Ernmó ash jamoke ayefere bíamawok’o hanyahak Iyesus shúútso s’eer konshor bo keewurawok’o ‹it atso korde’ere› erone.»

18 Manihak s’eegdek’t Iyesus shúútso s’eer b́ jamon bodanirawok' kup’idek’t boon boazazi. 19 P’et’rosnat Yohansnmó hank’o et boosh boaaniyi, «Ik’osh aleyoniyere itsh aleyo Ik’i shinatse wotituwaa? Aab it it tookonor angshwere. 20 Nooyere nobek’tsonat noshishtson keewo fal k’ayatsone.» 21 Ash ashuwotsatsi naashwotsnat moosh mooshifwots P’et’rosnat Yohansn awuk’on bo fayitwok’o weero t’ut’t, ashuwots boshattsotse aaniy sheefat faksh bok’ri, man bok’aluwere ashuwots wotts keewumantse tuutso Ik’o bo udtsosha b́tesh. 22 Adits keewann kashts ashman bí idmeyo hab natoniyere bogka b́ tesh.

23 P’et’rosnat Yohansn faksh k’rere bo toohuwotsok boaantsok’on kahniwotsatse naashuwotsnat eenashuwotsn boosh boetts jamo bokeewi. 24 ✝ Bowre man boshishtsok’on, ik wotdek’t bok’aaro eenshdek’t Ik’o maants hank’o ett bokuhi, «Daro, datso, aatsk’aro, boyitse fa’a jamo aztso Doonz eenono! 25 S’ayin shayiron n guutso no nihi Dawit noonon hank’o etaat keewtso neene,

‹Ik' ash woterawwots eegishe bo shashiri?

Ashuwots eegishe gond finosh datsmec’ron bo k’úmiri?

26 ✝ Datsatsi naashwots matseedekt,

Dats k’ezirwots ik wotdek’t ko’edek’t,

Doonzonat b́ Mesihiyo ats bo tuwi.›

27 ✝ «Aron Hirodisnat P’ent’os datsatsi asho P’ilat’os Ik' ash woterawwotsnat Israe’el ashuwotsn kitots ko’edek’t nfuuttso S’ayin guutso Iyesus ats botuwi, 28 Hank’o b́ wotiye nee shino niangonat ntook shunon n beezts fino s’eetsoshe, 29 Doonzono!, andoor bo sheefirwan s’iile, n guutsuwots bosharaniye aawo shu’ude n aap’o bokewituwok’o woshuwe, 30 N guuts S’ayino Iyesus shútson shodtswots bo kashitwok’onat adits, een een keewwots bo wotitwok’o n kisho jargwe.»

31 Ik' k’ono bo ishiyakon ko’edek’t bo beyiruwok man shek’e b́wutsi, jamwotswere shayiri S’ayinon s’een bowutsi, Ik’i aap’onwre ááwu shuk’on keewo dek’t botuwi.

32 ✝ Amants jamwots ik nibonat ik maac’on detsfno bo tesh, konuworu ash iko, «Haniye tikee» bí eteet keewo deshatse b́ tesh, bo dagotsere jam keewo bo jamets shira b́ teshi, 33 Woshetswotswere Doonzo Iyesus k’irotse tuwi jango angi eenona bogawefo, jametswotsatsno Ik' s’aati eeno fa’e b́tesh. 34 Datso wee moowo detsts jamwotswere kem dek’t b́ gizman dek’t boweyiruwotse boyitse konworu t’ut’tso aali b́ tesh. 35 Gizmano dek’wat woshetswotssh im bok’refoni. Bo ik iketssh boosh b́ geyitsok’owa kay bodek’foni.

36 K’op’rsn shuwetso, Yosefi eteetso Lewawi iko fa’e b́ teshi, wosheetswotsu «Barnabasi» ett bo s’eegfoni, b́ bitsonuwere «Kup’shit na’a» etee. 37 Bíwere b́ datso kemt b́ gizo dek’wat woshetswotssh b́ imi.