Atos 7

Ist’fanos keewuts keewo

1 Kahniwotsatsi naasho Ist’fanossh, «Eteets keewan arikeya?» eton bíaati.

2 Ist’fanosuwere hank’o ett bísh bíaniyi, «Ti eeshuwotsnat tnihotso! aab taan k’ewere! Nonih Abraham Karan datsatse beyosh bíamfetsre shino shin Mesp’et’omiya eteets datsatse b́ befere Mangts Ik’o bísh be’eyat 3 ✝7:2-3 Aze. 12:1 ‹N datsatse keer, n jagatse k’alyarr, taa neesh t kitsit datsats amee› bí eti. 4 ✝7:4 Aze. 11:31; 12:4 Manoor Keledawiyots datsatse kesht Karani eteets datsats be b́wtsi, b́ nih b́k’irihakonowere Ik’o Karanitse kisht hambets it beyiru datsanats bín dek’et b́weyi. 5 Wotowabako dab tufi need’okok’o bodts rstiyo bísh imatse, b́wotefere datsani bínat bíyere il b́ naarosh rstiyo woshde’er b́imetuwok’o taarre b́teshi, bísh b́taaruwere Abraham na’o b́ detsfetsere shine. 6 ✝7:6-7 Aze. 15:13-14 B́ naaronuwere ash datsatse gooshtsi wotar b́beetuwok’o datsmanatsnowere awd bal natosh guuts woshde’er was’o kayde’er boon bokewituwok’o bísh keewure b́ teshi. 7 ✝7:7 Kesh. 3:12 Manats dabtnwere, ‹Guuts woshde’er b́ keewit ashuwotsats angshitwe, datsmanatse keer hanoke taan ik’itúne› ett Ik’o keewre. 8 ✝7:8 Aze. 17:10-14; 21:2-4; 25:26; 29:31-35; 18 Gof ami taaronowere bísh bími, mansha Abraham Yishak’i b́shuwor shimtl aawots gofo b́daamiyi, Mank’o b́ naayi Yisak’i gofo b́daamiyi. Yak’obuwere b́ jir tatse gitetsuwotsi gofo b́damyi.

9 «Yak’ob nanaúwots bo eshuwi Yosefi okoort Gbs' datsatsere guutso b́ wotituwok’o bokemi, Ik’onmó bíntoniye b́ teshi, 10 ✝7:9 Aze. 37:11, 28; 39:2, 21 Gond bek' jamotse bín b́ kishi, Gbs' naasho Fer’on shinatsere baatsonat danitelefo bísh bi’imi. Naashonuwere Gbs’nat b́ maa jamatse alituwo bín b́woshi. 11 ✝7:11 Aze. 42:1-2 Manór Gbs’nat Kene’an dats jamatse ayidek’t ash kic’its k’ak’i eeno b́ woti, no nihuwotsuwere misho daatsosh falatsne. 12 Ya’ak’obwere Gbs’itse mááyo b́ beyok’owo b́ shishtsok’on tuwreerosh nonihotsi manok b́ woshi. 13 ✝7:13 Aze. 45:1; 16 Aani gitlo aanat Gbs’i bo amor Yosef b́ eshuotsesh b́ tooko b́ daneyi, jag bowotonúwere Fere’onokere b́ daneyi. 14 ✝7:14 Aze. 45:9-10, 17-18; 46:27 Maniye hakon Yosef b́ nihi, Yak’obnat b́ jag jamo b́mandan dek’t b́weyi, bo bojametsuwre shabe úts ashno. 15 Mansh Yak’ob Gbs' maantsan bí ami, bínat no nihwotsn manoke bok’iri. 16 ✝7:16 Aze. 23:3-16; 33:19; 50:7-13; 24:32 Bomak’tsonowere Sekem maantsan dek’amt Abraham Sekemn Emor nan’úwotsoke b́ gizon b́keewts doowots dukeyi. 17 Ik’o Abrahamsh taart b́ jangitso wotit aawo b́ t’inor Gbs’n beyiru ashuwots taawo ayefere bí ami. 18 ✝7:17-18 Kesh. 1:7-8 Man b́ wotwere Yosefi danawo k’osh Nugúso Gbs’n b́ naashefetsoniye. 19 ✝7:19 Kesh. 1:10-11; 22 Handr naash manuwere no ashuwotsats gondo k’úmt no nihwotsats kic’iyo dek’t bo tuwi, bo nana’i marmat’uwotsno bok’irituwok’o úratse kishde’er bo juwituwok’o, no nihuwotsi bokic’iyi. 20 ✝7:20 Kesh. 2:2 Manór Muse b́ shuweyi, bíwere Ik’i shinatse na’i az sheenge b́teshi, keez shashonowre b́nihi meyitse b́ eeni, 21 ✝7:21 Kesh. 2:3-10 Uratso juu k’irewor Fereon mááts naú k’audekat b́ naayik’o woshdek’at b ditsi. 22 Musewwere Gbs' datsi dani teleef jamo danb́dek’i, b́ keewiru keewonat b́ finonowere kup' wotb́wtsi.

23 ✝ 7:23 Kesh. 2:11-15 «Muse hab nato b́ s’eentsok’on bí eshuwotsi Israe’el nana’úwotsi s’iilo b́ tuwi. 24 Bí eshuwotsitse ikonuwere Gbs' dats ash ikon t’uk’eyat was’o b́kashefere bek’t bísh b́ gatsi, t’uk’eetsmanshowere weero weersht Gbs' dats asho togdek’t b́úd’i. 25 Ik’o b́ weeron boon b́ fakshiyituwok’o b́ jaguwots t’iwints bodek’etuwok’owa bísh araatni b́ tesh, bomó t’iwintsratsno. 26 Yaats guurok’onowere Israe’el ash gitetsuwots bo atsatseyo bo fayefere daatsdek’t bonbaziyo geeyat ‹It ashuwtso! itwo eshu itnere, eegishe itfayeyiri?› bíet. 27 B́ tooho togiru ashman Museyi okaan gifnit ‹Neenmó noon alituwonat noatse angshituwo kone nee wosh? 28 Oots Gbs' dats asho núd’tsok’o taanowere úd’osh geefiya?› bíet. 29 ✝7:29 Kesh. 18:3-4 Muse man b́shishtsok’on Gbs’itse kesht Midiyam datsomants amt gooshtsi wotat b́beeyi, Manoke nungush nana’a gituwotsi b́shuwi.

30 «Muse datsmanatse hab nato b́beshiyakon Debre Sin woruwotse aat’iru t’ugi atatsi tawi laluwotse melaki iko b́be’eyi. 31 Muse man b́bek’tsok’on bíadi, karndek’t b́s’iilorowere hank’o etiru Doonzo k’aro b́shishi, 32 ‹Taahe nnihotsko Izar Izewer taane, Abarhamko Izar Izewer, Yisahak’ko Izar Izewer, Yak’obko Izar Izewer taane,› Muse were shatoon k’ewub́wutsi, s’iloshowere aawo shu’atse. 33 Doonzonuwere hank’o b́ eti, ‹N ned’iruwok man S’ayin datso b́ wottsotse n tufitsi c’aamo kishuwe, 34 ✝7:30-34 Kesh. 2:14 Gbs’itse fa’a ti ashuwots weralo gond bo bek’iruwok’o bek’re, kic’at bo kuhirwono shishre, mansh boon kashiyosh oot’re, andoor wowe! taa neen Gbs’its woshona.›

35 «Israe’el ashuwotsu Musesh ‹Neen noats altsonat angshituwon woshtso kone?› Eton bín k’efatni botesh, wotowa boko t’ugi atatse bísh be’ets melakiyo jangon alituwonat nas' kishituwon woshdek’t bomandan bín b́ woshi. 36 ✝7:36 Kesh. 7:5; 14:21; Taaw. 14:33 Gbs’nat Aats k’ar birokere aditsonat milikito finat bí ashuwotsi kish dek’t hab natosh dats woruwtse jishtso Museyiye b́ teshi. 37 ‹Doonzo Izar Izewer taan b́ tiztsok’o mank’o it eshuwotsitse nebiyiyo itsh tuuzitwe› ett Isra’el ashuwots keewutso Museyiye b́teshi. 38 ✝7:38 Kesh. 19:1—20:17; Iwi. 5:1-33 Woruwotse kakuwedek’t teshts ashuwotsntonat Sin guri abaatse keewuts Ik’i melakiyonton animank’o no nihotsnton teshtso bíne. Ik’o keewuts kash imetu aap’o noosh beshitsonuwere un bíne Museyiye.

39 «No nihots bína bok’efibako bísh aleratsnee, Bonibotsnowere Gbs' maants aano bo gawi. 40 ✝7:40 Kesh. 32:1 Aronshowere ‹Noon Gbs’itse kishts Muse han eeg bíyats bodtsok’o no danawotse noshin shinatse sha’arr noon jishituwo Izar izewerotsi noosh doozwe› bo eti. 41 ✝7:41 Kesh. 32:2-6 Manór manz aron dozets Ik’o doozdek’t bísh wosho bo t’intsi, bokishi finonowere bogenee’úwi. 42 Ik’onmó boatse k’aleniye b́wutsi. Daritsi k’eenwotssh bo ik’ituwok’o boon beshidek’t bími. Manwere Nebiywotsn hank’o ett guut’etsok’one,

‹It Israe’el ashuwotso!

Shúkeets gizonat woshon

Hab nati s’eenosh woruwotse it t’ints tasheya?

43 ✝ 7:42-43 Amo. 5:25-27 Dek’at it amtso Molok gofonat

Refani eteef k’enon it arits it ik’oniye b́ teshi,

Bowere it kishon findek’at,

It boosh it boosh sagadat it teshts ik’irwotsiye,

Taawere Babloniye ok it gishetuwok’o woshituwe.›

44 ✝ 7:44 Kesh. 25:9; 40 «No nihots woruwotse gawi gofu detsfne b́ teshi, gofmanuwere Ik’o b́ keewutsok’onat b́ kitstsok’o bin fintso Museyiye b́ teshi. 45 Ik’o boshinatse b́ gishts Ik' ash Woteraw ashuwots datso bo nator no nihots bodek’ts gofani Iyasunton manok bo kindshi, Dawit dúro b́ borfetsosh manoke b beyi. 46 ✝7:46 2 Sam. 7:1-16; 1 Zen. 17:1-14 Dawituwere Ik' shinatse baatso daatst Yak’ob Ik’o Izar Izewersh k’ewok wotit moo agosh Ik’o b́ k’oni. 47 ✝7:47 1 Naash. 6:1-38; 2 Zen. 3:1-17 Ernmó Ik’í maa agtso Solomoniye.

48 «B́woteferor jam falts Ik’onmó ash kishon ageets moots beerake, manwere Nebiyon hank’o ett guut’etsoniye,

49 ✝ 7:49-50 Isa. 66:1-2 ‹Daro t be jooroniye,

Datsonuwere t tufi ned’oke,

Eshe ááwu naari mee taash it agetuwoni?›

‹Bíyok t kashituwokonu awuk’one?› Etfe Doonzoni.

50 ‹Jaman taa t kishon t finkoshna?› Bíeti Ik’oni.

51 «It wed’etswotso it nibo is’etswotso! it k’el kúp’uwotso! it nihuwotskok’o jam aawo S’ayin shayiro it k’efiri. 52 Nebíyiwotsitse it nihots bo gisherawo kone fa’oni? boowere kááw finetsman b́ weetuwok’o shin keewutswotsi boúd’i, It were and kááwu finetsan beshidek' imaat it úd’i. 53 It Ik’i melakiwots weeron Muse nemo dek’at it teshi, ernmó kotde’atste.»

Ist’ifanos shútson jot’eyat b́k’irtsok’o

54 Mooshiru jirwots han boshishtsok’on nibo k’únbowutsi, Ist’ifanosi fayat bí’ats gasho bo shas’i. 55 Ist’ifanosmó S’ayin shayiron s’eent daro maantsan kawudek’t s’iilt, Ik’i mango darotse b́bek’i, Iyesus noowere Ik' k’ani aaromadan b́ need’efere b́ bek’i, 56 Eshe «Hambe, daro k’eshe b́ gwutsere ash na’o Ik’i k’ani aaro maantsan b́ need’efere t bek’iri» bí eti. 57 Manoor bo k’aari eenon bo kuhi, bo waazono is’dekt ik wotdek’t b́ maantsan bowos’i. 58 Kitotsno kishdek’t shútson bo jot’i, gawuwotsuwre bo shemo dek’amt Sa’oli eteets jawets iko b́ kotetwok’o b́ tufi shirots ged bok’ri. 59 Shútson bín bo jot’fere, Ist’ifanos, «Doonzo Iyesuso! t kashu k’aaú de’e!» ett b́ k’oni. 60 Tuk’umaldek’t, «Doonzono! bo morran boats taawk’aye!» ett k’aari eenon kuhat man ettnuwere k’ir b́wutsi.